पेरीत 22 - सत मारग पर चलन वारो किताब

¹ पौलुस ना कहयो, “अगो भाउगीन अना बाप को बरौबर को नेक मानूस! मोरो बचाव मा अब मोला जोन कव्हनो से, ओला आयको।”

² वय असो आयके का, उ हमरो लक इबरानी बोली मा सांगासे अना उगो-मुगो भय गयो। तबा पौलुस ना कहीस।

³ मी यहुदि मानूस सेउ। किलकिया को तरसुस मा पैदा हुयो सेउ। अना ऐना सहर मा पलियो अना मोठो भयि सेउ। गमलीएल को पाय को जवर बसके आमरो पुरखा को विधान को अनुसार कड़ाई को संगा मोरी दिक्सा भयी से। परमेस्वर को पुढ़ा मि बड़ो धुन लगायो समरपित होतो। वसोच जसो तुमी आज सेव।

⁴ ऐना मारग को लोकगीन ला मिना लगत सतायो। मी ना मरदमाना अखीन आई-माई दुई ला बंदी बनायके जेलमा डाकके राखो होतो।

⁵ मुखिया याजक अना बुजरुक लोक को सभा खुदच यो गोस्टी को सबूत से सकासेत। का मी दमिस्क नगर जावन लाय मी इनको लक चिठ्ठी ले के यो मारग को लोकगिन ला बन्दी बनाय के येरुसलेम आनन गयो होतो।

पौलुस आपरो बदलाव ला सांगासे

⁶ जबा मी चलता-चलता दमिस्क को कठा पहुचयो। त असो भयो का दुफारी को बेरा होतो। बादल लक एकाएक एक मोठी उजाड़ो मोरो चारी कन चमकी।

⁷ अना मी धरती पर पड़ गयो। तबच मी एक असी आवाज आयकू आयो। अरे साऊल! अरे साऊल! तु मोला कायलाई सातवसेस?

⁸ तबा मी न जवाब दियो ओ पिरभू तु कोन आस? वोना मोरो लक कहीस “मी यीसु नासरी सेव जेनला तु सतावसेस?”

⁹ मोरा संगी गीन न उजाडो त चोवयो मंग जोन मोरो लक सांगत होतो। वोकी आवाज नही आयकयो।

¹⁰ तबा मी न कहेयो, “अरे पिरभू मी का करु?” पिरभू न मोरो लक कहीस “उभो होयके दमिसक मा जाय अना जोन काही तोरो करन को लाई राखीसेऊ उ तोला ला सब सांग दियो जाहे।”

¹¹ वोनो उजाडो को तेज को मारे मोला काही चोयो। ता मोरो संगी गीन हात धरके दमिस्क नगर ले गईन।

¹² यो सहेर मा तबा हनन्याह नाव को एक मानूस होतो। उ मोसे को नियम ला माननवालो एक नेक मानूस होतो। उ मोरो जवर आयो।

¹³ अना उभो होयके मोरो लक कहीस, अरे भाऊ साऊल मंग चोवन लग, वोनच बेरा मोरा डोरा उघड गईन अना मी न वोला देखयो।

¹⁴ तबा वोना कहीस, “आमरो आजा-पुरखागीन को परमेस्वर न तोला एकोलाय बेचीसेस का तु वोकी इक्सा ला जान, अना वोनच न्यायी यीसु ला चोव, अना वोको टोन्ड लक गोस्टी आयको।

¹⁵ काहेकी तु ना जोन चोइसेस अना आयकिसेस। वोको लाय सब मानूसगिन को पुड़ा तु वोको गवाह होवजोस।

¹⁶ अबा का देर करासेस? उभो होय अना बप्तिस्मा ले अखीन वोको नाव ला अपना अना अपरो पाप ला धोय डाक।”

गैर यहुदीगिन ला सन्देस आयकावन लाय पौलुस ला हाकलनो

¹⁷ जबा मी मंग येरुसलेम नगर मा आयके मंदिर मा पिराथना कर रहयो होतो त बेसुध भय गयो। अना मी दरसन चोवयो।

¹⁸ “का पिरभू यीसु मोरो लक कव्हसेस, येरुसलेम नगर लक फटाकने हिटी जाय।” काहेकी उ मोरो बारे मा तोरी गवाही नही मानेत।

¹⁹ मी न कहेयो “हे पिरभू उ त आपच जानासे, का मी तोरो पर बिस्वास करनवारा ला जेल मा डाकसेत, अना जघा-जघा यहुदी सभाघर मा पीटावत होतो।”

²⁰ जबा तोरो गवाह स्तिफनुस को खून बोवायो जाय रहेयो होतो। तबा मी भी वहान उभो होतो। अखीन एना गोस्टी मा हिस्सेदार होतो। लोक वोला मारत होतिन, अना मी उनको कपरा की देख-रेख करत होतो।

²¹ अना वोना मोरो लक कहीस चली जाय काहेकी मी तोला गैर यहुदी को जवर दुहुर-दुहुर तकन।

पौलुस की रोम देस मा नागरिकता

²² वय ओको एना बयान तकन ता आयकत रहीन। तबा जोर लक चिल्लाय के कव्हन लगीन, “असो मानूस को धरती पर लक नास कर देव, काहेका वोकी जित्तो होवनो बेस नाहती।”

²³ जबा वय चिल्लावत अना कपरा फेकके अना बादल मा धुल उडात होतीन।

²⁴ त सेना को अधिकारी न कहीस “एला किला मा लीजावो, अना कोडा मारके जाचो। का मी जानु का लोक कोनतो कारन लक वोको बिरोध मा असो चिल्लावत होतिन।”

²⁵ पर जबा उनना वोला कोड़ा, लगावन काजी बारती लक बांधीन, तबा उभो सौ सेना को अधिकारि लक पौलुस न कहयो, “कोनी रोमी नागरिक जोन बेकसूर सेत कोड़ा लगवानो का सही सेत।”

²⁶ यो आयक के वा अधिकारी सौ सेना को मुखिया को जवर जायके कहीस “तु यो का करासेस? यो त रोमी मानूस से।”

²⁷ तबा सेना को मुखिया न पौलुस जवर आयके कहीस, मोला सांग का तु रोमी सेस? वोना कहीस “हव।”

²⁸ असो आयक के सेना को मुखिया न कहीस मी न लगत रुपया देके पाइसेस। “पौलुस न कहीस मी त जन्म लक रोमी सेव।”

²⁹ तबा जोन लोक वोला जाचन पर होतीन। वय गदने वोको जवर लक सरक गयो। अना सेना को मुखिया भी असो जानके का योच रोमी से अना मी न वोला बांधी सेव उ डराय गयो।

धरम की मोठी सभा को पुढ़ा पौलुस

³⁰ सेना को मुखिया यो गोस्टी को बारेमा सही-सही जानन की मनसा लक, का यहूदी वोको पर कायलाई दोस लगावसेस वोको बन्धन खोल दियो। मंग वोना मुखिया याजक अना सबरी मोठी सभा ला इकक्ठा होवन की हुकूम देईस। अखीन पौलुस ला खाल्या लीजायके वोको पुड़ा उभो कर देईस।