पेरीत 19 - सत मारग पर चलन वारो किताब

इफिसुस नगर मा पौलुस

¹ वोनो बेरा अपुल्लोस कुरिन्थुस नगर मा होतो। तबा पौलुस भीतरी परदेसगीन को लक यातरा खतम करके इफिसुस आइस। वहान वोला काही चेला गीन मिलीन।

² पौलुस न उनको लक पुछिस “का बिस्वास करत बेरा तुमी लोक गीन को पवीतर आतमा मिली से?” उनना जवाब देईन, “हमी न यो नही आयकीसेजन का पवीतर आतमा होवासे?”

³ उ तबा उ कहीस “तो तुमिना कसो बप्तिस्मा लियो से?” उनना कहीन “योहन को बप्तिस्मा।”

⁴ मंग पौलुस न असो कहीस, योहन ना असो सांगत पस्तावा को बप्तिस्मा दियो होतो। का “जोन मोरो मंघा आवन वालो से वोको पर, मजे यीसु पर भरोसा करनो।”

⁵ उनना असो आयके पिरभू यीसु को नाव पर बप्तिस्मा लेइन।

⁶ जबा पौलुस न वोको पर हात राखीस, त पवीतर आतमा उनको पर उतर गयो। अना वय अलग-अलग बोली बोलन लगीन। अना भविस्यवानी सांगन लगीन।

⁷ वय पूरो मिलायके करीब बारा मरद-माना होतीन।

⁸ मग पौलुस तीन महिना तकन सभाघर जावत रहेयो उ “परमेस्वर को राज” को बिसय बेधड़क बोलत अना यहूदिगीन ला समझावत होतो।

⁹ पर उनमा लक काही लोक जिद्दी होतीन। वय बिस्वास नही करीन। बल्कि पंचायत मा एना रस्ता की निन्दा भी करन लगीन। एकोलाय पौलुस न उनला छोडके, अपरा चेलागीन ला वहान लक हटाय लेईस। उ हरदिन तुरन्नुस सिक्सा घर मा चरचा बिचार करन लग्यो

¹⁰ असो काम दूई बरस तकन चलतो रहयो, एको फर यो भयो का आसिया सब रव्हन वारा न चाहे वय यहूदी होय, या त यूनानी, सब न पिरभू को बचन आयक लेइन।

स्किवास को टूरागिन

¹¹ परमेस्वर को पौलुस कन लक अजब-गजब ताकत को काम, अना अचंभा करवात होतो।

¹² यहान तकन की वोको छुयो अगोछा अना रुमाल बिमार गिन को कठा लिजा के छिवात होतिन अना उ साजरा भयि जात होतो। अना भूत-पलित परात होतिन।

स्किवास का सात टूरा

¹³ काही यहूदी गिन जोन भूत-पलित हेड़त अना इतानी उतानी हिंडत होतिन। असो करन लगीन की, जोनमा भुत-पलित होतिन। उन पर यीसु को नाव आन के फूक मारके असो कव्हन लगीन। “मी तुमला वोना यीसु को नाव मा जोनको परचार पौलुस करासे मी तुमला हुकूम देवासू।”

¹⁴ स्किवास नाव को एक यहुदी मुखिया पुजारी को सात टूरा भी असोच करत होतीन।

¹⁵ कोनी फिरयाद पर भूत-पलित न उनला जवाब देईन, “मी यीसु ला जानासेऊ, पौलुस कोन आय यो भी जानासेऊ, पर तुमी लोक कोन आव?”

¹⁶ अना उ मानूस जोन मा भूत-पलीत होतीन उन को पर झपटयो अखीन उनला हिन्सा लक कब्जा मा करके उन को पर असो मजबूत ताकत दिसायो। का वय नंगा अना घायल होयके परान लगीन।

¹⁷ इफिसुस का रव्हन वारा सबा यहूदी अना गैरयहुदी गिनला मालूम भय गयो। अना सबमा भेव भर गयो। अना पिरभू यीसु को नाव को बड़ाई भयी।

¹⁸ उनमा लक लगत सा जोन ना बिस्वास करी होतिन। अपरो लक कियो खोटो काम ला सबको पुड़ा मान लेइन। अना उनला परगट कर देईन।

¹⁹ लगत सा लोकगीन न जोन जादू-टोना करत होतीन। वय अपरी-अपरी जादू की किताब ला आनके जमा करीन। अना सब को पुड़ा जलाय देईन। जबा उनना वोका हिसाब लगाइन, ता करीब पन्नास हजार खुरो का मोहर को बरोबर हिटयो।

²⁰ ऐना पिरकार लक पिरभू को बचन मजबूत लक फैलत गयो।

इफिसुस मा उपदरा

²¹ जबा या घटना घट चुकयो त पौलुस न मकीदुनिया अना अखया लक होतो हुया। येरुसलेम नगर जानो को मन मा ठानिस। अना कहीस वहान पहुचानो को बाद मोला रोम देस ला भी चोवनो जरुरी से।

²² वोना आपरो दुई सायता करन वालो तीमुथियुस अना इरास्तुस ला मकीदुनिया धाड़ दियो। के वय खुदच काही बेरा तकन आसिया मा रहयो।

²³ अना वोना बेरा पिरभू को ऐना मारग को कारन लगत मोठी आफद इफिसुस मा भयी।

²⁴ देमेतिरयुस नाव को एक सोनार होतो। जोन अरतिमिस देवी खुरो को भान्डो बनावत होतो। जोन लक कारीगरगीन ला लगत फायदा भेटत होतो।

²⁵ वोना उनला अखीन दुसरो ऐना धंधा लक जुड़यो कारीगार गीनला जमा करके कहीस, “अरे भाऊ तुमी जानासेव का हमारो यो धंधा लक लगत आमदानी होवासेत।”

²⁶ अना तुमी चोईसेव अखीन आयकी सेव का न केवल इफिसुस मा नही पर पूरो आसिया मा एना पौलुस न लगत सा लोकगीन ला बहला फुसला दियो से। उ कव्हसेस का हात को बनायो देवता सच्चो नाहती।

²⁷ एको लक नही केवल योच भेव सेत का आमरो धन्धा बदनाम होहेत। बलकी मोठी देवी अरतिमिस को मंदिर को मान खोवन को भी भेव सेत। अना जेनो देवी की पूजा आसिया अना दुनिया को सबच लोक करासेत। वोको मान छिन्डन को भेव सेत।

²⁸ जबा उनना असो आयकीन त लोक गुस्सा लक भर गईन। अना चिल्लाय-चिल्लायके कव्हन लगीन, “इफिसिलोक गीन की देवी अरतिमिस मोठी से”

²⁹ नगर मा हुल्लड़ मच गयो अना लोकगीन न मकिदुनिया लक आयो गयुस अखीन अरिस्तखुरस नामको पौलुस को संगी यातरी गिनला दबोच लेइन। अना वय रंगसाला पराय गईन।

³⁰ पौलुस न जमघट को पूड़ा जावनो चाहत होतो। पर चेला गीन न वोला नही जान देईन।

³¹ काही पिरान्त को अधिकारी गीन जोन वोका सँगी होतीन। खबर धाडिन का उ रंगसाला मा जानो को जोखिम नोको उचलेत।

³² अना कोनी काही चिल्लाय रही होतीन। अखीन कोनी काही, काहेकी सभा मा उथल-पुथल मची होती। लगत सा लोकगीन ला यो भी मालुम नही होतो का हमी जमा कायलाई भई सेजन।

³³ तबा यहुदीगिन ना भीड़ ला सान्त करन लाय सिकन्दर को नाव सुझाइन। तबा सिकन्दर न हात उभो करके लोकगिन को पूड़ा बचाव पक्स जाहिर करनो चाहयो।

³⁴ पर जबा लोकगीन न चीन्हिन का यो तो यहूदी से। ता लगभग दूई घंटा तकन सबच का सब एकच आवाज लक चिल्लावत रहीन। “इफिसिलोक गीन की अरतिमिस देवी मोठी से”

³⁵ तबा नगर को दिवान न जमघट ला उगो-मुगो करके कहीस “अरे इफिसिलोक गीन असो कोनतो मानूस से जोन नही जानासे का इफिसुस को यो नगर मोठी देवी अरतिमिस को मंदिर अना बादल लक पडी हुई पवितर गोटा को रखवालो से?”

³⁶ एना गोस्टी को कोनी तोड़ नाहती। त तुमी उगो-मुगो रहवो अना उताली मा काही नोको करो।

³⁷ काहेकी तुमी एना मानूसगिन ला धरके आनीसेऊ। जोन न त हमरो मंदिर गीन का लुटेरा सेत, ना आमरो देवी का निन्दा करनवारा सेत।

³⁸ मंग अदी देमेतिरयुस अना वोना कारीगीर ला जोन वोको संग सेत। कोनी मानूस लक कोनी सिकायत सेत त न्यायालय खुल्लो सेत। अना मोठो राजपाल मोजूद सेत। वहान वय एक दुसरो पर नालीस करो।

³⁹ पर तुमी एको लक जादा जाननो चव्हसेत ता एको फैसला नागरिक अदालत मा होहेत।

⁴⁰ काहेका अबा जोन काही भी सेत वोको अनुसार अमीला यो गोस्टी को भेव सेत। आज को बलवा को ठेका कहिं आमरो डोस्की मा नोको फूटे। काहेका यो दंगा को कोनी कारन नाहती।

⁴¹ वोना ऐतरो कहेके पंचायत ला खत्म कर देइन।