पेरीत 18 - सत मारग पर चलन वारो किताब

कुरिन्थुस की कलीसिया की सुरुवात

¹ एको बाद पौलुस अथेने नगर छोडके कुरिन्थुस नगर चले गयो।

² जहान अक्किला नाव को यहूदी लक वोकी भेंट भई। अक्विला पोंतुस को रव्हन वारा होतो। जोन अबा हाल च मा, अपरी बायको प्रिस्किल्ला को संग कछुक बेरा पयले इटली देस लक आयो होतो। उनना इटली यो काजी सोड़यो होतो, की राजा क्लौदियुस न सब यहूदीगिन ला रोम देस लक हेड़ दियो होतो। एकोलाय पौलुस वोको लक मिलन गयो।

³ अखीन वोको संग रव्हन अना काम करन लग्यो। काहेकी वय पन्डाल बनावन को एकच धंधा करत होतीन।

⁴ पौलुस हर एक बिसराम दिवस पर यहुदी सभाघर मा तरक-बेस करत अना यहूदी गीन अना यूनानी गीन ला समझावन को जतन करत होतयो।

⁵ जबा सीलास अना तीमुथियुस मकीदुनिया लक आइन। ता पौलुस गोस्टी आयकावन मा अपरो पूरो पुरुप देवन लगीस। अना यहूदी गीन को आयकावायके का यीसु च मसीह से।

⁶ जबा वय लोक पौलुस को बिरोध करनो अना निन्दा करन लगीन। ता वोना अपरा कपरा की बारू ला झड़ायके उनको लक असो कहीस, तुमरो जान को जवाब दार तुम्हिच सेव। अबा अमी गैरयहुदी गिन जवर जाबिन।

⁷ असो सांगके पौलुस वहान लक चले गयो। अना वा तितूस युस्तूस नाव को एक गैरयहुदी को घर मा गयो। जेनको घर यहुदी सभा घर को कगर होतो।

⁸ यहुदी सभाघर को मुखिया क्रिस्पुस न अपरो सबरी खानदान को संग पिरभू मा बिस्वास करीस। अना उनको संग लगत कुरुन्थी को यहुदीगिन पौलुस की गोस्टी आयक के बिस्वास करीन अना बप्तिस्मा लेईन।

⁹ पिरभू न एक रात को दरसन देके पौलुस लक असो कहीस, नोको हार, पर बोलत जाय अना उगो-मुगो नोको रव्ह।

¹⁰ “मी तोरो संग सेव, कोनी भी तोरो पर धावा नही करहेत कोनी तोरो नुकसान नही कर पाहेत। काहेकी येनाच नगर मा लगत सा लोक मोरा अपरा सेत।”

¹¹ पौलुस लोकगीन ला परमेस्वर को बचन की सिक्सा देतो हुयो, वहान डेढ़ बरस रहयो।

¹² जेना बेरा गल्लियो अखया यूनान देस को मोठो राजा होतो। यहूदी गीन न मिलजुल के पौलुस पर हमला करीन। अना वोला नियाव आसन को पुड़ा पेस करीस।

¹³ उनना यो अरोप लगाईन “यो मानूस परमेस्वर ला मनान को असो नियम सिकावासे जोन मोसे को नियम को बिरुध से।”

¹⁴ पौलुस अबा अपरो सफाई मा बोलन वालो होतो। का गल्लियो न्यायी न यहूदी गीन लक कहीस, “अरे यहूदिगीन! अदी यो अन्याव या अपराध को मामला होतो, त सही मा मि तुमरी गोस्टी आयकतो।” अना नियाव को साजरा कारन होतो।

¹⁵ पर यो झगड़ा-राड़ सबद नाव अना तुमरी मोसे को नियम लक सम्बन्ध राख सेत। त तुमी जेनो मी असी गोस्टी को न्याय करनो नही चाव्हसेऊ।

¹⁶ अना यहुदिगिन ला नियाव आसन लक बाहेर हेड देईस।

¹⁷ तब सब न सभाघर को मुखिया सोस्थेनेस ला धरके दबोचिन नियाव आसन को पुड़ा पीटीन, पर गल्लियो न येको पर जरासो भी धियान नही देईस।

अन्ताकिया मा पौलुस की वापिस

¹⁸ पौलुस लगत दिवस तकन कुरिन्थुस को बिस्वासी गिन को संग मा रहयो। मंग उ भाऊ गीन लक बिदाई लेके नाव को रस्ता लक सीरिया जावन लगयो। वोको संग प्रिस्किल्ला अना अक्किला भी होतिन। पौलुस ना किंखिया मा आपरो डोस्की मुन्डवाय लियो काहेका वोना एक मन्नत मानयो होतो।

¹⁹ अना जब वय इफिसुस नगर आइन ता पौलुस न प्रिस्किल्ला अना अक्विला ला वहान छोड़ देईस। अना खुद यहुदी सभाघर मा जायके यहूदी गीन को संग बैस करीस।

²⁰ उनना पौलुस लक बिनती करीन, “तु काही बेरा अखीन रव्हजोस।” पर पौलुस नही मानयो।

²¹ अना उनको लक यो साग के बिदाई लेइस, “अदी परमेस्वर चाव्हसे ता मी तुमी लोकगीन को जवर मंग आहिन।” उ इफिसुस छोड़के जहाज मा समुंदर को रस्ता लक चली गयो।

²² कैसरिया जहाज घाट मा उतरके वहान लक उ कलीसिया को धन्यवाद करन गयो, अना येरुसलेम लक मोठो नगर अन्ताकिया चली गयो।

²³ काही बेरा बितन को बाद वोने बिदाइ लेइस। अना गलातिया अना फ्रुगिया को छेतर लक होतो हुयो एक जघा लक दुसरो जघा मा हिंडता हुयो। सब चेला गीन को बिस्वास मा पूरो पक्को करतो रहयो।

इफिसुस अना कुरन्थी नगर मा अपुल्लोस

²⁴ वोनोच बेरा वहान अपुल्लोस नाव को यहूदी होतो। उ सिकन्दरिया को बिस्वासी होतो। बोलन मा विदवान होतो। अना वोला पवितर गिरंथ को लगत गियान होतो। उ इफिसुस नगर आयो।

²⁵ वोला पिरभू को मारग को सिक्सा भेटयो होतो। उ लगत सतरक होयके जो सच सेत। वोला साजरा लक सिकावत होतो। अना यीसु को बिसय मा साजरी गोस्टी सिकावत होतो। वोला केवल योहन को बप्तिस्मा मालुम होतो।

²⁶ उ यहुदी सभाघर मा बेधड़क बोलन लगयो। प्रिस्किल्ला अना अक्किला वोकी सिक्सा आयकन को बाद वोला अपरो संग ले गईन। अना उनना लगत साजरो तरीका लक वोना परमेस्वर को सिधो रास्ता ला समझाइन।

²⁷ जबा अपुल्लोस आखया ला जावनो चाहिस ता बिस्वासी हुन ना वोला जोस लक भर देइन। अना वहान को बिस्वासी गिनला स्वागत करन लाय चिठ्ठी धाड़ीन। जब उ वहान गयो तो उ वहान को लोकगिन लाय लगत मदद करन वारा साबीत भयो। जोन ना परमेस्वर को किरपा लक बिस्वासी बन गयो होतिन।

²⁸ काहेकी वोना पवितर गिरंथ लक सबुत देदे के यहूदी गीन को तोन्ड बंद करत होतो। अना गिरंथ लक समझावत होतो का यीसु च मसीह आय।