पेरीत 1 - सत मारग पर चलन वारो किताबआतमा मा बप्तिस्मा को परन 1 ओ चहेतो थियुफिलुस, मीना आपरो पयलो किताब उन सब काम गीनको बारे मा लिखिसेव, जो काम यीसु ना पयले लक करयो अना सिकायो। 2 वोना दिवस तकन पवितर आतमा लक आपरो बेचयो गयो चेला गिनला हुकूम दियो जोन दिवस लक उ सरग नही उचल लियो गयो। 3 आपरो मरनो को मघा, वोना 40 दिवस तकन उ अलग-अलग रीत लक उ लगत बार उनला आपरो जित्तो होवन को सबूत उनला देवत रहयो। अना वोना उनलक परमेस्वर को राज को बारेमा सागत रह्यो। 4 मग जबा वय यीसु को संग जमा होतिन, “ता ओना उनला हुकूम देईस।” येरुसलेम नगर नोको तजजोस, बल्की जोन पवितर आतमा भेटन को बारे मा तुमीना मोरो लक आयकिसेव, बाबूजी को ओनो वायदा को पुरो होवन को रास्ता ताको। 5 काहे का योहन ना पानी मा बपतिस्मा देई होतीस, “पर अबा तुमला जरासो दिवस को मंघा पवीतर आतमा लक बप्तिस्मा दियो जाहेत।” यीसु ला सरग मा उचलनो 6 जबा पेरीतगीन डुगां भईन, तबा वय यीसु लक पुसिन, पिरभू का तू योच बेरा इसरायल राज ला लवटा देजोस? 7 यीसु ना उनला कहीस “ओनो अवसर अना बेरा ला जाननो तुमरो काम नाहती। जोन ला परमेस्वर ना खुद अपरो हक मा पक्को करीसेस। 8 पर जबा पवीतर आतमा तुमी पर आहे तबा तुमी ताकत पावने, अना येरुसलेम, सप्पा यहुदिया अना सामरिया मा, यहान तकन का धरती को छोर तकन तुमी मोरो गवाह ठहरने।” 9 एतरो कव्हनो को मंघा उ उनको देखत-देखत वरता उचल लियो गयो, अना उ उनला नही चोवयो। 10 जबा उ जाय रहयो होतो, तो वय बादर कन ताक रहया होतिन, ताभिच दुई मानूस पांढरा झंगा घाल्या हुया उनको कगर मा आयके उभा भईन, 11 अना उनको लक कहिन, अरे! गलीली लोक गीन, तुमी कायलाई, उभा होयके बादर कन चोवासेव जोन यीसु तुमरो, जवर लक सरग मा उचलीयो गयोसे, अना वोला जसोच तुमीना, सरग ला जात चोयीसेव, वसोच रिती लक अखीन वापस लौटहेत। यहूदा को जघा मत्तियाह को निवाड़ो जानो 12 मंग पेरीत जैतून नाव को पहाड लक जोन यरुसलेम लक कोनी एक किलोमीटर दुहुर से। वहान लक येरुसलेम सहेर लवटिन। 13 तबा वय येरुसलेम सहेर को वय घर को पाटन पर गईन, जहा पतरस अना योहन अखीन याकूब अना अन्दिरयास, अखीन फिलिप्पुस, अना थोमा, अना बरतुल्मै, अखीन मत्ती अना हलफई, को टूरा याकूब, अखीन समौन, जेलोतेस अना याकूब, को टूरा यहूदा, ठहेराया होतीन। 14 इनको संग मा काही आई-माई, अखीन यीसु की माय मरियम अना वोका भाऊ गिन भी होतिन। यो सब आपरो आपला एक संग पिराथना मा लगायो राखत होतिन। 15 काही दिवस मघा बिस्वासी भाऊ गिन को सभा मा जोन एक सम्बर बीस लोक गीन होतिन। पतरस उभो होयके कव्हन लगयो। 16 यहूदा आमरो समूह को एक मेम्बर होतो अना यो सेवा मा उ हिस्सेदार होतो। 17 जोनको को बारेमा, पवितर गिरंथ को उ लेख जोनला राजा दाऊद को टोन्ड लक पवितर आतमा ना लगत पयलेच कव्हयो होतो। ओको पूरो होवनो जरुरी होतो। का उ आमरो च सग गिनो जाहेत, अना यो सेवा मा वोको भी हिस्सा होहेत। 18 यो मानूस ना अपरो अन्याय को कमाई लक एक खेत लेई सेस, उ ओको मा टोन्ड को बल पडीसे वोको पोट फट गयो, अना वोकी सबरी अतड़ी बाहेर हिट गईसेत। 19 सबच यरुसलेम का रहवन वारा गीन ला मालुम भय गयो ऐना कारन उ खेत ला हकलदमा मजे खून वालो खेत कहव्सेत। 20 काहेका भजन संहिता की किताब मा असो भी लिखीसे, “वोको घर उजड़ जाये, अना कोनी ना रव्हे।” अना असो भी लिखयो सेत का वोको सेवा को जघा कोनी अवर ला भेटेत। 21 एकोलाय यो जरुरी से, का जबा पिरभु यीसु हमरो बीच मा होतो। तबा लक जोन लोक हरामेसा आमरो संग होतिन उनमा लक कोनी एक ला बेचयो जाय, मजे वोना बेरा लक जब ले योहन ना लोकगिन ला बप्तिस्मा देवनो सुरु कियो होतो अना जब तकन आमरो बीच लक यीसु ला उचल लियो गयो होतो। 22 उनमा लक कोनी एक ला यीसु को दुबारा जित्तो होवन को आमरो सग गवाह होवनो पायिजे। 23 उन मा लक वोना दुई मानूस गीन को नाव बेच के पेस करीन। यूसुफ को जोनला बरसब्बास, कव्हत होतीन, अना जेनको छाप युस्तुस, होतो, अना मत्तियास ला। 24 मंग उनना पिराथना करीन, ओ पिरभू तुमी सबच को मन ला जानासे, ये दूई मा लक तुमी कोन ला यो पद लाय बेचयो सेस। 25 जोन यहूदा जघा होतो वहान वा चले गयो, अना आपरो जघा सोड़ दियो, अबा एक पेरीत को रुपमा सेवा को यो पद ला कोन अपनायेत। 26 तबा उनना वोको बारे मा चिठ्ठी डाकिस, अना चिठ्ठी मत्तियास को नाव पर हिटी होती अना वय अकरा चेलागीन को संग गिनयो गयो। |
The New Testament in Powari Language © The Word for the World International and Powari Madhya Pradesh, 2023.