2 तीमुथियुस 3 - सत मारग पर चलन वारो किताब

¹ पर यो हेत राखो का आखरी दिवस गीन मा कठिन बेरा आहे।

² काहेकी मानूस सुवारथी, धन दौलत लक माया करनवारा डींगमार, गरबिला, बिरोध करनवारा, माय-बाप को हुकूम नही मानन वालो बिरोधी अपवीतर।

³ दया रहित, क्षमारहित लान-छान लगावन वालो असंयमी कठोर साजरो को बैयरी।

⁴ बिसवासघाती ढीठ घंमडी अना परमेस्वर लक पिरेम नही, तरी सूक सुबिता का चाव्हवन वारा होहेत।

⁵ वय भक्ती को हुलीया त धरेहेत पर वोकी ताकत ला नही मानहेत असा गीन लक दुहुर रव्हना।

⁶ इनको च मा लक वय लोक सेत जोन घर मा चोरी लक धसावसेत अना वोना कमजोर आई-माई गीन ला बस मा कर लेसेत जोन पाप लक दबी अना हर पिरकार की आस को बस मा से।

⁷ अना हमेसा सिकावता रहवासेत पर खराई की पहिचान तकन कबच नही पहुचा सेत।

⁸ जसो यत्रेस अना यम्ब्रेस न मोसे को बिरोध करीस होतीस वसोच यो खराई को बिरोध करासे यो मानूस से जेकी अक्ल चली गईसे अना वय बिस्वास को बारे मा निकामा से।

⁹ पर वय एकोलक पुड़ा नही बढ सकासेत काहेकी जसो उनकी कम अक्ल सबच मानूस गीन पर परगट भय गई होती वसोच इनकी भी भय जाहे।

तीमुथियुस का खास निरदेस

¹⁰ पर तु न सिक्सा चालचलन मनसा बिस्वास सहन करन को ताकत पिरेम धीरज अना सताय जानो अना दुख उठावन मा मोरो संग देईस।

¹¹ अना असो दुख गीन मा भी जोन अन्ताकिया अना इकुनियुम अखीन लुस्तरा मा मोरो पर पडया होतो अना कई दुख गीन मा भी जोन मीना उठाइसेस पर पिरभू न मोला उन सब लक छुड़ाय लेईस।

¹² पर जेतरा मसीह यीसु मा भक्ती को संग जित्तो रव्हनो चाहवसे वय सब सताय जाहे।

¹³ पर पापी अना बहकावन वालो धोखा देवासे अना धोखा खाता हुयो बिगडता चली जाहे।

¹⁴ पर तु एना गोस्टी गीन पर जोन तु नही सीको सेस अना बिस्वास करीसेस यो समझके पक्को बनया रहवो का तु न उनला कोनता लोक गीन ला सीकाइसेस।

¹⁵ अना बचपन लक पवीतर गीरंथ तोरो दिल मा लिख्यो सेत जोन तोला मसीह यीसु मा बिस्वास करन लक मुकती पावन लाई अक्कलवर बनाय सकासे।

¹⁶ पूरो पवितर गीरंथ परमेस्वर की पिरेना लक रचयो गयो से अना सिक्सा अना समझावन अखीन सुधारन वालो अना धरमिपन की सिक्सा को लाई लाभ दायकसे।

¹⁷ ताकी परमेस्वर को जन सिध्द बनावनो अना हर एक भला काम को लाई पक्को होय जाहे।