2 तीमुथियुस 1 - सत मारग पर चलन वारो किताब

नमस्कार

¹ पौलुस को कन लक जोन, जिंदगी की परन को जसो जोन मसीह यीसु मा से। परमेस्वर की आस लक मसीह यीसु को पेरीत से।

² चहेतो टूरा तीमुथियुस को नाव परमेस्वर बाप अना हमरो पिरभू मसीह यीसु को कन लक तोला आसिरवाद अना दया अखीन सान्ती भेटत रव्हे।

धनवाद अना बढावा

³ जेना परमेस्वर की सेवा मा अपरो बाप-दादा गीन की रिवाज पर सुध्द अक्कल लक करासेऊ वोको धनवाद होहे का मी अपरी पिराथना गीन मा तोला रात दिवस हेत करासेऊ।

⁴ अना तोरो आँसु को हेत करके राती दिवस तोरो लक भेटन लाई लगत बेरा तकन तरसा सेव, का मी खुसी लक भर जाऊ,

⁵ मोला तोरो वोना सलपा दिल लक भरोसा को हेत आवासे जोन पहेल तोरी माम माँय लोइस अना तोरी माय युनीके मा होतो अना मोला पक्को भरोसा से का तोरो मा भी से।

⁶ एना कारन मा तोला हेत देवासू का तु परमेस्वर को वोना बरदान जोन मोरो हात राखन लाई तोला मिलसे वोला जित्तो राख।

⁷ काहेकि परमेस्वर न हमला भेव की नही पर ताकत अना पिरेम अना संयम की आतमा देईसेस।

⁸ एकोलाय हमरो पिरभू की गवाही लक अना मोरो लक जोन वोको जेली सेऊ लज्जित नोको होवो पर वोनो परमेस्वर की ताकत को जसो साजरो बारता लाई मोरो संग दुख उठाव।

⁹ जेना आमरो सुटकारा करीस, अना पवीतर बुलावा लक हाकलीस अना यो हमरो काम गीन को लक नाहती, पर वोको मकसद अना वोनो किरपा को लक सेत, जोन मसीह यीसु मा हरामेसा लक भयो सेत।

¹⁰ पर अबा हमरो पाप मोचक मसीह यीसु को परगट होवनो लक प्रकासीत भयो जेना मिरतु को नास करीस अना जीवन अखीन अमरता की वोना साजरो बारता लक उजाडो जसो कर देईस।

¹¹ जेनको लाई मी परचार करन वारा अना पेरीत अखीन सिक्सा वालो भी ठहरायो।

¹² एना कारन मी एना दुखगीन ला भी उचला सेऊ पर सरमाऊ नही काहेकी मी वोला जेनको पर मीना भरोसा करीसेऊ जानासेउ अना मोरो पक्को से का उ मोरी पुंजी की वोनो दिवस तकन देख-रेख कर सकासे।

¹³ जोन खरी गोस्टी तु न मोला लक आयकिसेस उनला वोना भरोसा अना पिरेम को संग जोन मसीह यीसु मा से अपरो नमूना बनायके राखे।

¹⁴ अना पवीतर आतमा को कन लक जोन अमी मा बसीयो हुयोसे एना साजरी पुंजी की देख-रेख कर।

¹⁵ तु जानासेस का आसिया देस वारा सब मोरो लक बेगरो भय गईसेत जेनको मा फूगिलूस अना हिरमुगिनेस से।

¹⁶ उनेसिफुरुस को खानदान पर पिरभू दया करेहे काहेकी वोना लगत बार मोरो जीव ला थन्डो करीसेस अना मोरी हतकड़ी गीन लक लज्जित नही भयो।

¹⁷ पर जबा उ रोम मा आयो त मोठो जतन लक ढुंढके मोरो लक भेंट करीस।

¹⁸ पिरभू करेहे का वोना दिवस वोको पर पिरभू की दया होहे अना जोन-जोन सेवा वोना इफिसुस मा करीसेस उनला भी तु साजरो लक जानासेस।