2 कुरिन्थियो 6 - सत मारग पर चलन वारो किताब

¹ परमेस्वर को संग हमारो काम मा, मंग हमी तुमरो लक बिनती करतत, का कोनी परमेस्वर की किरपा पायके उ नास होय जाहे।

² आयको परमेस्वर का कव्हासे “जबा मोरो लाई आपरी बेरा चोवन लाई आयो, त मीना तुमला आयको; जबा दिनमा तुमला बचावन को लाई मोरो जवर आयके, त मीना अपरी मदद करया।” आयको! यो परमेस्वर को खुसी को बेरा सेत, चोवो अबा उ सूटकारा को दिवससेत।

³ आमी नहीं चाव्हसेजन की कोनी ला भी आमरो सेवा मा दोस मिल जाहे, एकोलाय आमी कोनी ला भी रस्ता मा रोड़ा लावन की कोसिस नहीं कर रही से।

⁴ एको अलावा, आमी जोन सजरो बरताव काही भी करसेजन आमी चोवासेजन की आमी धीरज लक परेसानी, कठिनाइगीन को धीरज लक परमेस्वर के दास से।

⁵ कोड़ा खावनो लक, अना जेल जानो लक हल्ला गुला लक महेनत लक चेतया रव्हनो लक उपवास करनो लक।

⁶ पवीतर लक अक्ल लक धीरज लक किरपा लक पवीतर आतमा लक। सच्चो पिरेम लक

⁷ सच्चो बचन लक परमेस्वर की ताकत लक नेकीपन को हतियार लक जोन उज्जो अना डावो हात मा से।

⁸ जस-अपजस मा, मान-बेइज्जति मा, बदनामी अना सजरा नाव मा, हमला लोक धोकादेवन वारा समजासे पर आमी खरो सेजन।

⁹ अन्जान रूप मा आमी सेजन, मग आमी जग-जाहिर सेजन। लोकगिनला आवता च मेला का जबच मेला असो आमी चोवासेजन, पर आमी जित्तो सेजन, आमी ला अबा पिटाई पड़नवारा सेत आमी मर जाबिन असो लगसेत पर, अबा आमी जित्तो सेजन।

¹⁰ आमी दुखी चोवसेजन, पर आमी खुस सेजन, आमी गरिब सेजन, पर नगद लोकगीन ला धनी बनावसेजन। असो आमी चोवसेजन का अमरो कठा काही नाहती पर आमरो कठा सारी जुनुस सेत।

¹¹ अगा कुरिन्थी नगर को लोक गीन, आमी ना खुल्लमखुल्ला सक्कडिया गोस्टी सांगेसेजन, आमरो दिल तुमरो लाय उघडोसेत,

¹² आमरो मन मा तुमरो काजी कोनी इरादा नाहती, पर तुमरो मनमा सेत।

¹³ पर आपरो लेकरा समजके मी तुमिला सांगसू का तुमी खुलके आपरो दिल को बात सांगो, अना आपरो दिलमा अमीला चौरस जघा देव।

¹⁴ परमेस्वर पर भरोसा नही राखन वारा मानूस को संग बरोबरी करन को कोसीस असो खोटो करम नोको करो! भरोसा नही करन वालो लोकगीन संग संगती नही होय सकत, काहेका नेक मानूस अना खोटो मानूस को कोनी नातो नाहती। उजाड़ो अना अंधार दुई संग-संग कसो रव्ह सकसेत?

¹⁵ यीसु मसीह को लोकगीन को बलियाल देवता को संग काजक रिस्ता सेत? अखीन यीसु पर भरोसा राखन वारा को, भरोसा नही राखन वारा को संग कसो नाता?

¹⁶ मुरती को पूजा करनवारा को जित्तो परमेस्वर को मंदिर लक काजक लेवनो-देवनो सेत। “काहेका आमी जित्तो परमेस्वर को मंदिर सेजन। जसो परमेस्वर ना खुदच मी आपरो लोकगीन को संग आपरो घर बनाहिन अना उनको बीच मा रव्हिन। अना मी उनको परमेस्वर रव्हिन अना वय मोरो लोक कहलायेत।”

¹⁷ एकोलाय पिरभू कव्हसेत “उनको बीच लक हीटो अना बेगरो रव्हो,” अना असुध्द चीज ला नोको छिवो, तो मी तुमीला अपनाइन।

¹⁸ अना मी तुमी लोकगीन को अजी बनयो सेऊ, अना तु मोरो टूरा आस! यो सब लक ताकत वर “पिरभू असो कव्हसेत।”