2 कुरिन्थियो 3 - सत मारग पर चलन वारो किताब

¹ का हमी मंग अपरी सीपारिस करन लगबीन? अना मानूस गीन को जसो का हमी भी तुमरो लक सीपारिस की चिठ्ठी लेवन अना तुमला देनो जरुरी से।

² हमारो चिठ्ठी त तुमला च होय जाहे हमरो हिरदय मा लिखी से अना जेनला सबच लोक जानासेत अना वाचासेत।

³ अना असो पिरगट करयेत का मसीह की चिठ्ठी तुमी सेव जेकी देख-रेख अना जोन त स्याही लक नही अखीन न गोटा की पाटी पर जित्तो परमेस्वर की आतमा लक मानूस को देह हिरदय पर लिखयो गयो से।

⁴ अना मसीह को कन लक परमेस्वर पर हमी असोच भरोसा राखीसेजन।

⁵ असो नहाय का हमी अपरो आप ला एना काबील समझा सेजन का हमी खुदच काही कर सकासेजन पर अमीला काबिल बनावन वारा परमेस्वर से।

⁶ जोनना अमीला नवा करार को दास होवनको काबिल बनाइसेस, यो लिख्यो करार नाहती पर आतमा को करार सेत काहेका लिखयो सबद मारसेत पर आतमा जित्तो करासेत सेत।

⁷ पर अदी मरन को यो करार जेन को सबद गोटा को पटिया मा लिख्यो सेत, एतरो तेज बनके आयो का इसरायली गीन मोसे को तोन्ड को तेज ला जो घटत होतो, नही चोव सकिन।

⁸ तो मग आतमा को करार अना तेज कसो ना होयेत?

⁹ काहेका जबा दोसी ठहरावन वालो करार तेज से त नेक ठहरावन वालो करार अखीन लगत तेज होय जासे।

¹⁰ सहीमा उ जोन तेज होत्यो अता वोना तेज को पुड़ा जोन वोको लक बढकेन तेज से उ कम होय जाहे।

¹¹ काहेका अदी उ कम होवन वालो तेज होत्यो त उ जोन पक्को से अखीन लगत तेज से।

¹² असो आस होवन को कारन हमी मोठो हिम्मत लक बोला से।

¹³ अना आमी मोसे को जसो नही जोन अपरो चेहेरा पर सेव डाकयो राखत होत्यो का इसरायल की आवलाद एकटक होयके उ लोप होतो हुयो तेज को अंत ला नही देख सके।

¹⁴ पर उनको मन कड़ो भय गयो काहेकी अबा भी एना जुनो करार ला परदा उ सेव संची पढ़यो रहयो काहेकी उ बल्कि मसीह मा हटायो जाहे।

¹⁵ आज को दिवस जबा कदी मोसे को नियम पढ़यो जावासेत। तो उनको दिल सेव लक ढकयो रव्ह सेत।

¹⁶ पर जबा कदी कोनी मानूस पिरभू कन आपरो मनला लगाव सेत, तो वोना सेव हट जावा सेत।

¹⁷ अबा यो पिरभू तो आतमा सेत, अना जितानी पिरभू को आतमा सेत उता कोनी बन्धन नाहती।

¹⁸ पर आमी सबा उघाडो तोन्ड लक पिरभू को तेज जसो आरसा मा चोवतो हुया पिरभू मजे आतमा लक आमी वोको तेजपन को रुप मा जरा-जरा करके बदलत जावासेत।