2 कुरिन्थियो 2 - सत मारग पर चलन वारो किताब

¹ एकोलाय मीना आपरो आप मा यो तय कर लेईसेव, का तुमी लोक गिनला दुबारा दुख देवन साठी मी तुमरो बीचमा नोको आऊ।

² काहेका अदी मि तुमी लोक गिनला दुखी करीन, मंग मोला सुखी कोन करहेत? सिवाय तुम जोनला मीना दुखि करिसेऊ।

³ अना योच गोस्टी मीना तुमिला एकोलाय लिखी सेऊ, का जबा मी तुमरो जवर आहिन, ता जोन लक मोला खुसी मीलनो से, उनको लक मोला दुख ना पोहचायो जाय। मोला तुमी सब मा यो गोस्टी को भरोसा सेत, का जोन मरो खुसी सेत वा तुम सब को सेत।

⁴ काहेका मीना तुमीला यो गोस्टी दुखी दिल लक, डोरा लक पानी बोहाय-बोहाय के लिखि सेउ। यो साठी नाहय का तुमला दुख लगे, पर यो साठी सेत, का तुम यो जान सको का मी तुमरो लक कितरो माया राखासू।

गुनागार ला माफी

⁵ पर अदि कोनी न दुख देईसेत, त वोनो मोला नही, पर काही-काही तुमी सबच ला भी दुख देई सेत।

⁶ असो मानूस ला जोन दन्ड तुमरो दल ना देई सेत, उतरो च लगत सेत।

⁷ एको लाई उलटो तुमी वोला माफी दे देव, अना सान्ती देव, काहेका असो नोको होय का उ लगत सोक मा डूब जाय।

⁸ एको लाई मोरो तुमरो लक बिनती से का तुमी वोला अपरो पिरेम को पुरुप देवो।

⁹ यो मीना तुमला यो चोवन लाय लिखीयो सेऊ। का तुमी परखा सेऊ का हर गोस्टी मा, हुकूम मानन वालो सेव का नही?

¹⁰ जबा तुमी कोनी ला माफी देवा सेव, तो उनना जोन काही कियो सेत वोला मी भी माफ करा सेऊ। जबा मी छिमा करा सेऊ, ता सहीमा मी मसिहा को हाजीर मा माफ करा सेऊ। काहेका तुम पर सैतान को जोर नोको चले।

¹¹ काहेका भीतरी गोस्टी अमीला मालूम नाहती का सैतान को काजक योजना सेत।

तरोआस मा पौलुस की चिंता अना आराम

¹² जबा मी मसीह को साजरा बारता आयकावन को लाई तोराआस आयो, अना पिरभू न जबा मोरो लाई बेसकुड़ उघाडो।

¹³ तबा अपरो भाऊ तितुस ला नही पायके मोरी आतमा मा चैन नही लग्यो, अना वोला सार होयके मी मकीदुनिया को कना चली गयो।

¹⁴ पर परमेस्वर को धनवाद होय, जोन मसीह को कन लक अपरो जीत को खुसी मा हमारो देख-रेख करत होतो। अना हमरो कन लक अपरो अक्कल की मीठ्ठो खुसबू हर जघा फैलावा से।

¹⁵ काहेकि बचनवालो अना नास होवन वालो, दुई को लाई परमेस्वर को पक्को अमीच मसीह को खुसबू सेत।

¹⁶ उन लोक गिनको लाय, जोन नास को रस्ता मा सेत, मरन को बदबू सेत। जोन उनला मार डाकेत। परा बचायो हुयो लोक गिनको लाय, एक खुसबो जसो सेत। जो जिंदगी देवा सेत। परा यो काम को लाय कोन साजरो सेत?

¹⁷ परमेस्वर को बचन ला लोकगिन जसो मिलावट करके बिकन वालो जसो अमी नही सेजन। परअ परमेस्वर ना अमीला धाड़ी सेत, का वोको हाजरी मा ईमानदारी लक वोको बचन ला सांगनो सेत।