2 कुरिन्थियो 13 - सत मारग पर चलन वारो किताब

आखरी चेतावनी अना बधाई

¹ अबा मी तिसरो बार तुमी लोकगीन कना आवासू दुई या तीन पुरुप को संग हरेक गोस्टी को निवारन होहेत। जसो का पवीतर गिरंथ कव्हसेत।

² जसो मी जबा दुसरो बार तुमरो संग होतो। वसोच अबा दुहुर लक, उन लोकगीन ला जोन ना पाप करिसेत अना तुमी सबला मी सांगसू, का मि आहिन तो तुमरो खैरियत नाहती।

³ काहेका तुमी तो असो गोस्टी को सबुत माँगसेव। का मसीह मोरोलक गोस्टी करासे, जोन तुमरो काजी कमजोर नही पर तुममा ताकतवर से।

⁴ उ कमजोरी को कारन कूरूस मा चघायो, पर उ परमेस्वर को ताकत लक जित्तो से। आमी भी ओमा कमजोर सेजन। पर परमेस्वर को ताकत लक जोन तुमरो लाय सेत, वोको सँग जित्तो रव्हबिन।

⁵ आपरो आप ला परखो, का भरोसा मा सेव का नही। आपरो आप ला जाँच लेव। का तुमी आपरो बारे मा यो मालुम नाहती का यीसु मसीह तुमरो मा सेत? नही तो तुमी जाच मा निकम्मा हिटासेव।

⁶ पर मोरी आस असो सेत का तुमिला मालुम भई जाय का आमी निकम्मो नाहती।

⁷ आमी आपरो परमेस्वर लक असो पिराथना करीसेजन, का तुमी कोनी बुराई नोको करो। लोकगीन ला साजरा चोवन काजी नही पर एकोलाय तुमी भलाई को काम करो का चाहे कोनी अमीला नाव धरेत यो मंजूर सेत आमी भलाई च करबिन।

⁸ काहेका हमी खराई को बिरोध मा काही नही कर सकत पर सच को काजी कर सका सेजन।

⁹ जबा हमी कमजोर सेजन अना तुमी ताकतवर सेव, ता आमी खुस होव्हसेजन, अना यो पिराथना भी करासेजन की तुमी मजबुत होय जावो।

¹⁰ यो कारन मी तुमरो गयर हाजीर मा यो गोस्टी लिखासेऊ की हाजिर होयके मोला ओना हक को जसो जोनला पिरभु ना बिगाड़न को साठी नही पर बनावन को साठी मोला दियो से, कड़ाई लक काही करनो नही पड़ेह।

¹¹ एकोलाय अगो भाऊ खुस रव्हो! साजरो पक्को बनतो जावो अना धिरज राखो। एक बिचार राखो, मिलाप लक रव्हो! पिरेम अना सान्ती देवन वारा, परमेस्वर तुमरो संग होहेत।

¹² एक दुसरो ला पिरेम लक पवीतर नमस्कार करो!

¹³ परमेस्वर को पिरेम लक सबा पवीतर लोक तुम्हिला पिरभू यीसु मसीह मा नमस्कार कव्हसेत

¹⁴ पिरभू यीसु मसीह को किरपा अना परमेस्वर को पिरेम अना पवीतर आतमा को संगति तुम सक्कडया लोक को सग होत्यो रव्हे आमीन!