1 थिस्सलुनीकियो 3 - सत मारग पर चलन वारो किताब

¹ एको लाई जबा हमी ना लगत नही सह सकया। तबा हमी न अथेने नगर मा एकलो रह जानो समझया।

² अना आमी ना आपरो भाऊ अखीन मसीह की साजरो बारता मा परमेस्वर ला संग देन वारा दास तीमुथियुस ला धाड़िया, का तुमरो भरोसा मा तुमला बड़ावा देके पक्को करेहत अना समझाहेत।

³ जेनको लक एना दुख लक कोनी भी इतानी-उता नही होय जाव, तुमी खुदच जाना लेईसेव का हमी एको लाई ठहराया गईसेजन।

⁴ पक्को मा जबा हमी तुमरो संग होतो, त तुमला पुढ़ा च सांग देत होता का हमला दुख सवनो पडेत। अना भयो भी वसोच जसो का तुमी जानासेव।

⁵ एना कारन जबा मोरो लक अखीन न सहयो गयो त मीना तुमरो भरोसा की घटना जानन लाई धाड़ियो, काही असो नही होवा का परखन वालो न तुमरी परिक्सा करी रहेस अना हमारो महेनत बेकार भय जाहेत।

⁶ पर अबा जबकि तीमुथियुस तुमरो भरोसा अना पिरेम की साजरो बारता आन के हमरो जवर लवट के आयो अना वोना यो भी सांगीसेस का तुमी ना हमला पिरेम लक हेत राखियासेव अना जसो हमी तुमला वसोच तुमी भी हमला देखन लाई लगत बेरा तकन तरसासेव।

⁷ एको कारन अगा भाऊ हमरो सबच दुख मा अना कस्ट मा भी तुमरो भरोसा को कारन हमीना तुमरो बिसय मा सान्ती पाया।

⁸ अदी तुमी पिरभू मा पक्को लक रव्हो त हमी सचमुच जित्तो सेजन।

⁹ हमी वोना सबरी खुसी को बदला मा परमेस्वर ला कसो धनबाद देबो, जेनको लक हमी तुमरो कारन अपरो परमेस्वर को पुड़ा खुसी होवबिन।

¹⁰ हमी रात-दिवस मोठी लगन लक पिराथना करा सेजन, का तुमरो तोन्ड देखबिन अना तुमरो भरोसा घटी कमी पूरी करबिन।

¹¹ अबा हमरो परमेस्वर अना बाप खुदच अखीन हमरो पिरभू यीसु तुमरो जवर आवनो मा हमला रास्ता देखाहे।

¹² अना पिरभू करे का तुमी एक दुसरो को लाई अखीन सबच मानूस गीन को लाई पिरेम मा उन्नती करत जाने अना बढता जाने। जसो का हमी भी तुमरो लाई करी सेजन।

¹³ का जबा हमरो पिरभू यीसु, अपरो सब पवीतर लोक गीन को संग मा आहे, त उ तुमरो हिरदय ला परमेस्वर आमरो बाप को पुड़ा पवितरता मा खरो राखे।