1 पतरस 5 - सत मारग पर चलन वारो किताब

¹ जोन तुमरो मा बुजरुक सेत। वोला मी यो निवेदन करसेऊ, का मी भी एक बुजरुक सेऊ अना मसीह को दुख को पुरुप देवासू, अना वोको गौरव मा सह भागी होवके तुम्हीला समझावसू,

² परमेस्वर को वोना करप को जोन तुमरो मध्ये राहतत तुम्ही रक्सन केले पाहिजे। अना यो दड़प लक नाही तर परमेस्वर को इक्सा लक, आनंद लक अना लोभ लक, नाही तर मनलक।

³ जोन लोकावर तुमिला जबाबदारी सोपयो गयो सेत। उनको पर अधिकार गाजवू नका तर करपा साठी आदर्स बना।

⁴ अना जबा मुख्य संरक्षक परगट होयेत। ता उ तुम्हाला महीमा को मुकुट देवन आहेत। जो मुरझात नाही।

⁵ अना तुमी जवान हुन, तुम्ही आयको बुजरुग को अधीन रव्हो, परंतु आपरो सब च जन एकमेक को सेवा करन लाय साठी नरम रव्हो एकोलाय का “परमेस्वर गरब करनवालो को विरोध करतत, पर गरिबांना मदत करतत।”

⁶ एकोलाय परमेस्वर को ताकतवर हात को खाल्या नरम रव्हो, मजे काबील बेरामा तुमला वरता वाढवावा।

⁷ तुमरो सप्पा चिंता भगवानवर टाका, काहेकि उ तुमरी सूदी लेवासेत।

⁸ तू संयमित राहा अना जागत राहा! तुमरो विरोधी, सैतान सेर सिरिको गरजसे अना कोनाला फाड़ डाकू असो च तक्का मा रव्हसेत।

⁹ तुम्ही बिस्वास मा खम्मा जसो उभो राव्ह, अना वोको सामुर जाव। तुम्हिला मालुम सेत का जग भरात को आपरो भाऊगिन असा परकार लक दुख भोगत आहेत।

¹⁰ अता परमेस्वर, जोन सब पर किरपा करा सेत, जोना तुम्हिला मसीह को बीच मा अमर बेरा को गौरव काजी बुलायो सेत। तुम्ही काही काल सहन करनो को बाद तुम्हीला सिद्ध अना सामरथवान करहेत।

¹¹ वोको राज सदा हरामेसा रव्हे। आमेन।

¹² मी सिल्वानस अना जोनला मी बिस्वास भाऊ समजतो वोकोच हात थोड़ो सो लिखि सेऊ अना गवाहि देईसेऊ। यो परमेस्वर की खरी किरपा सेत। वा बीच पक्को रव्हो।

¹³ तुमरो जसो बेबीलोन मध्ये निवाड़ो गयो लोक सेत अना मोरो टूरा मरकुस तुम्हिला सलाम सांगासेस।

¹⁴ माया को चुंबा लक एकमेक ला सलाम करो टुम सबा मसीह मा सेव तुम्हिला सांती भेटेत।