1 पतरस 4 - सत मारग पर चलन वारो किताब

परमेस्वर को लाय जिंदगी

¹ यीसु मसिहा ना खुदको देहावर दुख भोगयो। ता तुमी वोच मनसा ला, आपरो देह मा हतियार जसो धरन करा, काहेका जोन मानूस ना दुख भोगयो सेत। उ मानूस ना पाप लक नातो तोडयो सेत।

² अना वोला भबिस्य मा आपरो बचयो देह को जिंदगी आपरो मरजी लक नही तर परमेस्वर को मरजी लक बिताव।

³ काहेका गैरबिस्वासी लोकांगिन, को इक्सा अनुसार काम करन्यात अना मोह, दारुखोरी, नसा, छिनालापन, अना घिरना लायक मूर्तिपूजा, वाईट इक्सा को बिचमा लगत बेरा गवायो, यो लगत भयो।

⁴ अता तुमी वोना लोकगीन को बरोबर एसो आराम को दलदल मा डुंबू नका। मंग वोको लक अचरज होवासे का वय तुमरो निंदा-बदी करतात।

⁵ उनला जित्तो अना मरियो लोकगिन को न्याय करनवालो परमेस्वर ला उनको बरताव को हिसाब देवनो पड़हेत।

⁶ यो च कारन सेत का मेला लक गिनला साजरो बारता आयकायो गयो। जेने कारन देहावर मानूस को जसो सजा मिल्यो होतो। तरी जीवनात वय परमेस्वर सोबत सुसंगत रहतो रव्हे।

⁷ प्रत्येक गोस्टी को अखट्ट जवर आयो सेत। तुमी संतुलन अना संयम राखो। जोन लक तुमी पिराथना करू सकत।

⁸ मुख्य गोस्टी मंजे एकमेक को मनमा मना पासुन गहरो पिरेम बनायो राखो। काहेका पिरेम लगत पापगिन ला पांघरून घालते।

⁹ तुमी कुरकुर नोको करा, तरी एकमेक को स्वागत करनो पाहिजे।

¹⁰ जोनला यो दान भेटयो सेत। उ परमेस्वर को अनेक किरपा को तंदुरुस्त दीवान जसो दुसरो को सेवा करन्या साठी वापरावे।

¹¹ जोन परबचन देवासे, उ असो लक्छात ठेवा जसो परमेस्वर सांगासे। जोन कोनी धरम को सेवा करतत, वोला असो समजून पायजे का परमेस्वर वोला ताकत देवा सेत। या सप्पा गोस्टी मध्ये यीसु मसीह लक परमेस्वर को गौरव परगट होयेत। वैभव अना ताकत परमेस्वर साठी च आहेत। आमेन!

मसीह को दुख मा संगी होवनो

¹² अगो चहेतो भाऊगिन! तुम्ही लोकगिन को स्तोतून परीक्सा घेयो जावासे। यो कारन अचरज मा होऊ नका, काहेका यो एक विलच्छन घटना नाहती।

¹³ अदी तुमी लोक गिन पर अत्याचार होवासेत। तर तुम्ही मसीह को दुखमा भागीदार होवनो को आनंद मनाव। जोन दिवस मसीह को गौरव परगट होयेत, उ दिवस तुम्ही खूब आनंद करयेती।

¹⁴ अदी मसीह को नाव मा तुमरो बेइज्‍ती होवासे। तर तुम्ही खुदला धन्य मानू सकत, कारन परमेस्वर को गौरवसाली आतमा तुम मा सावली करा सेत।

¹⁵ खुनी, चोर, कु करम करनवारा अना दुसरो को काम मा टेगड़ी अड़ावन वारा होयके तुमरो लक कोनी मानूस दुख नोको भोगे।

¹⁶ पर यदी एखाद ला मसीह होवन को नातो लक दुख सहन करे, तर कोनी लाज लगे नाका। तर परमेस्वर को गौरव साठी यो नाव स्वीकारनो पाहिजे।

¹⁷ काहेका न्याय को बेरा सुरू भयी गयो सेत। अना उ खुद परमेस्वर को कुटुंब लक सुरु भयो सेत। अदि आपरो लक असो सुरुवात भयो से, तर मग जोन परमेस्वर को साजरा बारता मा बिस्वास नही ठेवत उनको काजक दसा होयेत?

¹⁸ अदी नेक मानूस को कठनाई लक सुटकारा होयेत। तर ते भांडन व पापी एनाच काय होयेत?

¹⁹ एकोलाय जोन लोक परमेस्वर को इक्सा अनुसार पीडित सेत। उ साजरो चांगल्या गोस्टी करतो राहतात, अना आपरो जीव अना बिस्वास को निरमान करता परमेस्वर ला देतात।