1 पतरस 2 - सत मारग पर चलन वारो किताब1 एको लाई सबच पिरकार को बैर-भाव छल अना कपट, जलन ईरसा बदनामी सबला छोड़ देव। 2 अना नाहानो लेकरा को जसो सुध्द आतमिक दूध को लालसा करो। जोनलक तुमरो बिकास अना सूटकारा को लाय बड़तो जाव। 3 काहेकी तुमी ना पिरभू की किरपा को स्वाद चाखीसेव। 4 यीसु मसीह को जवर आव। उ जित्तो गोटा से। वोला संसारी मानूस गीन न नकार दियो होतो। पर जोन परमेस्वर को लाय लगत किमती से। अना वा परमेस्वर लक बेचयो हुया सेत। 5 तुमी भी जित्तो गोटा को जसो एक आतमिक भवन बनतो जाय रहयो सेव। जेनको लक एक असो याजकगीन को पवीतर समाज को रूपमा वोको सेवा कर सको। जोनको काम आतमीक बलिदान चाघावनो सेत। जोन यीसु मसीह को कन लक परमेस्वर को अपनाय जावन वालो होहे। 6 काहेकी पवितर गीरंथ मा लिखीयो से, “देखो, मी सिय्योन मा कोनटा को गोटा राख रहयो सेऊ। जोन बेचयो हुयो अना लगत किमती सेत। अना एकोमा जोन कोनी बिस्वास करहेत ओला कभीच लजानो नही पड़हेत।” 7 अना तुमी बिस्वासी गीन को लाई यो गोटा बेसकिमती से। पर अबिस्वासी गीन को लाई; वोच गोटा जोनला मिस्तरीगीन न नकार दियो होतो, “ओच सब लक कामी कोनटो को गोटा बन गयो।” 8 अना खोद्दा लगन को गोटा, “अना ठोकर खावन को चट्टान बन गयो।” लोग ठोक्कर खावासे, काहेका वय बचन को पालन नही करतत। अना बस योच उनको लाय ठहरायो गयो सेत। 9 पर तुमी एक बेचयो हुयो लोख सेव। याजकगिन को एक राज सेव, अना खुद परमेस्वर को परजा सेव। एक पवितर परजा, खुद परमेस्वर एक असो जन समूह मजे परजा सेव। तुमिला परमेस्वर ना इंधार लक उजाड़ मा आपरो अद्भुत गुन परगट करन लाय हाकली सेत। 10 एक बेरा होतो जबा तुमी परजा नही होतो। पर अबा तुमी परमेस्वर को परजा सेव। एक बेरा तुमरो पर दया नही भई होती। पर अबा दया भई से। 11 अरे चहेतो संगीहुन, तुमी संसार मा परदेसी जसो सेव। निवेदन करासु का तन को इक्सा लक दुहुर भई जाव, जो तुमरो आतमा लक लड़ाई करासेत। 12 गैर बिस्वासि गिन को बीच अपरी चाल-चलन बेस बनाय राखो। जेनको लक वय जेना गोस्टी गीन मा कुकरमी कहके तुमरी निन्दा-बदी करासेत। वोच गोस्टी मा तुमरो भलो काम गीन ला देखके नियाव को दिवस परमेस्वर की महिमा करहेत। 13 पिरभू को लाई राजा अना मानुसगिन लक ठहरायो गयो हरेक अधिकारी गिन को अधिन रव्हो। राजा को यो काजी काहेका उ सबको मुखिया सेत। 14 राजपाल गीन को अधिन रव्हो। रजा न उनला खोटो काम करनवालो गिनला सजा अना भलाई करन वारा की मान बड़ाई करनो को लाई धाड़यो सेत। 15 परमेस्वर असो चाव्हासेस का तुमी आपरो भलो काम करके बेअकल की गोस्टी बोलन वालो कम अक्कल मानूस गीन को टोन्ड बंद कर देवो। 16 आपरो आपला छुटटो समझो। पर आपरो आप को यो छूट ला बुरो करन काजी नोको बवजो पर आपरो आपला परमेस्वर को दास समझ के चलो। 17 सब को मान राखो। भाऊगीन लक एकता पिरेम रखो। परमेस्वर को भेव मानो। अना राजा को आदर मान करो। 18 अगो चाकर हुन आदर लक आपरो मालिक गिनको अधीन रहवो। केवल जो भलो अखिन नरम सेत उनको च नही, पर उनको भी जोन दुस्ट से। 19 काहेकी अदि तुमी परमेस्वर को मरजी सेत सो समझ कै दुख उचल सो ता परमेस्वर यो गोस्टी काजी तुमला आसीरवाद देहेत। 20 अदी तुमीला खोटो काम करके सजा भेटा सेत। तो काजक फायदा सेत? पर तुमी साजरा काम करासो अना दुख भेटा सेत अना मार खावासेव ता परमेस्वर तुमिला आसिरवाद देवासेत। 21 असोच परकार दुख उचलन काजी हाकलो गयो सेजन। काहेका मसीह खुदच तुमरो लाय दुख भोगयो सेत। अना खुदच नमूना बन गयो। वसोच तुमिला भी चलनो सेत। 22 ना तो वोना कोनी पाप करीस, अखिन ना तो कोनी वोको टोन्ड लक छल-कपट गोस्टी हिटी। 23 जबा वोला गारी दियो गयो। ता वोना जवाब मा गारी नही दियो। दुख सहतो गयो, धमकी नही दियो। पर अपरो आप ला वोको हात सोप दियो। जोन न्याय लक बिचार करा सेत। 24 मसिहा खुदच अपरी देह मा हामरो पाप बुराई आन के कूरूस मा चघ गयो। जेनको लक हमी पाप बुराई को लाय मर गयो अना धरमिपन अना नेकी को लाय जित्तो भयि गयो काहेकी वोको घाव लगनो लक तुमी साजरा भईसेव। 25 तुमी त मेढा गीन की जसो भटक रहयो होतो। पर अबा अपरी आतमा को चरानवालो अना कलिसीया को मुखिया को जवर लवटके आईसेव। |
The New Testament in Powari Language © The Word for the World International and Powari Madhya Pradesh, 2023.