1 पतरस 1 - सत मारग पर चलन वारो किताब

¹ यीसु मसीह को बेचयो गयो, पेरीत पतरस को यो चिठ्ठी, भगवान को उन बगरो हुवो बिस्वासी गिनको नाव, जोन पुन्तुस गलातिया, कप्पदूकिया आसिया अना बिथुनिया मा छेतर मा तितर-बितर होयके रव्हसे।

² तुम जोन परमेस्वर बाप को भबिस्य की गियान लक बेचयो गयो सेव। अना पवितर आतमा लक पवीतर कियो गयो सेव। जोनलक यीसु मसीह को हुकूम मानो। अना वोको रकत को छिड़काव लक तुम लोक गिनमा लगत सान्ती अना दया भेटेत।

एक जित्तो आस

³ धन्य से, आमरो पिरभू यीसु मसीह को परमेस्वर! जेना यीसु मसीह को मरयो हुयो मा लक जित्तो होवनो को कारन, अपरी मोठी दया लक, हमरो जीवित आस को लाई, नवतो रीती लक जलम देईसेस।

⁴ जोन वारसाना हक तुमी लोक गिन काजी सरग मा राखयो हुया सेत। उ नास नही होवन वालो, बेडाग, अमर सेत।

⁵ तुमरो बिस्वास को लाई, परमेस्वर की ताकत, तु मरो वोना सूटकारा को लाय सुरक्सित राखासेत। जोन अबा लक सेत, अना आखीर मा परगट होवन वालोसेत।

⁶ अबा काही दिवस लाई कई पिरकार की परिक्सा गीन को लक तुमला दुखी होवनो जरूरी सेत। मर एको लाय तुम खुस होवो।

⁷ काहेका तुमरो परखो हुयो बिस्वास जोन इस्तो लक तायो हुयो नासवान सोन्नो लक भी लगत किमती से। यीसु मसीह को परगट होवनो पर परमेस्वर कन लक मान बढाई अना महिमा भेटेत।

⁸ तुमीना यीसु ला कभीच नही चोवयो सेव। अना वोको लक बगर देखयो पिरेम रखासेव। अना वोको पर बगर देखयो बिस्वास भी करासेव। अना यो बिस्वास को कारन तुमी लगत खुसी अना मगन सेव। जोन महिमा लक भरयो सेत। जोनला सागयो नही जाय सकत।

⁹ अना अपरो बिस्वास को बदला मा आतमा को सूटकारा ला भेटासो।

¹⁰ एना सूटकारा को बारे मा, वय भविस्यवक्ता गीन न लगत ढुढ़-ढांड अना खोज-बीन करीन। जेनको लक वोला किरपा को बारे मा जोन तुमी पर होवन को होतयो, भबिस्य वानी करी होतिन।

¹¹ उन भविस्यवक्तागिन ना मसीह को आतमा लक यो जानकारी हासिल करीन। का यीसु मसीह पर कसो दुख आवन वालो सेत। अना उ महीमा जोन दुख उचलन को मंघा परगट होहेत उ कसो होहेत? अना यो गोस्टी दुनिया मा कब होहेत। अना तबयो दुनिया को काजक होहेत। यो सब जान कारी मसीह को आतमा उनमा परगट कर रहयो होतो।

¹² का वय इन गोस्टी ला, आपरो लाय नही, पर वय तुमरो बारेमा सागत होतिन। जेनको खबर तुमला उन लोकगिन को लक मिलयो। उ गोस्टी सरग को कन लक भेजयो गयो। पवितर आतमा को उकसायो जावनो पर तुमिला आयकवायो गयो सेत। अना इन गोस्टी ला चोवनलाय सरगदूत गिन भी मनसा राखत होतिन।

¹³ एना कारन अपरी मन ला पक्को करके अना सचेत रव्हो। अना आपरो मनला मारके रव्हो। अना वोना वरदान को आस मा रव्हो जोन यीसु मसीह को परगट होवन मा तुमला भेटनवारा सेत।

¹⁴ हुकूम मानन वालो टूरा गीन को जसो, अपरी वोना बेरा की जुनो मनसा को अनुसार आपरो आपला नोको बनाओ।

¹⁵ पर जसो तुमरो हाकलनवारा पवितर से, वसोच तुमी भी अपरा सबरी चाल-चलन मा पवीतर बनो।

¹⁶ गिंरथ असो भी कव्हसेस। “पवितर बनो काहेकि मी पवीतर सेऊ।”

¹⁷ अना यदी हरेक को करम को अनुसार बिना पक्स लियो न्याय करन वारा परमेस्वर ला तुमी अरे बाबूजी कव्हके हाकला सो। तो यो दुनिया जोन परदेस जसो सेत। आपरो जित्तो जी परमेस्वर को भेव मा आपरो जिंदगानी बिताव।

¹⁸ काहेकी तुमी जानासेव, का तुमरो बेकार चाल-चलन, जोन बापदादा गीन लक चलतो आयो से। उनको तुमरो सूटकारा, चांदी सोनो अना नास होवनवालो चीज गीन को किमत मा नही भयो।

¹⁹ पर बेकसूर अना निरदोस पाठी मसीह को कीमती रकत लक भयो सेत।

²⁰ यो जगत को सुरूवात लक पयले च वोला बिच लियो गयो होतो। पर अबा एना आखीर जुग मा तुमरो लाई परगट भयोसेत।

²¹ वोना मसीह को कारन तुमी वोना परमेस्वर पर बिस्वास करासेव। जोनना वोला मरयो हुयो मा लक जित्तो कर दियो। अना महिमा देईस, असो लक तुमरो बिस्वास अखिन आस परमेस्वर पर थम जाय।

²² अबा चोवो जबा तुमी ना सच्चाई ला मानत-मानत, सच्चौ भाऊचारा लक निस्कपट माया ला चोवान काजी आपरो आतमा ला पवितर कर लियो सेत। ता पवितर मन लक तेजी लक एक दुजो लक माया करन को आपरो निसान बनालेव।

²³ काहेकी तुमी न नासवान नही पर अविनासी बीज लक दुबारा जिंदगानी नही पायो सेव। बलकि यो उ बीज को फर सेत। जोन अमर सेत। तुमारो नवतो रीती लक जलम परमेस्वर को उ साजरा बारता लक भयो सेत, जोन जित्तो अना अटल सेत।

²⁴ काहेकी “हर एक देह गवथ को जसो से, अना वोकी सबरी महिमा गवथ को फूल को जसो से। गवत सूख जासे अना फुल झड़ जासे।

²⁵ पर पिरभू को बचन जुग-जुग रव्हसे” अना योच साजरो बारता को बचन से। जोन तुमला आयकायो गयो होतो।