1 योहन 2 - सत मारग पर चलन वारो किताबमसीह आमरो सहारा 1 एकोसाठी अगा माया को टुरागीन, यो गोस्टी मि तुम्ही ला एकोलाई लिख रही सेऊ तुमी पाप मा नोको पड़ो अना अदी कोनी पाप करेत ता बाबूजी को कठा आमरो पापहुन लक बचावन साठी बचावन वालो एक सहारा से, मन्जे उ से न्यायी यीसु मसीह। 2 उ एक बलिदान से जोन हमारो पापहुन ला छिमा करासे न केवल आमरो पापहुन को मनजे सप्पा संसार को पापहुन को। 3 अदी आमी परमेस्वर को हुकूम ला मान लेवबोन ता योच उ रास्ता सेत जेकोलक आमी पिक्को होवबिन का आमीना खरोखर ओला जान लिया सेजन। 4 अदि कोनी कव्हसे की, “मि परमेस्वर ला जानासेऊ!” अना ओको हुकूम गीन ला नही मानासे ता उ खोटो से। ओको मन मा खरो नहाय। 5 पर अदि कोनी परमेस्वर को बचन को पालन करासे ता ओमा परमेस्वर को माया सिध्द भयी से। योच उ रास्ता से जकोलक आमला पिक्को होवासे का आमी परमेस्वर मा पिक्को सेजन। 6 जोन असो कव्हसे का उ परमेस्वर मा बनयो से, ओला यीसु को जसो जिंदगी जीवनो पाहिजे। सब लक माया राखो 7 अगा चहेतो, मि तुमला कोनी नवो हुकूम नही लिख रही सेउ पर यो एक सनातन हुकूम से। जोन तुमला सुरुवात मा च देव देयि गयी होती। यो जूनो हुकूम उ साजरो बारता से जोन तुमना आयकियो सेव। 8 मि तुमला एक अखिन दुसरी नवी हुकूम लिख रही सेऊ। ऐना बिसय को सत्य मसीह को जिंदगी मा अना तुमरो जिंदगी हुन मा उजागर भयी से काहेकि अंधारो खतम होय रही से अना खरो उजियाड़ो ता चमक च रहयो से। 9 जोन कोनी असो कव्हसे का मि उजाडो मा सेव अना आपरो भाऊ लक बैर राखासे, ता उ अबा तकन अंधार मा बनयो हुयो से। 10 पर जोन कोनी आपरो भाऊ लक माया राखासे, उ उजाडो मा बनयो रव्हसे, अना ओको जिंदगी मा असो काही च नही से जेनको लक कोनी पाप मा नही पड़हेत। 11 पर जोन कोनी आपरो भाऊ लक ईरसा राखासे, उ ईंधारो मा से। उ अंधारो मा जिंदगी जी रही से। उ नही जाना, उ किता जाय रही से। काहेका ईंधारो ना ओको डोरा भोकना कर देईसेस। 12 ओ माया को टुराहुन, मि तुमी ला एकोलाई लिखासेऊ, काहेका यीसु मसीह को काज तुमरो पाप छिमा कियो गयी सेत। 13 ओ बाबुजीहुन, मि तुमीला एकोलाई लिखासेऊ, काहेका तुमी, जोन सूरूवात लक रव्हसे तूमी ओला जानासेव। ओ जुवानहुन, मि तुमला एकोलाई लिखासेऊ, का तुमना ओना बुराई पर जीत पायासेव। 14 ओ लेकराहुन, मि तुमला लिख रही सेऊ, काहेका तुमी परमेस्वर बाबूजी ला जान गयासेव। ओ बाबुजीहुन, मि ना तुमीला एकोलाई लिखासेऊ, काहेका जोन सूरू लक से तुमी ओला जान गयी सेव। ओ जुवानहुन, मिना तुमला एकोलाई लिखासेऊ, काहेका तुमी ताकतवर सेव, अना को गोस्टी तुमी मा बनो रव्हसे, अना तुमी ना ओनो बुराई पर जीत पायासेव। संसार लक माया नही करनो 15 संसार ला अना संसार की चीजगीन ला माया नोको राखो। अदि कोनी संसार लक माया राखासे, ता ओको दिल मा बाबूजी को माया नही से। 16 काहेकि ऐना संसार को हरेक चीज, जोन पर लोक एतरो घमन्ड करासेत। मोठयो बाबूजी को कन लक नही से पर उ ता संसारिक से। 17 यो संसार आपरी लालसा हुन अना मरजीहुन सकट खतम होतो जाय रही से पर उ जोन परमेस्वर को मरजी ला मानासे, अमर होय जासे। मसीह-बिरोधीहुन को मंघा नोको होवने 18 ओ चहेतो टुराहुन, यो आखरी बेरा आय गयी से! अना जसो का तुमिना आयकिया सेव का मसीह को बिरोधी आय रही से। एकोलाई अब कई मसीह बिरोधी उपजीसेत। ऐनाच आमी जानबिन का आखरी बेरा आय गयी से। 19 मसीहको बिरोधी आमरो च बीच लक हिटीसेत पर बाकई मा वय आमरो नही सेत काहेकि अदि वय खरो आमरो होतीन ता आमरो संगी होतीन। पर वय आमला तज देयि सेत जेकोलक वय यो चोवाय सकेत का उनमा लक कोनी भी पक्को मा आमरो नाहती। 20 पर तुमरो ता ओना पवीतर लक अभिसेक हुयो से। एकोलाई तुमी सब सत्य ला जानासेव। 21 मिना तुमला एकोलाई नही लिखासेव की तुमी खराई ला नही जानासेव, पर तुमी ता ओला जानासेव अना एकोलाई का सत्य लक कोनी खोटो नही हिटसे। 22 पर जोन यो कव्हसे का यीसु मसीह नाहती, उ खोटो से। असो मानूस मसीह को बैरी से उ ता बाबूजी अना टूरा दुही ला नकारसे। 23 जोन कोनी टूरा लक मुकर जावसे ओको जवर बाबूजी भी नही: पर जोन टूरा ला मान लेवासे, उ बाबूजी ला भी मानासे। 24 जोन काही तुमी ना सुरू लक आयकिया सेव, वाच तुम मा बनयो रव्हे; जोन तुमी ना सुरू लक आयकियो सेव; अदि उ तुमी मा बनयो रव्हे ता तुमी टूरा मा अना बाबूजी मा बनया रव्हो। 25 ओना आमला अमर जिंदगी देन को परन करीसेस। 26 मिना यो गोस्टी तुमला उन लोकहुन को बारे मा लिखयोसेऊ, जोन तुमला भरमावन को तक्का मा रव्हसेत। 27 पर तुमरो उ अभिसेक जोन ओको कन लक करयो गयो, तुमी मा बनयो रव्हसे; अना तुमला ऐको मकसद नही का कोनी तुमला सिखाहे वरन जसो उ अभिसेक जोन ओको कन लक करयो गयो तुमला सबच गोस्टी सिकावासे, अना यो खरो से अना खोटो नहाती; अना जसो ओना तुमला सिकायो से वसोच तुमी ओमा बनयो रव्हसो। परमेस्वर को औलाद 28 एकोलाई ओ चहेतो लेकराहुन, ओमा बनयो रव्हो का जबा हमला ओको गियान होय ता आमी हिम्मत पाय सकबिन, अना आमी ओको मंग आवनो को बेरा आमला लजाबिन नहि। 29 अदि तुमी यो जानासेव, की उ न्यायी से, ता यो भी जानासेव का जोन कोनी नेकी को काम करासे उ परमेस्वर लक जन्मो से। |
The New Testament in Powari Language © The Word for the World International and Powari Madhya Pradesh, 2023.