1 योहन 1 - सत मारग पर चलन वारो किताब

जिंदगानी को बचन

¹ उ दुनिया को सुरुवात लकच ही होतो: आमीना येला आयकासेजन, आपरो नजर लक चोयोसेजन से, धियान लक चोयो सेजन, अना येला खुदच आपरो ही हातगीन लक आमीने येला छुयिसेत। आमी ओनो वचन को बारे मा साँग रही सेजन जो जीवन से।

² ओनो च जीवन को गियान आमीला करायो गयो। आमिना ओला चोया सेजन। आमी ओको गवाही सेजन अना अबा आमी तुमी लोकहुन ला ओना च अमर जिंदगी को एलान कर रही सेजन जोन बाबूजी को संग होतो अना आमी जेनको गियान करायो गयो।

³ जोन काही आमी ना दिसया अना आयको सेजन ओको खबर तुमला देसेजन, एकोलाय की तुमी भी आमरो संगा संगी सेजन, अना आमरो यो संगीपन बाबूजी को संगा अना ओको टूरा यीसु मसीह को संग से।

⁴ अना यो गोस्टी आमी एकोसाठी लिखासेजन का तुमरो खुसी पूरी भयी जाहे।

परमेस्वर आमरो पापहुन ला छिमा करासे

⁵ आमिना यीसु मसीह लक जोन साजरो बारता आयकोसेजन, उ यो से अना ऐलाच आमी तुमला आयकी सेजन, परमेस्वर उजियाड़ो से अना ओमा जरासो भी अंधारो नही से।

⁶ यदि आमी कव्हबिन का आमी ओको संगी सेजन अना पाप को अंधारो जिंदगी ला जीवत रहया ता आमी खोटो कव्हसेजन अना खरो को अनुसरन नही कर रही सेजन।

⁷ पर यदि आमी अबा उजियाड़ो मा पुढ़ा बढ़सेजन काहेकि उजियाड़ो मा च परमेस्वर से-ता आमी भरोसा को रुप मा एक दुसरो को संगी सेजन, अना परमेस्वर को टूरा यीसु को रकत आमला सबच पापहुन लक सुद कर देवासे।

⁸ अदी आमी कव्हबिन का आमी मा काही पाप नहात, ता आपरो आप ला दगा देसेजन अना आमरो मा खरो नाहोति।

⁹ अदी आमी आपरो पाप ला मान लेबिन, ता उ आमरो पाप गीन ला छिमा करनो को लाई अना अमीला सप्पा अन्याय लक सुद्ध करन लाय भरोसा लायक अना न्यायी से।

¹⁰ अदी आमी कव्हबिन का आमी ना कोनी पाप नही करयो सेजन, ता आमी परमेस्वर ला खोटो ठहरा सेजन अना ओको बचन आमी मा नहाय।