1 कुरिन्थियो 8 - सत मारग पर चलन वारो किताब

मुरति अना परसाद

¹ अबा मुरत गीनको पुड़ा चघायो हुयो बली को बारेमा, आमी जाना सेजन, अना आमी सक्ड़िया मानूस ला यो मालूम सेत। पर पिरेम लक सबको उन्नती होवासेत, पर गियान गरब ला पैदा करा सेत।

² अदी कोनी असो समजा सेत का मोला सब मालूम सेत। तो जितरो वोला मालूम होवनो पाहिजे, वोतरो वोला साजरा लक मालूम नाहती।

³ पर अदी कोनी परमेस्वर लक माया राखासेत, ता परमेस्वर वोला चिन्हअ सेत।

⁴ ता आमीला मुरत गीनको पुड़ा चघायो हुयो जेवन को बारेमा अमीला मालूम सेत, का मुरती दुनिया मा काही नाहती। अना एक परमेस्वर ला छोड़, कोनी दुसरो परमेस्वर नाहती।

⁵ अमीला यो मालूम सेत, का बादल अना धरती मा, ढगभर परमेस्वर सेत, अना पिरभू भी सेत।

⁶ मंग आमरो कठा एकच परमेस्वर सेत, मजे परमेस्वर दआजी जेनना सब चीज ला बनाइसेस, अना उ आमीला भी बनाइसेस, एकोलाय उ आमरो भी पिरभू सेत, वोच यीसु मसीह सेत।

⁷ पर यो सत हरेक मानूस ला मालूम नाहती, काही लोकगीन, हाल मा मुरती पुजा करनवारा होतिन। वय मुरत गीन को पुड़ा चघायो हुयो जेवन समजके जेवत होतिन, अना उनको मन कमजोर होवन को कारन, अपवीतर हो जावासेत।

⁸ जेवन अमीला परमेस्वर को कठा नही धाड़ा सेस। अदी आमी जेवन नही करबीन, तो काही नुकसान नाहती। अना जेवन करबीन, तो काही फायदा नाहती।

⁹ पर सतरक रव्हजोस, असो ना भई जाय का, तुमरो यो हक कोनी निरबल बिस्वासी को पड़न को कारन भई जाय।

¹⁰ काहेका कोनी तोरो जसो अक्कल वर ला, मुरत गीन को पुड़ा चघायो हुयो जेवन मंदिर मा जेवन करत चोवके, उ भी जेवन करन बस जाहेती।

¹¹ असो रीत लक तोरो गियान को कारन लक, उ कमजोर बिस्वासी जोनको लाय मसीह मरयो सेत, नास भई जाहेती।

¹² अना भाऊ-बहिनहुन को बिरोध मा, असो पाप करन लक अना उनको कमजोर बिचार को कारन लक, उनको दिल दुखान को पाप करतत, जोन मसीह को बिरोध मा सेत।

¹³ एकोलाय अदी मोरो जेवन, मोरो भाऊ अना बहिनगिन को लाय, पाप को कारन बना सेत, तो मी सदा जेवन नही जेहुँ। कही असो ना भई जाय का, मी आपरो भाऊ अना बहिन को काजी पाप को कारन बन जाऊ।