1 कुरिन्थियो 5 - सत मारग पर चलन वारो किताब

कुमारगी ला कलीसिया लक हेड़ो

¹ अबा, सही मा यो आयकनो मा आवा सेत, का तुमरो बीचमा कु करम लगत फैल गयो सेत। असो कुकरम ता कोनी कुल को लोक गिनमा भी नाहती। मोला बतायो गयो सेत का एक मानूस आपरो मौसि माय को संग सो रहयो सेत।

² मंग काजक को गरब, एको उलट तुमरो मा उदासी होवनो पाहिजे। अना जोन मानूस ना असो काम कियो सेत वोला संगती लक बाहेर हेड़ो।

³ अना मी तुमरो बीच मा नही सेऊ, मी दुहुर सेऊ, मंग मन लक तुमरो संग सेऊ। तुमी असो समजो का मी तुमरो जवर सेऊ। मीना पयले लक पिरभू यीसु को नाव लक फैसला देवा सेऊ

⁴ का जबा तुमी संगति मा जमा होवने ता मोरो आतमा अना यीसु को ताकत लक,

⁵ वा मानूस को देह ला सैतान को हात मा सोप देवने। वोको देह तो नास भयी जाहेत। पर पिरभु को दिवस मा वोको आतमा बचायो जाहेत।

⁶ तुमरो गरब करनो साजरा नाहती। का तुमीला मालुम नहती? जरा सो खमिर सब मलो कनिक ला खमीर बना डाका सेत, अना जसो हाना सेत का “एक मरो मसरी, सप्पा बोडी को पानी ला, खराब कर देवसेस।”

⁷ ता तुमी जुनो खमीर ला हेड़के, आपरो आपला सूद करो, मजे नवा मलो कनिक जसो बन जावो, जसो तुमी सहीमा सेव। काहेका आमरो फसह को तिहार को पाठी, मसीह भी बली भईसेस।

⁸ एकोलाय आमी ना तो जूनो खमीर लक, ना तो बुराई, अना दुस्टपन को खमीर लक, पर बिना कपट को, अना खराई लक बेखमिरी भाकर लक, फसह को तिहार मनाबीन।

⁹ मि ना आपरो चिठ्ठी मा लिखि सेव, का छिनरापन करनवारा को संगती नोको करजोस।

¹⁰ यो जरुरी नाहती, का तुमी, यो दुनिया को छिनरा, लालची, लुटेरा, अना मुरत पुजा करनवारा, लोकगीन को संगति नोको राखो। तब ता तुम्हिला दुनिया लक हीट जानो पड़येत।

¹¹ पर मिना सहीमा, यो लिखि सेव का, अदी कोनी मसीह भाऊ कहलावा से, अना छिनरापन, लालची, मुरत पुजा करनवालो, सिवा देवनवारा, बेवड़ा, लुटेरा, होहे ता वोको सगंति नोको करा जोस। पर असो मानूस को संग, जेवन नोको करा जोस।

¹² काहेका मोला बाहेरवालो को नियाव करन लक काजक काम सेत? का तुम्हिला उनको न्याय नही करनो सेत? जोन कलीसिया मा सेत।

¹³ बाहेरवालो लोक गीनको नियाव, परमेस्वर करा सेत। पर तुमी असो खोटो काम करनवारा ला, आपरो बीच लक हेड़ देव।