VUAANA 6 - Northern Tepehuan Bible

Suxi bhibhi bhaibitukami taama mirhi odami

^1-4 Dai gokiïrï Suxi jii baasadïrï go gïï sudagi Galilea tïgidukïdï. Tiberias tïgidukatadai go gïï sudagi ïpï. Dai aidïpïrï ka miadimitadai go judidiu bagimigadï ix makïdï Daibuñigïrï tïgidu. Dai kïïga mui odami oiditadai go Suxi nïiditai go naana maaxi maaxidaragai ix makïdï ibuadana ïgai duduaditai kokokoñiadï. Daidi go Suxi ïmadï mamaatïrdamigadï tïtïsai ïmo gidiana dai ami daraiba.

⁵ Dai tïïgakai Suxi ix arhi muidutugai odami saidi itïtïdai ïgai go Pirhi, —¿Xako sabïdana aatïmï kuadagai dai bhibhidana mos ïïki odami?— itïtïdai.

⁶ Go Suxi ka kïïga maatïkatadai ixdukatai iduña agai dai potïtïdai ïgai go Pirhi as tïna ïgai.

⁷ Daidi go Pirhi itïtïdai aidï, —Go ciento plata tuminxi aïkami pan xadïrï ayimudai ix bïïxkatai ïgai ugiagi tomaxi lïïlïchi— itïtïdai.

⁸ Dai ami dakatadai ïmo mamaatïrdamigadï Suxi Andïrïxi tïgidukami, sukurhidï ïgai go Ximuñi Piduru. Daidi itïtïdai ïgai go Suxi,

⁹ —Tami kïïka ïmo arhi gïrhi dai bia taama pan dai goka batopa. Dïï mos xadïrï ïr soiñikana gobai mos ïïki odami bïïtarï— itïtïdai.

¹⁰ Dai Suxi itïtïdai aidï mamaatïrdamigadï, —Aagidabïrai go odami bai daraibana— itïtïdai. Dai kïï basogatadai ami baidi ami basoana daraiba ïgai. Go ïï kïkïïrhi ajïakatadai parï taama mirhi.

¹¹ Daidi Suxi bui go pan dai itïtïdai sai bhai gï ïrhidi Diuxi ïmadï dai bhodïrï maa ïgai mamaatïrdamigadï bai ïgai takobi go odami. Daidi gokiïrï Suxi bui go batopa dai podui ïgaikïdï ïpï. Dai bïïxi go odami kïïgadu dai kïïga tataxkobai.

¹² Dai ka tataxkonakai bïïxkatai Suxi itïtïdai mamaatïrdamigadï sai ïmpaidana bïïxi go bidadï sai mai surhigana toma lachi.

¹³ Dai mamaatïrdamigadï ïmpagi bïïxi go saasakigadï dai susudagi bhaibuxtama dan goka asarai bidadï go taama pan kaxi ugakai go odami.

¹⁴ Daidi go odami ikaiti nïiditai go maaxidaragai ix makïdï iduitadai Suxi, —Idi gia ïr go aagadami Diuxi ñokidï ïrhi aanï ix makïdï dibiagaitadai, ix makïdï Diuxi ojadï aagai tudu— ikaiti odami.

¹⁵ Dïï Suxi máí ix go odami gubuakïdï bhïiyi agaitadai dai rey dasa agaitadai dai kaxkïdï maigobai jii ïgai bhaiyoma dai tïsai ïmo tubidakana.

Ïmo imidagai Suxi maaxiturhi xïïxi ïr gïdukami sudagi dama imïitai

¹⁶ Dai aidï urunoko mamaatïrdamigadï tïapai go tubidakiañdïrï dai ayi go gïï sudagi ugidana.

¹⁷ Dai ami tïtïsai ïgai ïmo barkoïrï dai imi agai baasadïrï go gïï sudagi dai aji agai xako Kapernaum tïgidu ïmo kiiki. Kaxi tukamugatadai oidigi aidï dai go Suxi mai kia ayitadai.

^18-19 Dai tukarioma ka ijitadai go mamaatïrdami parï taama ix ïpï parï naadami kilometro barkoïrï dai kabami ïbïraitadai dai aipakoga nïituskïitadai go ïbïrhi go sudagi. Dai bhodïrï tïï ïgai go Suxi ix miadaimi sudagi dama imïitai dai kabami duduadimu ïgai tïïgakai.

²⁰ Dïï Suxi itïtïdai, —¡Maiti abïr duduadikuda! Aanï an ïr Suxi— itïtïdai.

²¹ Aidï gia go mamaatïrdamigadï ka bhai gïn ïrhiarakïdï miadïgi go Suxi barkoana. Dai kia go gïï sudagi ïrana imïitadai ïgai aidï dai mos tïsai Suxi barkoana dai mo todian dukai ayi ïgai mïïka xako ukami imi agaitadai ïgai.

Go odami mïï gaagamu go Suxi Kapernaumïrï

²² Dai xadiko go odami ix makïdï baasadïrï bitadai go gïï sudagi maatï tïï ix ka mai tiputadai barko ami dai mai tïtïgaitadai ïgai xïduitadai go Suxi. Máí ïgai sai mamaatïrdamigadï bhïitadai go barko iimïkai dai sai Suxi mai ami barkoana oitadai.

²³ Daidi sai gokiïrï ayi jaa barko xibhïadïrï iimïdami xako Tiberias tïgidu ïmo kiiki. Ayi go barko ami xako darakatadai go odami kia, xako takabioma Suxi aagiditadai Diuxi xïï bhai gï ïrhidi go panakïdï tudu dai xako bhibhi ïgai go odami.

²⁴ Daidi ka máí go odami ix ka mai tipukatadai Suxi ami dai tomarhi mamaatïrdamigadï ïpï ix kaxkïdï go odami tïtïsai go gaa barkoana ix makïdï utudan dadatadai dai mïïka gaagamu go Suxi Kapernaumïrï.

Suxi pokaiti saidi ïr pan gï dukami ixtukïdï kïïgakïrï óídakana odami bïïxkïrï bïïtarï ugakai

²⁵ Ayi ïgai Kapernaumïrï xako dajatadai Suxi daidi itïtïdai, —¿Pïtïkidï ayi tami aapi Mamaatïtuldiadami?— itïtïdai.

²⁶ Daidi Suxi potïtïdai, —Kïïga abïr gïn tïgito kaïka idi ñoki. Daiñi, maiti gin gaagai aapimï maatïkatai xorai aanï. Maiti gin máí aapimï nïiditai go maaxidaragai ix makïdï ibuayi aanï dai bhaiyoma mos gin gaagai aapimï gïn tataxkonakai go kuadagaikïdï ix makïdï gïn oi aanï— itïtïdai.

²⁷ —Kïïga abïr gïn tïgito dai abïr mai gaagada mosïkaxi go kuadagai ix makïdï xia gï buayi. Bhaiyoma abïr gaagada go kuadagai ix makïdï bïïxkïrï bïïtarï óídakana odami ugakai. Daiñi, aanï ïr ix makïdï kïïgakïrï odami busai dai ka aagai Diuxi sai gin maa sïïrhikami kïïgakïrï gin nïiditai. Gin maa ïgai sïïrhikami ansai gïn maakana go pan ix makïdï bïïxkïrï bïïtarï óídakana odami ugakai— itïtïdai.

²⁸ Daidi go odami itïtïdai aidï, —¿Tumaxi ipïrhidi Diuxi ix ibuadagi aatïmï saidi kïïgakïrï gïr nïijada ïgai aatïmï ïpï?— itïtïdai.

²⁹ Dai Suxi itïtïdai, —Gïn aagidamu aanï ix tumaxi ipïrhidi Diuxi ix ibuada aapimï. Ïgai ipïrhidi mïx xi gin buaboitudagi Diuxi otosadïkatai aanï— itïtïdai.

³⁰ Daidi go odami itïtïdai, —¿Tuma maaxidaragai gïr tïïgida agai ix podukai buaboituda antaadakagi aatïmï?— itïtïdai.

³¹ —Ipïrhidi aatïmï ix gïr tïïgidagi aapi ïmo maaxidaragai ïpïan dukai ix makïdï nïidiña gïr piipixarakaru ïïki. Po kaiti Diuxi ñokidï sai aidïxi oidigana ajiopatadai ïgai sai kuadana kuadagai ix makïdï tïbagiañdïrï daibuiña ix makïdï maná tïgidu. Ami ojiïrï ikaiti sai go Moiseskaru gamamaakaiña go pan tïbagiañdïrï. Dai ipïrhidi aatïmï pïxi gïr tïïgidagi ïmo maaxidaragai podukai ïpï— itïtïdai odami.

³² Daidi Suxi potïtïdai go odami, —Kïïga abïr gïn tïgito kaïka idi ñoki. Daiñi, mai xu go Moiseskaru gïn maakai go pan ix makïdï tïbagiañdïrï dibia. Bhaiyoma Diuxi gin Oga ïgai dai otoi go pan tïbagiañdïrï ix makïdï ïr go kïïgadukïdï kuadagai.

³³ Ïgai ix makïdï ïr Diuxi panagadï tïbai tïbagiañdïrï dai gamaakai gubukarhigai oidigi daama óídakami ix kïïgakïrï óídakana— itïtïdai.

³⁴ Dai go odami potïtïdai, —Aidï gia bïïx tasai gïr oida go pan gobai ix makïdï aagai aapi— itïtïdai odami.

³⁵ Dai Suxi potïtïdai, —Gin aaduñi— itïtïdai. —Ïïgi aanï ïr go pan ix makïdï aagai aanï. Daiñi, go pan ix makïdï oidaga tami oidigi dama maigobai dadasai mosïkaxi gïr tukuga bhiugigaigadï dïï aanï ïr pan gï dukami ix makïdï maigobai dadasai bhiugigaigadï odami ibhïgadï sai kïïgakïrï óídakana. Dai odami ix makïdï gin buaboitudagi ka mai biïgaka agai tomarhi ïmo ixtumaxi ibhïadï bïïtarï dai ka bïïxkïrï bïïtarï óídaka agai.

³⁶ Dïï aapimï maiti gin buaboitudai. ¿Mai ix gïn aagidiña aanï sai maiti gin buaboitudai aapimï tomaxi gin nïidi aapimï?— itïtïdai.

³⁷ —Dïï gia oidaga jaa mui odami ix makïdï gin maa Diuxi gin Oga sai gin urabana dai ïgai gia kïïga gin buaboitudamu dai gin urabakamu dai aanï mai gajiadïrï biamu tomarhi ïmadutai ïgai.

^38-39 Daiñi, aanï dibia tami oidigi daama iduña iñagaitai ixtumaxi Diuxi ipïrhidi dai mai xu xi ïïgi ixtumaxi aanï ipïrhidi. Diuxi otosadï aanï tudu kaxkïdï iduña iñagai ixtumaxi ïgai ipïrhidi dai Diuxi gin Oga ipïrhidi ansai mai dagitoagi ix kuga imiagi tomarhi ïmadutai go buaboitudadami ix makïdï gin maa ïgai. Go maa bïïtarï gin otoi ïgai tudu an sai kïïga nukadakana go ix makïdï gin buaboitudai asta aïkai go kugatïrï tasïrï ukami. Dai ka aïkai go kugatïrï tasïrï aanï duduakarhida iñagai bïïxkatai ix makïdï gin nukaturhi Diuxi.

⁴⁰ Kïï maatï aanï sai Diuxi ipïrhidi ix bïïxkatai ix makïdï gin nïijadagi dai gin buaboitudagi kïïgakïrï óídakana bïïxkïrï bïïtarï. Kaxkïdï go kugatïrï tasïrï duduakarhida iñagai bïïxkatai ix makïdï gin urabaka— itïtïdai Suxi.

⁴¹ Daidi go judidiu bui ñiño go Suxi mos potïkai ïgai saidi ïr go pan ix makïdï tïbagiañdïrï dibia.

⁴² Dai po kaiti ïgai, —¿Maiti ix tudu idi ïr go Jose maradï? ¡Aatïmï kïï maatï dïïdïdï di! ¿Tuixidï pokaiti gobai sai tïbagiañdïrï dibia?— ikaiti go judidiu.

⁴³ Dai Suxi potïtïdai aidï, —Kaxi abïr mai ñokiada aapimï.

⁴⁴ Daiñi, Diuxi ïgai ix makïdï abïnakidimi odami sai gin urabana dai mai tipu xorai gin urabagi ix ïgai mai abïnakidagi. Dai aïkai go kugatïrï tasïrï aanï duakatuldamu bïïxkatai makïdï gin urabaka.

⁴⁵ Daiñi, go aagadami Diuxi ñokidï oja ïïki daidi ikaiti ojadï, Diuxi maakimu ñoki bïïxkatai ix makïdï buaboituda agai saidi gin buaboitudaiña, ikaiti go ojai. Kaxkïdï gin buaboitudadamu bïïxi odami ix makïdï gïn tïgito kaïkagi ix tumaxi gïn aagidagi Diuxi dai aanï duduakarhidamu ïgai go kugatïrï tasïrï.

⁴⁶ Buaboi tudu sai Diuxi gamaakai ñoki odami dïï tomarhi ïmo odami ïr nïijadami Diuxi gïr Oga, mosïkaxi aanï ix makïdï tïbagiañdïrï dibia ïr nïijadami ïgai— itïtïdai.

⁴⁷ —Kïïga abïr gïn tïgito kaïka idi ñoki. Daiñi, bïïxkatai ix makïdï gin buaboitudai kïïgakïrï óídaka agai bïïxkïrï bïïtarï

⁴⁸ Kaxkïdï tudu aanï ïr go pan gï dukami ix makïdï gamaakai gubukarhigai ix kïïgakïrï óídakana odami.

⁴⁹ Daiñi, idi pan ix makïdï aagai aanï maiti ïr go baaxi maná tïgidukïdï pan ix makïdï kuadana gïn piipixara ïïki oidigana ajiopatadai. Ga kuadana ïgai gobai dai bïïxkïrï koi.

⁵⁰ Dïï gia aanï aagai ïmai pan ix makïdï tïbagiañdïrï tïbai. Dai odami ix makïdï ugiagi idi pan ka mai koi agai.

⁵¹ Aanï tudu ïr ix makïdï tïbagiañdïrï dibia dai ïr pan duakakami gin dukami dai odami ix makïdï ugiagi gobai óídaka agai bïïxkïrï bïïtarï. Gin tukuga tudu ïgai daidi ïr go pan gï dukami dai aanï gatïïgida iñagai gin tukuga ix oidigi daama óídakami ugana dai kïïgakïrï óídakana— itïtïdai Suxi.

Aidïxi potïtïdai Suxi go odami sai gï agaitadai ix ugiagi tukugadï dai iiyagi ïradï potïiya ïrhiditadai ïgai sai gï agai ix buaboitudagi ïgai sai podukai bïïxkïrï bïïtarï óídakana

⁵² Dai go judidiu aipako gïn tïkakai daidi ikaiti, —¿Dukatai gatïïgidana gobai ïïgi tukugadï sai ugana aatïmï?— ikaiti.

⁵³ Dai Suxi itïtïdai aidï, —Aanï ïr ix makïdï kïïgakïrï odami busai. Dai aanï aagai sai ix aapimï mai ugiagi gin tukuga dai mai iiyagi gin ïra aidï gia mai kïïgakïrï óídakamu aapimï— itïtïdai.

⁵⁴ —Dïï gia go kugatïrï tasïrï duduakatuldamu aanï odami ix makïdï ugiagi gin tukuga dai iiyagi gin ïra dai ïgai kïïgakïrï óídakamu bïïxkïrï bïïtarï.

⁵⁵ Gin tukuga ïr go kïïgadukïdï kuadagai gï dukami dai gin ïra ïr go kïïgadukïdï iidagai gï dukami ïpï.

⁵⁶ Odami ix makïdï ugiagi gin tukuga dai iiyagi gin ïra gin bïnakami bipiïyi dai aanï bïnakami biïyi ïgai ïpï.

⁵⁷ Daiñi, Diuxi gin Oga gin otoi tami oidigi daama dai Diuxi gubukarhigadïkïdï oidaga aanï. Dai ïpïan dukai ix aanï Diuxi gubukarhigadïkïdï oidaga, podukai ïpï odami ix makïdï gin kuadagi aanï gin gubukarhigakïdï óídakamu ïpï.

⁵⁸ Aanï kïïgakïrï ïr go pan ix makïdï tïbagiañdïrï dibia. Dai mai ïpïamaaxi aanï go pan ix makïdï kuadana gïn piipixarakaru ïïki ix makïdï maná tïgidu. Ïgai uu go maná dai bïïxkïrï koi. Dïï gia xorai ugiagi go pan ix makïdï aagai aanï bïïxkïrï bïïtarï óídaka agai— itïtïdai.

⁵⁹ Pobai itïtïdai Suxi go judidiu gamaakaitai ñoki go judidiu kiupaigadïrï amïï Kapernaumïrï.

Mui mamaatïrdamigadï Suxi dagito ïgai

⁶⁰ Daidi mui mamaatïrdamigadï Suxi ikaiti kaïkai aatagidï, —Arhiï xijaigan kaiti aatagidï. ¿Dukatai buaboitudana ïmoko?— ikaitiña.

⁶¹ Daidi Suxi máí ix tumaxi gïn tïtïïgitokatadai ïgai daidi itïtïdai, —¿Xijiakan duu mïx kaï idi aatagi dai kaxkïdï mai buaboituda ïrhidi?— itïtïdai.

⁶² —¿Bamioma mïx buaboitudamudai ix gin tïïgiadamudai xïïxkadï noragiagi aanï tïbagiamu, aanï ix makïdï kïïgakïrï odami busai tudu?— itïtïdai.

⁶³ —Daiñi, Diuxi Ibhïgadï ïr ix makïdï gamaakai gubukarhigai sai kïïgakïrï óídakana odami bïïxkïrï bïïtarï. Ïïgi odami gubukarhigadï maiti ïr soiñi gokïdï. Dïï gia go ñoki ix makïdï gïn aagidi aanï ïr ñokidï Diuxi Ibhïgadï dai mai xu ïr ïmo odami ñokidï gobai. Kaxkïdï gï aagai ix buaboitudagi aapimï gin ñoki bai podukai kïïgakïrï óídakana aapimï bïïxkïrï bïïtarï.

⁶⁴ Dïï ïïmadutai aapimï maiti gin buaboitudai tomax dukai— itïtïdai. Potïtïdai Suxi tudu kïïga maatïkatai xorai ïgai dai mai buaboituda agaitadai. Dai maatïkatadai ïpï ix makïdï odami ïgai dai gatïïgida agai ïgai.

⁶⁵ Daidi Suxi itïtïdai go odami aidï, —Ïïmoko aapimï mai buaboitudai. Kaxkïdï an gïn aagidi sai ix Diuxi gin Oga maiti gïn abïnakidagi ix gin buaboitudagi aidï gia tomarhi ïmadutai aapimï mai bhaiga ix gin urabagi— itïtïdai.

⁶⁶ Daidi, muidutai go mamaatïrdamigadï go Suxi dagito ïgai aidï kaïkai go aatagi dai ka mai uraba bii.

⁶⁷ Daidi Suxi itïtïdai go bhaibuxtama dan goka mamaatïrdamigadï, —¿Aapimï ïpï ix ka imi agai ïpï?— itïtïdai.

⁶⁸ Daidi Piduru itïtïdai, —Gïr Nukadakami, ¿Borai ïmai urabana aatïmï? Aapi ïgai dai bia go ñoki ixtukïdï kïïgakïrï óídakana aatïmï bïïxkïrï bïïtarï di— itïtïdai.

⁶⁹ —Aatïmï kïïga gï buaboitudai ix aapi ïr ïko dasadï Diuxi ix makïdï ïgai otoi tami oidigi daama— itïtïdai.

⁷⁰ Dai Suxi itïtïdai, —Ïjï. Bhaibuxtama dan gokadu aapimï ix makïdï aanï ïkobai gïn bubaitu saidi ïr gin bïïtarïkana. Dïï gia ïmadutai aapimï bia ïmo diabora tïañikarudï— itïtïdai.

⁷¹ Potïi go Suxi aagaitai go Udaxi. Go Udaxi ïr maradï Ximuñi Iskariote daidi ïr ïmoko go bhaibuxtama dan goka mamaatïrdamigadï Suxi. Ïgai tudu gatïïgida agaitadai go Suxi.