VUAANA 19 - Northern Tepehuan Bible

Go judidiu tïjai muaragai go Suxi

¹ Dai bhodïrï go Pilato gatïjai sai gïikarsana go sandadarugadï go Suxi ikixanaikïdï.

² Baidi ka gïikarsakai ïgai sai bui uxi maamaradï kïï óígakami dai idui ïmo korona dai modïrï kïïxi. Dai aadi yukuxi moraduakami ïpï sai ïpïamaaxkana ïgai ïmo rey.

³ Daidi bhodïrï baan gugukaiña go sandadaru buidïrï go Suxi daidi itïtïdaiña, —Bhaiga aapi reygadï go judidiu— ikaitiña parunaitai. Dai kapixaiña ïgai.

⁴ Daidi go Pilato ïpamu busai kidigamu xako darajatadai go judidiu daidi itïtïdai, —Busaidamu aanï go Suxi bhaigobai bai maatïkana aapimï sai aanï mai tïï ix tumaxi ixtukïdï ïr soimaaxi ibuadami gobai— itïtïdai.

⁵ Daidi busai go Suxi kidigamu dai kia gï moïrï kïïsati go uparai korona dai kia gï aadati go yukuxi moraduakïdï ïpï. Daidi go Pilato itïtïdai go judidiu, —Tami kïïka go soitigami— itïtïdai.

⁶ Daidi go bhaitï gukakami gadaxdadami ïmadï go sandarugadï ijiñakimi tïïgakai go Suxi daidi ikaitimi, —¡Kuruxiana abïr xixa! ¡Kuruxiana abïr xixa!— ikaitimi. Daidi go Pilato itïtïdai go odami, —Baidakabïrai aapimï dai ïïgi kuruxiana abïr xixa. Aanï mai tïï ixtukïdï ïr soimaaxi buadami gobai— itïtïdai.

⁷ Daidi go judidiu itïtïdai go Pilato, —¡Gobai ka podukai aagai saidi ïr Diuxi maradï! Dai gïr sïïrhikamigana aagai sai gï agai muagi xorai pokaitadagi saidi ïr Diuxi maradï di— ikaiti go judidiu.

⁸ Dai kabami duadimu go Pilato aidï kaïkai ix Diuxi maradï gï aagai Suxi ïïgi. —Tadu tïjai aanï muaragai ïmo maradï Diuxi— gï ïrhidi ïgai.

⁹ Dai bhodïrï ïpamu tukabi báí ïgai go Suxi daidi itïtïdai, —¿Baadïrï oidakami aapi?— itïtïdai. Dïï mos go Suxi mai ñokai bii.

¹⁰ Daidi go Pilato itïtïdai, —¿Tui pïxi mai ñokai?— itïtïdai. —¿Maiti pïx maatï ix aanï ïr ïmo gubukadagai biakami? Kïïga ixtutuidikïi aanï ix gï gatïañiagi muaragai kuruxiana xiïpï ix gatïañiagi ix gï dagitoagi ïpï di— itïtïdai.

¹¹ Daidi go Suxi itïtïdai, —Diuxi ïgai dai gï maa ïmo sïïrhikami ix kaxkïdï bhaiga aapi ix gin tïañiagi muaragai. Ix mai maakimudai Diuxi sïïrhikami xadïrï ixtutuidimudai aapi. Dïï gia ix makïdï tami gï buitapi gin kïsatu mos ïgikïdï gin tañia ïrhidi muaragai mai biakatai sïïrhikami. Kaxkïdï ïgai gïïpi bamioma soimaaxi ibuayi ix bhai aapi— itïtïdai.

¹² Daidi go Pilato gaagaitadai ixdukatai dagitoagi go Suxi kaïkatai ñokidï. Dïï gia go judidiu maiti ipïrhi dai bhaiyoma itïtïdai ïgai go Pilato, —¡Aapi Pilato kïï maatï sai xorai pokaitadagi saidi ïr ïmo rey kaxi buidïrï bipiïyi go gïï dunukami César! ¡Dai go Suxi ka poduu aagai saidi ïr ïmo rey di! Ix dagito aapi go Suxi aidï gia ïr buidïrï kaatïkamikamu aapi go gïï dunukami César— itïtïdai go judidiu.

¹³ Dai go Pilato ïpamu báí go Suxi kaïkai ñokidï go judidiu. Dai bhodïrï go gïï daikaruïrï daiba xako bhai gï buayi ñoki. Dai ami go tuixiki xako kïïka go gïï daikarui Gabatana tïgidu Hebreokïdï. Gobai itïiya ïrhidi ïmo tuixiki pisomadikami ojodaikïdï.

¹⁴ Aidï tasïrï go judidiu biakatadai ix bhai gïn duñagi go bagimi bïïtarï ix makïdï Daibuñigïrï tïgidu daidi parï daan duku ïxi go Pilato itïtïdai go judidiu, —Tami kïïka gïn reyga— itïtïdai.

¹⁵ Dai go judidiu gïgïr ijiñakimi daidi ikaitimi, —Baidakabïrai tabhiadïrï dai kuruxiana abïr xixa— ikaitimi. Daidi go Pilato itïtïdai go odami, —¿Kïïgakïrï mïx ipïrhidi ix kuruxiana xixagi aanï gïn reyga?— itïtïdai. Daidi go judidiu itïtïdai, —¡Maiti ïr gïr reyga gobai! ¡Aatïmï mos arhi ïmo rey bia dai gobai ïr go César!— itïtïdai.

¹⁶ Dai aidï gia go Pilato gatïïgi go Suxi go sandadaru mïsai bhïkaiña dai kuruxiana xixana.

Kuruxiana gï xixatu go Suxi

¹⁷ Daidi bhodïrï go sandadaru bhïiyi go Suxi dai baidakai ïmo gidiïrï xako odami modïrï tïgidu. Dai ami Gólgota tïgidu Hebreokïdï ïpï. Daidi go Suxi ïïgi kusuba iimïi kuruxigadï.

¹⁸ Daidi go sandadaru bhïkai go Suxi dai mïï gidana kuruxiana xixa. Dai jaa kukuruxiana xixa ïgai ïpï goka kïkïïrhi ïpï ix makïdï ïr ïïxibogami dai Suxi ïrana bii.

¹⁹ Dai go Pilato gatïjai ïmo ojixikami saidi ami kuruxiana dasana ix makïdï ikaititadai, IDI ÏR SUXI GO NASARETÏRÏ OIDAKAMI DAI REYGADÏ GO JUDIDIU, ikaititadai go ojixikami.

²⁰ Dai baika ñokikïdï idui ïgai go ojixikami, Hebreokïdï dai romanokïdï dai griegokïdï. Dai ami mianai go kuruxi bipiïyitadai go Jerusalen bai kaxkïdï muidutai go judidiu kïïga nïiditadai ix kaiti go ojai.

²¹ Daidi go dadaxdadami bhaitï gukakamigadï mai bhai gïn ïrhidi nïiditai go ojixikami dai mïï aagidi go Pilato sai, —Go ojixikami maiti gï agai ix pokaitadagi saidi go Suxi ïr reygadï go judidiu. Bhaiyoma gï agai gobai ix ojixikagi sai ïïgi gobai pokaititadai saidi ïr reygadï go judidiu. Podukai dasa aapi— itïtïdai.

²² Daidi go Pilato itïtïdai aidï, —Modukai bimu gobai ix duu oja aanï— itïtïdai.

²³ Dai kaxi gï xixatudakai go Suxi kuruxiana sai go maakoba sandadaru ix makïdï gaxixa bui yukuxidï daidi gïn takogi. Daidi bhïiyi ïgai ïpï Suxi mantagadï. Ïgai mos ïr ïmo ikuxi mai somidikami.

²⁴ Daidi potïi go sandadaru nïiditai go manta, —Maiti gï agai tïxi sarañagi gobai. Bhaiyoma gï agai tïxi tïtïïbiagi ïmo bolado dukai nïida as xorai aïna gobai— ikaiti go sandadaru. Podukai pobï dui ix dukai ojixi ïïki Diuxi ñokidïrï. Ami ikaiti, Gïn takogi ïgai gin yukuxi ïïgi gïn bïïtarï dai bhodïrï gin mantaga gatïki ïgai ïmo boladoïrï dukai, ikaiti go ojai. Ka podukai ojixikatadai tudu ix kaxkïdï pomaaxi idui go sandadaru.

²⁵ Dai ami miadïrï go kuruxi kïakatadai go Suxi dïïdï dai dixikadï ïpï ïmadï ïmai oki Maria tïgidukami. Go Maria ïr go Kleopas oñigadïkatadai. Daidi ami kïakatadai go Maria Magdalena ïpï.

²⁶ Dai Suxi dïïdï abhana kïakatadai go mamaatïrdamigadï ix makïdï kïïga oigïdaitadai Suxi ïpï. Dai tïïgakai Suxi ix ami miadïrï dïïdï kïakatadai ïgai, saidi itïtïdai ïgai dïïdï, —Gin daada, gobai gin mamaatïrdamiga ix makïdï gï abhana kïïka ïr gï maaraka agai xibi— itïtïdai.

²⁷ Daidi bhodïrï potïtïdai ïgai go mamaatïrdamigadï ix makïdï kïïga oigïdai ïgai, —Aapi kïïrhi, gobai gin daada ïr aapi gï daadaka agai xibi— itïtïdai. Dai kaxkïdï Suxi dïïdï mïï kiidïrï oidatu go mamaatïrdamigadï ix makïdï kïïga oigïdai Suxi.

Suxi taata mukigami gïr bïïtarï

²⁸ Dai bhodïrï Suxi maatïkatadai sai kaxi bïïxi naatorhikatadai ix tumaxi biakatadai ïgai ix iduñagi. Dai kïïga iduña ïrhiditadai ix dukatai ojixi ïïki abhiadïrï Diuxi ñokidïrï daidi po tïi, —Tonomoka aanï— itïi ïgai. Podukai ojixikatadai ïïki abhiadïrï ix potïiya agai kaxkïdï potïi ïgai.

²⁹ Dai bhobai dajatadai ïmo asokorhi biakami bino ïkokami. Dai ïmadutai ix makïdï ami gukatadai bhïiyi ïmo bixokorhi dai ïmo uxi mamaradïana buu dai badaitu bino. Dai bhodïrï bhïiyi ïgai dai tïñiïrï dadaxdi go Suxi sai bixusuna. Hisopo tïgidu go uxi ïgai.

³⁰ Dai mos bixusukai Suxi go bino sai bhodïrï itïi, —Ka natorhixikami bii bïïxi aïkatai— itïi go Suxi. Dai koidamu kuiki modï dai muu.

³¹ Ïmo imidagai bianaxiko muu go Suxi dai aidï tasïrï bhai gïn buadana go judidiu go bagimi bïïtarï ix makïdï Daibuñigïrï tïgidu bai kaxkïdï go bhaitï gukakami dadaxdadami maiti ipïrhiditadai ix bhobai baaxi kuruxiana biiyagi go Suxi ïmadï ï goka kïkïïrhi ix makïdï jaa kukuruxiana nagiïjï ïpï. Dai go bhaitï gukakami dadaxdadami mïï aagidi go Pilato sai ïgai gatïanïna omixaragai nonosakadï go ix makïdï kuruxiana xixixapi sai otoma kona dai bhodïrï sai otoma tïapanïna tutukugadï ka kokai ïgai. Maiti ipïrhidi ïgai ix kia ami nagiïjïka ïgai bakïkai go bagimi kaxkïdï.

³² Daidi mïï dada go sandadaru dai omi nonosakadï bïï goka go ïïxibogami ix makïdï ami xixixapi sonoana go Suxi.

³³ Dai bhodïrï omixa agaitadai nonosakadï go Suxi ïpï dïï mos ka tïï ïgai ix ka mukiñi dai ka mai omixa ïgai bhaiyoma.

³⁴ Dïï gia bïïxkïrï ïmadutai go sandadaru ïmo lansakïdï onomadïrï sïi go Suxi tai busai ïradï ïmadï sudagi.

³⁵ Aanï ix makïdï ibuayi idi ojai ïr nïijadami ix dukatai pogïdui dai mai yaatagïi aanï. Buaboi aagai aanï tudu bai kïïga buaboitudana aapimï ix makïdï kaïkagi idi ñoki.

³⁶ Buaboi aagai aanï sai tomarhi ïmo odï mai omi go Suxi. Podukai buaboi busai go ïïkidadï ojai xako ikaiti sai, Maiti gï omi tomarhi ïmo odï go OtosadïDiuxi, ikaiti go ojai ïïkidadï.

³⁷ Dai ikaiti ïpï sai, Odami nïijadamu go ix makïdï sïi ïgai, ikaiti go gobai.

Gï yaasatu go Suxi

³⁸ Daidi gokiïrï ïmo kïïrhi Jose tïgidukami Arimateïrï oidakami jii dai mïï nïida agai go Pilato dai gataanïi agai oigaragai sai bhïkaiña tukugadï Suxi yaasaragai bïïtarï. Dai Pilato maa oigaragai bai go Jose bhïkai tukugadï Suxi. Idi Jose ïr mamaatïrdamigadïkatadai go Suxi dïï mos ïxtokikan dukai duadikuitai ïgai go gaa judidiu.

³⁹ Dai ïmo kïïrhi Nikodemo tïgidukami oiditadai go Jose ïpï aidïxi bhïkai ïgai tukugadï Suxi. Go Nikodemo ïr ïgai ix makïdï dibijitadai go Suxi ïmo imidagai tukarï dai xibi bhïkati ïgai parï ïmokobhai dan bhaibuxtama dan maakoba kilo xigian ubadami oiditai go Jose. Go xigian ubadami ïr mira dai sabila duñixikami.

⁴⁰ Dai go Jose ïmadï Nikodemo tïbandi tukugadï Suxi dai ïmo ikuxikïdï bhixa ïmadï go xigian ubadami. Ïïgi podukai gïn bituldakatadai ïgai judidiukatai kaxkïdï.

⁴¹ Dai ami xako kïakatadai go kuruxi xako gï muatutadai go Suxi ami miadïrï gukatadai mui tutukami uxi ibhiatïdami dai ami oidagatadai ïmo tïjobai maaxkami yaasakaru. Utuduitadai go yaasakaru aidï dai mai kia gï yaasatutadai tomarhi ïmo mukiadï ami.

⁴² Dai kaxi ïr bianaxikokatadai aidï dai ka uruitadai oidigi bïïxi dai xadiko kaxi ïr go Kïïgakïrï Bubaidaragai Bagimika agaitadai ix kaxkïdï bhobaxi miadïrï tïï ïgai tukugadï go Suxi go utudui yaasakaruana.