Udaxi 1 - Northern Tepehuan Bible

Go Udaxi biaturhi go buaboitudadami

¹ Bhaiga gin aaduñi Diuxi amadïrï. Aanï ïr Udaxi dai gïn ojidi idi ojai. Sukurhidï aanï Santiago dai ïmo pioñigadï aanï Suxi Kristo. Gïn ojidi aanï aapimï ix makïdï ïr ïko bubaidadï Diuxi gïr Oga. Aapimï ïr ix makïdï kïïga gïn oigïdai dai gïn nukadai Diuxi. Gïn nukadai ïgai urabakatai aapimï Suxi Kristo tudu.

² Gin aaduñi, ipïrhidi aanï sai kïïga maatï taatana aapimï xïï kïï tuiga Diuxi gïn bïïtarï soi gïlda gïn nïiditai ïgai. Dai ipïrhidi aanï ïpï sai kïïga ibhïxtakan taadakagi aapimï gïn ibhïdagïrï dai sai kïïga gïn oigïdada aapimï aipakoga maatïkatai xïï kïïga gin oigïdai Diuxi.

Go Udaxi aagidi go buaboitudadami saidi gïn nukadakana sai mai oijada ïgai go tïtïïgiadami yaatagi

^3-4 Kïïga gïn oigïdai aanï aapimï gin aaduñi. Dai kaxkïdï sïïrhikïdï ipïrhidiña aanï xi gïn ojidagi aagaitai go utudui oidakaragai ix makïdï bia aatïmï kïïgakïrï gïr bubaidakai Suxi Kristo. Gobai gïn ojida in ïrhidiña aanï tudu. Dïï gia xibi ka máí aanï sai oidaga tïtïïgiadami yaatagi gïn saagida ix makïdï ïr buidïrï bïïtïkami gïr buaboidaraga. Diuxi gïr tïïgi go buaboikïdï buaboidaragai aatïmï ix makïdï ïr ïko bubaidadï tudu dai bïïxkïrï bïïtarïka agai gobai. Kaxkïdï gï agai sai kïï sïïrhi gïn ojidagi aanï idi ojiïrï dai gïn abïnakiadagi saidi kabami gïn aajagïdagi aapimï dai kïïga nukatika go buaboidaragai ix makïdï gïn tïïgi Suxi Kristo. Maiti abïr gïn dagito ix gïn maitiagi go buidïrï bïïtïkamigadï go buaboikïdï buaboidaragai. Daiñi, oidaga tïtïïgiadami yaatagi ix makïdï mai ïïgidi Diuxi tudu dai gïn saagida daraka. Gïn bupuirumagi ïgai dai podukai bapai gïn saagida tudu. Pokaitiña ïgai sai odami bia oigaragai xi ïïgi gïn tïanïdagi daidi iduñagi ïïgi ixtumaxi iduña ïrhiadagi dai asta soimaaxi ibuadagi. Pokaitiña ïgai sai mai tipu buamï ïrhiaragai gokïdï mos ïï kïï tuigakatai Diuxi gïr bïïtarï. Maiti ipïrhidi ïgai xi ïïgiadagi Suxi Kristo Gïr Nukadakami kaxkïdï. Dïï gia ka ïki abhiadïrï ka podukai aagai Diuxi saidi toma xorai ix makïdï podukai gatïtïïgiadagi ñoki sai ïgai ïr gïpiïrï bïïtïkami dai taata agai gïgïbidaragai. Mai tipu ïmai xorai ïr Gïr Nukadakamikagi mosïkaxi Suxi Kristo tudu.

⁵ Gin aaduñi, xibi ipïrhidi aanï ix gïn tïgitokagi aapimï ix dukatai Suxi Gïr Nukadakami kïïgakïrï bubaitu go Israelitas Ejiptuañdïrï ïïki. Gobai ïr ïmo maaxidaragai dukai bïïtarï ixtumaxi gïn aagidimi aanï xibi. Daiñi, kïïgakïrï bubaitu ïgai go Israelitas dïï gia bïïxkïrï xia dodai ïgai gokiïrï maiti ipïldakai ïgai ix buaboitudagi. Kïïga maatï aapimï bïïxi gobai dïï bïïxkïrï gïn aagidi aanï ïpamu xibi saidi gïn tïgitokagi aapimï gobai.

⁶ Dai gïn tïgitobïrai go tïtïañikarudï Diuxi ïpï ix makïdï ïr sïïrhikami bipiakamikatadai tïbagiana. Bapai ïgai xako mai biakatadai ïgai sïïrhikami dai kaxkïdï bubuaka abhiadïrï tïbagiañdïrï xako óídakatadai ïgai. Dai kaxkïdï aidï abhiadïrï bupurakami bia Diuxi go tïtïañikaru ïgai ïmo ïmapïkïrï xako kabami tukamuga. Dai mai bubuakimu asta xïïxkadï aiyagi go gïï tasai xïïxkadï aagada agai Diuxi ix tuma gïgïbidaragai aji agai bïïxi go soimaaxi ibuadami.

⁷ Dai podukai ïpï go ïïkidadï óídakami Sodomana dai Gomorana ïmadï bïïxkatai ix makïdï miadïrï óídakatadai ami. Galnaaxi idui ïgai ïpï gaïmadï bopodatai aipakoga. Ibuadana ïgai buirudagai tukugadïkïdï tudu ïmadï bopodatai ïgai ix makïdï maiti ïr sïïrhi. Kïï maatï aapimï sai Diuxi gïgïbiturhi ïgai. Dai gokïdï gïr tïtïïgidi Diuxi sai taiyïrï gïgïbitulda agai ïgai bïïxi soimaaxi ibuadami. Dai gïgïbidaradï bïïxkïrï bïïtarïka agai dai mai ugiti agai.

⁸ Dai go tïtïïgiadami yaatagi ix makïdï gïn saagida bapai soimaaxi ibuayi podukai ïpï ïpïan dukai go Sodoma dai Gomorana óídakami dai ïpïan dukai go tïtïañikarudï Diuxi ix makïdï soimaaxi idui ïïki. Pokaitiña go tïtïïgiadami yaatagi sai mai bia ïgai xi ïïgiadagi tomarhi ïmo sïïrhikami biakami dai soimaaxi ibuayi ïgai gaïmadï bopodatai aipakoga ïpï. Asta galnaxi ñoki aagaiña ïgai buidïrï go tïtïañikarudï Diuxi parunaitai ïgai ïpï. Pokaitiña ïgai sai tïïtïkidïrï máí ïgai sai bia oigaragai xi pomaaxi ibuadagi tudu.

⁹ Daiñi, kïïga maatï aatïmï sai oidaga ïmo tïañikarudï Diuxi Migirhi tïgidukami dai ïgai bamioma tïanïi xi bhai jaa tïtïañikarudï Diuxi. Dïï gia tomaxi bamioma tïanïi ïgai bïïxkïrï aidïxi gïn bupui ñokaitadai ïgai ïmadï go diabora dai gïn dadaiditadai ïgai go tukugadï go Moiseskaru ka mukukai ïgai, aidï go Migirhi po gï ïrhidi sai mai bia sïïrhikami xi kabami bhagaidadagi ïgai go diabora. Maiti ipïrhi ïgai tomarhi xi ïmo soimaaxi ibuadami aagagi tudu. Dai bhaiyoma mosïkaxi potïtïdai ïgai sai, —Diuxi gï bhagaidana aapi diabora— itïtïdai.

¹⁰ Dïï gia go tïtïïgiadami yaatagi ix makïdï gïn saagida bapai ïgai mos parunaiña ixtumaxi mai maatï kaïkagi ïgai. Tïgibudadï ïpïan maaxi buxtaki tïgibudadï. Buxtaki dukai ïïgidiña ïgai bïïxi ixtumaxi tañiagi tukugadï daidi ibuayi naana maaxi soimaaxkami tudu. Dai mos ugiti agai ïgai pobuadatai. Pokaitiña ïgai sai kïïga maatï ïgai ixtumaxi dïï pupuiruga ïgai bhaiyoma.

¹¹ Agia soimaaxi taatamada agai ïgai. Ïpïan buayi ïgai go Kain ix makïdï ïïgi mua sukurhidï ïïki. Dai ïpïan buayi ïgai go Balaam ix makïdï oidakatadai ïïki ïpï. Bupuirumagi ïgai go odami dai gïpiïrï surhi gamaitia ïrhiditai tuminxi tudu. Go tïtïïgiadami yaatagi ïr buidïrï bïïtïkami Diuxi tudu dai gïn kodituda agai ïgai ïpïan dukai go Kora. Buidïrï gïi ïgai Diuxi dai gï muatu ïïki ïpï.

¹² Go tïtïïgiadami yaatagi ïgai ïr ïmo xaïraragai gïn bïïtarï gïn saagida darakatai ïgai xïïxkadï ibuadagi aapimï ïmo urabaragai kuadagaikïdï. Ïpïan dukami gobai xïïxkadï gïr yukuxi sarabidikagi tukuragai. Xaïraraga gobai tudu. Go kïkïïrhi ïgai bhaibitukami gakuadana gïn urabaragïrï tudu dai mai buamï gïn ïrhidi ïgai ix gïn tïgitokagi ix tuma bïïtarï go urabaragai. Mosïkaxi ïïgi bïïtarï buamï ïrhidi ïgai tudu. Maiti ibuayi ïgai soiñi jaa bïïtarï tudu. Ïpïan dukamikana ïgai iikomai ix makïdï bhïï aimïrai ïbïrhi dai mai dukitudai oidigi. Dai ïpïan dukami ïgai uxi ix makïdï ka bainkumi dai mai taataka dai mai ibhiatai ka gakixakai gobai ïpï. ¿Tumaxi ïr soiñikana ïgai tudu?

¹³ Ïpïpï gïn aagidamu aanï ix maaxi go tïtïïgiadami yaatagi ïgai. Ïpïan dukami ïgai xïïxkadï gïï daibuskïdagi sudagi dai ugidïrï bipiïyi naana maaxi tukuragai. Pomaaxi ïgai. Dai maiti soikïi ïgai óídakami ix maatïkagi ix dukatai oijadagi oidakaradï ïpï. Ïpïamaaxi ïgai xixabugai ix makïdï kuga iji tudu. Maiti gï agai ix po gï ïrhiadagi ïmoko sai ïgai gïr tïïgidamu boi xako sïïrhi imiagi aatïmï oiditai gïr oidakaraga. Bïïxkïrï bïïtarï bii agai ïgai xako kabami tukamuga tudu.

¹⁴ Daiñi, kïï maatï aapimï sai ïïki oidakatadai ïmo kïïrhi Enok tïgidukami. Ïgai ïr go Enok ix makïdï busai kubarakami generacion gokiïrioma xi go Adán tudu. Dai ïmo imidagai ño ïgai Diuxi bïïtarï dai ïkiaxdïrï aagai ixtumaxi daibuña agai gokiïrioma. Daidi ikaiti ïgai, —Kaïkabïrai idi ñoki aapimï óídakami— ikaiti. —Gï agai sai maatïkagi aapimï sai ayimu ixtuigako dibiagai Diuxi dai mui mirhi ïko bubaidadï oijada agai— ikaiti.

¹⁵ —Daiñi, Diuxi maatï bïïxi go soimaaxkami ix makïdï ibuadana go odami ix makïdï mai ïïgidi Diuxi. Dai maatï ïgai xïxkadï galnaxi ñoki aagagi ïgai buidïrï Diuxi ïpï. Dai ka dibiakai aagada agai Diuxi ixtuma gïgïbidaragai aji agai bïïxkatai ïgai— ikaiti go Enok ïïki.

¹⁶ Galtutuiga go tïtïïgiadami yaatagi ïgai tudu. Tomax maaxi imïdagi oidakaradï mai biïga ixtukïdï soi kaitiada ïgai buidïrï Diuxi dai buidïrï jaa dai tomax dukai mai bhai gïn ïrhidiña ïgai. Adaimïi ïgai ïïgi bhai ïrhiaradï ibuadatai ïïgi ixtumaxi ipïrhiadagi ïgai. Gïgïr tïtïanïdami dukai ñokai kabami tïkabi gïn tïgitokatai ïgai. Yaatagïi ïgai dai ïgai aagidiña go óídakami ixtumaxi odami kaïka ïrhidiña saidi podukai bhai gïn ïldagi odami ïgaikïdï kaïkatai aatagidï sai podukai ibuadagi go odami ixtumaxi ïgai ipïrhidi.

Go Udaxi abïnakidi go buaboitudadami saidi gïn kabakadana ïgai dai apia oijadana go buaboidaradï tomaxi buidïrï bïïtïkagi jaa

¹⁷ Gïn oigïdai aanï aapimï gin aaduñi Diuxi amadïrï dai ipïrhidi aanï saidi gïn tïgitokagi aapimï ixtumaxi gïn aagidi go ojotosadï Gïr Nukadakami Suxi Kristo.

¹⁸ Ïkiaxdïrï gïn aagidi ïgai sai xïïxkadï karhioga ugiti agadagi oidigi saidi oidaka agai mui parunadami. Ïgai adaimuda agai ïïgi bhai ïrhiaradï ibuadatai ïïgi ixtumaxi bhai ïrhiadagi ïgai. Po kaiti go ojotosadï Suxi Kristo baasïkioma tudu dai ipïrhidi aanï saidi gïn tïgitokagi aapimï gobai.

¹⁹ Go parunadami ïgai ïr ix makïdï gïn ïjïkobaldan buayi xibi dai gïn bupui tutusadan buayi. Ïgai mosïkaxi oidiña go tami oidigi daama tïgibudadï tudu dai Diuxi Ibhïadï mai ïmadï daja.

²⁰ Gïn ïjïkobalda ïrhidi ïgai tudu. Dïï gia maiti abïr gïn dagitoda. Daiñi, kïïga maatï aapimï sai gïn oigïdai aanï gin aaduñi dai aanï aagai sai gï agai bhaiyoma ix gïn gupurtudagi aapimï aipakoga dai gïn soikïdagi aipakoga saidi bamioma gubuakami dukai buaboitudadagi aapimï. Sai kïïgioma oijadagi aapimï go buaboidaragai ix makïdï gïr maa Diuxi tudu. Dai daanïdabïrai Diuxi ïpï. Dai xïxkadï daanïdagi aapimï abïr ïïgiada Diuxi Ibhïadï saidi podukai ïgai gïn tïïgidana ix dukatai daanïdagi aapimï.

²¹ Daiñi, Diuxi kïïga gïn oigïdai. Dai gï agai sai buaboitudada aapimï ix kïïga gïn oigïdai ïgai. Bïïx tasai abïr podukai óídaka aapimï, buaboitudatai sai Diuxi gïn oigïdai tudu. Dai kïïga buaboitudaitai abïr nïnïraka saidi Gïr Nukadakami Suxi Kristo gïn tïïgidana xïï kïï tuiga ïgai gïn bïïtarï. Gïn maakai ïgai go bïïxkïrï bïïtarï oidakaragai tudu mos ïï kïï tuigakatai ïgai gïn bïïtarï.

²² Dai soi ïlda abïr nïijada dai kïïga tutiaka bïïtarï jaa ix makïdï ka mai kapaka buaboidaradï. Kabami abïr abïnakiada ïgai dai maakada ñoki saidi kïïga kabakan dukai buaboitudada ïgai.

²³ Dai ix makïdï oijada antaadaga go tïtïïgiadami yaatagi, ïgai abïr soikïda dai kïïgakïrï bubiada sai ka mai oijada ïgai ïpïan dukai xïïxkadï bhïiyagi ïmoko ïmo odami ix makïdï karhioga taiyïrï gïxia agadagi. Kïïga abïr tutiaka ïgai bïïtarï dai kïïga abïr maakada ñoki sai mai gïpiïrï surhigiagi ïgai. Dai abïr kïï tutiaka jaa bïïtarï ïpï ix makïdï adaimïi go soimaaxkami. Dïï gia abïr dïïdaidan duu nïijada go soimaaxkamigadï ix makïdï ibuayi ïgai dai gïn nukadabïrai aapimï soikïitai xïduñada gïn sarabidagi go soimaaxkamigadï ïpï.

²⁴ Gïn aaduñi, mosïka arhi ïmaduga Diuxi dai ïgai bhai dui go kïïgakïrï bubaidaragai gïr bïïtarï Suxi Kristokïdï ix makïdï ïr Gïr Nukadakami. Kïïga ixtutuidikïi Diuxi ix gïn nukadakagi dai gïn soikïdagi sai mai dagitoagi aapimï gïn buaboidaraga sai podukai mai gïpiïrï surhigiagi aapimï. Dai kïï bhaiga ïgai sai bhai gïn buadagi saidi kïïga bhai ïrhiarakïdï gukakagi aapimï ami xako kabami totoarïi buitapi Diuxi. Kabami totoarïi Diuxi tudu mos ïï kïïga xigiamaaxkatai ïgai dai mos ïï kabami gubuakatai ïgai ïpï. Kïïga ixtutuidikïi ïgai ix bhai gïn duñagi sai mai biakagi aapimï toma lïïchi soimaaxkami gïn abhana dai bhodïrï baan gïn tutusamu ïgai ami buitapi ïgai ka kïïga bhai gïn dunakai ïgai.

²⁵ Bïïxi gobai ka bhai dui Diuxi Suxi Kristokïdï ix makïdï ïr Gïr Nukadakami tudu. Dai kaxkïdï gï agai sai tomax tuigako kïïga ñokadagi bïïxi óídakami Diuxi buidïrï. Mai xudu xi ïr ïïki mai kia kïkibakai oidigi, xi ïr xibi, xi ïr gokiïrioma dai asta bïïxkïrï bïïtarï. Kïïga ïr ajïakami Diuxi sai toma xuduku kïïga ñokadagi óídakami ïgai bïïtarï tudu dai sai xagïdutuadagi ïgai dai sai biakagi ïgai gubukarhigai ix bïïxkïrï bïïtarï tïanïdagi bïïxi aïkatïrï. Sai pogïduna bïïxi gobai tudu. Mosïkaxi.