Tito 2 - Northern Tepehuan Bible

Pabora aagai kïkïrhiodami dai rhiokodami dai utudui iimïdami dai aagai ix dukatai ibuadagi ïgai ïïgiditai go buaboikïdï aatagi

¹ Tito, gï aagai xi maakadagi aapi ñoki go buaboitudadami ix kïïga bhai dukai óídakagi bai podukai maatiga maaxkana ix ïïgidimi ïgai ixtumaxi ïr buaboi.

² Aagidañi ix makïdï ïr kïkïïrhiodami sai kïï gïn tïgito nïijadagi ïgai sai bïïxi ixtuma buadagi kïï bhai maaxkagi. Sai bhïna kïïga tïgibudagai dai kïïga óídakana sai jaa odami xadutuadana. Aagidañi ïpï sai tomax tumaxi daibuñagi sai apia buaboitudada ïgai dai sai apia oigïdaiña ïgai jaa dai sai gïn kabakadana ïgai soi ïrhiaragai buidïrï.

³ Dai aagidañi go buaboitudadami ix makïdï ïr rhiokodamikagi ïpï sai kïïga xadutudaitai dukai óídakana. Sai mai naana kaitiña ïgai aipakoga dai sai mai nabaakorïkana.

^4-5 Gï agai ïgai bhaiyoma xi maakada kïïga ñoki go utu iimïdami oki sai kïï bhai maaxi óídakana. Ix mai kïïga óídakagi ïgai aidï gia jaa pokaitada antaada sai maiti ïr soiñi Diuxi ñokidï tudu. Gï agai go rhirhiokodami xi maakadagi ñoki go utu iimïdami sai oigïdana ïgai kukunadï dai maamaradï. Gï agai sai kïïga gïn tïtïgitoagi go utu iimïdami dai kïïga buañixikami dukai óídakagi. Gï agai ïgai xi kïïga nukadakagi kiidï dai ix kïï tutiakagi ïïgiditai kunadï. Ix pobuadagi ïgai aidï gia mai tipukamu ixtukïdï soi dukai nïijadagi jaa Diuxi ñokidï.

⁶ Dai gï agai xi maakada aapi ñoki go kïkïïrhi ïpï ix makïdï mai xii ïr kabami imïdami sai kïïga gïn tïgitokagi dai ibuadagi ixtumaxi ïr kïïga.

⁷ Gï agai tudu xi kïïga ibuadagi aapi Tito dai podukai kïïga maaxitudagi ix dukatai ibuadagi go gaa. Gï agai xi sïïrhi ibuadagi dai ñokadagi aapi dai kïïga xadutudaitai dukai gamaakadagi ñoki.

⁸ Tïïgidañi ñoki ix makïdï ïr buaboi tudu sai podukai mai tipukagi ixdukatai ñokadagi jaa. Podukai ibuadatai aapi gïn xaïrogidamu gïr buidïrï bïïtïkamiga mai tïtïgaitai ïgai soimaaxi ixtukïdï gïpiïrï gïr buapadagi.

⁹ Dai buaboitudadami ix makïdï ïr pipioñikagi gï agai xi kïïga ïïgiadagi amudï. Gï agai xi ibuadagi ixtumaxi bhai ïrhiadagi amudï dai gï agai xi mai bui ñokadagi ïpï.

¹⁰ Maiti gï agai xi gaïxiadagi ïgai amudï ixtumaxi dai bhaiyoma gï agai xi sïïrhi ibuadagi bïïxi aïkatïrï sai jaa maatï nïidiña sai Diuxi ïr kïïgakïrï gïr bubiadamiga dai sai Diuxi ñokidï kïïga ïr soiñi.

¹¹ Diuxi otoi Suxi Kristo tudu dai bhai dui kïïgakïrï bubaidaragai bïïxi óídakami bïïtarï. Podukai gïr tïtïïgidi ïgai xïï kïï tuiga Diuxi.

¹² Dai xibi maatï nïiditai aatïmï xïï kïï tuiga Diuxi gobai gïr soikïi naana maaxi ixtumaxiïrï. Gïr soikïi gobai xi dagitoagi aatïmï ixtumaxi mai bhai ïrhidi Diuxi. Dai gïr soikïi ïpï xi gajiadïrï biagi aatïmï go soimaaxi ix makïdï ibuada ïrhidiña odami ix makïdï mai buaboitudai. Dai maatï nïiditai aatïmï xïï kïï tuiga Diuxi gobai gïr soikïi xi sïïrhi gïr tïtïgitoagi ïpï dai xi buañixikan dukai óídakagi idi oidigi daama kïïga ïïgiditai aatïmï Diuxi. Bïïxi gobai gïr soikïi maatï nïiditai aatïmï xïï kïï tuiga Diuxi otosakai ïgai Suxi Kristo.

¹³ Podukai gïr maatïturhimi Diuxi ix dukatai óídakana aatïmï xibi kia nïnïrakatai aatïmï xi aiyagi gïr bhai ïrhiaraga. Nïnïraka aatïmï xi dibiagi Suxi Kristo tudu ix makïdï ïr gïr Diuxiga. Aidï dibiakai ïgai gï maaxitudamu xïïxi ïr gïdukami.

¹⁴ Suxi Kristo tudu ïgai dai gï dagito ix gï muatudagi kïïgakïrï gïr bubaiditai gïr soimaaxkamiañdïrï. Podukai bhai dui ïgai saidi ïr aaduñdïkana aatïmï Diuxi kïïga buañixikami gïr biakai ïgai. Dai xibi ka kïïgakïrï buabuakïkai aatïmï ipïrhidi ïgai sai bïïxi gïr bhai ïrhiarakïdï ibuadagi aatïmï ixtumaxi ïr kïïga.

¹⁵ Podukai maakada aapi aatagi tudu dai abïnakidada go buaboitudadami sai kïïga ïïgiada gï ñoki. Kïïga bia aapi gubukarhigai xi maakadagi ñoki go buaboitudadami xïxkadï mai kïïga ibuadagi ïgai tudu. Kaxkïdï maiti gï agai tudu xi gï dagito aapi xi odami gajiadïrï biagi gï ñoki.