Tito 1 - Northern Tepehuan Bible

¹ Bhaiga Tito. Aanï ïr Pabora ix makïdï gï otoxdi idi ojai. Pioñigadï aanï Diuxi ix makïdï gin maa ïmo sïïrhikami saidi ïr otosadïkana aanï Suxi Kristo. Aatabuayi aanï soiña iñïrhiditai buaboitudadami, kaxkïdï tudu Diuxi ïko bubaidadï ïgai. Soiña in ïrhidi sai kïïga buaboitudana ïgai. Kaxkïdï tïtïïgidiña aanï ixtumaxi ïr buaboi sai buaboitudaiña dai Diuxi maaxi tutiakana ïgai.

² Ipïrhidi aanï sai buaboidaitai ïgai ixtumaxi ïr buaboi sai kïïga mai duduadikuda ïgai kïï maatïkatai sai kïïgakïrï óídaka agai bïïxkïrï bïïtarï. Diuxi gïr aagidi ïïki sai óídaka ragai bïïxkïrï bïïtarï tudu dai ïgai mai yaatagïi.

³ Diuxi ïr gïr kïïgakïrï bubiadamiga dai kaxkïdï aidïxi ka ayitadai ixtuigako ïgai ipïrhi aidïpïrï gïr maa ïgai ñokidï. Dai xibi gin maa ïgai aaduindagai sai aipakoga aituldana aanï gobai.

⁴ Gin maara dukai gï nïidi aanï Diuxi amadïrï aapi Tito, kaxkïdï tudu gin ïpïan dukai buaboitu aapi buaboidakai go ñoki ix makïdï gï tïtïïgidi aanï. Kaxkïdï gï ojidi aanï idi ojai. Dai ipïrhidi aanï sai Diuxi gïr Oga dai Suxi Kristo Gïr Nukadakami kïï tuigakagi gï bïïtarï dai sai gï ibhïxtakan taadakagi aapi gï ibhïdagïrï.

Pabora aagidi go Tito ix tuma aaduindagai gï agaitadai xi ibuadagi ïgai Kretana ix makïdï ïr ïmo arhi oidigi xako xikorhi kaatï sudagi

⁵ Aapi Tito, gï aagidi aanï baasïkioñdïrï pïsai bhai buadana ixtuma biïgakagi buaboitudadami bïïtarï ami Kretana. Pomaaxi bïïtarï gï bia aanï Kretana tudu. Gï aagidi aanï pïsai darasagi bhaitï gukakamigadï go buaboitudadami bïïxi go arhi kiikiïrï xakoga gïn ïmpaidi ïgai.

⁶ Dai go bhaitï gukakami ix makïdï darasagi aapi gï agai xi ïr kïkïïrhikagi ix makïdï kïï buañixikami dukai óídaga. Podukai mai biakamu jaa ixtukïdï gïpiïrï bupadagi. Gï agai xi ïmadugakagi oñigadï tudu. Dai gï agai xi maamaradï ïr buaboitudadamikagi. Dai gï agai xi mai oidakagi ix tukïdï jaa pokaitadagi sai maamaradï ïr pupuirugami. Dai gï agai ix mai tipukagi ïpï ixtukïdï pokaitadagi jaa sai mai ïïgidi dïïdïdï.

⁷ Daiñi, go buaboitudadami bhaitï gukakamigadï bia ïmo sïïrhikami. Diuxi nukaturhi ïgai Diuxi maamaradï kaxkïdï gï agai xi kïïgakïrï óídakagi go bhaitï gukakami sai podukai mai tipukagi ixtukïdï gïpiïrï bupadagi go jaa óídakami. Maiti gï agai xi ïmo gïdukami gï ïrhiadagi ïïgi ïgai tudu dai maiti gï agai xi omarhigakagi tomarhi xi nabaamutïrïkagi tomarhi xi kokoatïrïkagi. Dai maiti gï agai xi mukiñdadï tuigakagi ïpï.

⁸ Gï agai bhaiyoma xi kïïga miadïgidarakagi ïgai xïïxkadï daibiadagi odami. Dai gï agai xi ojoidagi ïgai ibuadagi ixtumaxi ïr kïïga. Gï agai xi maatïkagi ïgai ix tuma tïgibudagai ïgai daidi ïr soiñi dai ïgai bhïiyagi. Gï agai xi ïr sïïrhi ibuadamikagi. Gï agai xi bïïxi aïkatïrï ipïrhiada ïgai xi bhai ïrhiatuda Diuxi dai gï agai ïpï xi gï kabakadagi ixtumaxi maiti ïr soiñi bïïtarï.

⁹ Xïxkadï darasa agadagi aapi buaboitudadami bhaitï gukakamigadï gï agai xi kïïga gïn tïgito nïijada sa bhai buaboitudai ïgai go buaboikïdï aatagi ix makïdï gatïtïïgidi aatïmï. Ix kïïga buaboitudagi ïgai ix tumaxi ïr buaboi aidï gia bhaigakamu ïgai xi kïïga maakadagi ñoki go gaa buaboitudadami dai bhaigakamu xi abïnakidadagi go gaa ïpï sai kïïga oijadana gïr buaboidaraga. Dai podukai ïpï xi go bhaitï gukakami kïïga buaboitudagi ixtumaxi ïr buaboi aidï gia bhaigakamu ïgai xi mamaakadagi ñoki xorai buidïrï bïïtïkagi ixtumaxi ïr buaboi.

¹⁰ Daiñi, mui oidaga odami ami Kretana ix makïdï ïr buidïrï bïïtïkami ix tumaxi ïr buaboi. Maiti ipïrhidi ïgai ix ïïgiadagi dudunukami dai bhaiyoma aatagaiña naana maaxi ix makïdï maiti ïr soiñi. Dai aatagidïkïdï buirumadai ïgai go jaa óídakami. Ix makïdï bamioma pobuayi ïr go buaboitudadami judidiu ami óídakami. Ïgai pokaitiña sai gï agai xi ïïgiadagi judidiu bituldaradï tudu.

¹¹ Dai pomaaxi aatagikïdï maitïkïiña ïgai tuminxi dai gobai maiti ïr sïïrhi. Gï agai xi daidagi xi ka mai pomaaxi aatagaiña. Kaxkïdï tudu ix makïdï ïïgiadagi aatagidï koidamako imïiña buaboidaradï. Dai ami Kretana mui gadïïdïdï ïmadï modukai maamaradï ïïgidiña dai xia buimi ïïgi buaboidaradï.

¹² Daiñi, ami Kretana oidaga ïmoko ix makïdï maatïkami aagaiña odami. Dai ïgai pokaiti sai, —Sïïrhikïdï yaataboga go Kretana óídakami. Dai sai omarhiga ïgai ïpï dai koimudadï tutuiga. Paparïga ïgai bïïxkatai— ikaiti go maatïkami aagaikïdï.

¹³ Dai kïïga ïr buaboi ix dukai aagaiña ïgai. Kaxkïdï gï agai ix bhagaidagi ix makïdï aatagaiña ixtumaxi maiti ïr soiñi sai ïma dukai gïn tïgitokana dai kïïga buaboitudaiña.

¹⁴ Daiñi, maiti gï agai xi ïïgiadagi go judidiu aatagidï ix makïdï maiti ïr buaboi. Dai maiti gï agai xi ïïgiadagi sïïrhikami ix makïdï ïr ïïgi odami tïgibudadï ix makïdï bhïiyi odami dagitokai ixtumaxi ïr buaboi. Ïgai pokaitiña sai ïïgiditai ïgai sïïrhikamigadï sai buañixi bipiïyi odami iibhïadï. Dïï maiti gï agai xi buamï ïrhiada aatïmï xi ïïgiada gobai.

¹⁵ Daiñi, bïïxi buaboitudadami ibhïgadï ka kïï buañixi dai tomarhi ïmo ixtumaxi mai bhaiga xi tukurhimagi ïpamu. Dïï gia odami ix makïdï kia tukuraga ibhïgadï mai buaboidaitai Suxi Kristo ïgai gia bïïxi aïkatai ixtumaxi ibuadagi bamioma tukurhidi iibhïadï. Kaxkïdï tudu bïïxi tïgibudadï tukuraga asta xako ka mai maatï taata ïgai ixtumaxi ïr soimaaxkami.

¹⁶ Po kaitiña ïgai sai buaboitudai Diuxi dïï maatiga maaxi sai maiti ïr buaboi nïiditai ixtumaxi ibuayi. Mai ïïgidaraga ïgai tudu dai maiti ixtutuidikïi xi ibuadagi ixtumaxi ïr kïïga. Kaxkïdï go ïï tukuragai dukai nïidi Diuxi ïgai.