Santiago 5 - Northern Tepehuan Bible

Kabami soimaaxi taata agai go gïn bipidakami ix makïdï soi buidadagi soititigami

¹ Kïïga abïr kaïka ixtumaxi gïn aagida iñagai aanï xibi aapimï ix makïdï gïn bipidaka. Gï agai ix kabami gïgïr suanïdagi aapimï. Kabami soimaaxi taatamada agai aapimï kaxkïdï.

² Daiñi, sïïrhikïdï koimudadï tutuiga aapimï. Maiti ipïrhidi aapimï ix soikïdagi soititigami dai asta dubarhimi bïïxi go naana maaxi ixtumaxi namïakami ix makïdï bia aapimï mos ïï tïbïpi bhai tutuajidatai aapimï. Dai gïn yukuxi ka mamaataimi ïpï tïbïpi bhai tutuajidatai aapimï.

³ Dai asta gïn oroga ïmadï gïn plataga ïpï ka bhitamarhimi ïpï. Dai gobai ïr ïmo maaxidaragaika agai ix gïn ajïga agai gïgïbidaragai xïïxkadï aagagi Diuxi ix bhai kïï dui aapimï. Ka otoma aagada agai Diuxi ix bhai kïï idui aapimï tudu dai gïn maakimu ïgai gïgïbidaragai ix makïdï ïpïan soi taadaga ix mïiyagi gïn tukuga.

⁴ Daiñi, mai aa namïki aapimï gïn pipioñiga ix makïdï yoobaiña gïn ïxi. Gaïxi aapimï maitïkidï bhaiyoma dai gobai ïr ïmo maaxidaragai ix mai kïïga ibuayi aapimï. Daiñi, Diuxi bïïxi adaama gubuka dai ïr Tïanïdami mui sandadaru dai kïïga kaïkana ïgai gïn pipioñiga ix gïgïr aajagïiña. Dai kïï bhaiga Diuxi xi gïn bui gïxiagi gatïanïitai ïgai bïïxi sandadarugadï amïka tïbagiana tudu.

⁵ Kïï xioma óídakaiña aapimï tami oidigi daama tudu, kïïga biakatai aapimï naana maaxi ixtumaxi namïakami. Adaimïiña aapimï naana maaxi bhai ïrhiaragai tami oidigi daama tudu. Dïï gia aanï aagai sai ïpïamaaxi aapimï buxtaki ix makïdï gïgïpi gakuayiña mai maatïkatai sai miadaimi ixtuigako koda agai go sosiakami. Maatigan dukai gïn ayimu gïgïbidaragai tudu.

⁶ Daiñi, baan tutusaiña aapimï odami dudunukamiana mai biakatai ixtukïdï dai gataanïiña kodagi ïgai tomaxi maiti ïr soimaaxi ibuadamikana. Dai mai biakatadai ïgai ix dukatai ïïgi gïn soiñagi gïpiïrï bupaitai aapimï. Agia soimaaxi taata agai aapimï gïn bipidakami soimaaxi buididitai aapimï go soititigami tudu.

Gï agai go buaboitudadami ix mai ojodakatai nïnïrakagi ix dibiana Suxi Kristo

⁷ Gin aaduñi, oidaga odami ix makïdï soi buidada agai go buaboitudadami. Dai kaxkïdï gï agai sai gïn kabakadagi aapimï go soi ïrhiaragai buidïrï dai mai ojodatai nïnïrakagi ix dibiagi Gïr Nukadakami ïpamu. Gïn tïgitobïrai ix dukatai ibuayi ïmo ïsadami. Tïbïraga ïgai nïnïraradï tudu. Ga ïsaiña ïgai dai bhodïrï kïïga mai ojodatai nïnïrakana ïgai ix aiyagi duki. Dai bhodïrï bhai tïbïpi nïnïrakana ïgai ix aiyagi gobai ix makïdï bamioma namïga ïgai bïïtarï. Nïnïrakana ïgai go yoobaragai tudu.

⁸ Dai podukai ïpï gï agai sai gïn kabakadagi aapimï dai nïnïrakagi ix dibiana Gïr Nukadakami. Kaxi miadaimi ixtuigako dibiagai ïgai tudu.

⁹ Gin aaduñi, maiti abïr naana kaï nïijada gïn aaduñi Diuxi amadïrï. Ix pobuadagi aapimï aidï gia Diuxi aagada agai sai mai kïïga ibuayi aapimï. Gïn nukadabïrai tudu tadu gïn ayi gïgïbidaragai. Karhioga ayi ix tuigako gïgïbitulda agai Diuxi xorai mai kïïga ibuadagi tudu.

¹⁰ Gïn tïgitobïrai go ñiñokituldiadamigadï Diuxi ix makïdï oidakatadai ïïki tudu. Ïgai toma xïï tïbïpi soimaaxi taatamaiña bïïxkïrï kïïga gïn kabakadaiña go soi ïrhiaragai buidïrï. Dai aapimï abïr pobuada ïpï.

¹¹ Pokaitiña aatïmï sai Diuxi kïïgakïrï nïidi bïïxi ïgai ix makïdï kïïga gïn kabakadagi go soi ïrhiaragai buidïrï tudu. Daiñi, kïï maatï aatïmï sai go Job tomaxi kabami soimaaxi taata ïgai ïïki bïïxkïrï apia buaboitu ïgai dai kïïga gï kabakagi go soi ïrhiaragai buidïrï. Dai maatï aatïmï ïpï sai Gïr Nukadakami kïï tuigakatadai go Job bïïtarï dai soi ïlda tïï dai maa naana maaxi bhai ïrhiaragai gokiïrï. Gïr Nukadakami bïïxkïrï soi ïlda nïidiña bïïxi odami tudu kaxkïdï.

¹² Gin aaduñi Diuxi amadïrï, xibi gïn aagidamu aanï ïmo ñoki ix makïdï sïïrhikïdï gï agai ix kaïkagi aapimï. Daiñi, xïïxkadï gïn bapasadagi ix iduñi agai ixtumaxi mosïkaxi abïr ikaitiada sai, —Ïjï iduñimu aanï—. Dai maiti gï agai sai arastudagi aapimï jaa ñoki. Maiti gï agai xi jaa ñokikïdï maaxituda ïrhiada aapimï sai buaboikïdï iduña agai aapimï tudu. Dukami, maiti abïr aagadagi sai Diuxi ïr nïijadami saidi iduña agai aapimï. Dai maiti gï agai xi aagada aapimï ïpï sai ixtumaxi tami idi oidigi daama oidaga ïr nïijadami saidi iduñimu aapimï ïpï. Ix iduña agadagi aapimï aidï gia mosïkaxi, —Ïjï iduñimu aanï— abïr ikaitiada dai mosïkaxi. Dai ix maiti iduña agadagi aapimï, aidï gia bhaiyoma mosïkaxi, —Cho maiti iduñimu aanï— abïr ikaitiada. Ïma dukai gïpiïrï surhigimu aapimï Diuxi buidïrï tudu.

Go Santiago aagai ixdukatai ibuadagi xïïxkadï kokokoñikagi go buaboitudadami xiïpï ix daibuñagi ïma maaxi soi ïrhiaragai

¹³ Gin aaduñi, xïïxkadï ïmadutai aapimï soi dukai daibuñagi gï agai aapimï ix daanïdagi Diuxi. Dai xïïxkadï bhai gï ïrhiadagi ïmadutai aapimï gï agai ix ganïyagi ïgai bhai gï ïrhiditai Diuxi ïmadï.

¹⁴ Dai xïxkadï kokokagi ïmadutai aapimï gï agai ix baidagi aapimï go nunukadakamigadï go buaboitudadami sai daanturhiada ïgai. Ïgai bia ïmo sïïrhikami Gïr Nukadakamiñdïrï pipioñigadïkatai ïgai. Kaxkïdï abïr bapaida ïgai saidi tïidïna go kokoadï asaiti dai daanturhiada ïgai.

¹⁵ Daidi kïïga duadamu go kokoadï kïïga buaboidaitai daanturhitai ïgai. Diuxi Gïr Nukadakami duadidamu ïgai tudu. Dai xi duñada soimaaxi iduitadai go kokoadï dai kaxkïdï ayi go kokodagai aidï gia Diuxi oigïldamu ïgai maaxi aagaitai ïgai ixtuma soimaaxkami idui.

¹⁶ Gï agai aapimï ix gïn aaduñi Diuxi amadïrï buitapi maaxi aagagi ixtuma soimaaxkami idui aapimï tudu. Daidi gïn daanturhiadabïrai aipakoga ïpï xïïxkadï kokokoñikagi aapimï saidi duduadïna aapimï. Xïïxkadï kïïga buañixikagi ïmo odami ibhïadï dai kïïga buaboitudaitai daanïdagi ïgai Diuxi gobai kïïga ibuayi soiñi tudu.

¹⁷ Daiñi, go Eliaskaru ïr ïmo odamikatadai gïr ïpïan dukai. Dïï bïïxkïrï aidïxi dáí ïgai Diuxi kïïga buaboitudaitai sai mai duduna oidigi, Diuxi kïïga kaï dai baika umigi dan tajukami aïkami mai duudu.

¹⁸ Dai gokiïrï dáí ïgai Diuxi sai duduna oidigi ïpamu dai Diuxi otoi duki dai ïpamu bubuaka tïdoidagai dai kïïga ibhaji uxi.

Pokaiti go Santiago saidi gï agai ix soikïdagi aatïmï go buaboitudadami ix makïdï daadagitoimi go buaboidaragai saidi kïïga buaboitudana ïgai ïpamu

¹⁹ Gin aaduñi Diuxi amadïrï, xi ïmadutai aapimï ka maiti ipïrhiadagi ix ïïgiadagi ixtumaxi ïr buaboi, gï agai ix soiñagi ïgai sai bhïna ïpamu go kïïgadukïdï boi.

²⁰ Dai gï agai sai maatïkagi aapimï sai xorai soiñagi ïmai sai dagitona ïgai go soimaaxi ix makïdï ibuadana sai podukai soiñamu sai mai mukuna ïgai dai sai mai taatana ïgai gïgïbidaragai go naana maaxi soimaaxkami bïïtarï ix makïdï ibuadana ïgai.