Santiago 4 - Northern Tepehuan Bible

Gï agai go buaboitudadami ix mai gïgïrdukïdï gïn ïrhiadagi sai podukai biakagi ïgai urabaragai Diuxi ïmadï dai sai maiti gïn bupui ñokaiña ïgai aipakoga

¹ Gin aaduñi, ¿Ix tuixi gïn bupui ñokaiña aapimï aipakoga dai gïn bupui bïïtïkana aapimï ïïgi? Bhaibitukami gaagaiña aapimï ïïgi gïn bhai ïrhiaraga mai buamï gïn ïrhiditai jaa bïïtarï tudu dai go tïgibudagai gobai gïn tïanïda ïrhidi.

² Ipïrhidi aapimï ix biakagi naana maaxi ixtumaxi dai kaxkïdï asta kodaiña aapimï jaa. Ïgamukïiña aapimï jaa tudu dai kaxkïdï gïn bupui ñokaiña aapimï dai gïn kokodaiña dïï modukai mai kia bia aapimï ixtumaxi gaagai. Maita taanïiña aapimï Diuxi kaxkïdï.

³ Dai tomax dukai xadïrï gïn maakana Diuxi ixtumaxi tanïdagi aapimï. Soimaaxi gïn tïgibudaga gataanïitai aapimï tudu. Ïïgi gïn bïïtarï xia duada ïrhidiña aapimï ixtumaxi gïn maakadagi ïgai kaxkïdï.

⁴ Daiñi, Diuxi bïïtarï ïpïan dukami aapimï ïmo oki ix makïdï oidiña ïmai kïïrhi tomaxi maiti ïr kunadï. Oidiña aapimï go tami oidigi daama óídakami tïgibudadï soimaaxkïdï tudu. Pobuayi aapimï gaagaitai gïn bhai ïrhiaraga ixtumaxiïrï oidaga tami oidigi daama. Bamioma ïïmadai aapimï go soimaaxi tïgibudagai ix makïdï oidaga tami idi oidigi daama tudu dai mai ïïmadai aapimï Diuxi. Gï agai sai maatïkagi aapimï tudu sai odami ix makïdï adaimïi pomaaxkami tïgibudagai ïr buidïrï bïïtïkami Diuxi.

⁵ Gobai tudu aagaiña Diuxi ñokidïrï xako ikaiti ïgai sai, Diuxi gïr maa Ibhïadï saidi gïr ïmadï dakana dai bïïx tasai gïr tïtïitoiña ïgai ipïrhiditai saidi Diuxi bïïtarï óídakagi aatïmï dai mai xu xi ïmai bïïtarï. Sïïrhikïdï maiti ipïrhidi ïgai sai oijadagi aatïmï ïmai tudu. Po tudu ikaiti Diuxi ñokidïrï dai kïïga ïr buaboi gobai.

⁶ Dai tomaxi oijada antaadakagi aatïmï ïïgi gïr tïgibudaga soimaaxkïdï Diuxi bïïxkïrï kïï tuiga dai gïr soikïi saidi ïgai oijadiña aatïmï bhaiyoma. Agia kïï tuiga Diuxi gïr bïïtarï. Kaxkïdï pokaiti Diuxi ñokidïrï saidi, Odami ix makïdï gïgïrdukïdï gïn ïrhidi ïr buidïrï bïïtïkamigadï Diuxi. Dai kïï tuiga Diuxi odami bïïtarï ix makïdï mai gïgïrdukïdï gïn ïrhiadagi. Kïïga soikïi ïgai tudu, ikaiti go ojai.

⁷ Dai kaxkïdï gï agai ix gïn dagitoagi aapimï ix gïn tïanïdagi Diuxi. Ïïgiadabïrai Diuxi tudu dai gïn kabakadabïrai go diabora buidïrï. Aidï gia daibuna mïrhimu ïgai dai gïn dagitomu.

⁸ Kïïga abïr uraba Diuxi tudu dai kïïga ïïmada baidi ïgai aadïrï gïn ïïmadamu ïpï ïmo gïn aadunumï dukai. Aapimï ix makïdï soimaaxi ibuayi, dagitobïrai gïn soimaaxkamiga tudu. Mai kïï maatï aapimï ix bhai kïïgakïrï oijadagi Diuxi tïgibudadï xiïpï xi oijadagi go tami oidigi daama óídakami tïgibudadï. Gobai maiti ïr tïgibudadï Diuxi tudu. Mosïkaxi Diuxi tïgibudadï abïr oijada bhaiyoma.

⁹ Kabami abïr soi gïn ïrhiada dai asta suanïda tïïtïitoitai xïï kabami galnaxi gïn soimaaxkamiga. Maiti gï agai ix bhai gïn ïrhiadagi aapimï tudu dai tomarhi xi asïdagi aapimï. Gï agai bhaiyoma ix kabami soi gïn ïrhiadagi aapimï.

¹⁰ Maiti abïr gïgïrdukïdï gïn ïrhiada aapimï Gïr Nukadakami buitapi tudu bai ïgai kïïga namïakami gïn aagamu.

Maiti gï agai ix gïgïrdukïdï gïr ïrhiadagi aatïmï dai mai naana kaï nïijadagi gïr aaduñi Diuxi amadïrï

¹¹ Gin aaduñi, Diuxi gïr maa sïïrhikamigadï ix makïdï ikaiti sai gïr oigïdada aatïmï aipakoga. Kaxkïdï maiti abïr naana kaï nïijada gïn aaduñi. Maiti gï agai ix dudunukami dukai gïn bapasadagi aapimï dai pokaitadagi sai ïmoko gïn aaduñi buaboitudadami ajïga gïgïbidaragai soimaaxi ibuadamikatai ïgai tudu. Xorai podukai ñokadagi ka mai ïïgidi Diuxi sïïrhikamigadï. Bamioma gatïanïdami gï ïrhidi ïgai xi bhai go sïïrhikami tudu podukai ñokaitai ïgai.

¹² Mosïkaxi Diuxi ïgai dai bia gubukadagai ix gamaakadagi sïïrhikami dai aagagi ïpï ix bhai sïïrhi ibuayi óídakami. Mosïkaxi ïgai bia sïïrhikami ix maakadagi gïgïbidaragai odami xiïpï ix kïïgakïrï bubiadagi. Aapimï mai bia sïïrhikami xi bamioma gatïanïdan buadagi xi bhai Diuxi dai aagagi ix bhai kïï buayi gïr aaduñi tudu.

¹³ Daiñi, ïïmadutai aapimï gïgïrdukïdï dukai gïn ïrhidiña daidi ikaitiña saidi iduña agai ïïgi ixtumaxi iduña ïrhiadagi aapimï. Mai buamï ïrhidi aapimï ix bhai Diuxi bhai agai ix pobuadagi aapimï tudu. Pokaitiña aapimï sai, —Xibi xiïpï xoroko no xibhïako iimimu aatïmï dai gaatabuadamu parï ïmo umigi dai kïïga mui gamaitïmu tuminxi— ikaitiña aapimï.

¹⁴ Dïï gia mai maatï aapimï ix daibuñagi xoroko. Mai xii tïbïpi kaapakïrïi aapimï tudu. Ïpïamaaxi aapimï go kukudurhi ix makïdï mosïkaxi lachi maaxkana dai ïpï lïïchikïdï ka mai tiputurui.

¹⁵ Kaxkïdï gï agai bhaiyoma ix pokaitadagi aapimï sai, —Ix gïr maakiagi oigaragai Diuxi ix óídakagi aatïmï aidï gia iduñimu aatïmï ixtumaxi—.

¹⁶ Dïï aapimï gïgïrdukïdï gïn ïrhidiña dai ïïgi gïn tïanïitai dukai ñokaiña. Mai tïgitokana aapimï sai Diuxi ïgai dai gïn tïanïi. Sïïrhikïdï soimaaxi ix podukai gïn ïrhiadagi aapimï tudu.

¹⁷ Daiñi, kaxi ïr soimaaxkami gobai tudu ix ïmo odami maatïkagi ixtumaxi ïr sïïrhi ix ibuadagi dai bïïxkïrï maiti iduñagi ïgai.