Santiago 3 - Northern Tepehuan Bible

Pokaiti go Santiago sai buaboitudadami gï agai sai kïïga bhai maaxi ñokadagi

¹ Gin aaduñi Diuxi amadïrï, kïïga gï maatï sai Diuxi bamioma gï tïgito nïida agai ix makïdï gatïtïïgidi ñokidï ix bhai kïï ibuayi dai go gatïtïïgiadami ñoki bamioma biakamu gïgïbidaragai ix mai kïï idui ïgai. Kaxkïdï maiti gï agai ix muidutai aatïmï ipïrhiadagi ix ïr gatïtïïgiadamikagi Diuxi ñokidï.

² Aatïmï ix makïdï ïr gatïtïïgiadami ñoki gï agai xi kïïga gïr tïgitokagi tudu. Kïïga maatï aapimï sai bïïxkatai aatïmï oidigi daama óídakami dudatai dai naana dukai mai kïïga ibuadana tudu. Dïï gia xi ïmo odami kïïga gï nukadatai tïanïdagi tïñidï sai mai soimaaxi ñokadagi ïgai gobai itïiya ïrhidi sai kïïga ixtutuidikïi ïgai xi kïïga tïanïdagi bïï sudakami tukugadï ïpï sai mai soimaaxi ibuadagi ïgai.

³ Ïpïan dukami gobai xïxkadï dakamitudagi aatïmï ïmo kabayo dai kïïga tïanïdagi dai baidakagi xako sïïrhi ipïrhiada aatïmï toma xïï gubuka ïgai. Pomaaxi odami ix makïdï ïïgi tïanïi tukugadï tudu.

⁴ Dai gobai ïpïamaaxi go gïgïr barkos ïpï. Tomaxi kïïga gïgïrdu ïgai dai go ïbïrhi kïïga gubuka ïpï dai aipakoga nïituskïi dïï gia odami ïmo arhi timonkïdï1 tïanïi go barkos sai iimïna sïïrhi xako ipïrhiadagi go odami.

⁵ Pomaaxi gïn tïñi ïpï tudu. Tomaxi arhidu gobai dïï kïïga aagaiña gobai kïïga gupukami ñoki. Dai go ñoki ix makïdï bubuakiagi gïr tïñiañdïrï kïï bhaiga xi ïpïan buadagi ïmo táí ïpï.

⁶ Tomaxi arhidukagi ïmo táí dïï gia ix busiagi gobai gïïpi mïmïidi gobai oidigi. Pomaaxi xïïxkadï gïr tïñiañdïrï busiagi ïmo soimaaxkami ñoki tudu. Ïmo arhi ñokikïdï bhaiga odami xi soi buidadagi mui óídakami. Tïñidï odami sïïrhikïdï mui naana maaxi aagaiña soimaaxkami ñoki tudu. Dai tomaxi arhidu gïr tïñi dïï ix aatïmï mai kïïga ñokadagi gïpiïrï gïr surhigai gobai. Tomaxi arhidu gobai bïïxkïrï kïïga gïpiïrï gïr dadaitudai gobai bïï sudakami gïr tukuga tudu. Gïr ñoki ïr ïpïan dukami ïmo táí ix makïdï busiagi go gïï taiyañdïrï xako gïgïbitulda agai Diuxi go diabora. Kïï bhaiga gobai xi xia buadagi bïïxi gïr oidakaraga ix soimaaxi ñokadagi aatïmï.

⁷ Daiñi, odami kïïga ixtutuidikïi xi kïï tutiatudagi tomax tuma kïixi, dukami go oidigana buxtaki dai go ujurugi dai go kïkïixi ix makïdï dïbïrapi gïn tïrhiusumai dai asta go kïkïixi ix makïdï sudaïrï óídaga ïpï. Odami ka kïï bhai tutiatudaiña bïïxi gobai dai tïanïiña tudu.

⁸ Dïï gia ïïgi tïñidï odami gobai gia mai tipukana xorai bhai tutiatudagi gobai sai ka mai soimaaxi ñokadagi gobai. Mai dodorhi bipiïyi gïr tïñi tudu dai apia aagaiña naana maaxi mukigami dukai ñoki ïmo patai dukai.

⁹ Ïïmo imidagai kïïga xadutuadan kaitiña odami Diuxi dai bhodïrï laachkïdï ïgalbaaxi odami galnaaxi ñokaiña buidïrï jaa odami ix makïdï Diuxi idui. Galnaaxi ñokaiña ïgai buidïrï jaa odami tomaxi Diuxi idui go odami sai ïpïamaaxkana ïgai Diuxi tudu.

¹⁰ Ïïmo imidagai kïïga ñokaiña odami aagaitai bhai ïrhiaragai ñoki tudu dïï gia ïïmo imidagai ïgalbaaxi odami galnaaxi ñokaiña buidïrï jaa. Maiti ïr sïïrhi podukai aapimï gin aaduñi Diuxi amadïrï.

¹¹ Daiñi, ¿Bhai ix ïmo babikiañdïrï busaiña sudagi yoobikami saagida jaa sudagi mai bïñiakami ïpï? ¿Cho aba?

¹² Dai podukai ïpï, ¿Bhai ix ïmo igoxi dïïdï ibhiatana olibo? ¿Dai ïmo uba dïïdï ix bhai ibhiatana igoxi? Xadïrï. Dai xako busanïdagi sudagi ix makïdï mai kïïgadu iiyagi bïïtarï xadïrï ami busaiña sudagi kïïgadukami ïpï. Dai pomaaxi gïr ñoki ïpï. Maiti gï agai sai gïr ñoki saagida busiagi toma lachi soimaaxkami tudu.

Diuxi ïgai dai gïr mamaakai kïïgadukami tïgibudagai

¹³ Gin aaduñi, ¿Po gïn ïrhidi mïxi sai kïïgadu gïn tïgibudaga dai sai maatï aapimï ix dukatai kïïga óídakagi? Aidï gia ix kïïgadukagi gïn tïgibudaga abïr ibuada ixtumaxi ïr kïïga dai podukai maaxituda saidi ïr buaboi sai kïïgadu gïn tïgibudaga. Kïïga abïr ibuada tudu dai maiti abïr gïgïrdukïdï gïn ïrhiada aapimï. Podukai ibuayi odami ix makïdï mai kïïgadu tïgibudadï kaxkïdï.

¹⁴ Dïï gia ix koimudadï tutiakagi aapimï dai mosïkaxi buamï gïn ïrhiadagi aapimï ïïgi gïn bïïtarï aidï gia mai kïïgadu gïn tïgibudaga. Ix po maaxkagi aapimï aidï gia maiti abïr pokaitada sai kïïgadu gïn tïgubudaga. Yaatagi gobai tudu.

¹⁵ Pomaaxkami tïgibudagai maiti ïr Diuxiañdïrï imïdami dai bhaiyoma gobai ïr tïgibudagai ix makïdï tomaxakoga oidaga tami oidigi daama. Diuxi Ibhïadï mai podukai mamaakai tïgibudagai odami tudu. Diabora tïgibudadï gobai bhaiyoma.

¹⁶ Toma xakoga xako koimudadï tutiakagi óídakami dai mosïkaxi ïïgi bïïtarï buamï gïn ïrhiadagi ïgai, ami ïïgi gïn bupui ñokaiña óídakami dai naana maaxi soimaaxi ibuadana.

¹⁷ Go tïgibudagai ix makïdï gamamaakai Diuxi gia mai pomaaxi. Go Diuxiañdïrï tïgibudagai gia kïïga buañixi dai odami ix makïdï oijadagi gobai gaagaiña ix dukatai xioma urabakatai óídakagi jaa ïmadï. Mai oomarhigakana ïgai dai bhaiyoma kïï tutiakana ïgai dai kïïga abokan dukai óídakana. Soi gïn ïrhidiña ïgai jaa bïïtarï xïïxkadï soimaaxi taatamadagi ïgai dai kïïga buididiña. Ïmadugan dukai nïidiña ïgai bïïxi óídakami ïpï. Dai mai yaatagïiña ïgai dai bhaiyoma bïïxi ixtumaxi aagadagi ïgai gobai ibuadana. Po maaxi go tïgibudagai ix makïdï gamamaakai Diuxi tudu.

¹⁸ Kïï sïïrhi kaatïkana oidakaradï odami ix soikïdagi ïgai jaa tudu sai kïïga gïn urabakatai óídakagi gïn oigïdatai aipakoga tudu.