Santiago 1 - Northern Tepehuan Bible

Santiago biaturhi go buaboitudadami

¹ Aanï ïr Santiago ix makïdï gïn ojidi idi ojai. Ïmo pioñigadï aanï Diuxi dai Suxi Kristo Gïr Nukadakami ïpï. Ïmo biatuldaragai bïïtarï bïïxkatai aapimï judidiu ix makïdï ïr buaboitudadami dai ix makïdï aipakoga mïïmïkaxi óídaga oidigi daama, aapimï ix makïdï ïr piipixaradï go bhaibuxtama dan goka maamaradï go Jakobokaru tudu.

Gï agai aatïmï xi apia buaboitudadagi Diuxi tomaxi xijiakagi gïr oidakaraga

² Gin aaduñi, maiti abïr soi gïn ïrhiada xïïxkadï naana maaxi soimaaxi daibuñagi aapimï dai bhaiyoma abïr bhai gïn ïrhiada.

³ Ka máí aapimï tudu sai xïïxkadï soimaaxi daibuñagi ix apia buaboitudadagi aapimï tomax dukai sai gobai gïn soikïi ix bamioma gïn kabakadagi aapimï go soi ïrhiaragai buidïrï.

⁴ Maiti abïr gïn dagito ix gïn maitiagi go soi ïrhiaragai tudu dai podukai bïïx tasai bamioma kabakami dukai buaboitudamu aapimï asta xako ka maiti gïn biïgakagi ixtumaxi oijada bïïtarï gïr buaboidaraga.

⁵ Daiñi, xïïxkadï ka mai tïtïïgiagi aapimï ix dukatai iduñagi gïn oidakaraga bïïtarï aidï gia daañibïrai Diuxi dai ïgai bhai ïrhiarakïdï gïn maakimu maatïdagai. Kïïga gï maatï tudu sai maiti gïn bhagaidamu Diuxi daanïitai aapimï tudu.

⁶ Dïï gia gï agai sai kïïga buaboitudaitai daanïdagi aapimï, kïïga kabakami dukai buaboitudatai tudu. Odami ix makïdï mai kïïga kabakami dukai buaboitudai dudatai ïmadukai gïn tïïtïitoiña dai ka mai maatïkana ix tumaxi gïn tïtïgitoagi. Tïgibudadï ïpïan buayi go sudagi ix makïdï bïïxi aipakoga oiñïiña go ïbïrhikïdï tudu. Odami pomaaxkami maiti gï maatï ix gïn tïgitoagi tudu.

⁷ Dai ïgai gia xadïrï bhïna ixtumaxi tanïdagi Gïr Nukadakami.

⁸ Ïïgi mai maatï ïgai ix bhai kïïgakïrï buaboitudada agai tudu dai ïïgi tïgibudadï aipakoga bapaiñxïrïdan buayi. Pomaaxkana ïgai tïgibudadï tudu dai kaxkïdï mai bhïbhïjïiña ïgai ixtumaxi tanïdagi ïgai Diuxi.

⁹ Gin aaduñi Diuxi amadïrï, gï agai sai kïïga bhai gïn ïrhiada aapimï ix makïdï ïr soititigami dai ix makïdï jaa odami mai namïakami dukai nïidi. Gï agai sai bhai gïn ïrhiadagi maatïkatai sai Diuxi gia kïïga namïakami dukai gïn nïidi.

¹⁰ Dai ajakoga xi gï bidakagi ïmoko gï agai sai bhai gï ïrhiadagi ïpï. Diuxi soikïi ïgai sai mai gïdukïdï gï ïrhiadagi gï bidakai kaxkïdï. Odami ix makïdï kïïga gïn bipidaka mai tïbïpi kapaka agai dai ugiti agai ïpïan dukai ïmo arhi yooxigai ix makïdï oidigana kïakana tudu.

¹¹ Kïï tiodikana gobai dïï gia xïxkadï busiagi tasai ka otoma tobhipai go basoi dai laachkïdï go yooxigadï koidamakoga naigiïrïi dai bhodïrï surhigïi gobai dai ïpï laachkïdï ka mai kïï tiodikana. Dai pomaaxi go gïn bipidakami ïpï. Mai tïbïpi kapakarïi tudu dai ugiatïi ïgai mai kia nato idunakai bïïxi ixtumaxi ibuada ïrhidiña.

¹² Gin aaduñi, xïxkadï gïr ajiagi ïmo soi ïrhiaragai dai ix kïïga gïr kabakadagi aatïmï dai apia oijadagi gïr buaboidaraga aidï gia bia aatïmï ixtukïdï bhai gïr ïrhiadagi. Gï agai tudu sai bhai gïr ïrhiadagi aatïmï xïïxkadï gïr kabakadagi aatïmï dai apia oijadagi gïr buaboidaraga tomaxi xijiakagi gïr oidakaraga. Gï agai sai bhai gïr ïrhiada aatïmï maatïkatai Diuxi gïr maakimu gïr maitïki ix makïdï ïr go kïïgakïrï oidakaragai bïïxkïrï bïïtarï. Kaxi gïr aagidi Diuxi sai maakimu ïgai go maitïki go odami ix makïdï oigïdai Diuxi tudu.

¹³ Dai xïxkadï gïn aajiagi tïgibudagai ix soimaaxi iduñagi aapimï maiti abïr pobai gïn ïrhiada saidi Diuxi gïn maakai tïgibudagai podukai. Xadïrï. Daiñi, Diuxi tomarhi ïmo imidagai mai biakana pomaaxkami tïgibudagai ix soimaaxi ibuadagi dai tomarhi ïmo imidagai mai mamaakai ïgai pomaaxkami tïgibudagai odami ïpï.

¹⁴ Dai bhaiyoma ïïgi gïr tïgibudaga ïgai daidi gïr bupuirumadaiña dai gïr mamaitiña ix kaxkïdï soimaaxi ibuadana aatïmï. Gobai ïgai tudu dai gïpiïrï gïr dadaitudai dai mai xu xi Diuxi.

¹⁵ Ïïgi gïr tïgibudaga gïr bapaidi ix ibuadagi aatïmï soimaaxkami po gïr ïrhiditai sai ami tïïgimu aatïmï bhai ïrhiaragai bai go tïgibudagai gobai gïr maitïkïi dai gïpiïrï gïr dadaitudai dai ka soimaaxi ibuadana aatïmï. Dai bhodïrï go soimaaxkami go ïï mukigami gïr buapidi bhaiyoma.

¹⁶ Gin aaduñi Diuxi amadïrï, gïn oigïdai aanï dai bia aanï ïmo ñoki gïn bïïtarï. Gin kaïkabïrai dai maiti abïr gïn dagito ix gïn bupuirumadagi go soimaaxkami. Maiti abïr po gïn ïrhiada sai ami tïïgimu aapimï ïmo bhai ïrhiaragai tudu. Gobai mai buapai tomarhi ïmo ixtumaxi kïïgadukami kaxkïdï.

¹⁷ Mosïkaxi Diuxi gïr Oga ix makïdï idui go xixabugai dai go tasai dai go masadai ïgai dai tïbagiañdïrï gïr oidi bïïxi ixtumaxi ix makïdï buaboikïdï ïr kïkïïgadukami tudu. Dai kïïga gï maatï sai Diuxi tomarhi ïmo imidagai gïr maakimu soimaaxkami ixtumaxi. Daiñi, tomaxi go xixabugai ïmadï go tasai dai masadai gia ïmapïbuadana dai tutukuiña ïïmo imidagai dïï gia Diuxi apia mo maaxkana dai mai ïmapïbuayi toma lïïchi. Kaxkïdï bhaiga aatïmï xi kïïga buaboitudada ïgai.

¹⁸ Diuxi ïgai dai gïr maa gïr utudui oidakaragai tudu aidïxi buaboitu aatïmï Diuxi ñokidï ix makïdï kïïga ïr buaboi. Podui ïgai saidi ïko darasadïkana aatïmï, saidi podukai aatïmï ix makïdï buaboitudai ïpïgioma ïko ïr darasadïkana ix bhai ïma maaxi ixtumaxi ix makïdï idui ïgai tudu. Podukai aatïmï bamioma namïakami bii Diuxi bïïtarï xi bhai go gaa ixtumaxi ix makïdï idui ïgai. Ïïgi podukai gï tïgito Diuxi dai kaxkïdï podui ïgai.

Gï agai ix ïïgiada aatïmï Diuxi ñokidï dai mai xu xi mosïkaxi kaïkagi aatïmï

¹⁹ Gin aaduñi, kïïga abïr gïn tïgito kaïka ixtumaxi gïn aagida iñagai xibi. Daiñi, gï agai sai kïïga kaïkagi aatïmï ixtumaxi gïr aagidagi jaa. Dai gï agai ïpï sai kïïga gïr tïgitokatai ñokadagi aatïmï. Dai maiti gï agai ix otoma bhaakokodagi aatïmï ïpï.

²⁰ Xïïxkadï bhaakokodagi aatïmï gobai maiti gïr soikïi saidi buañixikami dukai óídakagi aatïmï ixdukatai Diuxi ipïrhidi tudu.

²¹ Kaxkïdï abïr dagito bïïxi go soimaaxkami dai bïïxi go tukuragai maaxi ix makïdï ibuadana aapimï. Dai bhaiyoma abïr kïïga maaxituda sai mai gïgïrdukïdï gïn ïrhidi aapimï kïïga ïïgiditai Diuxi ñokidï. Kïïga ïr buaboi Diuxi ñokidï tudu ix makïdï gïn tïtïïgidi jaa. Ka kïïga maatï aapimï Diuxi ñokidï gïn iibhïdagïrï tudu. Dai Diuxi ñokidï kïïga bia gubukarhigai ix kïïgakïrï gïn bubiadagi kïïga buaboitudakai aapimï.

²² Gï agai sai ïïgiada aapimï Diuxi ñokidï tudu dai mai xu mosïkaxi kaïka aapimï. Jaa gia mosïkaxi kaïkana Diuxi ñokidï dai mai kïïga tïgitokana ix kaiti dai mai ïïgidiña. Ïïgi gïn bupuirumadaiña ïgai pobuadatai tudu. Maiti gï agai ix po buadagi aapimï gin aaduñi.

²³ Ix kaïkagi aapimï Diuxi ñokidï dai mai ïïgida kaïkagi aapimï, gobai mai kïïgadu. Ïgai ix makïdï pobuadagi ïpïan buayi ïmo odami ix makïdï ïïgi gï nïnïidiña nïidakaruana

²⁴ dai mai kïïga gï tïgito nïidiña dai otoma mai tïgitokana ix maaxi tiodi.

²⁵ Daiñi, Diuxi ñokidï sïïrhikïdï kïïgadu. Ami Diuxi ñokidïrï mai biïga ixtumaxi tudu. Dai kïïga soikïi gobai odami sai ka maiti ïr pioñigadïkagi ïgai go soimaaxkami, sai ka mai biakana ïgai xi ïïgiadagi go soimaaxkami dai taatagi mukigami tudu. Dïï gia gï agai odami xi kïïga gïn tïgito kaïkagi ix kaiti gobai daidi ïïgiadagi. Ix pobuadagi ïgai aidï gia kïïga bhai gïn ïrhiadamu ïgai.

²⁶ Gï agai ix ïïgiada aatïmï gïr buaboidaraga tudu. ¿Ïma dukai dukatai gïr soiñana gïr buaboidaraga ix mai ïïgiadagi aatïmï? Dukami, ix pokaitadagi ïmo odami sai kïïga oidi buaboidaradï dïï gia ix mai buamï ïrhiditai aagaiña ïgai soimaaxi ñoki, podukai ïïgi gï buirumadai ïgai. Gï maaxitudai ïgai sai maiti ïr soiñi buaboidaradï tudu.

²⁷ Dïï gia Diuxi pokaiti sai odami ix makïdï mai sarabidi go soimaaxkami ix makïdï oidaga tami oidigi daama dai bhaiyoma kïïga soikïdagi aarhi mai dïïdïkami ïmadï bipiudu, sai ïgai gia kïïga oidi go buaboidaragai ix makïdï kïïga buañixi. Oidi ïgai go buaboidaragai ix makïdï mai bia soimaaxi tudu.