Romanos 8 - Northern Tepehuan Bible

Diuxi Ibhïadïkïdï óídaga aatïmï xibi

¹ Aa gia ïr buaboi gobai ix makïdï gïn aagidi aanï. Kaxkïdï xibi ka mai tipu gïgïbidaragai odami bïïtarï ix makïdï bïïnakami bii Suxi Kristo.

² Xibi Diuxi Ibhïadï ïgai dai gïn tïanïi dai gïn maakai gubukarhigai sai kïïgakïrï óídakana aapimï. Ka bïïnakami aapimï Suxi Kristo kaxkïdï. Dai kaxkïdï ïpï go soimaaxkami ka maiti gïn tïanïi dai go mukigami ka maiti gïn ajïi ïpï.

³ Go sïïrhikami ojixikami maiti ixtui ix kïïgakïrï gïr bubaidagi. Mai bia gobai gubukarhigai ixtukïdï gïr soiñagi. Ïïgi sobhikïiña aatïmï adaimïitai gïr ïkidadï tïgibudagai kaxkïdï. Dïï Diuxi gia kïïgakïrï gïr bubaitu. Ïgai otoi maradï sai biakana ïmo tukugai ïpïamaaxkami ix makïdï bia aatïmï soimaaxi ibuadami. Dai gï muatu ïgai gïr soimaaxkamiga bïïtarï. Podukai Suxi tukugadïkïdï Diuxi gamaitï go soimaaxkami bui.

⁴ Diuxi gamaitï go soimaaxkami bui sai podukai aatïmïkïdï gï ibuada ixtumaxi ïr sïïrhi. Sai aatïmïkïdï gï ibuadana bïïxi ixtumaxi gïr tanïi go sïïrhikami tudu. Xibi ka mai ïïgidi aatïmï gïr ïkidadï tïgibudagai. Xibi bhaiyoma ïïgidi aatïmï Diuxi Ibhïadï.

⁵ Odami ix makïdï ïïgidi gïn ïkidadï tïgibudagai mosïkaxi gobai gïn tïgito ajiopaiña. Mos ïr pipioñigadï gïn dukamikana ïgai gïn ïkidadï tïgibudaga. Dïï gia ix makïdï ïïgidi Diuxi Ibhïadï, ïgai gia gïn tïgito ajiopaiña ixtumaxi gïn tïanïi Diuxi Ibhïadï.

⁶ Gïr ïkidadï tïgibudagai go ïï mukigami gïr buapai xïxkadï gïr tïgito ajiopada aatïmï gobai. Dïï gia xïxkadï gïr tïgito ajiopada aatïmï ixtumaxi Diuxi Ibhïadï ipïrhidi aidï gia kïïgakïrï óídakana aatïmï dai kïïga ibhïxtakan taadakana.

⁷ Daiñi, Diuxi buidïrï bïïtï odami ix makïdï gïn tïgito ajiopai gïn ïkidadï tïgibudagai. Gïr ïkidadï tïgibudagai tomarhi ïmo imidagai mai ïïgidi Diuxi sïïrhikamigadï tudu. Maiti ixtutuidikïi gobai xi ïïgiadagi tudu.

⁸ Odami ix makïdï gïn tïanïi tïgibudagai ïkidadï maiti ixtutuidikïi xi bhai ïrhiatudagi Diuxi.

⁹ Dïï gia ix gïn ïmadï daja Diuxi Ibhïadï aidï gia ka maiti gïn tïanïi gïn tïgibudaga ïkidadï. Bhaiyoma xibi Diuxi Ibhïadï ïgai dai gïn tïanïi. Xorai mai biakagi Diuxi Ibhïadï ix makïdï Suxi Kristo gïr otoxi, ïgai gia maiti ïr aaduñdï Suxi Kristo.

¹⁰ Dïï gia xi gïn ïmadï daja Suxi Kristo aidï gia Diuxi Ibhïadïkïdï óídaga aapimï kïïgakïrï gïn nïiditai Diuxi. Dïï gïn tukuga tomax dukai bia xi mukiagi gïn soimaaxkamigakïdï.

¹¹ Daiñi, Diuxi ïgai dai duakaturhi go Suxi Diuxi Ibhïadï gubukadadïkïdï. Dai xibi Diuxi Ibhïadï gïn ïrana daja. Kaxkïdï maatï aatïmï sai Diuxi duakatuda agai gïn tukuga ïpï mukukai aapimï. Gïn duakatudamu Diuxi Ibhïadï gubukarhigadïkïdï ix makïdï gïn ïrana daja.

¹² Kaxkïdï xibi gin aaduñi, ka mai guguamakïdï bia aatïmï xi ïïgiadagi gïr tïgibudaga ïkidadï.

¹³ Ix ïïgiditai óídakagi aapimï gïn ïkidadï tïgibudagai aidï gia mos koimu aapimï. Dïï gia ix Diuxi Ibhïadï gubukarhigakïdï maigobai dasagi aapimï ix makïdï ibuadana ïïgiditai gïn tïgibudaga ïkidadï, aidï gia kïïgakïrï óídakamu aapimï.

¹⁴ Bïïxi odami ix makïdï ïïgidi Diuxi Ibhïadï ïr Diuxi maamaradï.

¹⁵ Daiñi, Diuxi Ibhïadï ka ayi gïr ïrana. Dai ïgai maiti gïr maakai duadimudagai ix dukai biakana aatïmï ïkioma aidïxi mos ïr pipioñi dukamikana aatïmï. Xibi Diuxi Ibhïadï gïr maa sïïrhikami xi ïr Diuxi maamaradïkana aapimï. Kaxkïdï gïr oga aagai aatïmï Diuxi.

¹⁶ Xibi gïr iibhïdaga gïr aagidimi xi aatïmï ïr maamaradï Diuxi dai Diuxi Ibhïadï gïr aagidimi ïpï xi gia ïr buaboi gobai.

¹⁷ Maamaradï aatïmï Diuxi tudu. Kaxkïdï xibi bïïxi go bhai ïrhiaraga ix makïdï Diuxi bhai darasakami bia Suxi Kristo bïïtarï ïr aatïmï gïr bïïtarï ïpï. Dïï gia gï agai xi soimaaxi taatagi aatïmï ïpïan dukai ix dukatai taata Suxi bai podukai gïr aiyagi ïmo xadutudaragai ïgai ïmadï ïpï.

Sïïrhikïdï kïï gïduka agai gïr bhai ïrhiaraga ix makïdï nïnïraka aatïmï

¹⁸ Kïïga maatï aanï sai bïïxi go soi ïrhiaragai ix makïdï taataimi aatïmï xibi maiti ïr ixtumaxi bhaitoma maatïkatai sai Diuxi gïr maaki agai ïmo bhai ïrhiaraga ix makïdï mai bhaiga xi aiyagi gïr tïgibudagai xi maatiagi.

¹⁹ Xibi bïïxi aïkatai ix makïdï Diuxi idui mos nïnïraka xi aiyagi ixtuigako xi Diuxi gatïtïïgiadagi ix maaxi ka agai maamaradï.

²⁰ Daiñi, Diuxi dáí sai xia duñixikami biïna go oidigi xibi ïmadï bïïxi aïkatai ix makïdï idui ïgai dïï mai xu bïïxkïrï bïïtarï. Po dui ïgai ipïrhiditai

²¹ xi gokiïrioma kïïgakïrï bubuakiagi bïïxi aïkatai ix makïdï idui ïgai. Diuxi ipïrhidi xi ix makïdï idui kïïgakïrï busiagi ïpï xi ka mai kïrhimurïkagi dai tomarhi mai dubarïdagi. Ipïrhidi ïgai xi ix makïdï idui gobai biakagi gïdukami bhai ïrhiaraga dai sai kïïgakïrï bubuakïna gobai ïmadï Diuxi maamaradï ïpï xïxkadï kïïgakïrï bubuakiagi ïgai.

²² Kïi maatï aatïmï tudu sai bïïxi aïkatai ix makïdï ïr Diuxi duñidï mos aijiïgïi kia xibi dai kokokan taadakana ïpïan dukai ïmo oki xuduku buapa agadagi ïmo xïïñi.

²³ Dai aatïmï aijiïgïi ïpï tomaxi ka bia aatïmï xibi go ïpïgadadï oidaragai ix makïdï gïr maakai Diuxi. Diuxi Ibhïadï tudu ïr ïpïgadadï oidaragai ix makïdï Diuxi gïr maakai. Dïï tomaxi ïgai gïr ïmadï daja aatïmï mos nïnïraka kia xi Diuxi aagagi bïïxkatai buitapi xi aatïmï ïr maamaradï ïgai. Aidïpïrï buimu aatïmï utudui tukugai. Gobai nïnïraka aatïmï kia dai mos aijiïgïi gïr ïrabiadïrï.

²⁴ Daiñi, buaboidaitai kïïgakïrï bubuaka aatïmï dai xibi apia buaboitudai aatïmï dai mai dagitokatai tïgito ajiopai aatïmï xi gïr ayimu gïïdukami bhai ïrhiaragai. Xibi mai kia nïidi aatïmï gïr bhai ïrhiaraga tudu, kaxkïdï mos nïnïraka aatïmï kia.

²⁵ Maiti gïr ayi kia gobai ix makïdï nïnïraka aatïmï tudu dai kaxkïdï tomaxi tïbïpidagi gobai apia nïnïraka aatïmï kia.

Diuxi Ibhïadï gadaanïi Diuxi gïr bïïtarï

²⁶ Daidi Diuxi Ibhïadï gïr soikïi ïpï xïïxkdï mai gubuakagi aatïmï. Ïïmo imidagai mai tïtïgai aatïmï ix tïiyagi aatagaitai Diuxi ïmadï. Dïï gia Diuxi Ibhïadï aijiïgïi daanïitai Diuxi gïr bïïtarï. Aagai ïgai naana maaxi ix makïdï mai tipu ñoki ixtukïdï aagagi ïmoko.

²⁷ Diuxi kïï maatï ix tïtïitoi odami dai kïi maatï ïpï ix tïiya ïrhidi Diuxi Ibhïadï daanïitai gïr bïïtarï. Diuxi Ibhïadï daanïi ixtumaxi Diuxi ipïrhidi gïr bïïtarï tudu.

²⁸ Kïï maatï aatïmï sai Diuxi bïïxi aïkatïrï aatabuayi dai kïïga ibuayi aatïmï gïr bïïtarï ix makïdï oigïdai Diuxi. Aatïmï gïr bïïtarï tudu ix makïdï Diuxi ïkobai gïr báí xi aatïmïkïdï gï ibuadagi ix tumaxi ïgai ipïrhidi.

²⁹ Diuxi ka ïkiaxdïrï maatïkatadai xorai aatïmï daidi ïr ïko bubaidadïka agai. Dai ïgai dáí sai aatïmï ïpïamaaxkana gï maara Suxi Kristo. Podukai Suxi Kristo bïïxi adaama ïr namïakami dai muidu aatïmï ix makïdï ïr susukurhidï.

³⁰ Diuxi podukai dáí sai aatïmï ïpïamaaxkana Suxi Kristo. Gïr báí ïgai dai kïïgakïrï gïr tïï. Gïr báí sai aatïmï ïpï gïr aiyagi bhai ïrhiaradï Suxi Kristo dai sai gïr aiyagi go xadutudaragai ix makïdï ïgai bia ïpï.

Diuxi gïr oigïdai

³¹ ¿Ix tïiya ïrhidi aidï gïr bïitarï idi ix makïdï gïn aagidimi aanï idi ojiïrï? Diuxi ïgai dai gïr abhana kïïka dai gïr soikïi ¿aba? ¡Xadïrï ixtuidïna gïr buidïrï bïïtïkami gïr bui aidï!

³² Daiñi, Diuxi mai tudayitai gatïïgi ïïgi maradï sai mukuna gïr bïïtarï. Kaxkïdï kïïga maatï aatïmï sai gïr maakimu ïgai bïïxi aïkatai go gaa ixtumaxi ix makïdï bia ïgai gïr bïïtarï ïpï.

³³ Daiñi, Diuxi kïïgakïrï gïr nïidi xibi. ¡Aatïmï ïr ïko bubaidadï di! ¡Kaxkïdï xibi mai tipu xorai gïpiïrï gïr bupadagi!

³⁴ Dai Suxi Kristo ïgai dai muu gïr bïïtarï ïpï dai gï duakatu ïpamu dai Diuxi sïïrhixapadïrï daja ïgai xibi. Ami gadaanïi ïgai Diuxi gïr bïïtarï. ¿Xorai potïdana aidï saidi gïr ajïga gïgïbidaragai ami dajatai Suxi dai daanïitai ïgai gïr bïïtarï? ¡Tipu xorai!

³⁵ ¿Ix tuma sobhidana aidï bai ka maiti gïr oigïdadagi Suxi Kristo? ¡Tipu tomarhi ïmo ixtumaxi ix makïdï gasobhidagi bai ka maiti gïr oigïdada ïgai! Daiñi, tomaxi gïr aiyagi soi ïrhiaragai kabami, dai tomaxi soimaaxi taatagi aatïmï, dai tomaxi soi gïr buidadagi jaa gïr kïdaitai, tomax dukai tomaxi pobï gï buadagi bïïxkïrï mai sobhidamu gobai ix gïr oigïdada Suxi Kristo. Dai tomaxi taata aatïmï bhiugigai, dai tomaxi mai yukusukagi aatïmï, dai tomaxi gïr kodadagi omarhigami, tomax dukai mai sobhidamu ïgai bai ka maiti gïr oigïdadagi Suxi Kristo.

³⁶ Po tudu ikaiti Diuxi ojadïrï. Ami ikaiti sai, Bïïx tasai gïr kodadan kaiti omarhigakami mos gï oiditai aatïmï. Kañiñiru dukai maaxi aatïmï ïgai bïïtarï. Mos kodituda bïïtarï dukai gïr nïidi ïgai tudu, ikaiti go ojai.

³⁷ Dïï gia tomax pobï buadagi gobai aatïmï tomax dukai gamaitïkami gïr oigïdaitai Suxi Kristo.

³⁸ Kïïga maatï aanï sai mai tipu ixtumaxi sobhidagi bai ka maiti gïr oigïdadagi Diuxi. Tomaxi koi aatïmï xiïpï xi apia óídakagi aatïmï modukai mai sobhidamu gobai. Tomarhi Diuxi tïtïañikarudï dai tomarhi go diabora tïtïañikarudï, xiïpï go gubukadagai bipiakami tïbagiïrï óídakami mai sobhidamu. Tomarhi ix tumaxi oidaga xibi dai tomarhi ix tumaxi oidaka agai gokiïrioma,

³⁹ tomarhi ix makïdï tïkadïrï daja tomarhi ix makïdï utadïrï daja, tomarhi ïmo ixtumaxi ix makïdï idui Diuxi ixtuidimu xi sobhidagi bai ka maiti gïr oigïadagi ïgai. Suxi Kristo Gïr Nukadakami ka bhai dui gïr bïïtarï dai xibi ka mai tipu ixtumaxi sobhidagi bai ka maiti gïr oigïadagi Diuxi. Ka bïïna daraja aatïmï Suxi Kristo Gïr Nukadakami kaxkïdï.