Romanos 7 - Northern Tepehuan Bible

Go sïïrhikami ka maiti gin tïanïi

¹ Gin susukurhi, aapimï kïï maatï ix dukatai aatabuayi go sïïrhikami. Kïï maatï aapimï sai go sïïrhikami mosïkaxi odami duduakakami bïïtarï tïanïi dai go koidadï bïïtarï gia cho.

² Dukami xi ïmo oki ïmadï biyagi ïmo kïïrhi, aidï gia ka maiti gï agai xi ïmadï boiyagi ïgai ïmai kia oidakatai aduñdï. Po kaiti go sïïrhikami tudu. Dïï gia xi ugitiagi aduñdï go oki aidï gia bia ïgai oigaragai xi ïmadï biyagi ïmai.

³ Dïï gia xi ïmadï boiyagi ïgai ïmai kïïrhi kia oidakatai aduñdï aidï gia soimaaxi ibuayi ïgai. Ka mai xadutudai ïgai go sïïrhikami pobuadatai. Dïï gia xi ugitiagi aduñdï aidï gia mai soimaaxi ibuayi ïgai tomaxi ïmadï bii ïmai.

⁴ Pomaaxi aapimïkïdï ïpï gin susukurhi. Aapimï ka bïïna daraja Suxi Kristo dai koi aapimï ïgai ïmadï. Koidadï dukami aapimï xibi go sïïrhikami bïïtarï. Ka bïïna bii aapimï Suxi Kristo ix makïdï gï duakatu mukukai. Kaxkïdï xibi kïïga ïr soiñi aapimï Diuxi bïïtarï.

⁵ Ïkioma mai kia buaboidakai aatïmï Suxi gïr tïanïiña go sïïrhikami. Dïï mos kaïkai aatïmï ix kaiti go sïïrhikami mos kabamioma gïr aïjïiña soimaaxi tïgibudagai dai podukai go soimaaxkami mos bamioma gïr tïanïiña xi soimaaxi ibuada aatïmï. Aidïpïrï bïïxi go soimaaxkami ix makïdï ibuadana aatïmï go ïï mukigami gïr buapaiña.

⁶ Ïkioma maamaixapikami dukai gïr biakana go sïïrhikami gïr tïanïitai gobai dïï xibi ka kïïgakïrï bubuaka aatïmï. Koidadï dukami aatïmï go sïïrhikami bïïtarï kaxkïdï. Xibi ïma dukai óídaga aatïmï. Ka mai óídaga aatïmï gïr tïanïitai go sïïrhikami. Xibi utudui gïr oidakaraga. Xibi kïïgakïrï óídaga aatïmï gïr tïanïitai Diuxi Ibhïadï.

Go sïïrhikami gïr tïtïgidi xïï galnaxi gïr soimaaxkamiga

⁷ Ïïmo odami potïiya antaada nïidakai idi ojai sai mai kïïgadu Diuxi sïïrhikamigadï. ¡Maiti ïr buaboi gobai! Kïïgadu aba Diuxi sïïrhikamigadï. Ïgaikïdï tudu mamaatïrïi aanï ixtumaxi ïgai daidi ïr soimaaxkami. ¿Dukatai maatïkana aanï aidï saidi ïr soimaaxkami xudu biaka in ïrhiada aanï buxtuidadï ïmai ix mai tipukamudai ïmo sïïrhikamigadï Diuxi ix makïdï gïr daidi ix po buada aatïmï?

⁸ Kïïgadu go sïïrhikami tudu dïï go soimaaxkami ïgai dai garhi in dodai. Tïï gobai ix dukatai aatabuadagi go sïïrhikamikïdï dai gin maa tïgibudagai xi naana maaxi biaka in ïrhiada aanï jaa buxtuidadï.

⁹ Mai buamï in ïrhidiña aanï tudu ïkioma mai maatïkatai ix kaiti go sïïrhikami. Dïï gokiïrï máí aanï ix kaiti go sïïrhikami dai maatïkai aanï ixtumaxi gin daidi gobai go soimaaxkami bhïiyi gubukadagai gin bui

¹⁰ dai aanï mukiadï bii Diuxi bïïtarï. Go sïïrhikami asïgai daidi gïr maaki agaitadai ïmo duakaragai dïï mos aanï gin bïïtarï go ïï mukigami gin buapi bhaiyoma.

¹¹ Go soimaaxkami tïï ix dukatai aatabuadagi go sïïrhikamikïdï tudu dai gin buirumagi dai mukiadï gin bia.

¹² Dïï tomax dukai bïïxkïrï kïïgadu Diuxi sïïrhikamigadï. Kïï buañixi gobai dai kïï sïïrhiñi.

¹³ ¿Go sïïrhikami ix tudu ïgai dai gin buapi mukigami tomaxi kïïgadukami ïgai? ¡Cho! ¡Xadïrï gin buapidana gobai mukigami! Go soimaaxkami ïgai dai aatadui go sïïrhikamikïdï tomaxi gia ïr kïïgadukami go sïïrhikami dai ïgaikïdï gin buapi mukigami. Go sïïrhikamikïdï maatï tïï aatïmï ix makïdï ïgai daidi ïr soimaaxkami. Dai maatï tïï aatïmï xïï kabami ïr bïïtïkami go soimaaxi ïpï. ¡Asta ixtumaxi kïïgadukamikïdï bïïxi aatabuayi go soimaaxkami di!

Ïmo kokodi dukai imïi gïr ïrabiadïrï

¹⁴ Kïï maatï aatïmï sai Diuxi sïïrhikamigadï ïr Diuxi tïgibudadï. Dïï aanï mos ïr odami dai go soimaaxkami gin tïanïi pioñigadï dukai.

¹⁵ Mai tïtïgai aanï ix tuixi pomaaxi buayi aanï. Maiti ibuayi aanï go kïïgadukami ix makïdï iduña in ïrhidi dai bhaiyoma soimaaxkami ix makïdï maiti iduña in ïrhidi gobai gia ibuayi aanï.

¹⁶ Tomaxi ibuayi aanï ix makïdï mai kïïgadu bïïxkïrï buaboitudai aanï sai kïïgadu go sïïrhikami. ¡Maiti ipïrhidi aanï xi buadagi gobai ix makïdï mai kïïgadu di!

¹⁷ Kaxkïdï maatiga maaxi sai maiti ïr aanï ix makïdï soimaaxi ibuayi tdu. Go soimaaxkami ix makïdï gin ïrana oidaga ïgai dai pomaaxi gin duiñturhi bhaiyoma.

¹⁸ Kïïga maatï aanï aidï sai ïïgi gin tïgibudagïrï mai tipu ixtumaxi kïïgadukami. Kaxkïdï ipïrhidiña aanï xi buadagi ixtumaxi ïr kïïga dai maiti ixtutuidikïiña.

¹⁹ Ipïrhidiña aanï xi buadagi ixtumaxi ïr kïïga tudu dïï soimaaxi ibuayi aanï bhaiyoma.

²⁰ Dai xi ibuayi aanï gobai ix makïdï maiti iduña in ïrhidi aidï gia maiti ïr aanï ïgai dai soimaaxi ibuayi. Go soimaaxi ix makïdï gin ïrana oidaga gobai ïgai dai pomaaxi ibuayi aidï.

²¹ Ka máí aanï tudu sai tomaxi iduña in ïrhidiña ixtumaxi ïr kïïga bhaiyoma mosïkaxi soimaaxkami ixtutuidikïi aanï xi buadagi.

²² Daiñi, Diuxi sïïrhikamigadï ïr bhai ïrhiaradï gin ibhïdaga.

²³ Dïï gin ïrana oidaga ixtumaxi ix makïdï gin kokodai ïpï. Gin tïanïi gobai dai mos maixapikan dukai gin biayi ïïgiditai aanï go soimaaxkami.

²⁴ ¡Kabami soi gin ïrhidiña aanï tudu! ¿Xorai kïïgakïrï gin busaidana idi gin tukugañdïrï ix makïdï mukigami amakoga gin baidatimi?

²⁵ Suxi Kristo Gïr Nukadakami aba ïgai dai kïïgakïrï gin busaitu tudu. Kaxkïdï bhai gin ïrhidi aanï Diuxikïdï. Pomaaxi tudu gin oidakaraga. Gin ibhïdagakïdï gia ïïgidi aanï Diuxi sïïrhikamigadï. Dïï bïïxkïrï go soimaaxkami mos apia gin tïanïi ansai soimaaxi ibuadagi.