Romanos 6 - Northern Tepehuan Bible

Gïr ibhïdaga ïkidadï muu Suxi Kristo ïmadï dai xibi ka bhïiyi aatïmï ibhïdagai utudui

¹ ¿Xibi dukatai nïidi aapimï? ¿Bhai ix ïr buaboi xibi sai gï agai xi kabami soimaaxi ibuadagi aatïmï bai podukai Diuxi gïr maaxituldagi ix kïï tuiga ïgai dudatai gïr oigïrhiditai gïr soimaaxkamiga?

² ¡Cho! ¡Xadïrï! Bhaiyoma xibi ïr koidadï aatïmï go soimaaxkami bïïtarï. ¿Dukatai aapia adaimïiña aatïmï aidï?

³ ¿Maiti mïx maatï aapimï sai buaboidakai aatïmï ka bïïnaga bipiïyi aatïmï Suxi Kristo? Daiñi, aatïmï koi ïgai ïmadï aidïxi ïgai muu. Biïna bii aatïmï ïgai kaxkïdï.

⁴ Dai podukai ïpï aatïmï gïr yaasatu ïpï ïgai ïmadï mos bïïnakai ïgai. Koi aatïmï ïgai ïmadï dai Diuxi Gïr Oga gïr duakaturhi ïpï ïpïan dukai ixdukai duakaturhi ïgai Suxi Kristo mos ïï gubuakatai ïgai. Podui ïgai xi podukai utudutudagi gïr oidakaragai xibi.

⁵ Daiñi, aatïmï koi Suxi Kristo ïmadï bïnakatai aatïmï ïgai. Dai duakatumu aatïmï ïpï ïpïan dukai ix dukatai ïgai duakatu.

⁶ Kïï maatï aatïmï sai aidïxi Suxi gï xixatu kuruxiana aidï gïr ibhïdaga ïkidadï gï xixatu ïpï ïgai ïmadï. Podui Diuxi sai podukai ka maiti gïr tïanïdana go soimaaxkami.

⁷ Go soimaaxkami tudu ïr gïr tianïdamikatadai ïkioma. Dïï go soimaaxkami ka mai bia gubukadagai buidïrï odami ix makïdï ka koi ¿aba?

⁸ Dai aatïmï koi Kristo ïmadï. Kaxkïdï kïïga buaboitudai aatïmï sai óídakamu aatïmï ïgai ïmadï ïpï.

⁹ Kristo muu dai ka duakatu ïgai dai xibi tomarhi ïmo imidagai ka mai mukimu ïgai ïpamu. Kaxkïdï go mukigami ka mai bia gubukarhigai ïgai bui.

¹⁰ Aidïxi muu Kristo, aidï abhiadïrï go soimaaxkami ka mai bia gubukarhigai ïgai bui. Ka mai mukimu ïgai tomarhi ïmo imidagai. Dai xibi bhai ïrhiatudai ïgai Diuxi oidakaradïkïdï.

¹¹ Podukai ïpï abïr tïgito ajiopada aapimï sai kaxi ïr koidadï aapimï go soimaaxkami bïïtarï. Dïï gia abïr tïgito ajiopada ïpï sai xibi bhai ïrhiatudai aapimï Diuxi gïn oidakaragakïdï ïpï bïïna darakatai aapimï Suxi Kristo.

¹² Kaxkïdï abïr mai dagito xi gïn tïanïdagi go soimaaxkami tami oidigi daama óídakatai aapimï bai mai ïïgiadagi aapimï gïn soimaaxi tïgibudagai.

¹³ Maiti abïr gatïïgida gïn tukuga xi ïr aaduinkarudï go soimaaxkami tudu. Bhaiyoma abïr gïn tïïgida xi ïr Diuxi aaduinkarudïkana aapimï xi ibuadagi aapimï ixtumaxi ïr kïïga. Aapimï ka gokiamako bia go mukigami aidï dai kaxi ïr duduakakami kïïgakïrï. Kaxkïdï abïr gatïïgida gïn tukuga bai podukai ïïgiadagi aapimï ixtumaxi ïr sïïrhi.

¹⁴ Podukai go soimaaxkami ka mai biakamu ix dukatai gïn tïanïdagi. Xibi ka mai bia aapimï sïïrhikami xi ïïgiadagi go sïïrhikami. Xibi bhaiyoma ïïgida ïrhidi aapimï Diuxi mos ïï kïï tuigakatai ïgai gïn bïïtarï.

Kaxi kïïgakïrï bubuakai aatïmï go soimaaxkamiañdïrï

¹⁵ ¿Ix tïiya ïrhidi aidï gïr bïïtarï gobai ix makïdï nïiditadai aatïmï? Kaxi aagai aatïmï sai go sïïrhikami ka maiti gïr tïanïda agai. ¿Bia tïxi aidï oigaragai xi soimaaxi buadagi xibi mos ïï kïï tuigakatai Diuxi gïr bïïtarï? ¡Cho! ¡Xadïrï!

¹⁶ Daiñi, kïï maatï aapimï sai xudu ïmoko biaka ïrhiadagi gï amu, ïgai biakamu ix ïïgiadagi amudï tomax dukai. Dai po maaxi xibi gïn bïïtarï ïpï. Kïï bhaiga aapimï xibi xi gïn tïïgidagi xi go soimaaxkami gïn amukagi ïïgiditai aapimï go soimaaxkami. Dïï gia go soimaaxkami go ïï mukigami buapai. Dïï gia xi gïn tïïgidagi aapimï Diuxi xi ïr gïn amukagi ïgai ïïgiditai aapimï aidï gia ïgai kïïgakïrï gïn nïijadamu.

¹⁷ Ïkioma aapimï ïr pipioñigadïkana go soimaaxkami. Dïï xibi aanï aagai ansai bhai gin ïrhidi Diuxikïdï. Xibi aapimï bïïxi gïn bhai ïrhiarakïdï ïïgidi go ñoki ix makïdï gïn maatïturhi aanï kaxkïdï.

¹⁸ Xibi ka kïïgakïrï bubuaka aapimï dai ka maiti ïr pipioñigadï go soimaaxkami. Xibi ïr pipioñigadï aapimï Diuxi dai ibuayi ixtumaxi ïr sïïrhi. Kaxkïdï sïïrhikïdï bhai gin ïrhidi aanï Diuxikïdï.

¹⁹ Xijaiga gïn bïïtarï xi maatï kajiagi gin aatagi. Kaxkïdï xibhï gïn aatagidamu aanï ixtumaxi mai xijaiga, ix makïdï bïïx tasai nïidiña aapimï. Daiñi, ïkioma ïïgidiña aapimï gïn soimaaxi tïgibudagai dai mos ïr pipioñigadï dukamikana go soimaaxkami adaimïitai gobai. Dïï xibi gï agai mïxi gatïïgidagi gïn tukuga bïï sudakami Diuxi xi ïr ïïgi ïgai bïïtarïkagi aapimï. Aidï gia Diuxi bïïtarï óídakamu aapimï kïïgakïrï.

²⁰ Ïkioma aidïxi kia ïr pipioñigadïkana aapimï go soimaaxkami mai biakatadai aapimï sïïrhikami xi ïïgiadagi ixtumaxi ïr sïïrhi.

²¹ Mos ïr xaïraragai gobai ix makïdï ibuadana aapimï ïki. ¿Tumaxi ïr soiñikana aidï gobai ix makïdï ibuadana aapimï? Maiti ïr soiñikana gobai toma lachi. Bhaiyoma go ïï mukigami buapaiña gobai.

²² Dïï xibi go soimaaxkami ka mai bia gubukadagai xi gïn tïanïdagi. Xibi aapimï ïr Diuxi pipioñigadï bhaiyoma. Kaxkïdï xibi Diuxi bïïtarï óídaga aapimï dai kïïgakïrï óídakamu aapimï bïïxkïrï bïïtarï.

²³ Go soimaaxkami maitïkidï ïr go ïï mukigami tudu. Dïï gia Diuxi gïr maakai ïmo oidaragai. Ïgai gïr maakai ïmo kïïgakïrï oidakaragai bïïxkïrï bïïtarï tudu bïïnakatai aatïmï Gïr Nukadakami Suxi Kristo.