Romanos 5 - Northern Tepehuan Bible

Buaboitudadami bia gïïpi bhai ïrhiaraga kïïgakïrï gïn nïiditai Diuxi

¹ Kïïga maatï aatïmï aidï sai Diuxi kïïgakïrï gïr nïidi buaboidaitai aatïmï. Suxi Kristo Gïr Nukadakami bhai dui gïr bïïtarï sai xioma uraba óídakana aatïmï Diuxi.

² Buaboidakai aatïmï Suxi Kristo baa aatïmï ïmo gïdukami bhai ïrhiaragïrï ix makïdï gïr maa Diuxi gïr oigïdaitai. Dai xibi bhai ïrhiarakïdï nïnïraka xi urabagi aatïmï Diuxi xudu gï maaxitudagi ïgai xïïxi ïr gïïdukami.

³ Dai xudu gïr aiyagi soi ïrhiaragai aatïmï mos bhai gïr ïrhidiña. Maatï aatïmï sai taatakai soi ïrhiaragai bamioma mamaatïrïi aatïmï xi dukatai mai dagitoagi xi gïr maitiagi soi ïrhiaragai.

⁴ Dai xudu mai dagito aatïmï xi gïr maitiagi soi ïrhiaragai, aidï gia Diuxi pokaiti sai kïï odan tutuiga aatïmï. Dai xudu Diuxi potïiyagi sai kïï odan tutuiga aatïmï aidï gia bhai ïrhiarakïdï nïnïraka aatïmï xi Diuxi kïïgakïrï gïr bubiadagi.

⁵ Dai xi buaboidaitai nïnïrakagi aatïmï xi Diuxi kïïgakïrï gïr bubiadagi aidï gia mai soi gïr ïrhiadamu aatïmï. Dai ïkobïrakoga Diuxi gïr maa Diuxi Ibhïadï dai ïgai gïr maatïturhimi gïr iibïdagïrï ix xïï kïïga gïr oigïdai Diuxi.

⁶ Suxi Kristo muu gïr bïïtarï aidïxi kia ïr gïpiïrï bïïtïkamikana aatïmï dai mai biakana aatïmï soiñi. Diuxi podukai dáí sai aidïpïrï mukiagi ïgai aidïxi kia ïr gïpiïrï bïïtïkamikana aatïmï.

⁷ Bhaitoma mai tipu xorai bhai aagagi xi mukiagi ïmai bïïtarï tomaxi kïï tuigakagi ïgai ¿aba? Ïbogiamaaxi oidaka antaada ïmoko ix makïdï bhai aagagi ix mukiagi ïmo kïï tuigakami bïïtarï, ix kabami kïï tuigakagi ïgai tudu.

⁸ Dïï Kristo gia muu gïr bïïtarï aidïxi kia ïr soimaaxi ibuadamikatadai aatïmï dai podukai gïr tïtïgidi Diuxi xïï kïïga gïr oigïdai ïgai.

⁹ Suxi Kristo aaxi ïradï gïr bïïtarï kaxkïdï xibi Diuxi kïïgakïrï gïr nïidi. Dai xi Diuxi kïïgakïrï gïr nïidi aidï gia ka maiti gïr ayimu gïgïbidaragai.

¹⁰ Ïkioma gïr bupuidïrï bïïtïkana aatïmï ïmadï Diuxi dïï gia Suxi Kristo, Diuxi maradï, muu dai podukai bhai dui sai ïpamu biakana aatïmï urabaragai Diuxi ïmadï. Suxi Kristo ïpamu duakatu aidïxi ka mutadai. Kaxkïdï xioma maatiga maaxi xibi sai kïïgakïrï bubuakimu aatïmï, ïpamu oidakatai ïgai tudu.

¹¹ Dai ïkobïrakoga xibi Diuxi ïgai daidi ïr gïr bhai ïrhiaraga, ka bhai dunakai Gïr Nukadakami Suxi Kristo xi biakagi aatïmï urabaragai ïmadï Diuxi.

Adankaru gïr buapi mukigami dïï gia Suxi gïr buapi bhai ïrhiaragai

¹² Go Adankaru soimaaxi dui ïïki dai podukai ayi go mukigami oidigi daama dai xibi go mukigami bïïxi óídakami ajïi soimaaxi buadatai óídakami.

¹³ Kaxi ïr soimaaxi ibuadamikatadai óídakami ïïki aidïxi mai kia ojixikatadai Diuxi sïïrhikamigadï. Dïï aidï Diuxi mai gïgïbiturhiña óídakami soimaaxkamigadïkïdï ix dukatai tïanïi go sïïrhikami. Mai biakatai ïgai Diuxi sïïrhikamigadï kaxkïdï.

¹⁴ Go Adankaru mai ïïgidi ïmo sïïrhikamigadï Diuxi ix makïdï tïjai ïgai sai ïïgidiña. Dïï gia go gaa óídakami ix makïdï óídakatadai asta xïxkadï dibia go Moises, ïgai mai gajiadïrï bia ïmo sïïrhikami ix dukai idui go Adankaru. Ïgai mai biakatadai ïmo sïïrhikami ixtuma gajiadïrï biagi kaxkïdï. Dïï tomaxi mai gajiadïrï bia ïgai ïmo sïïrhikami bïïxkïrï koiyiña ïgai bïïxkatai. Go Adankaru ïr ïmo maaxidaragai dukamikatadai bïïtarï ïmoko ix makïdï gokiïrioma dibia. Suxi Kristo bïïtarï ïr maaxidaragaikatadai ïgai tudu. Dïï mai xu bïïxi aïkatïrï ïpïamaaxi ïgai Suxi.

¹⁵ Suxi mai ïpïan dui go Adán tudu. Daiñi, go oidaragai ix makïdï Diuxi gïr urhiñdi mai ïpïamaaxi go soimaaxkami ix makïdï idui go Adán. Go soimaaxkami ix makïdï idui Adán bua mukigami bïïxi óídakami bïïtarï. Dïï gia baamioma gubuka go oidaragai ix makïdï gïr urhiñdi Diuxi mos ïï kïï tuigakatai ïgai. Suxi Kristokïdï gïr urhiñdi ïgai ix dukatai muidutai aatïmï kïïgakïrï oidakagi bïïxkïrï bïïtarï tudu.

¹⁶ Kaxkïdï aanï aagai sai Suxi mai ïpïandukai dui go Adán. Daiñi, go Adán soimaaxi dui mos ïïgi ïmo imidagai dai gokïdï bua gïgïbidaragai gïr abhana. Dïï gia Suxi Kristokïdï Diuxi gïr maa ix dukatai kïïgakïrï gïr nïijadagi ïgai tomaxi mui imidagai soimaaxi idui aatïmï.

¹⁷ Go Adán soimaaxi dui ïïki kaxkïdï aidï abhiadïrï go mukigami apia kïïkigiña. Dïï go aaduindagai ix makïdï idui Suxi Kristo gïïpi bamioma gubuka xi bhai go soimaaxkami ix makïdï iduitadai Adán. Suxikïdï gïr maakai Diuxi ix dukatai kïïgakïrï gïr nïijadagi ïgai. Ïmo oidaragai dukai gïr maakai gobai gïr oigïdaitai. Dai kïïgakïrï nïijadamu Diuxi odami ix makïdï buaboidakai bhïiyagi óídaradï dai ïgai kïïgakïrï óídakamu Suxi Kristo gubukadadïkïdï.

¹⁸ Bïïxkatai aatïmï biakatadai gïgïbidaragai gïr abhana soimaaxi dunakai Adankaru. Dïï Suxi mos arhi ïmo buañixikami aaduindagaikïdï bhai dui gïr bïïtarï xi biakana aatïmï urabaragai Diuxi ïmadï ïpamu bai podukai kïïgakïrï óídakana aatïmï bïïxkïrï bïïtarï.

¹⁹ Go Adankaru soimaaxi ibuadami bia bïïxi óídakami tudu mai ïïgidakai ïgai Diuxi. Dïï Suxi Kristo gia ïïgidi Diuxi dai podukai bhai dui sai Diuxi kïïgakïrï nïijadana kïïga mui odami.

²⁰ Diuxi gïr maa sïïrhikamigadï sai ïgaikïdï maatiga maaxkana xïï gïïpiga gïr soimaaxkamiga. Dïï gia xudu kabami gïïpigatadai soimaaxkami aidïpïrï Diuxi apia bamioma gïr mamaaxidi xïï kïï tuiga ïgai.

²¹ Ïkioma go soimaaxkami tïanïiña bïïxi óídakami gïr buapidakai gobai mukigami. Dïï gia xibi Diuxi gïr tïtïïgidi xïï kïï tuiga ïgai. Xibi Suxi Kristo Gïr Nukadakami bhai dui gïr bïïtarï sai Diuxi kïïgakïrï gïr nïijadana dai sai aatïmï kïïgakïrï óídakana bïïxkïrï bïïtarï ïpï.