Romanos 4 - Northern Tepehuan Bible

Abraamkaru buaboitu Diuxi kaxkïdï Diuxi kïïgakïrï tïï

¹ ¿Ix dukatai ïpï dui aidï go Abraamkaru, ix makïdï ïr ogadï bïïxkatai aatïmï Israelitas tudu? ¿Ixtukïdï kïïgakïrï tïï Diuxi ïgai?

² Gï aagidamu aanï ixtukïdï. Daiñi kïïgakïrï tïï Diuxi go Abraam buaboitudakai ïgai dai mai xu kïï ïïgiditai ïgai Diuxi. Xi ïïgiditai kïïgakïrï tïïgimudai Diuxi ïgai, aidï gia go Abraamkaru biakamudai ixtukïdï tïdagi odami buitapi sai ïr gïdukami ïgai. Dïï tomaxi dukai, xadïrï potïdana ïgai Diuxi buitapi saidi ïr gïdukami ïgai.

³ Diuxi ñokidï ikaiti aidï sai, Go Abraamkaru buaboitu Diuxi dai kaxkïdï Diuxi kïï buañixikami aagai dai kïïgakïrï tïï, ikaiti Diuxi ñokidï.

⁴ Daiñi, ïmo kïïrhi ix makïdï gaatadui dai gamaitï tuminxi, xadïrï potïna saidi ïr óídaradï go tuminxi ¿Aba? ¡Cho! ¡Maitïkidï gobai bhaiyoma!

⁵ Daiñi mai tipu tomarhi ïmo aaduindagai ix makïdï odami ibuadagi xi ïgaikïdï Diuxi kïïgakïrï nïijadana. Dïï gia Diuxi kïïgakïrï nïidi odami ix makïdï buaboitudagi Diuxi xi ïïgi ïgai buanai iibhïadï soimaaxi buadami. Kïïgakïrï nïidi ïgai odami mos nïiditai ix ka buaboitu dai mai xu nïiditai xi dui ïgai ixtumaxi kïïgadukami.

⁶ Dai go Dabidkaru ïki aagai idi baaxi bhai ïrhiaragai aatagi ïpï. Pokaiti ïgai sai Diuxi kïïgakïrï nïidi odami mos buaboitudakai ïgai dai sai go kïïgadukami ix makïdï ibuadana odami mai bapakïi ami. Ïgai pokaiti sai odami ix makïdï Diuxi kïïgakïrï nïijadagi podukai mos buaboitudakai ïgai, gïïpi bia bhai ïrhiaraga gïn abhana.

⁷ Go Dabidkaru ikaiti sai, Kïïga bhai gïn ïrhidi odami ix makïdï Diuxi oigïrhi soimaaxkamigadï, ix makïdï Diuxi ka mai tïgito soimaaxkamigadï tudu.

⁸ Kïïga bhai gïn ïrhidi ïgai ix makïdï soimaaxkamigadï ka mai ojixi Diuxi librogadïrï xako ojixikatadai bïïxi go soimaaxkami ix makïdï ibuayi ïgai, ikaiti Dabidkaru ïki.

⁹ ¿Borai bïïtarï aidï idi bhai ïrhiaragai ix Diuxi kïïgakïrï nïijadana odami podukai? ¿Mosïkaxi óídakami ix makïdï gïn circuncido bïïtarï xi gobai? ¿Ix makïdï maiti gïn circuncido ïpï bïïtarï xio? Ka aagai aatïmï xibiki sai go Abraamkaru buaboitu Diuxi dai podukai Diuxi kïïgakïrï nïidi ¿aba?

¹⁰ ¿Dai kaxi ix ïr circuncidadugamikatadai go Abraamkaru aidïxi Diuxi kïïgakïrï tïï? ¡Cho! Daiñi, Diuxi kïïgakïrï tïï ïgai mai kia circuncidadugakatai ïgai.

¹¹ Go Abraamkaru buaboitu dai aidïpïrï Diuxi kïïgakïrï tïï mai kia gï circuncidadukatai ïgai. Gokiïrï Diuxi tïjai sai gï circuncidandoagi xi gï maaxitudagi sai Diuxi ka kïïgakïrï tïïtadai mos buaboidakai ïgai. Kaxkïdï go Abraamkaru ogadï dukai bii bïïxi buaboitudadami bïïtarï ix makïdï Diuxi kïïgakïrï nïidi tomaxi maiti ïr circuncidadugami ïgai.

¹² Dai ogadï dukai bii Abraam odami bïïtarï ix makïdï gïn circuncido ïpï dïï mosïkaxi ix makïdï bia go baaxi buaboidaragai ix makïdï biakatadai go Abraamkaru aidï abhiadïrï xi mai kia circuncidadugatadai ïgai.

Go bhai ïrhiaragai ix makïdï agaiña Diuxi ïki ïr buaboitudadami bïïtarï

¹³ Diuxi aagidi go Abraamkaru ïmadï piipixaradï sai ïgai tïanïda agai oidigi. Aagidi ïgai podukai mai xu nïiditai ix kïïgakïrï ïïgidiña ïgai go sïïrhikami. Cho. Bhaiyoma Diuxi kïïgakïrï tïï go Abraamkaru mos buaboidaitai ïgai dai kaxkïdï podukai aagidi sai ïgai ïmadï pipiixaradï tïanïda agai oidigi.

¹⁴ Jaa pokaitiña sai Diuxi óídakami abhana dasai ïgai go bhai ïrhiaraga mosïkaxi ix odami ïïgiadagi go sïïrhikami. Maiti ïr buaboi gobai. Ix podukaikamudai aidï gia maiti ïr soiñikamudai ix buaboitudagi ïmoko. Tomarhi maiti gï agaikamudai xi nïnïrakagi ïmoko sai Diuxi maakiana go bhai ïrhiaragai ix makïdï aagai ïgai sai maaki agai. Ïïgi bhïimudai ïmoko go bhai ïrhiaragai mos ïïgiditai go sïïrhikami, dïï xadïrï bhaigakana ïmoko.

¹⁵ Go sïïrhikami go ïï gïgïbidaragai gïr buapai bhaiyoma. Mai ïïgidi aatïmï kaxkïdï. Mosïkaxi ix mai tipukamudai go sïïrhikami aidï gia ka mai tipukamudai ïpï ixtukïdï gïpiïrï gïr bupadagi.

¹⁶ Kaxkïdï gï agai xi buaboitudagi aatïmï Diuxi. Buaboitudakai aatïmï kïï maatï sai biakamu aatïmï ixtumaxi gïr aagidi Diuxi mos ïï kïï tuigakatai ïgai gïr bïïtarï. Kïï tuiga ïgai aatïmï gïr bïïtarï ix makïdï ïr piipixaradï go Abraamkaru tudu. Dai mai mosïkaxi Abraamkaru piipixaradï bïïtarï gobai ix makïdï aagai Diuxi tomaxi bia ïgai Diuxi sïïrhikamigadï. Bhaiyoma gobai ïr bïïtarï bïïxkatai ix makïdï buaboitudai ix dukatai buaboidaitadai Abraamkaru. Go Abraamkaru ïr ogadï bïïxkatai aatïmï ix makïdï buaboitudai tudu.

¹⁷ Go Abraamkaru buaboitu Diuxi ix makïdï duduakatudai koidadï dai ix makïdï mos ñokaitai ibuayi ixtumaxi ix makïdï mai kia tipukana. Kaxkïdï Diuxi ñokidï pokaiti ïki abhiadïrï sai go Abraam ïr ogadï ka agai mui óídakami naana dukai ñokadami.

¹⁸ Diuxi aagidi go Abraamkaru sai muidu ka agai piipixaradï. Kaxkïdï go Abraamkaru gubukatu ibhïadï dai tomax dukai mos apia buaboitu. Dai podukai biatu ïgai mui piipixaradï naana dukai ñokadami.

¹⁹ Go Abraamkaru ka biakatadai parï ïmo ciento umigi dïï bïïxkïrï apia kïïga buaboitu ïgai Diuxi tomaxi nïidi ïgai ïïgi tukugadï ix ka mai biakatadai gubukarhigai ixtukïdï tïïgiagi aarhi. Dai maatïkatadai ïgai sai go Sara mai bhaigakatadai xi tïïgiagi aarhi ïpï.

²⁰ Tomax dukai apia kabami buaboitudaiña ïgai sai Diuxi iduña agaitadai ix dukatai aagidi. Buaboidaitai bhïiyi ïgai gubukarhigai daidi aagaiña xïï kïïga ïr gïdukami Diuxi.

²¹ Go Abraamkaru kïïga buaboidaiña sai Diuxi kïïga ibuayi ix dukatai aagadagi ïgai tudu.

²² Kaxkïdï Diuxi buañixikami aagai dai kïïgakïrï tïï ix dukatai ojixi Diuxi ñokidïrï.

²³ Dai mai mosïkaxi Abraamkaru bïïtarï ojixikami bii gobai sai Diuxi kïïgakïrï tïï buaboidakai ïgai.

²⁴ Aatïmï gïr bïïtarï ojixi gobai ïpï. Daiñi, Diuxi kïïgakïrï gïr nïijadamu ïpï buaboidakai aatïmï ïgai ix makïdï duakaturhi go Suxi Gïr Nukadakami mukukai ïgai. Buaboidakai aatïmï Diuxi tudu.

²⁵ Diuxi otoi Suxi sai ïgai aa namïidana gïr soimaaxkamiga mukukai. Dai bhodïrï duakaturhi Diuxi go Suxi bai podukai kïïgakïrï gïr nïijadana ïgai.