Romanos 3 - Northern Tepehuan Bible

¿Ix ïr soiñi xi ïr judiukagi ïmoko?

¹ ¿Ix ïr soiñi xi ïr judiukagi ïmoko aidï? Ïjï kïïga ïr soiñi gobai. ¿Tumaxi ïr soiñi xi gï circuncidandoagi ïmoko judiukatai tudu?

² Sïïrhikïdï gïïpi ïr soiñi gobai bïïxi aïkatïrï. Daiñi, Diuxi nukaturhi go judidiu Diuxi ñokidï. Gobai ïr go gïdukïdioma soiñi ix makïdï bia go judidiu gïn abhana.

³ Tomaxi ïïmo judidiu mai ïïgidi Diuxi, Diuxi bïïxkïrï iduñimu ix dukatai ïgai aagidi.

⁴ Xadïrï maiti duna Diuxi idukatai aagagi ïgai. Diuxi mai yaatagïi tomaxi odami gia ïr yaatabogami bïïxkatai. Podukai tudu agai Diuxi ñokidï. Ami ikaiti sai, Bïïxkïrï buaboi aagai Diuxi. Xudu jaa gïpiïrï buaja ïrhiadagi Diuxi, ïgai gatïtïïgiada agai sai mai soimaaxi buayi ïgai, ikaiti go ojai.

⁵ Ïïmo odami pokaitiña sai go soimaaxi ix makïdï odami ibuayi kïïga mamaaxidi xïï kïïga buañixi Diuxi. Kaxkïdï pokaitiña ïgai sai mai kïïga ibuayi Diuxi gïgïbiditai soimaaxi buadami. ¡Mos ïr ïï buirudagai gobai ix makïdï aagai ïgai!

⁶ ¡Xadïrï ïr buaboikana gobai! Diuxi kïï sïïrhi buayi bhaiyoma gïgïbiditai soimaaxi buadami. Kaxkïdï bia ïgai sïïrhikami xi aagadagi xorai biaka agai gïgïbidaragai

⁷ Jaa pokaitiña ïpï sai yaatagïitai ïgai sai bamioma maatiga maaxi ix Diuxi gia mai yaataboga. Podukai as buayi ïgai ïmo soiñi Diuxi bïïtarï yaatabogamikatai ïgai. Kaxkïdï pokaitiña ïgai sai maiti gï agai xi Diuxi po kaitadagi ix soimaaxi ibuayi ïgai yaatagïitai.

⁸ Xi ïr buaboikamudai gobai sai xudu soimaaxi buadagi ïmoko sai buapai ixtumaxi kïïgadukami, aidï gia gï agadamudai xi soimaaxi buadagi aatïmï bai podukai bamioma oidakagi ixtumaxi ïr kïïga. Asta pokaitiña jaa ïpï sai aatïmï maatïturhimi odami sai soimaaxi ibuada ïgai bai podukai bamioma oidakagi kïïgadukami. ¡Xadïrï! Daiñi, gï agai xi Diuxi gïgïbituldagi ix makïdï podukai maatïtuldagi odami bhaiyoma.

Bïïxi óídakami ïr soimaaxi buadami

⁹ ¿Buaboi xi aidï sai Diuxi bamioma kïïgakïrï nïidi go judidiu xi bhai go gaa óídakami? ¡Cho! ¡Xadïrï! ¡Kaxi aagai aanï sai bïïxi óídakami ïr pipioñigadï dukai go soimaaxkami xi ïr judiukagi ïgai xi maiti ïr judiukagi ïpï!

¹⁰ Diuxi ñokidï ikaiti, Mai tipu tomarhi ïmadutai ix makïdï sïïrhi aatabuayi.

¹¹ Mai tipu xorai maatïkagi ixtumaxi ïr sïïrhi, dai tomarhi ïmadutai mai gaagai urabaragai Diuxi ïmadï.

¹² Bïïxkatai kuga iji odami dai ka maiti ïr soiñi ïgai. Mai tipu xorai ibuadagi ixtumaxi ïr sïïrhi, tomarhi ïmadutai.

¹³ Odami tïñidï ïpïan galnaaxi ïmo yaasakaru xako maaxiko bïïtï koidadï, go ïï yaatagi bïïtarï kïïgadu nïïnïdï. Gïn aatagi ïpïan ïxi mukiga ïmo kooyi kïidï.

¹⁴ Go ïï galnaaxi ñoki surhigai ïgai mos tïgito ajiopaitai ïïgi gïn bhamudagai.

¹⁵ Oomarhiga ïgai.

¹⁶ Ïïgi xajako iimiagi ïgai mos xia dodai ïgai ixtumaxi oidaga dai soimaaxi taatamiturhi jaa.

¹⁷ Mai maatï ïgai ix dukatai xioma óídakagi.

¹⁸ Ïgai mai ïbhïidi Diuxi— ikaiti Diuxi ñokidï.

¹⁹ Dai kïïga maatï aatïmï sai Diuxi maa sïïrhikamigadï baidi kïïga ïïgiadagi xorai biakagi. Diuxi kabami gïgïbitulda agai bïïxi ix makïdï mai ïïgiadagi gobai dai ïgai mai biakamu ixtukïdï ñokadagi. Go sïïrhikamikïdï tudu gï maatï sai bïïxi oidigi daama óídakami ïr soimaaxi buadami.

²⁰ Odami mai bhaiga xi kïïgakïrï ïïgiadagi Diuxi sïïrhikamigadï tudu. Kaxkïdï maatiga maaxi sai Diuxi mai kïïgakïrï nïijada agai tomarhi ïmadutai mos ïïgiditai ïgai sïïrhikami. Ïgaikïdï gï mamaatïrïi bhaiyoma saidi ïr soimaaxi buadami aatïmï.

Diuxi kïïgakïrï nïidi mosïkaxi ix makïdï buaboitudai Suxi Kristo

²¹ Pomaaxi gobai, dïï xibi Diuxi ñokidï gïr aagidi ix dukatai kïïgakïrï gïr nïijadagi Diuxi. Ïgai ñokidïrï gïr aagidi sai mai kïïgakïrï gïr nïidi ïgai mos ïïgiditai aatïmï sïïrhikami.

²² Diuxi kïïgakïrï nïidi bïïxi odami bhaiyoma ix makïdï kïïgakïrï buaboitudai Suxi Kristo tomaxi ïr judiukagi ïgai xi maiti ïr judiukagi ïpï. Mos arhi ïmaduga boi bïïxi óídakami bïïtarï.

²³ Daiñi, Diuxi sïïrhikïdï kïï tuiga dai kïï tiodi dai bïïxi óídakami ïr soimaaxi buadami dai mai ajïi Diuxi.

²⁴ Dïï gia Suxi Kristo taata gïgïbidaragai gïr bïïtarï mos ïï kïï tuigakatai Diuxi. Kïïgakïrï gïr bubaitu ïgai gïr soimaaxkamiañdïrï. Aatïmï maiti gïr táí Diuxi tomarhi ïmo ixtumaxi. Suxi Kristo ïgai dai aa namïki bïïxi aïkatai ixtumaxi gïr bïïtarï.

²⁵ Mukukai Suxi Kristo kuruxiana Diuxi gïr tïtïgidi ixtuma gïgïbidaragai gïr ajïakatadai soimaaxi buadatai aatïmï. Ami kuruxiana Suxi aaxi ïradï bai oigïrhixikami biïna bïïxi buaboitudadami. Dai Diuxi gïr tïtïïgidi xïï sïïrhi aatabuadana ïgai ïïki abhiadïrï ïpï dai mai otoma bhamukuitai ïgai nïiditai soimaaxkami ix makïdï ibuadana óídakami ïkioma dai mai otoma gïgïbituldatai ïpï.

²⁶ Xibi Diuxi gïr tïtïïgida ïrhidi sai ïgai apia kia bïïxkïrï ibuayi ixtumaxi ïr sïïrhi. Gïgïbitudai ïgai ix makïdï soimaaxi ibuayi dai kïïgakïrï nïidi ïgai ix makïdï buaboitudai Suxi Kristo.

²⁷ Podukai mai tipu ixtukïdï kïï tuigakami gï ïrhiadagi ïmoko dai potïiyagi sai ïïgi kïïgakïrï gï busaitu. ¿Kïïgakïrï tïx bubuakïi aatïmï ïïgiditai go sïïrhikami? ¡Cho! ¡Xadïrï! Bhaiyoma buaboidaitai kïïgakïrï bubuakïi aatïmï.

²⁸ Kïïga maatiga maaxi tudu sai Diuxi kïïgakïrï nïidi odami buaboidaitai ïgai dai mai xu ïïgiditai ïgai go sïïrhikami.

²⁹ Diuxi maiti ïr mosïkaxi go judidiu Diuxigadï. Bïïxi óídakami Diuxigadï ïgai.

³⁰ Mos arhi ïmaduga Diuxi dai ïgai kïïgakïrï nïidi judidiu ïmadï ix makïdï maiti ïr judidiu mos buaboidaitai ïgai.

³¹ ¿Ka mai namïakami ix dukai biayi aatïmï go sïïrhikami aidï mos buaboidaitai aatïmï? ¡Cho! ¡Xadïrï! ¡Bhaiyoma gïr buaboidaragakïdï bamioma namïatudai aatïmï go sïïrhikami!