Romanos 2 - Northern Tepehuan Bible

Soimaaxi buadami bïïxi óídakami

¹ Aapimï odami mai bia ix tuixi ñokadagi gïn aïkai gïgïdaragai. Daiñi, xi ïmadutai aapimï gïpiïrï buaja agadagi ïmai potïkai sai ïgai soimaaxi ibuayi, aidï gia ïïgi gïn abhana daitudai aapimï gïgïbidaragai mos potïkai. ¡Aapimï ïïgi ibuayi go baaxi soimaaxi tudu ixtukïdï gïpiïrï bupaimi aapimï go gaa!

² Kïï maatï aatïmï sai Diuxi bia sïïrhikami ix gïgïbituldagi odami ix makïdï soimaaxi buadagi podukai tudu.

³ Aapimï odami ix makïdï ïr gïpiïrï bupadami go gaa, ¿Bhai ix kïïgakïrï bubuakimu aapimï xi maiti gïn gïgïbituldagi Diuxi? ¡Xadïrï kïïgakïrï bubuakïna aapimï! ¡Ïïgi ibuayi aapimï go baaxi soimaaxi di!

⁴ Diuxi gia kïï tuiga. Mai otoma bhamukui ïgai gïn bui tudu dai tomarhi mai otoma daitudai gïgïbidaragai gïn abhana tomaxi gïn ajïakatadai xi taatagi gïgïbidaragai. Dïï aapimï tomarhi mai buamï gïn ïrhidi. Bhaiyoma soi dukai nïidi aapimï Diuxi poïrhiditai sai ïgai mai oton gïgïbitulda agai. Buabi tudu sai kïï tuiga ïgai gïn bïïtarï. Ipïrhidi ïgai sai ïma dukai gïn tïtïgitokagi aapimï kaxkïdï mai oton gïgïbituldai ïgai.

⁵ Dïï sïïrhikïdï mai tïtïkaidaga aapimï dai ïïgi gïn abhana dadasai aapimï gïïpioma gïgïbidaragai. Ayimu tudu ixtuigako Diuxi gatïtïïgida agai xïï kabami bhamu ïgai soimaaxi iibhïdakami bui. Aidïpïrï Diuxi aagada agai xorai biaka agai gïgïbidaragai dai xorai mai biaka agai. Sïïrhi aagada agai aidï.

⁶ Dai Diuxi nïida agai ix dukatai óídatu odami dai iduñagai bïïxkatai ïmadï ïïgi ix dukatai gïn ajïakagi.

⁷ Diuxi maakimu ïmo gïdukami xadutudaragai abhana go odami ix makïdï mai ojodatai adaimïi ixtumaxi ïr kïïga, ix makïdï gaagai podukai ïmo kïïgakïrï oidakaragai Diuxi ïmadï bïïxkïrï bïïtarï tudu, dai ix makïdï ipïrhidi ïpï sai Diuxi kïïgakïrï nïïjadagi. Ïgai gia Diuxi maaki agai gubukarhigai xi tomarhi ïmo imidagai mai ugitïna dai xi kïïgakïrï oidakana Diuxi ïmadï.

⁸ Dïï gia Diuxi kabami bhamuka agai buidïrï ix makïdï ïïgi gïn tïgito ajiopadagi dai maiti ibuayi ixtumaxi ïr sïïrhi apia adaimïitai ïgai go soimaaxkami.

⁹ Diuxi daitulda agai gïgïbidaragai bïïxi óídakami abhana ix makïdï soimaaxi buadagi tudu. Mos ïr ïgalbaaxika agai judidiu bïïtarï dai ix makïdï maiti ïr judidiu bïïtarï tudu.

¹⁰ Dïï gia Diuxi kïïgakïrï nïijada agai ix makïdï ibuayi ixtumaxi ïr sïïrhi. Ïgai abhana dasamu Diuxi gïïpi bhai ïrhiaraga dai xadutuadamu dai maakimu ibhïxtaragai ïpï tomaxi ïr judiukagi ïgai xi maiti ïr judiu ïpï.

¹¹ Diuxi ïmadugan dukai nïidi bïïxi odami tudu.

¹² Bïïxi go odami ix makïdï maiti ïr judidiu dai mai bia Diuxi sïïrhikamigadï dai ix makïdï soimaaxi buadagi, ïgai mai kïïgakïrï bubuaki agai tomaxi mai maatïkana ix kaiti go sïïrhikami. Dai go ix makïdï gia ïr judidiu dai kïï maatï ix dukatai bïïtï go sïïrhikami dïï bïïxkïrï soimaaxi buadagi, ïgai biaka agai gïgïbidaragai ïpï ix dukatai agai go sïïrhikami.

¹³ Diuxi kïïgakïrï nïidi odami ix makïdï kïïgakïrï ïïgidi sïïrhikamigadï tudu. Dai mai xu kïïgakïrï nïidi ïgai ix makïdï mos kaïkana dai mai ïïgidiña.

¹⁴ Daiñi, ïïmo imidagai odami ix makïdï maiti ïr judidiu ibuayi ixtumaxi Diuxi gatïjai tomaxi mai maatï ïgai Diuxi sïïrhikamigadï. Podukai maaxitudai ïgai sai ïïgi ïgai kïï maatï ix makïdï ïr sïïrhi.

¹⁵ Dai xudu odami ibuadagi ixtumaxi Diuxi gatïjai kïïga maaxitudai ïgai sai bïïxi óídakami ïïgi gïn tïgibudagïrï bhïï ajiopai go sïïrhikami. Kaxkïdï ïïgi tïgibudadï aagidimi bïïx tasai ix bhai kïï gï buayi ïgai, ix mai kïï gï buayi ïpï.

¹⁶ Daiñi, go bhai ïrhiaragai aatagi ix makïdï aanï aagidimi odami aagai sai ayimu ixtuigako oidaka agai gïgïbidaragai odami bïïtarï. Aidïpïrï Suxi Kristo aagada agai Diuxi bïïtarï xorai biaka agai gïgïbidaragai. Nïijadamu ïgai odami tïgibudadï ix makïdï ïxto biakana ïgai dai bhodïrï aagada agai xorai biaka agai gïgïbidaragai.

Go Judidiu biaka agai gïgïbidaragai ïpï

¹⁷ Ïïmoko aapimï judidiu gïgïrdukami gïn ïrhidi ïïgi aapimï pobïnïrhiditai sai Diuxi ïr mosïkaxi aapimï Diuxigadï. Pobïnïrhidi aapimï sai Diuxi kïïgakïrï gïn nïidi mos biakatai aapimï Diuxi sïïrhikamigadï. Yaatagi gobai.

¹⁸ Aapimï judidiu kaïkana ix kaiti Diuxi sïïrhikamigadï dai ïgaikïdï mamaatïrïi aapimï ixtumaxi ïr sïïrhi.

¹⁹ Dai pobïnïrhidi aapimï judidiu ïpï sai gï agai xi jaa gïn tïkakagi ix dukatai kïïgakïrï óídakagi. Mai nïadami dukai nïidi aapimï odami ix makïdï maiti ïr judidiu. Aapimï kudagi gïn ïrhidi jaa bïïtarï ix makïdï mos tukamuga tïgibudadï.

²⁰ Aapimï judidiu bia Diuxi sïïrhikamigadï dai Diuxi sïïrhikamigadï aagai ixtumaxi ïr buaboi. Kaxkïdï aapimï maaki ïrhidi ñoki go pupuirugami dai ix makïdï mai maatï ix dukatai oidakagi.

²¹ Aapimï ïïgi mai maatia ïrhidi ixtumaxi dïï bïïxkïrï maatïtulda ïrhidiña aapimï jaa. Daiñi, aapimï pokaitiña sai maiti gï agai xi gaïxiadagi jaa buxtuidadï dai ïïgi aapimï ïïxibogakana.

²² Dai aapimï judidiu pokaitiña ïpï sai maiti gï agai xi odami ïmadï boopodagi jaa aduñdï. ¿Maiti mïx ïïgi pomaaxi buayi ïpï? Daidiña aapimï jaa sai mai buaboitudagi uubixi dïï aapimï ïpï mai kïï gï buayi gaïxiditai ixtumaxi kikiupiañdïrï.

²³ Kïïga namïakami gïn ïrhidi aapimï biakatai Diuxi sïïrhikamigadï dïï mos mai ïïgidi aapimï. Mai xadutudai aapimï Diuxi mai ïïgiditai.

²⁴ Buaboi tudu ix dukatai ojixi Diuxi ñokidïrï ïïki sai aapimï mai xadutudai Diuxi dai kaxkïdï jaa odami mai xadutudai ïpï. Diuxi ñokidïrï adukai ojixi tudu, Go odami ix makïdï maiti ïr judidiu galnaaxi ñoki surhigaiña Diuxi bui mos nïiditai ïgai go soimaaxkami ix makïdï aapimï judidiu ibuayi. Aapimï judidiu tudu ïr gïn duñi xi galnaxi ñoki surhigai ïgai Diuxi bui, ikaiti Diuxi ojadï.

Go circuncision

²⁵ Daiñi, kïïga ïr soiñi aapimï judidiu gïn bïïtarï xi gïn circuncidandoagi dïï mosïkaxi ix kïïgakïrï ïïgiadagi aapimï Diuxi sïïrhikamigadï. Dïï mos go circuncision ka mai namïakan dukai bipiïyi mai ïïgidakai aapimï go sïïrhikami.

²⁶ Diuxi circuncidadugami dukai nïidi bïïxi odami ix makïdï kïïgakïrï ïïgidi go sïïrhikami tomaxi maiti gï circuncido tukugadï.

²⁷ Daiñi, aapimï judidiu mai kïïgakïrï ïïgidi go sïïrhikami tomaxi ojixikami bia aapimï. Kaxkïdï odami ix makïdï maiti ïr judidiu dai ïïgidi go sïïrhikami mos ïïgiditai maaxitudamu sai aapimï ïr soimaaxi buadami, tomaxi ïgai maiti gïn circuncido dai aapimï gia.

²⁸ Mai xu xi bïïxkatai aapimï judidiu ïr Diuxi ïko bubaidadï tudu tomaxi circuncidadugakagi gïn tukuga. Mosïkaxi gïn tukugadïkïdï maaxituda ïrhidi aapimï sai ïr Diuxi tuidadï aapimï tudu dai mai xu gïn ibhïdagakïdï.

²⁹ Dïï gia ix makïdï ïma dukai gïn tïtïgitoagi, ïgai gia ibhïgadïkïdï kïïgakïrï ïr judiu dai ïr Diuxi ïko bubaidadï. Ïgai gia ibhïdagakïdï maaxitudai sai ïr Diuxi tuidadï dai mai xu mosïkaxi tukugadïkïdï maaxitudai ïgai. Mosïkaxi Diuxi Ibhïgadï ïgai daidi ïr ïmapïduu ibuadami odami iibhïadï xi podukai ïkobai bubaidadïkagi ïgai Diuxi. Diuxi Ibhïadï ïgai dai ïkobai bubaidi odami Diuxi bïïtarï saidi ïr aaduñdïkana. Dai go sïïrhikami gobai mai ïkobai bubaidi tomarhi ïmo odami saidi Diuxi aaduñdïkagi ïgai. Diuxi ïkobai bubaidadï biaka agai ïmo xadutudaragai Diuxiañdïrï tudu dai mai xu odamiañdïrï.