Romanos 16 - Northern Tepehuan Bible

Pabora biaturhi buaboitudadami Romïrï óídakami

¹ Aanï Pabora ipïrhidi mïxi oigïda nïïjadagi aapimï go oki Febe tïgidukïdï. Gïr sukurhi ïgai Diuxiïrï tudu dai kïïga soikïiña ïgai go gaa buaboitudadami ix makïdï gïn ïmpaidiña Cenkreïrï.

² Kïïga maatï aapimï ix dukatai gï agai xi miadïgidagi jaa ix makïdï ïr buaboitudadami. Podukai tudu abïr miadaigida go Febe ïpï. Ïgai kïïga soikïiña mui odami dai asta aanï gin soikïiña ïpï kaxkïdï abïr maaka bïïxi ixtuma tïgitokagi ïgai.

³ Diuxkïdï abïr biatulda go Prisila ïmadï Aquila ïpï. Ïgai gin uurapïkïi Suxi Kristo aaduindadïrï.

⁴ Ïgai kïïgakïrï gin soikïiña ïpï dai asta bhaitoma gïn koditu ïgai gin soikïitai. Kaxkïdï sïïrhikïdï bhai gin ïrhidi aanï ïgaikïdï. Dai mai xu mosïkaxi aanï ïgai dai bhai gin ïrhidi ïgaikïdï. Bïïxi go gaa buaboitudadami ix makïdï maiti ïr judidiu kïïga bhai gïn ïjïrhidi ïgaikïdï ïpï.

⁵ Diuxkïdï abïr biatulda go buaboitudadami ïpï ix makïdï gïn ïmpaidi kiidïrï Prisila ïmadï Aquila. Diuxkïdï abïr biatulda gin sukurhi Epeneto. Kïïga oigïdai aanï ïgai. Ïgai tudu ïr ïpïgadadï go Asiana óídakami ix makïdï buaboitu Suxi Kristo.

⁶ Diuxkïdï abïr biatulda Maria. Ïgai kabami aatabuadana bïïxkatai aapimï gïn bïïtarï.

⁷ Diuxkïdï abïr biatulda Andronico ïmadï Junias. Ïgai ïr judidiu gin ïpïan dukai dai gin ïmadï maamaixapikana ïpï. Suxi Kristo ojotosadï ïgai, dai go gaa ix makïdï ïr ojotosadï Suxi kïïga xadutudai ïgai. Ïgai buaboitu Suxi Kristo ïpïgioma xi aanï.

⁸ Diuxkïdï abïr biatulda Ampliato ix makïdï kïï oigïdai aanï Gïr Nukadakamikïdï.

⁹ Diuxkïdï abïr biatulda Urbano ix makïdï gin ïmadï aatadui Suxi Kristo aaduindadïrï. Diuxkïdï abïr biatulda go Estakis ïpï ix makïdï kïïga oigïdai aanï.

¹⁰ Diuxkïdï abïr biatulda Apeles. Ïgai mos apia buaboitu tomaxi kabami taata soi ïrhiaragai dai maiti gï dagito xi gï maitiagi go soi ïrhiaragai. Diuxkïdï abïr biatulda Aristobulo aaduñdï ïpï.

¹¹ Diuxkïdï abïr biatulda go Herodion ix makïdï ïr judiu ïpï gin ïpïan dukami ïpï. Diuxkïdï abïr biatulda go Narciso aaduñdï ïpï ix makïdï ïr buaboitudadami.

¹² Diuxkïdï abïr biatulda Trifena dai Trifosa ix makïdï ïr aatabuadami Suxi Kristo aaduindadïrï ïpï, dai gïr sukurhi Perside ïpï. Kïïga oigïdai aatïmï ïgai. Kabami aatabuadana ïgai Suxi Kristo bïïtarï.

¹³ Diuxkïdï abïr biatulda Rufo. Ïgai ïr ïmo buaboitudadami kïï tuigakami. Diuxkïdï abïr biatulda Rufo dïïdï ïpï. Ïgai gin soikïiña ïpïan dukai xi ïr gin dïïkamudai.

¹⁴ Diuxkïdï abïr biatulda Asinkrito dai Flegonte dai Hermes dai Patrobas ïmadï bïïxi go gaa buaboitudadami ix makïdï ïmadï daraja.

¹⁵ Diuxkïdï abïr biatulda Filogolo dai Julia dai Nereo ïmadï Nereo xïgidï oki dai Olimpas ïmadï bïïxkatai gïr susukurhi Diuxiïrï ix makïdï ïmadï daraja.

¹⁶ Kïïga abïr gïn bipiaturhiada aipako aapimï ix makïdï ïr buaboitudadami. Diuxkïdï gïn biaturhi bïïxi go gaa buaboitudadami ix makïdï gïn ïmpaidiña kikiupiana aipakoga ïpï.

Pabora aagidi sai maiti gïn dagitona ïgai xi jaa gïn bupuidïrï gïn surhigitudagi

¹⁷ Gin susukurhi, sïïrhikïdï gï agai xi kïïga gïn nukadakagi aapimï. Kaxi máí aapimï ixtumaxi ïr buaboi kaxkïdï abïr mai uurapïkïdagi jaa ix makïdï maatïturhi ïma maaxi maatïtuldaragai. Mos ïjïkobai mamaakai ïgai tïgibudagai go buaboitudadami xi ka mai ïmadugan dukai buaboitudagi ïgai. Podukai garhi buayi ïgai gïr susukurhi xi ka mai kïï oijadagi ïgai Suxi Kristo. Kaxkïdï abïr mai uurapïkïda ïgai tudu.

¹⁸ Ix makïdï pomaaxi gamamaakai aatagi maiti ibuayi Kristo Gïr Nukadakami aaduindadï tudu. Dai bhaiyoma ïïgi ibuayi ixtumaxi bhai ïrhidi ïgai. Xigian dukai aatagaiña ïgai dai aagai ïïgi ix ixtumaxi kaïka ïrhiadagi óídakami. Podukai buirumadai ïgai mui ix makïdï maiti gïn nukadatai óídaga.

¹⁹ Bïïxi go gaa buaboitudadami kïïga kajiomakana xïï kïï ïïgidiña aapimï Diuxi dai gobai ïr ïmo gïïdukami bhai ïrhiaraga gin bïïtarï. Mos ipïrhidi aanï xi kïïga sastudakagi aapimï ibuadatai ixtumaxi ïr kïïga dai mai xu go ixtumaxi maiti ïr kïïga.

²⁰ Diuxi ïgai dai gïr maakai xi ibhïxtakan taadakagi aatïmï. Dai otoma naato popokimu ïgai gubukarhigadï go diabora dai dumaltuda agai xi aapimï mos kïixoramu kaxi gamaitïkai aapimï ïgai bui. Diuxi gubukarhigadïkïdï gamaitïmu aapimï aidï. Dai xibi ipïrhidi aanï xi taatagi aapimï xïï kïï tuiga Suxi Kristo gïn bïïtarï.

²¹ Diuxkïdï gïn biaturhi go Timoteo gin soikïdamiga. Dai gin susukurhi Jason dai Lucio dai Sosipatro gïn biaturhi ïpï. Ïgai bïï baikatai ïr aanï gin aaduñi ïpï.

²² Aanï Tercio ojiturhi Pabora idi ojai dai Diuxkïdï gïn biaturhi aanï ïpï. Aanï ïpï ïr buaboitudadami Suxi Kristo tudu.

²³ Diuxkïdï gïn biaturhi Gayo. Ïgai kiidïrï tudu gin urhiñdaka aanï. Dai ïgai gïr maa oigaragai bïïxkatai buaboitudami xi gïr ïmpaidagi aatïmï kiidïrï ïpï. Diuxkïdï gïn biaturhi Erasto ïpï. Ïgai ïr nukadakami go tuminxi ixtukïdï aatabuayi dudunukami tanai Korintoana. Gïr sukurhi Kuartoxi tïgidukami gïn biaturhi ïpï.

²⁴ Xibi ipïrhidi aanï xi taatagi aapimï xïï kïï tuiga Suxi Kristo gïn bïïtarï.

²⁵ Tï oigïda ñokada Diuxi bui tudu xadutudaitai ïgai. Kïïga ixtutuidikïi ïgai xi gïn gupurtudagi go bhai ïrhiaraga aatagikïdï ix makïdï aanï gamamaatïturhiña aagaitai Suxi Kristo. Ïkioma mos ïxtokikana go maatïtuldaragai ix makïdï aagai go Suxi Kristo. Mai kia kïkibakai oidigi abhiadïrï ïxtokikana gobai.

²⁶ Dïï xibi gia mos nïiditai aatïmï ojadï go aagadami Diuxi ñokidï ka máí aatïmï gobai ix makïdï ïxtokikana ïkioma. Podukai tudu tïjai Diuxi dai ïgai bïïxkïrï mo maaxkana. Dai xibi kaxi bïïxi aipako óídakami buitapi ayi go bhai ïrhiaragai aatagi bai podukai buaboidaitai ïïgiadagi ïgai.

²⁷ Mos arhi ïmaduga Diuxi dai mosïkaxi ïgai maatï nïidi bïïxi aïkatai. Ïgai tudu gï agai xi xadutuadagi aatïmï bïïxkïrï bïïtarï. Xibi buaboitudaitai aatïmï Suxi Kristo ka bhaiga aatïmï xadutuadagi Diuxi bïïxkïrï bïïtarï. ¡Gobai gia ïr buaboi!