Romanos 14 - Northern Tepehuan Bible

Buaboitudadami gï agai xi gïn xadutuadagi aipakoga

¹ Aapimï buaboitudadami Romïrï óídakami abïr kïïgakïrï nïijada jaa buaboitudadami ïpï tomaxi mai xii gubuakagi ïgai buaboidaradï kia. Maiti abïr bui ñokada ïgai aagiditai ix tumaxi ïr sïïrhi xi buadagi ïgai tudu xi ïpï ix tumaxi maiti gï agai xi ibuadagi.

² Dukami maiti gï agai xi bui ñokada aapimï aagiditai ix tumaxi ïr sïïrhi xi kuada ïgai. Ïïmoko buaboitudai sai oidaga oigaragai xi tomax ix makïdï kuadagai kuadagi ïmoko. Dai jaa ix makïdï mai xi gubuka buaboidaradï mai kuayi bhaabhaidi.

³ Ix makïdï gia buaboitudai sai oidaga oigaragai xi kuadagi tomax tuma kuadagai, ïgai maiti gï agai xi soi dukai nïijadagi jaa ix makïdï mai kuayi bhaabhaidi. Dai podukai ïpï ix makïdï buaboitudai sai daidarxi ïïmo kuadagai, gobai maiti gï agai xi soi dukai nïijadagi ix makïdï toma ix makïdï kuadagai kuayi. ¡Diuxi mos ïmadugan dukai kïïgakïrï nïidi bïï gokatai di!

⁴ Daiñi, aapi ix makïdï ïr pioñigadï Diuxi mai bia sïïrhikami xi potïiyagi sai ïmai ix makïdï ïr pioñigadï Diuxi ïpï mai kïï ibuayi. Mosïkaxi Diuxi bia sïïrhikami xi aagagi sa bhai kïï buayi pioñigadï. Dai Diuxi aagidamu gï pipioñi aidï sai ïr kïïga ibuadami ïgai. Kïïga ixtutuidikïi Gïr Nukadakami xi buadagi xi ïr kïï buadamikagi pipioñigadï kaxkïdï.

⁵ Daiñi, ïïmo odami bamioma xadutudai ïïmo tasai dai jaa mos ïmadugan dukai nïidi bïïx tasai. Kaxkïdï gï agai ïmoko xi kïïga maatïkagi ïïgi gï bïïtarï ix dukatai buaboitudai.

⁶ Ix makïdï bamioma xadutudai ïïmo tasai mos xadutudai Diuxi pobuadatai. Dai ix makïdï kuayi toma ix makïdï kuadagai xadutudai Diuxi ïpï pobuadatai dai aagidiña Diuxi sai bhai gïn ïrhidi Diuxikïdï gakuadatai. Dai ix makïdï mai kuayi ïïmo kuadagai xadutudai Diuxi ïpï mai kuadatai. Dai ïgai bhai gïn ïrhidi Diuxikïdï ïpï.

⁷ Aatïmï buaboitudadami mai xu mos ïïgi gïr bïïtarï óídaga tudu dai mai ïïgi gïr bïïtarï koimu aatïmï ïpï.

⁸ Diuxi bïïtarï óídaga aatïmï aidï. Dai xudu koiyagi aatïmï, Diuxi bïïtarï mumukui aatïmï ïpï. Ïgai tuidadï aatïmï kaxkïdï.

⁹ Daiñi, Suxi Kristo muu dai gï duakatu ïpamu baidi ïr Tïanïdamigadïkana ïgai bïïxi odami tomaxi duduakagi ïgai xiïpï xi ïr koidadïkagi ïpï.

¹⁰ Suxi Kristo ïgai daidi ïr Gïr Nukadakami tudu kaxkïdï mai bia aapimï sïïrhikami xi potïdagi ïmai buaboitudadami sai mai kïïga buayi. Tomarhi maiti gï agai xi bamioma namïakami gïr ïrhiadagi xi bhai jaa. Bïïxkatai aatïmï bia ix gukibagi buitapi Diuxi bai aagadagi ïgai sa bhai ïr kïïga ibuadami aatïmï ix cho ïpï.

¹¹ Diuxi ojadï adukai ikaiti, Aanï Diuxi aagai sai gia ïr buaboi sai bïïxi óídakami tootonakïdï gukiba agai gin buitapi. Bïïxkatai gin xadutuadamu ïgai tudu dai potïimu bïïxkatai óídakami buitapi sai aanï ïr Diuxi, ikaiti Diuxi ojadï.

¹² Daiñi, bïïxkatai aatïmï biakamu xi aagidagi Diuxi ix tuma dui aatïmï aidï.

¹³ Kaxkïdï ka maiti gï agai xi bui ñokada aatïmï jaa buaboitudadami pokaititai sai mai kïï buayi. Gï agai bhaiyoma xi kïï gïr tïgito nïijadagi xi maiti ibuadagi aatïmï tomarhi ïmo ixtumaxi ix makïdï sobhidagi ïmoko gïr susukurhi bai ka mai kïïga oijada ïgai Suxi.

¹⁴ Aanï bïïna daja Suxi Gïr Nukadakami tudu dai kïïga maatï aanï sai ïmoko mai soimaaxi ibuayi kuadatai tomarhi ïmo kuadagai. Dïï gia xi ïmadutai po ïrhiadagi saidi ïr daidarxi ïmo kuadagai aidï gia ïgai bïïtarï ïr soimaaxkami xi ugiagi gobai.

¹⁵ Dai xi ugiagi aapi ïmo kuadagai ix makïdï daidarxikami aagai go gaa aidï gia mai oigïdadan buayi aapi ïgai. Soi gïn ïlda antaada ïgai poïrhiditai sai soimaaxi ibuayi aapi gakuadatai aapi gobai ix makïdï ïgai daidarxikami aagaiña . Dai Suxi Kristo muu ïgai bïïtarï ïpï. Kaxkïdï maiti gï agai xi soi ïrhiatuda aapi kuadatai ïïgi ix tumaxi bhai ïrhiada aapi tomaxi ïmai daidarxikami aagai gobai.

¹⁶ Maiti kuada ixtumaxi jaa daidarxikami dukai nïidi tudu tomaxi aapi gï bïïtarï gia mai daidarxi gobai. Maiti ibuada tomarhi ïmo ixtumaxi tudu ixtukïdï jaa potïiyagi sai soimaaxi ibuayi aapi.

¹⁷ Daiñi, Diuxi tïanïi odami mai xu mos ipïrhiditai xi odami dagitoagi ïïmo kuadagai xiïpï ïïmo iidagai. Diuxi ipïrhidi xi sïïrhi óídakagi odami Diuxi buitapi dai sai iibhïxtakan taadakagi odami dai sai ïïgiditai Diuxi Ibhïadï biakana ïgai gïn bhai ïrhiaraga. Go maaxi bïïtarï tïanïi Diuxi odami tudu.

¹⁸ Xorai podukai oidakagi Suxi Kristo bïïtarï maakimu bhai ïrhiaraga Diuxi dai odami kïï tuigakami dukai nïijadamu ïpï.

¹⁹ Kaxkïdï xibi tï gïr aaga iduñi ïïgi ixtumaxi gïr soiñana bai xioma óídakagi aatïmï gïr oigïdaitai aipakoga. Tï duñi ïïgi ix makïdï ïr soiñikagi ïpï xi bamioma gupurtudagi gïr buaboidaraga.

²⁰ Maiti gï agai xi xia duada aatïmï Diuxi aaduindadï mos kuadatai ïïgi ixtuma ugia ïrhiada aatïmï. Buaboi tudu sai bia aatïmï oigaragai xi ugiagi bïïxi kuadagai dïï xi gïpiïrï daituda ragai ïmai kuadatai ïmo kuadagai aidï gia maiti gï agai xi ugia aatïmï.

²¹ Xioma ïr kïïga xi mai kuada aatïmï bhaabhaidi dai tomarhi mai yïïdagi aatïmï tomarhi ix maiti ibuada aatïmï tomarhi ïmo ix tumaxi ixtukïdï ïmoko gïr susukurhi Diuxiïrï ka mai kïïga oijadagi Suxi Kristo tudu.

²² Xi buaboitudagi aapi sai bia oigaragai xi kuadagi xiïpï yïïdagi pïx tuma ipïrhiadagi, maiti gï agai xi aagada aapi aipakoga. Gobai mosïkaxi aapi ïmadï Diuxi gï agai xi maatïkagi. Xïïxkadï odami buadagi ix makïdï kïï maatï ïgai saidi ïr sïïrhi aidï gia ïïgi ibhïgadï aagidamu sai kïï bhai. Gobai ïr ïmo gïdukami bhai ïrhiaraga odami bïïtarï.

²³ Dïï gia xorai ugiagi kuadagai mai kïïga buaboidaitai ix kïïga buayi, mos ïïgi gïpiïrï gï daitudai ïgai. Soimaaxi tudu xi ibuadagi ïmoko ixtumaxi mai kïïga buaboidaitai sai ïr kïïga.