Romanos 13 - Northern Tepehuan Bible

Gï agai xi buaboitudadami ïïgiadagi go gupudagai bipiakami

¹ Bïïxi óídakami gï agai xi ïïgiadagi dudunukami. Diuxi dagito xi buiyagi ïgai gubukadagai kaxkïdï. Tomarhi ïmadutai go dudunukami mai ïïgi bipiatu sïïrhikami xi gatïanïdagi. Diuxi ïgai dai gamaakai.

² Kaxkïdï tudu xorai mai ïïgidi dudunukami mai ïïgidi Diuxi ïpï. Dai xorai pomaaxi buadagi biakamu gïgïbidaragai.

³ Odami ix makïdï ibuayi ixtumaxi ïr sïïrhi mai bia ix tuixi ïbhiadagi go dudunukami. Dïï gia ix makïdï mai kïïga ibuayi ïgai gia bia xi ïbhiadagi. ¿Xioma mïx oidaka ïrhidi mai ïbhïiditai go dudunukami? Aidï gia gï agai xi iduñagi aapimï ixtumaxi ïr sïïrhi bai podukai go dudunukami kïïga ñokada aapimï gïn bïïtarï.

⁴ Go dudunukami ïr pipioñigadï Diuxi tudu dai bia sïïrhikami xi ibuadagi ixtumaxi ïr soiñi gïn bïïtarï. Dïï gia xi soimaaxi buadagi aapimï aidï gia gï agai xi duduadikudagi aapimï. Diuxi maa sïïrhikami go dudunukami xi gïgïbituldagi ïgai soimaaxi buadami kaxkïdï. Podukai gatïtïïgidiña ïgai xïï kabami bhaamukui Diuxi soimaaxi buadami bui.

⁵ Ïïgiadabïrai dudunukami tudu dïï mai xu mosïkaxi ïbhïiditai gïgïbidaragai. Bhaiyoma ïïgiditai aapimï go dudunukami kïïga bhai gïn ïrhiadamu maatïkamu ïïgi aapimï sai kïï buayi, kaxkïdï abïr ïïgiada ïgai.

⁶ Kaxkïdï gï agai ïpï xi maakiagi aapimï tuminxi dudunukami ix makïdï kaatï sïïrhikami ix tanïda ïgai. Pipioñigadï ïgai Diuxi tudu dai Diuxi aaduindadï bïitarï daraka ïgai.

⁷ Maakabïrai go dudunukami ïïgi ixtumaxi gïn ajïakagi ix maakiagi. Xi gïn ajïakagi xi aa namïidagi tuminxi abïr maaka gobai. Ïïgiadabïrai tudu xïïxkadï gïn tïanïdagi ïgai daidi abïr kïïga xadutuada ïpï.

Gin oigïadabïrai aipakoga

⁸ Gï agai xi gïn oigïdada aapimï aipakoga. Bia aapimï sïïrhikami tudu xi gïn oigïdadagi. Ïmo buatuldaragai dukami gobai aapimï gïn bïïtarï. Mosïkaxi gobai abïr buatuldaka xi oigïdadagi aapimï jaa. Ïma maaxi abïr gia mai buatuldaka. Daiñi, ix makïdï gaoigïadadagi kïïgakïrï ibuayi bïïxi ixtumaxi gïr tanïi Diuxi sïïrhikamigadïrï.

⁹ Ix makïdï gaoigïadadagi xadïrï gaabhana bona ïmai aduñdï tomarhi maiti ïr gamuakamikana tudu. Mai ïxibuga ïgai ïpï dai mai biaka ïrhidi buxtuidadï jaa. Ix dukai gï oigïdai ïïgi aapi podukai oigïdada jaa tudu. Ix makïdï podukai oigïdadagi jaa ïgai gia ka bïïxi aïkatai ibuadana ix makïdï gïr tanïi go sïïrhikami tudu.

¹⁰ Daiñi, ix makïdï gaoigïadadagi mai soi buididiña jaa. Kïïgakïrï ïïgidi ïgai bïï sudakami go sïïrhikami bhaiyoma.

¹¹ Gïn oigïadabïrai tudu dai nïnïasïrhigan dukai óídaka maatïkatai sai otoma ayimu ixtuigako Suxi Kristo kïïgakïrï gïr bubiadamu tami oidigi damaiñdïrï. Bïïx tasai bamioma miadaimi tudu xi dibiagi Suxi ïpamu.

¹² Ïkioma mos tukamugan dukamikana gïr oidakaragai tami oidigi daama dïï xibi karhioga dibia Suxi Kristo dai gobai ïr ïmo xarhimodï gï dukami ka agai gïr bïïtarï. Kaxkïdï tudu gï agai xi maigobai dasagi aatïmï go oidakaragai ix makïdï ïr tukagi dukai, gïr ïkidadï oidakaragai tudu. Gobai gï agai xi ïmo baasaragai tukurakami dukai maigo dasagi aatïmï. Dai xibi gia gï agai xi gïr aadagi aatïmï go oidakaragai ix makïdï ïr tasïrï gï dukami, gïr utudui oidakaraga tudu. Gï agai xi bhïiyagi aatïmï gïr utudui oidakaraga ïpïan dukai go sandaru gï aadai yukuxi ix makïdï ïr kokodi bïïtarï xudu gakokoda agadagi ïgai.

¹³ Tïtai kïïga bhai maaxkami dukai óídaka aidï, tonorakïrï dukai. Xibi ka maiti gï agai xi nabaakorïdagi aatïmï. Maiti gï agai xi okimïrhiakagi, gï agai xi dagitoagi gobai. Dai maiti gï agai xi ïgamotïrakagi aatïmï ïpï tomarhi xi omarhigakagi

¹⁴ Xibi abïr ïpïan dukai óídaka Suxi Kristo Gïr Nukadakami bhaiyoma. Daidi abïr mai tïgito ajiopada xi dukatai buadagi ix tumaxi gïn tanïi gïn ïkidadï tïgibudaga.