Romanos 12 - Northern Tepehuan Bible

Pabora maa ñoki go buaboitudadami xi Diuxi bïïtarï óídakana ïgai

¹ Gin aaduñi, sïïrhikïdï kïï tuiga Diuxi gïr bïitarï gïr oigïrhitai. Kaxkïdï xibi kabami gïn tanïi aanï xi ïïgi gïn tïïgidagi aapimï ïmo daxdaragai duakakami dukai Diuxi bïïtarï. Diuxi bïïtarï abïr óídaka tudu kïïga xadutudaitai ïgai gin iibhïdakïdï. Gobai ïr ïmo bhai ïrhiaraga Diuxi bïïtarï. Kïïga maatiga maaxi aidï saidi ïr sïïrhi xi podukai xadutuadagi aapimï Diuxi.

² Maiti abïr ïïgiada tïgibudadï oidigi daama óídakami bhaiyoma abïr bhïiyi tïgibudagai utudui Diuxiañdïrï. Aidï gia gïn utudutuldamu Diuxi gïn ïrabiadïrï dai maatïkamu aapimï ixtuma agai Diuxi gïn bïïtarï. Ix makïdï Diuxi aagai gïn bïïtarï mos ïr ïï kïkïïgadukami dai buapai bhai ïrhiaraga Diuxi bïïtarï. Mai tipu ïma maaxi bamioma kïïgadukami xi bhai ix makïdï Diuxi agai gïn bïïtarï.

³ Diuxi gin maa ïmo gubukadagai mos kïï tuigakatai ïgai gin bïïtarï. Kaxkïdï xibi aanï aagai sai mai gïgïrdukïdï gïn ïrhiadagi ïïgi aapimï. Bhaiyoma xudu gïn tïgitoagi aapimï abïr tïgito ixtumaxi ïr buaboi. Diuxi ïgai dai gïr maa gubukadagai bïïxkatai aatïmï tudu xi kaxkïdï buaboitudai aatïmï.

⁴ Gïn aagidamu aanï ïmo maaxidaragai xibi. Daiñi, gïr tukuga mui bia tutuidadï, dukami gïr ïïka, gïr ïïkaso, gïr naanaka. Dai bïïxi gïr tukuga tuidadï ïkobai bia gïn aaduindaga.

⁵ Pomaaxi aatïmï buaboitudadami ïpï. Aatïmï bïïxkatai ïmapi ïr tukugadï Kristo mos bïïnakai aatïmï ïgai. Gïr arasakan dukai aatïmï ïpïan dukai ïmo odami tukugadï tutuidadï. Dïï gia ïjïkobai bia aatïmï gïr aaduindaga.

⁶ Diuxi gïr oigïdaitai gïr maa bïïxkatai aatïmï gubukarhigai xi buadagi aatïmï ïgai aaduindadï. Gï agai xi aatabuadagi aatïmï go gubukarhigaikïdï ix makïdï ïgai gïr maa. Ïïmadutai gïr maa ïgai gubukarhigai xi aagada aatïmï Diuxi ñokidï. Kaxkïdï ix makïdï aagadagi Diuxi ñokidï gï agai xi Diuxi gubukarhigakïdï agadagi ïgai kïïga buaboidaitai Diuxi.

⁷ Xi Diuxi maakiagi ïmadutai gubukarhigai xi soikïdagi jaa, gï agai xi kïïga soikïdagi ïgai. Dai xi maa ïgai gubukarhigai xi gamaatïturhiadagi jaa, gï agai aidï xi kïïga maatïtuldagi ïgai.

⁸ Podukai ïpï ix makïdï gamaakiagi ñoki dai gaabïnakiadagi jaa xi kïïgioma buaboitudana, ïgai gï agai xi Diuxi gubukarhigakïdï gamaakiagi ñoki. Dai ix makïdï Diuxi maa gubukarhigai xi gamaakiagi ïgai ïïgi buxtuidadï Diuxi bïïtarï, gï agai xi mai tudadagi ïgai gï ibhïdagïrï gamaakaitai. Dai ix makïdï Diuxi maa gubukarhigai xi ïr ïmo bhaitï kïakamigadïkagi buaboitudadami gï agai xi kïïga aatabuadagi ïpï. Dai xi Diuxi maa ïmoko gubukarhigai xi maakiagi soiñi ix makïdï tïgitokagi jaa gï agai xi bïïxi bhai ïrhiaradïkïdï gamaakiagi ïgai.

⁹ Gï agai xi kïïgakïrï gïn oigïada aapimï. Gajiadïrï abïr bia gobai ix makïdï ïr soimaaxkami daidi abïr kabami bhïiyi ix makïdï gia ïr kïïga.

¹⁰ Aapimï ix makïdï buaboitudai Suxi Kristo gï agai xi gïn oigïdadagi ïmo gïn xïgïmï dukai. Kïïga abïr xadutuada tudu gïn xixïgi Diuxiïrï gaagaitai ïpïgioma ix makïdï ïr kïïga ïgai bïïtarï dai mai xu ïpïgioma ix makïdï ïr kïïga ïïgi aapimï gïn bïïtarï.

¹¹ Maiti abïr paparuaka ïpï. Bhaiyoma abïr kabami gïn aaga gïn aaduindagïrï ibuadatai bïïxi gïn ibhïdagakïdï gobai ix makïdï ipïrhidi Gïr Nukadakami.

¹² Aapimï bia ïmo gïdukami bhai ïrhiaraga ix makïdï Diuxi bhai dasakami bia aapimï gïn bïïtarï. Kaxkïdï abïr bhai gïn ïrhiada xibi nïnïraitai gobai. Maiti abïr gïn dagito aidï xi gïn maitiagi soi ïrhiaragai xïïxkadï soimaaxi taatakagi aapimï. Abïr mai dagitokai aatagada Diuxi ïmadï bhaiyoma.

¹³ Kïïga abïr oida soiñi gïn aaduñi Diuxiamadïrï ix makïdï tïgitokagi daidi abïr kïïga miadïgida gïn kiikiïrï dadidakami ix makïdï ïr buaboitudadami xibhïadïrï óídakami.

¹⁴ Xi ïmadutai soi gïn buidadagi, daanïdabïrai Diuxi xi maakana ïmo bhai ïrhiaraga ïgai abhana. Dai abïr mai daanïda Diuxi sai soi buidada ïgai ix makïdï soi gïn buididi.

¹⁵ Xïïxkadï bhai gïn ïrhiadagi gïn aaduñi Diuxiamadïrï, aapimï abïr bhai gïn ïrhiada ïpï. Dai xudu soi gïn ïrhiadagi ïgai, aapimï abïr soi gïn ïrhiada ïpï ïgai ïmadï.

¹⁶ Ïmadugan dukai abïr tïgito nïida gïn aaduñi aipakoga ix maaxi daraja. Dai maiti abïr gïgïrdukami gïn ïrhiada ïïgi aapimï pobai gïn ïrhiditai xi bamioma maatï aapimï xi bhai jaa. Kïïga abïr nïijada ix makïdï ïr soititigami ïpï.

¹⁷ Maiti abïr aa noraida soimaaxkamikïdï ix makïdï soi gïn buidadagi. Gaagabïrai ix dukatai ibuadagi ixtumaxi ïr sïïrhi xi jaa óídakami maatïkagi sai kïïga ibuayi aapimï.

¹⁸ Abïr gaaga ix dukatai xioma óídakagi bïïxkatai ïmadï. Xïïxi ukami ixtutiadagi aapimï tudu.

¹⁹ Gin aaduñi, xi ïmadutai soi gïn buidadagi, maiti gï agai xi gaagagi aapimï ix dukatai gïn sïïrhiñdagi ïgai ïmadï. Diuxi ïgai dai gï sïïrhiñdamu soimaaxi buadami ïmadï bhaiyoma. Daiñi, Diuxi ñokidï ikaiti aidï sai, Aanï ïr Tïanïdami dai aanï bia sïïrhikami xi gin sïïrhiñdagi soimaaxi buadami ïmadï. Aanï aa noraidamu soimaaxi buadami mai kïï dunakai ïgai, ikaiti go Tïanïdami.

²⁰ Dai aapimï abïr bhibhida bhaiyoma gïn buidïrï bïïtïkami xudu bhiugikoñikagi ïgai. Dai xi tonokoñikagi ïgai abïr oida sudagi. Podukai xia gïn ïrogidamu ïgai dai ïma dukai gïn tïgito antaada, ikaiti go Tïanïdami.

²¹ Maiti abïr gïn dagito tudu xi gïn maitiagi go soimaaxkami. Dai bhaiyoma abïr ibuada ixtumaxi ïr sïïrhi bai podukai maitïmu aapimï go soimaaxkami bui.