Romanos 11 - Northern Tepehuan Bible

Diuxi oigïdai go Israelitas

¹ ¿Kaxi ix dagito Diuxi go Israelitas aidï? ¡Cho! ¡Xadïrï dagitona ïgai! ¡Aanï ïr Israelita ïpï di! Pipiixaradï aanï go Abraamkaru dai biakami aanï ïradï go Benjaminkaru ïpï.

² Diuxi mai dagito aaduñdï ix makïdï ïgai ïko bubaitu tudu. ¿Maiti mïx tïgito ix kaiti Diuxi ojadïrï? Ami ikaiti sai go Elias aatagaitadai Diuxi ïmadï dai bui ño ïgai go Israelitas. Go Elias itïtïdai Diuxi aidï,

³ Gin Nukadakami, itïtïdai. Go Israelitas ka bïïxi naato kodai go aagadami gï ñoki dai bïïxi xia dodai gï dadaxdakaruga ïpï xako gï dadasai daxdaragai gï bïïtarï. Mosïkaxi aanï bii dai ïr aagadami gï ñoki dai xibi aanï gin mua ïrhidi ïgai ïpï, itïtïdai.

⁴ Dai Diuxi itïtïdai aidï, Kia oidaga kubarakami mirhi judidiu ix makïdï mai xadutudai go Baal agaikïdï ix makïdï mui odami diuxigadï dukai nïidi. itïtïdai.

⁵ Pomaaxi xibi ïpï, apia kia kïï tuiga Diuxi go judidiu bïitarï. Kaxkïdï kia oidaga chïki judidiu ix makïdï ïr Diuxi ïko bubaidadï.

⁶ Diuxi ïko bubaitu chïki judidiu dïï mai xu nïiditai xi kïï dui ïgai. Bhaiyoma mos kïï tuiga Diuxi dai kaxkïdï ïko bubaitu ïgai. Ix ïïko bubiadamudai nïiditai sai kïï duitadai ïgai aidï gia maiti ïr oidaragai dukaikamudai gobai. Mos ïr ïmo oidaragai dukai tudu chïki judidiu bïïtarï xi Diuxi ïko bubaitu ïgai.

⁷ ¿Ix tïiya ïrhidi gobai aidï? Daiñi, go judidiu kïïga ïïgida ïrhidiña go sïïrhikami ojixikami pobïnïrhiditai xi podukai Diuxi kïïgakïrï nïijada agai. Dïï Diuxi mai kïïgakïrï tïï podukai. Bhaiyoma mosïkaxi chïkidu judidiu ix makïdï Diuxi ïko bubaitu dai ïgai gia Diuxi kïïgakïrï tïï. Dai go gaa ix makïdï maiti ïr Diuxi ïko bubaidadï bamioma kapakatu gïn iibhïdaga bhaiyoma dai mo dukai maiti ipïrhi xi buaboitudagi ixtumaxi ïr buaboi.

⁸ Podukai tudu ojixi Diuxi ñokidïrï. Ami ikaiti sai, Diuxi kabakatu momodï odami xi mai maatï kajiagi ïgai. Dai xibi ukami kukupidi bupuidï kia xi mai nïadaga ïgai dai naanakadï ïpï kukupidi xi mai kaïkagi ïgai, ikaiti gobai.

⁹ Go Dabidkaru oja ïki ïpï daidi ikaiti, Sai gïpiïrï gïn surhigïna ïgai buadatai bagimigadï dai sai Diuxi mai bhai gï ïldana ïgaikïdï daidi aa noraidana gïgïbidaragai.

¹⁰ Sai Diuxi mai nïadami biana ïgai aidï. Dai bïïxkïrï bïïtarï sai taatana ïgai gïïpi soi ïrhiaragai, po tudu oja go Dabidkaru.

Go odami ix makïdï maiti ïr judidiu bia kïïgakïrï bubaidaragai

¹¹ Gia ïr buaboi sai go judidiu gïpiïrï surhi mai buaboidakai. ¿Dïï gobai ix tïiya ïrhidi xi ka mai tipuka agai soiñi go judidiu bïïtarï? ¡Cho! Daiñi, bhaiyoma ix makïdï maiti ïr judidiu gïn ayi xi buaboitudagi xibi dai kïïgakïrï bubuakiagi maiti ipïldakai go judidiu xi buaboitudagi. Podukai ïgamuka antaadakamu go judidiu nïiditai xi ix makïdï maiti ïr judidiu gia buaboitudai.

¹² Bïïxi óídakami gïn ayi xibi xi buaboitudagi dai kïïgakïrï bubuakiagi maiti ipïldakai go judidiu xi buaboitudagi. Gobai gia ïr ïmo bhai ïrhiaraga bïïtarï gobai ix makïdï maiti ïr judidiu. Dïï gokiïrioma kia gïïpioma oidatumu bhai ïrhiaraga bïïxkatai bïïtarï xïïxkadï go judidiu kïïgakïrï buaboitudagi.

¹³ Xibi idi ñoki ix makïdï aagamu aanï ïr bïïtarï aapimï ix makïdï maiti ïr judidiu. Diuxi gin otoi ansaidi gïn aituldana Diuxi ñokidï. Dai sïïrhikïdï ïr namïakami idi aaduindagai ix makïdï ibuayi aanï.

¹⁴ Maatï xi ibuadatai aanï gin aaduindagai gïn ïgamuka antaadakagi gin aaduñi judidiu. Podukai gia maatï xi buaboituda antaada ïgai bai podukai kïïgakïrï bubuakia ïgai.

¹⁵ Maiti ipïrhi go judidiu xi buaboitudagi Kaxkïdï xibhï gïn ayi bïïxi go gaa óídakami bïïtarï xi buaboitudagi dai kïïgakïrï bubuakiagi. ¿Ix tuma oidaka agai aidï go judidiu bïïtarï xudu ka buaboitudagi ïgai? Gïn aagidamu aanï ix tumaxi oidakamu ïgai bïïtarï. ¡Daiñi, bïïxkatai ix makïdï buaboitudagi dai mukiagi gïn duduakatuda agai ïpamu!

¹⁶ Xibi gïn aagidamu aanï ïmo maaxidaragai dukai aatagi xi bamioma maatï kaïkana aapimï. Daiñi, xudu biakagi ïmoko tuiyi, mai bhaiga ïmoko xi potïiyagi sai mosïkaxi go ïpïgadï busaidi ïr Diuxi tuidadï ¿aba? ¿Dukatai mosïkaxi lïïchi go tuiyi ïr Diuxi tuidadï aidï? ¿Mai xu bïï sudakami ïr Diuxi tuidadï gobai bhaiyoma? Dai pomaaxi ïmo uxikïdï ïpï. Xi tatakadï ïmo uxi ïr Diuxi tuidadï aidï gia bïïxi go uxi ïr Diuxi tuidadï ïpï dai mai xu mosïkaxi go tatakadï.

Go Israelitas ïr ïpïan dukami ïmo olibo mamaaradï ix makïdï Diuxi guikuta dai gokiïrï go baaxi uxiïrï saituda agai ïpamu

¹⁷ Go judidiu ïr ïpïan dukami ïmo mamaaradï guikomidikami ïmo oliboañdïrï kïï finuakami. Dai aapimï ix makïdï maiti ïr judidiu ïr ïpïan dukami ïmo mamaaradï ïmai oliboañdïrï korientegami ix makïdï Diuxi guikoma dai ïpamu saitu go finuakïdï olibo kïakamiïrï. Xibi aapimï ix makïdï maiti ïr judidiu bhïjimi go gubukarhigai ix makïdï ïr go finuakami olibo mamaaradï bïïtarïkatadai. Bhïjimi aapimï gubukarhigai ix makïdï ïr go judidiu bïïtarïkatadai tudu.

¹⁸ Maiti abïr pobïnïrhiada aidï sai bamioma ïr namïakami aapimï xi bhai go judidiu. Tïgito abïr ajiopada sai aapimï ïr ux mamaaradï dukami dai mai xu ïr tatakadï aapimï. Dai ïmo ux mamaaradï takadïañdïrï buyiña gubukarhigai. Dai mai xu go ux takai mamaaradïañdïrï buiyiña gubukarhigai.

^19-20 Kïïga ïr buaboi tudu sai Diuxi guikoma go judidiu ïmo ux mamaaradï dukai dai aapimï gïn saitu ami uxiïrï. Kaxkïdï abïr mai gïgïrdukami gïn ïrhiada ïïgi aapimï. Abïr tïgito nïida bhaiyoma sai Diuxi guikoma ïmo ux mamaaradï dukai go judidiu mai buaboidakai ïgai. Dai Diuxi gïn saitu aapimï ix makïdï maiti ïr judidiu ami uxiïrï gia buaboitudakai aapimï. Kaxkïdï abïr mai gïgïrdukami gïn ïrhiada ïïgi aapimï ix makïdï maiti ïr judidiu. Daidi abïr duduadikuda bhaiyoma tadu aapimï gïn guikuta Diuxi ïpï.

²¹ Daiñi, Diuxi guikoma go ix makïdï ïr ïïgi go finuakïdï olibo mamaaradïkatadai mai buaboidakai ïgai. Guikoma ïgai go judidiu tudu. Dai kïï bhaiga ïgai xi gïn guikomagi ïpï aapimï ix makïdï maiti ïr judidiu ix mai buaboitudagi aapimï.

²² Tïgito abïr kaï idi ñoki tudu. Gia ïr buaboi sai Diuxi kïï tuiga dïï bïïxkïrï kabami gïgïbituldai ïgai soimaaxi buadami. Gïgïbiturhi ïgai go judidiu dai mos guikoma mai buaboidakai ïgai. Dïï aapimï gïn bïïtarï gia kïï tuigakana Diuxi buaboidakai aapimï. Kaxkïdï gï agai sai apia buaboitudadagi aapimï. Ïma dukai aapimï gïn guikoma antaada ïgai ïpï.

²³ Dai xi go judidiu ïma dukai gïn tïtïgitoagi dai buaboitudagi aidï gia Diuxi gïn saitudamu ïpamu go oliboïrï. ¿Tuma xijaiga aidï Diuxi bïïtarï xi abhai saitudagi ïgai ïpamu?

²⁴ Kïïga ixtui Diuxi aidï xi gïn saitudagi aapimï abhai oliboïrï tomaxi xijaiga gobai. Aapimï ïr ïmo korientegami uxiañdïrï guikomidikami kaxkïdï. Dai kaxkïdï ïpï bamioma mai xijaiga Diuxi bïïtarï xi ïpamu saituda ïgai go judidiu ix makïdï kïïgakïrï ïr mamaaradï go finuakïdï olibo.

Ayimu ixtuigako gia buaboituda agai go judidiu

²⁵ Gin aaduñi, ipïrhidi aanï xi maatïkagi aapimï ïmo maatïtuldaragai Diuxiañdïrï ï ix makïdï ïki abhiadïrï ïxtokikana. Dai aidï gia toma lïïchi mai gïgïrdukïdï gïn ïrhiadamu aapimï kaïkai idi maatïtuldaragai ix makïdï gïn aagidamu aanï. Daiñi, mai xu bïïxkïrï kaapakami ka agai iibhïadï go judidiu maiti ipïrhiditai xi buaboitudagi. Kapakamu ïgai mosïkaxi asta xïïxkadï aiyagi ix xïïkiduka agai buaboitudadami ix makïdï maiti ïr judidiu.

²⁶ Aidï gia kïïgakïrï bubuakimu bïïxi go judidiu. ¡Ka podukai ojixi Diuxi ñokidïrï di! Go ojai ikaiti sai, Go Kïïgakïrï Bubiadami dibiamu Sionañdïrï. Dai buanada agai soimaaxkamigadï Jakobo piipixaradï.

²⁷ Podukai Diuxi ibuada agai ix dukatai bhai duitadai ñoki go judidiu ïmadï daidi buanada agai soimaaxkamigadï ïgai.

²⁸ Xibi buidïrï bïïtïkami dukai nïidi Diuxi go judidiu mai buaboitudakai ïgai. Kaxkïdï xibi aapimï gïn ayi xi kaïkagi go bhai ïrhiaraga aatagi. Dïï Diuxi ïko bubaitu go Abraamkaru ïki ïmadï go Isaakaru dai go Jakobokaru dai kaxkïdï tomax dukai apia oigïdai ïgai piipixaradï. Apia oigïdai ïgai go judidiu tudu.

²⁹ Xadïrï ïma dukai gï tïgitona Diuxi kaxi maakakai ïmo oidaragai. Dai xadïrï ïma dukai gï tïgitona ïgai kaxi ïko bubaidakai óídakami ïpï. Bïïxkïrï ibuayi ïgai ixdukatai aagadagi.

³⁰ Ïkioma aapimï ix makïdï maiti ïr judidiu maiti ipïrhidiña xi ïïgiadagi Diuxi. Dai xibi go judidiu ïgai dai mai ïïgidimi. Kaxkïdï xibi Diuxi kïï tuiga aapimï gïn bïitarï.

³¹ Diuxi gïn oigïrhimi xibi mos buaboitudakai aapimï. Diuxi oigïlda ïrhidi go judidiu gokiïrioma ïpï buaboitudakai ïgai. Dïï xibi mai kia buaboitudai ïgai kaxkïdï aapimï gïn ayi xibi xi Diuxi soi ïrhiadagi gïn nïiditai.

³² Diuxi dagito xi ïmadugan dukai gïn maamaixakami dukamikagi bïïxi odami mai ïjïgidaragakatai ïgai, pomaaxi bïïxi odami xi ïr judidiukagi xi maiti ïr judidiukagi ïpï. Dagito Diuxi xi gïn maamaixakan dukamikagi ïgai bai podukai Diuxi ïmadugan dukai oigïldagi bïïxkatai ïpï.

Gï agai ix oigïda ñokada aatïmï Diuxi bïïtarï

³³ ¡Aa gia gïïdu Diuxi tïgibudadï! Kïï maatïtai nïidi ïgai bïïxi aïkatai dai maatïtai aagai ix tumaxi ïr kïïga. Odami xadïrï maatï kaïkana ix dukatai aatabuayi ïgai.

³⁴ Tipu xorai maatïkagi ix tuma tïïtïitoi Diuxi dai tipu ïpï xorai maakiagi ñoki.

³⁵ Tipu xorai maakiagi ixtumaxi Diuxi xi podukai Diuxi buatulda biyagi.

³⁶ Diuxi idui bïïxi ixtumaxi oidaga di. Ïgai gubukarhigadïkïdï apia oidaga bïïxi aïkatai ixtuma oidaga. Ïïgi gï bïïtarï idui ïgai tudu. Kaxkïdï gï agai xi oigïda ñokada aatïmï Diuxi bui bïïxkïrï bïïtarï xadutudaitai aatïmï ïgai. ¡Gobai gia ïr buaboi!