Romanos 10 - Northern Tepehuan Bible

¹ Gin aaduñi, aanï ipïrhidi bïïxi gin ibhïdagakïdï xi kïïgakïrï bubuakiagi go judidiu. Kaxkïdï daanïi aanï Diuxi ïgai bïïtarï.

² Aanï kïï maatï sai go judidiu kïïga xadutuada ïrhidi Diuxi dïï mos kuga iji ïgai.

³ Maiti ipïrhi ïgai xi buaboitudagi ix Diuxi ïgai dai bhai dui boiyi odami bïïtarï xi podukai ïgai kïïgakïrï nïijadana. Ïïgi gïn gubukarhigakïdï bhai duña ïrhiditadai ïgai boi ïïgi gïn bïïtarï bhaiyoma. Gajiadïrï bia ïgai Diuxi tïgibudadï dai ïïgi gïn tïgibudaga adaji.

⁴ Suxi Kristo ïgai dai kugaitu go sïïrhikami. Kaxkïdï Diuxi kïïgakïrï nïidi ix makïdï buaboitudai ïgai.

Bïïxi óídakami bïïtarï go kïïgakïrï bubaidaragai

⁵ Go Moiseskaru idui ojai ïki dai ami ikaiti sai odami ix makïdï ïïgida ïrhiadagi go sïïrhikami bai podukai Diuxi kïïgakïrï gïn nïijadagi, ïgai biakamu xi ïïgiadagi bïïxi sudakami go sïïrhikami bïïx tasai.

⁶ Dïï odami ix makïdï Diuxi kïïgakïrï nïidi mos buaboitudaitai ïgai, maiti gï agai ïgai xi potïiyagi sai, Xi ïmadutai tïsaidagi tïbagiamu dai mïkadïrï buapagi go Kristo aidï gia buaboituda antaada aanï. ¡Ka buaboitudai ïgai tudu tomaxi mai nïidi ïgai go Suxi di!

⁷ Dai tomarhi maiti gï agai ïpï xi potïiyagi ïgai sai, Xi ïmadutai tïbandagi mïï taana xako daraja koidadï dai mïkadïrï buapagi go Suxi Kristo, aidï gia buaboituda antaada aanï, gobai maiti gï agai ix tïiyagi ïgai ïpï.

⁸ Daiñi, Diuxi ñokidï ikaiti sai, Aapimï bia Diuxi ñokidï. Ka kïïga maatïtai aagai aapimï Diuxi ñokidï tudu ka kïïga maatïkatai aapimï gïn iibhïdagïrï ix kaiti gobai, ikaiti Diuxi ñokidï. Go galbaaxi Diuxi ñokidï tudu ïgai dai aagaiña aatïmï aipakoga. Aagidiña aatïmï óídakami sai gï agai xi buaboitudagi ïgai.

⁹ Ga aagidiña aatïmï sai gï agai xi odami buaboitudaitai po tïiyagi sai Suxi Kristo bïïxi adaama ïr Tïanïdami. Dai sai gï aagai xi kïïgakïrï buaboitudagi ïgai ix Diuxi duakaturhi go Suxi. Xorai pobuadagi gia kïïgakïrï bubuaki agai.

¹⁰ Diuxi kïïgakïrï gïr nïidi buaboitudakai aatïmï tudu, mos maaxiko aagakai ix buaboitudai aatïmï.

¹¹ Diuxi ñokidï ikaiti sai, Toma xorai ix makïdï buaboitudagi Diuxi mai biaka agai ix tuixi xaïradagi, ikaiti Diuxi ñokidï.

¹² Pomaaxi bïïxi odami bïïtarï xi ïr judiukagi, xi maiti ïr judiukagi ïpï. Diuxi ïr tïanïdamigadï bïïxi óídakami dai maakai ïmo gïdukami bhai ïrhiaraga bïïxkatai xorai tanïdagi soiñi.

¹³ Kaxkïdï pokaiti Diuxi ñokidï sai, Bïïxi odami kïïgakïrï bubuakimu ix makïdï daanïdagi Suxi Gïr Nukadakami xi ïgai kïïgakïrï bubaidana, ikaiti Diuxi ñokidï.

¹⁴ ¿Dïï gia dukatai daanïdana ïgai Suxi Kristo sai kïïgakïrï gïn bubaidana mai kia buaboitudakai ïgai? ¿Dai dukatai buaboitudana ïgai Suxi Kristo mai kia kajiomakatai xorai ïgai? ¿Dai dukatai kaïkana ïgai aidï mai tipukatai xorai aagidagi?

¹⁵ ¿Dai dukatai imïna ïmadutai dai mïï aagidagi ix mai tipukagi xorai gaotosdagi? Kaxkïdï tudu Diuxi ñokidï pokaiti aidï, Gia xigiamaaxi odami ix makïdï buapai go bhai ïrhiaraga aatagi, ikaiti Diuxi ñokidï.

¹⁶ Dïï mai xu bïïxi óídakami buaboitu go bhai ïrhiaraga aatagi. Go Isaiaskaru ïpï pokaiti ïki sai mai xu bïïxi óídakami buaboitudai. Ïgai gatïkaka Diuxi aidï daidi ikaiti, Gïr Nukadakami, ¿Oidaga xi ïmadutai xorai buaboida kaï gïr aatagi? ikaiti.

¹⁷ Mosïkaxi kaïkatai go bhai ïrhiaragai aatagi bhïjïi odami tïgibudagai xi buaboitudagi. Kaxkïdï gï agai ïgai xi kaïkagi go aatagi aagaitai Suxi Kristo.

¹⁸ ¿Dai go judidiu ix bhai mai kaï go bhai ïrhiaraga aatagi? Kaï aba ïgai. Kaxkïdï Diuxi ñokidï ikaiti, Bïïxi aipako oidigi daama ayi go aatagi. Oidigi ugidïrioma ukami ayi Diuxi ñokidï tudu, ikaiti go ojai.

¹⁹ ¿Go judidiu ix mai maatï kaï Suxi Kristo aatagidï aidï? Kïïga maatï kaï ïgai tudu, ikaiti gobai. Go Moiseskaru oja ïki tudu sai Diuxi ikaiti, Aanï Diuxi oigïdamu odami ix makïdï maiti ïr judidiu. Oigïdamu aanï odami tudu ix makïdï aapimï judidiu mai namïakami dukai nïidi. ¡Aidï gia ïgamukan taadakamu aapimï judidiu! Bhakoikamu aapimï nïiditai sai aanï oigïdai odami ix makïdï aapimï mos pupuirugami aagai, ikaiti Diuxi.

²⁰ Dai go Isaiaskaru mai duadimukai ño ïki ïpï dai aagai ix kaiti Diuxi. Pokaiti ïgai sai Diuxi ikaiti, Jaa odami gin tïïgimu ix makïdï tomarhi maiti gaagaiña urabaragai gin ïmadï. Tomaxi go odami ix makïdï maiti ïr judidiu mai gaagai urabaragai gin ïmadï aanï bïïxkïrï tïtïgidamu xorai aanï, ikaiti Diuxi.

²¹ Dïï Diuxi oigïdai go judidiu tomax dukai. Go Isaiaskaru oja ix ikaiti Diuxi go judidiukïdï. Diuxi ikaiti aidï, Bïïx tasai apia abïnakidiña aanï go judidiu saidi gin urabakana. Dïï mai ïjïgidaraga ïgai. Arhiï kapaka iibhïadï tudu, ikaiti Diuxi.