Mataibo 27 - Northern Tepehuan Bible

Soi gï ïldatu go Udaxi dai ïïgi gï burhiji

¹ Dai xadiko mos maaxikai oidigi sai gïn ïmpagi bïïxi go tïtïanïdamigadï go dadaxdadami ïmadï jaa bhaitï gukakamigadï go judidiu. Dai bhai dui ïgai aatagi ix dukatai muagi go Suxi.

² Dai bhodïrï burhikami bhïkai ïgai go Suxi dai mïï tïïgi ïgai Pilato. Go Pilato ïr kaigikatadai aidï ami Judea munisipiïrï.

³ Dai aidïxi ka máí go Udaxi sai ka bhai duitadai ñoki go dudunukami sai mua agai go Suxi saidi soi gï ïrhi ïgai. Ïgai gatïïgitadai tudu. Soi gï ïrhi ïgai dai ïma dukai gï tïgito. Dai bhïkai ïgai go maitïki ix tukïdï gatïïgitadai ïgai Suxi dai mïï aa noraida agai go tïtïanïdamigadï go dadaxdadami ïmadï go gaa bhaitï gukakamigadï go judidiu. Ïmokobhai dan bhaibuxtama plata tuminxikatadai gobai.

⁴ Dai potïtïdai ïgai go dudunukami, —Agia soimaaxi idui aanï gatïïgidakai aanï go Suxi maiti ïr soimaaxi idukamikatai ïgai— itïtïdai. Daidi go dudunukami potïtïdai, —Aatïmï gïr bïïtarï maiti ïr ixtumaxi gobai. Ïïgi aapi ïr gï duñi gobai— itïtïdai.

⁵ Daidi go Udaxi abhai go gïï kiupiïrï surhi go tuminxi dai no maigobai jii dai gï burhiji.

⁶ Dai go tïtïanïdamigadï go dadaxdadami ïmpagi go tuminxi daidi ikaiti, —Maiti ïr sïïrhi xi bhai darasagi aatïmï idi tuminxi xako bhai gï darasai tuminxi tami kiupiïrï aaduindadï Diuxi bïïtarï— ikaiti. —Idikïdï gï sabïrhi ïmo kïïrhi ix makïdï gï muatuda agai tudu. Kaxkïdï tukuraga gobai. Ïramadikan dukai gobai tudu— ikaiti.

⁷ Dai aataga ïgai dai bhai dui ñoki dai go tuminxikïdï sabïrhi ïgai go dïjoi xakoga bhïjïiña odami go bhidai ajataragai bïïtarï. Sabïrhi ïgai ïmo kampo santo bïïtarï saidi ami gï yaasana ix makïdï maiti ïr óídakami ami. Go tuminxikïdï ix makïdï ïramadikami duu sabïrhi ïgai tudu.

⁸ Dai kaxkïdï Ïrakïrï tïgidu go dïjoi gobai xibi apia kia.

⁹ Podukai po gï idui ixtumaxi oja go Jeremias ïïki. Ïgai ïr ïmo ñokituldiadamigadїkatadai Diuxi. Dai ami ojadïrï pokaiti ïgai sai, Go Israelitas bhai dui ñoki dai aagai sai ïmokobhai dan bhaibuxtama plata tuminxikïdï sabïda agai ïmo kïïrhi. Podukai ka aagai ïgai xïïki namïaka agaitadai ïgai ix makïdï gï tïïgitulda agai.

¹⁰ Dai namïgadïkïdï sabïdamu ïgai dïjogadï go ajatadami. Podukai aagai Diuxi Gïr Nukadakami kaxkïdï. podukai tudu oja go Jeremias ïïki.

Gï baan kïsatu Suxi go dunukami Pilato tïgidukami buidïrï

¹¹ Go dudunukami ka mïï kaigi buidïrï baan kïsakatadai go Suxi aidï. Pilato tïgidukatadai go kaigi tudu. Daidi potïtïdai ïgai Suxi, —¿Aapi pïxi ïr Reygadï go judidiu?— itïtïdai. Daidi Suxi potïtïdai, —Podukai aba ix dukai aagai aapi— itïtïdai.

¹² Dai go tïtïanïdamigadï go dadaxdadami ïmadï go gaa bhaitï gukakamigadï go judidiu gïpiïrï buapaitadai go Suxi ami Pilato buidïrï aagaitai saidi ïr soimaaxi ibuadami ïgai. Dïï gia go Suxi dodorhi bii dai mai aa noraidi tomarhi ïmo ñoki.

¹³ Dai go Pilato potïtïdai Suxi, —¿Maiti pïx kaï ix kaiti gobai gïpiïrï gï bupaitai?— itïtïdai.

¹⁴ Dïï gia Suxi mai aa noraidi tomarhi ïmo ñoki xi go Pilato mai tïtïgaitadai ixtumaxi gï tïgitoagi.

¹⁵ Dai go Pilato bïïxi umiïrï go Kïïgakïrï Bubaidaragai bagimiïrï daadagitoiña ïmo maixapikami, ïïgi ix makïdï tañiagi go odami.

¹⁶ Dai aidïpïrï no maixakaruana dajatadai ïmo omarhigami Barabás tïgidukami.

¹⁷ Dai mïï dada go odami muidutai xako daja go Pilato. Daidi go Pilato potïtïdai, —¿Ix makïdï maixapikami ipïrhidi aapimï ix dagitoagi aanï?— itïtïdai. —¿Aagai mïxi ix dagito aanï go Barabás xiïpï ix dagitoagi aanï go Suxi ix makïdï Diuxi otosadï gabhaitïkïakami aagaiña go óídakami?— itïtïdai.

¹⁸ Go Pilato kïïga maatïkatadai sai ïgamudagaikïdï gï baan kïsatutadai Suxi ami buidïrï dai mai xu xi ïr soimaaxi ibuadamikatadai ïgai. Maatïkatadai ïgai tudu saidi go tïtïanïdamigadï go dadaxdadami ïgai dai ïgamukatadai. Dai kaxkïdï aagidi ïgai go odami ix bhai maiti ipïrhidi ïgai ix dagitoagi ïgai Suxi.

¹⁹ Dai go gïï daikaruana dakatadai go Pilato aidï xako dakatai gatïanïiña ïgai. Daidi oñigadï otoxdi ñoki ami. Daidi potïtïdai, —Maiti gï agai xi gïpiïrï daitudagi aapi go kïïrhi gobai. Maiti gï agai ix maakada gïgïbidaragai tudu. Maiti ïr soimaaxi ibuadami gobai toma lïïchi kaxkïdï. Tukarï tïïtïkimi gobaikïdï dai kabami soimaaxi taata aanï gokïdï— as duu otoxdi ñoki go oki.

²⁰ Dïï gia go tïtïanïdamigadï go dadaxdadami abïnakidi go óídakami sai aagidana ïgai go Pilato sai dagitona go Barabás. Dai abïnakidi ïgai go odami sai tanïna ïgai muaragai Suxi ïpï.

²¹ Daidi go Pilato potïtïdai go odami aidï, —¿Ipïrhidi mïxi ix dagitoagi aanï go Suxi? ¿Go Barabás xio?— itïtïdai. —Dagitoñi go Barabás— ikaiti go odami.

²² Daidi go Pilato potïtïdai, —¿Ix duna aidï aanï go Suxi ix makïdï Diuxi otosadï aagaiña óídakami?— itïtïdai. Dai go odami ijiñakimi daidi ikaitimi, —Kuruxiana abïr xixa— ikaitimi.

²³ Daidi go Pilato potïtïdai, —¿Tuixidï gï agai gobai xixagi kuruxiana?— itïtïdai. —¿Tumaxi soimaaxi ibuadami gobai tudu?— itïtïdai. Dïï go odami apia bamioma ijiñakimi daidi ikaitimi, —Kuruxiana abïr xixa— ikaitimi.

²⁴ Dai gokïdï ka máí go Pilato sai ka maiti ixtutuidi agai buidïrï go odami mos ïï xigarhi kaititai go odami ijiñakaitai. Dai gatáí ïgai sudagi dai gï iko ami go óídakami buitapi. Podukai maaxituda ïrhiditadai ïgai saidi maiti ïr duñidїka agai xïïxkadï gï muatuda agai go Suxi. Daidi potïtïdai ïgai go óídakami, —Ka maiti ïr gin duñika agai gï aaxtakai ïradï go Suxi gï muatudakai ïgai. Ïïgi aapimï ïr gïn duñika agai gobai— itïtïdai.

²⁵ Daidi go odami potïtïdai, —Kïïgaduaba. Aatïmï ïmadï gïr maamara ïr duñidїka agai gï aaxtakai ïradï gobai— itïtïdai.

²⁶ Dai go Pilato ïïgidi go odami dai dagito go Barabás. Bhodïrï tïjai ïgai go sandadaru mïsai gïikarsana go Suxi ikixanaikïdï dai bhodïrï sai baidakana dai kuruxiana xixana.

Parunai go sandadaru go Suxi

²⁷ Daidi go sandadaru baidaja Suxi kuartelïrï dai ami tuixikana kïi dai mui gïn ïmpagi sandadaru dai bïï xikorhi gukiba ïgai Suxi.

²⁸ Dai upasai ïgai yukuxidï dai aadi jaa yukuxi moraduakami.

²⁹ Daidi iduñi ïmo korona uparai dai kïïxi. Dai maa ïgai ïmo arhi uxi saidi dagïkana ïgai ïkadïrï uxiaradï dukai, ïmo dunukami dukai. Podukai idui ïgai bïïxi gobai sai ïpïamaaxkana ïgai ïmo Rey. Dai bhodïrï kuikïskaiña ïgai buidïrï daidi ikaitiña, —Xïïxi ïr gïdukami aapi Reygadï go judidiu— ikaitiña. Xadutuadan dukai kaitiña ïgai dïï mos ïr ïmo parunaragai ïgai bïïtarï bhaiyoma.

³⁰ Dai xixibidi ïgai dai bhïiyi ïgai uxiaradï dai ïgaikïdï gïgïbaitadai modïrï ïpï.

³¹ Naana dukai parunadan buayi ïgai tudu. Dai ka nato parunakai ïgai sai bhodïrï upasai ïgai go yukuxidï moraduakami dai ïïgi yukuxidï aadi. Dai bhodïrï busaitu ïgai abhiadïrï dai kuruxiana xixa agai.

Kuruxiana gï xixatu go Suxi

³² Kaiyañdïrï iimïi ïgai dai ayi ïmo kïïrhi Sireniañdïrï oidakami, Ximuñi tïgidu ïgai. Dai go sandadaru gubukadakïdï tïjai sai kusubana ïgai go kuruxi.

³³ Dai bhïkai ïgai go Suxi ïmapïkïrï xakopïrï Gólgota tïgidu ix makïdï odami modï tïiya ïrhidi.

³⁴ Ami oida agaitadai ïgai bino bïnakami usabhai kabami xibukami. Oida agaitadai gobai Suxi ïmo duadigami dukai sai mai kabami kokokagi ïgai dïï mosïkaxi palïpi dïïka ïgai dai ka maiti ipïrhi xi iiyagi.

³⁵ Dai ka xixakai ïgai go Suxi kuruxiana sai bhodïrï go sandadaru bhïiyi yukuxidï daidi idui ïmo totoidaragai dai nïida agai ix tuma yukuxi aïna ïïmadutai.

³⁶ Dai bhodïrï ka darakatai nukadai ïgai go Suxi ami.

³⁷ Mïtaidi kuruxiana xixa ïmo ojixikami ïpï modï daama sai ïgaikïdï gï maatïkana ix tuixi gï xixatu Suxi ami. Daidi ikaiti go ojai, IDI ÏR REYGADÏ JUDIDIU

³⁸ Mïtaidi ami go Suxi abhana xixa ïgai goka ïïxibogami ïpï jaa kukuruxiana. Ïmoko sïïrhixapadïrï xako gï xixatu go Suxi dai go gïmai ogixapadïrï.

³⁹ Dai go odami ix makïdï ami dïgabuskïiña parunaitadai go Suxi dai giidai momodï

⁴⁰ daidi ikaitiña, —Aapi pokaitiña saidi bhaiga aapi daitudagi go gïï kiupaigadï judidiu kabami gubuakatai aapi dai sai bhaiga aapi xi baika tasaikïdï kïïsagi ïpamu ïpï. Kaxkïdï kïïgakïrï gï busaidi ïïgi aapi tudu ix ïr buaboikagi gobai sai kabami gubuka aapi. Dai pokaitiña aapi saidi ïr Diuxi Maradï aapi ïpï. Xi ïr buaboikagi gobai aidï gia tïbanañi abhai kuruxiañdïrï— ikaitiña ïgai parunaitai.

⁴¹ Daidi go tïtïanïdamigadï go dadaxdadami ïmadï go tïtïïgiadami sïïrhikami parunaitadai ïpï daidi ikaitiña,

⁴² —Kïïgakïrï as bubaitu gobai mui odami dïï gia maiti ixtutuidikïi ïgai xi ïïgi kïïgakïrï gï busaidagi— ikaitiña. —Gobai as ïr reygadï go judidiu ix makïdï óídaga tami Israelïrï tudu. Tï nïida xibi sa bhai tïbanïna kuruxiañdïrï. Aidï gia buaboituda antaada aatïmï— ikaitiña.

⁴³ —Pokaitiña gobai sai kïïga buaboitudai Diuxi dai saidi ïr Maradï gobai. Sai Diuxi soiñana xibi tudu xi ïr buaboikagi gobai— ikaitiña parunaitai.

⁴⁴ Dai ï goka kïkïïrhi ix makïdï kukuruxiana nagiïjïtadai pokaitiña ïpï dai xigarhi kaitiña ñokiditai.

Kuruxiana muu go Suxi

⁴⁵ Daidi daan duku abhiadïrï asta koi gïsïko tasai ukami tukamugatadai oidigi.

⁴⁶ Dai aidï uruno taadako gïgïrï iiña go Suxi daidi ikaiti, Eloi, Eloi, ¿Lama sabhaktani? Dai gobai itïiya ïrhidi, Gin Oga, Gin Oga, ¿Tui pïxi gin dagito?

⁴⁷ Dai ïïmoko ix makïdï ami darajatadai kaï ix potïi ïgai daidi ikaiti ïgai kaïkatai, —Daiñi, gobai bapaidiadan kaiti go Eliaskaru— ikaiti.

⁴⁸ Dai ïmadutai mḯḯ dai mïï bhïiyi ïmo bixokorhi dai badaitu bino ïkokami. Bhodïrï ïmo uxi tïbïdukami kugadïrï buu ïgai dai miadïrï daxi ïgai Suxi sai bixusuna.

⁴⁹ Dïï gia jaa potïtïdai ix makïdï dagïi uxi, —Nïnïrakañi kia. Tïnïida sa bhai dibiana go Elias dai kïïgakïrï busaidana— itïtïdai.

⁵⁰ Daidi bhodïrï gïïgïrï iiña Suxi ïpamu dai muu.

⁵¹ Baidi amaxi tïkabidïrï abhiadïrï asta mïï taana ukami sarai go gïï ikuxi ix makïdï go gïï kiupaigadïrï judidiu sagiïkatadai. Dai gigiburhi oidigi ïpï dai mui ojodai taatapai ïrana.

⁵² Daidi kukupiokan tïi xako yaasapikatadai koidadï ïpï dai mui óídakami ix makïdï buaboitudatadai duduaka ïpamu.

⁵³ Dai bubuaka ïgai abhiadïrï xakoga yaasapikatadai ïgai dai ajiopaitadai kayana dai mui óídakami tïï.

⁵⁴ Daidi kabami duduadimu go kapitañi ïmadï sandadarugadï ix makïdï nukadakatadai go Suxi. Nïiditadai ïgai aidïxi gigiburhi oidigi dai bïïxi ixtumaxi daibusai ami ïpï kaxkïdï. Daidi ikaitiña ïgai, —Idi gia ïr buaboi saidi ïr Diuxi maradï— ikaitiña.

^55-56 Dai mïkaxdïrï gukatadai oki ïpï dai nïnïidi ix dukatai po gï buimi. Dajatadai Maria Magdalena, dai go gïmai Maria ix makïdï ïr go Santiago dai go Jose dïïdï. Dai dajatadai oñigadï Sebedeo ïpï. Bïï baikatai go oki ïgai oiditadai go Suxi baasïkioma aidïxi jii Galileañdïrï dai soikïitadai ïgai aaduindadïrï. Dai xibi ka Jerusalenïrï darakatadai ïgai ïpï dai mïkaxdïrï nïidi aidïxi gï muatu go Suxi.

Gï yaasatu go Suxi

⁵⁷ Dai aidï urunoko ami dibia ïmo kïïrhi gï bidakami Jose tïgidukami. Arimateïrï oidakami ïgai dai ka buaboitudai ïgai Suxi ïpï.

⁵⁸ Dai jii ïgai dai mïï baa buitapi go Pilato dai gatai ïgai tukugadï Suxi. Dai Pilato aagidi sandadarugadï sai maakana ïgai tukugadï Suxi go Jose.

⁵⁹ Dai bhïkai Jose tukugadï Suxi dai ïmo ikuxi kïïga bakuañikamiïrï bhixa.

⁶⁰ Dai biakatadai go Jose ïmo yaasakaru koidadï ïmo tïjobai dukai xako kobiarsaitadai ïgai ïmo baboi uta. Dai utuduitadai gobai. Mai kia gï yaasatadai tomarhi ïmo mukiadï ami tudu. Daidi ami tïï ïgai go tukugadï Suxi dai bhodïrï iña ïgai go tïjobai ïmo gïï odaikïdï dai ka maigobai jii.

⁶¹ Daidi go Maria Magdalena, dai go gïmai Maria ix makïdï ïr dïïdï go Santiago ami buidïrï darakatadai dai nïidi aidïxi gï yaasatu tukugadï go Suxi ami.

⁶² Pogïdui gobai go tasïrï ix makïdïrï bhai buayi go judidiu bïïxi ixtumaxi go ibhïxtaragai tasïrï bïïtarï. Dai xadiko kaxi ïr go ibhïxtaragai tasïrïkatadai. Dai aidï iji go tïtïanïdamigadï go dadaxdadami ïmadï go fariseos dai mïï nïidi ïgai go Pilato.

⁶³ Daidi potïtïdai ïgai, —Go Suxi sïïrhikïdï yaatabogatadai— itïtïdai. —Kïïga gïr tïgito aatïmï ix ikaitiña ïgai mai kia mukukai. Aidï pokaitiña ïgai saidi xïïxkadï mukiagi sai abhiadïrï baika tasaikïdï duaka agai ïpamu.

⁶⁴ Kaxkïdï ipïrhidi aatïmï sai otosana aapi sandadaru sai baika tasai aïkami kïïga nukadana ïgai ami xako yaasapi go Suxi— itïtïdai. —Ïma dukai dadi antaada go mamaatïrdamigadï Suxi dai gaïxida antaada tukugadï. Aidï gia pokaitada antaada ïgai sai gï duakatu Suxi ïpamu. Kïïga buirumagi Suxi go óídakami aidïxi kia oidakatadai ïgai dïï gia xi go mamaatïrdamigadï gaïxidagi tukugadï aidï gia asta bamioma imimu go buirumadaragai óídakami bïïtarï— itïtïdai.

⁶⁵ Daidi go Pilato potïtïdai, —Mo guka gin sandadaruga— itïtïdai. —Bhïkabïrai chïki dai mïï bhai duñi ix dukatai ixtutiadagi aapimï ami xako yaasapi go mukiadï saidi maiti gaïxidiña ixtumaxi— itïtïdai.

⁶⁶ Dai iji go tïtïanïdamigadï go dadaxdadami ïmadï go fariseos dai baidaja ïgai sandadaru dai mïï nukaturhi ïgai xako yaasapikatadai Suxi. Dai daxi ïgai ïmo seyo ami xako tïjobiana arasaka go gïï odai sai podukai gï maatïkana ix bhai kupioka ixtumaxi go tïjobai.