Mataibo 26 - Northern Tepehuan Bible

Go bhaitï gukakamigadï go judidiu bhai dui ñoki sai mua agai go Suxi

¹ Dai bhodïrï ka kugaidakai Suxi go aatagi sai bhodïrï potïtïdai ïgai mamaatïrdamigadï ïpï sai,

² —Kïïga maatï aapimï sai ka miadimi go kïïgakïrï bubaidaragai bagimi mos arhi goka tasai bii ix aiyagi gobai tudu. Dai amaxi bagimiana gin tïïgida aagai ïmoko go dudunukami baidi ïgai gin tïañi agai muaragai kuruxiana aanï ix makïdï ïr go otosadï Diuxi dai ïmo kïïrhi busai tudu— itïtïdai.

³ Dai aidï tuigako ïpï gïn ïmpagi go tïtïanïdamigadï go dadaxdadami ïmadï go tïtïïgiadami sïïrhikami. Gïn ïmpagi ïgai kiidïrï ïmo kïïrhi Kaifas tïgidukami ix makïdï ïr bïïxi adaama gatïanïdami go dadaxdadami.

⁴ Dai ami bhai dui ïgai ñoki dai yaatagikïdï bhïiyi agai go Suxi dai mua agai.

⁵ Daidi ikaiti ïgai, —Ka daibunukai go bagimi bhïimu aatïmï sai mai bhakoikana odami gïr bui. Ix go bagimiana bhïiyagi aatïmï gïr bui surhigi antaada óídakami tudu— ikaiti ïgai.

Ïmo oki toidi perfume modïrï Suxi

⁶ Dai aidïpïrï Suxi Betaniana dakatadai kiidïrï ïmo kïïrhi Ximuñi tïgidukami. Go Ximuñi ïkioma biakatadai ïmo kokodagai ix makïdï lepra tïgidu.

⁷ Dai mesa buidïrï dajatadai go Suxi daidi gakuayi ami kiidïrï go Ximuñi baidi ami dibia ïmo oki. Bhïkati ïgai ïmo tukayu kïï namïakami dai sudakami perfume kïï namïakami dai modïana toi ïgai go perfume Suxi.

^8-9 Dai ami kiiyïrï darajatadai go mamaatïrdamigadï Suxi ïpï dai mai bhai ïrhi ïgai nïiditai ix idui go oki. Daidi ikaiti ïgai, —¿Ix tuixidï mos ïgikïdï xia buayi gobai go perfume? Gagaaramudai gobai mui tuminxikïdï bhaiyoma dai ïgaikïdï soiñamudai soititigami— ikaititadai go mamaatïrdami.

¹⁰ Dïï gia Suxi maatïkatadai ix kaititadai ïgai. Daidi potïtïdai ïgai, —Dagitobïrai go oki— itïtïdai. —Maiti gï agai xi buidïrï ñokadagi aapimï. Kïïga gin buididi gobai go perfumekïdï tudu.

¹¹ Daiñi, go soi titiigami toma xïxkadï oidakamu gïn saagida. Dai kïï bhaiga aapimï xi soikïdagi ïgai xïïxkadï ipïrhiadagi aapimï. Dïï gia aanï mai xii tïbïpi dakamu kia gïn ïmadï— itïtïdai.

¹² —Idi oki ka ïkiaxdïrï bhai buayi gin tukuga yaasaragai bïïtarï gin toidakai gobai go perfume tudu. Ka miadaimi xïxkadï mukia iñagai kaxkïdï.

¹³ Daiñi, gïn aagidamu aanï ïmo ñoki go okikïdï dai kïïga ïr buaboi gobai. Aanï aagai tudu sai bïïxi oidigi daama xako gï aagadagi go bhai ïrhiaragai ñoki, ami gï aagada agai ixtumaxi in duñi idi oki. Podukai go óídakami bïïxkïrï gïn tïgitoka agai ixtumaxi idui ïgai. Ixtumaxi gïn aagidi aanï kïïga ïr buaboi tudu— itïtïdai Suxi.

Go Udaxi gatïïgida agai go Suxi dudunukamiana

¹⁴ Bhodïrï go kïïrhi Udaxi Iskariote tïgidukami jii dai mïï aataga ïmadï tïtïanïdamigadï go dadaxdadami. Go Udaxi ïr ïmadutai go bhaibuxtama dan goka mamaatïrdamigadï Suxi tudu.

¹⁵ Daidi tïkaka ïgai go tïtïanïdamigadï go dadaxdadami daidi potïtïdai, —¿Xïïxi gin aa namïidana aapimï ix gïn tïïgidagi aanï go Suxi?— itïtïdai. Daidi go tïtïanïdami maa ïmokobhai dan bhaibuxtama plata tuminxi.

¹⁶ Dai aidï abhiadïrï ka gaagaitadai go Udaxi ixdukatai iduñagi dai tïïgidagi go Suxi.

Mamaatïrdamigadï ïmadï uu Suxi go kuadagai go Kïïgakïrï Bubaidaragai bagimi bïïtarï

¹⁷ Dai gokiïrï ka ayi go bagimi ix tuigako go judidiu kuayi pan mai biakami kopodatudakarui go Kïïgakïrï Bubaidaragai bagimi bïïtarï. Dai go tukamidïrï tasai go bagimiïrï sai dada go mamaatïrdamigadï Suxi ami xako dakatadai ïgai. Daidi potïtïdai ïgai, —¿Bakoga ipïrhidi aapi sai gï duiñdana aatïmï go kuadagai go bagimi bïïtarï?— itïtïdai.

¹⁸ Daidi Suxi potïtïdai, —Iimibïrai nobai Jerusalenana dai ami tïïgimu aapimï ïmo kïïrhi, dai bïrai aagida sai aanï ix makïdï ïr go Mamaatïtuldiadami kaxi gïn aagidi sai ka miadaimi ix tuigako gin muatuda iñagai aanï. Aagidabïrai sai ami kiidïrï gaugimu aanï go Kïïgakïrï Bubaidaragai kuadagai aapimï gïn ïmadï, aapimï gin mamaatïrdamiga— itïtïdai.

¹⁹ Dai go mamaatïrdamigadï Suxi ïïgidi dai mïï bhai dui kuadagai kiidïrï ïmo kïïrhi Jerusalenïrï oidakami.

²⁰ Dai aidï urunoko ka mesa buidïrï dakatadai Suxi ïmadï go bhaibuxtama dan goka mamaatïrdamigadï

²¹ dai kaxi gakuayi ïgai daidi Suxi potïtïdai, —Gïn aagidamu aanï ïmo ñoki dai buaboi aagai aanï— itïtïdai. —Ïmadutai aapimï gin mamaatïrdamiga gin tïïgida agai go dudunukami— itïtïdai.

²² Dai kabami soi gïn ïjïrhi go mamaatïrdami daidi bïïxkatai gatïkakai go Suxi, —¿Gïr Nukadakami, aanï xi tudu gï tïïgida iñagai?— ikaititadai ïgai bïïxkatai.

²³ Daidi Suxi potïtïdai, —Gobai ix makïdï badaidi pan idi baaxi asokorhiïrï gin ïmadï ïgai aba dai gin tïïgida agai— itïtïdai.

²⁴ —Aanï ïr Diuxi otosadï ix makïdï ïmo kïïrhi busai tudu dai gï aagai xi podukai gin duiñtuldagi ix dukai ka ojixi ïïki abhiadïrï. Gï aagai ix mukiagi aanï tudu. Dïï gia sogigi gobai ix makïdï gin tïïgida agai. Gïïpi biakamu ïgai soi ïrhiaragai tudu. Kaxkïdï xioma ïr kïïgadukamudai ïgai bïïtarï xi bhaiyoma mai busaimudai ïgai oidigi daama— itïtïdai Suxi.

²⁵ Dai ami dakatadai go Udaxi ix makïdï gatïïgida agai go Suxi. Daidi ikaiti ïgai, —Gin Maatïtuldiadamiga, aanï ix maiti ïr ïgai ix makïdï gatïïgida iñagai ¿aba?— Dai Suxi potïtïdai, —Aapi aba. Ka podukai aagai aapi tudu— itïtïdai.

²⁶ Dai bhodïrï kia gakuadatadai ïgai dai Suxi bhïiyi pan dai aagai ïmo Diuxiatanamїidaragai Diuxi. Dai bhodïrï saasasai ïgai go pan dai maa go mamaatïrdamigadï. Daidi potïtïdai, —Ugabïrai, idi ïr gin tukuga gï dukami— itïtïdai.

²⁷ Dai bhodïrï bhïiyi ïgai ïmo arhi baso biakami bino dai aagai ïmo Diuxiatanamїidaragai Diuxi go binokïdï ïpï. Dai maa ïgai go mamaatïrdamigadï daidi potïtïdai, —Iibïrai aapimï bïïxkatai— itïtïdai.

²⁸ —Idi bino ïr gin ïra gï dukami ix makïdï gï aaxta agai mukukai aanï mui odami bïïtarï. Gin ïrakïdï gï namïatulda agai go ñoki ix makïdï bhai buayi Diuxi odami ïmadï. Gin ïrakïdï oigïrhixikami bii agai mui óídakami soimaaxkamigadï gï aaxtakai gobai tudu— itïtïdai.

²⁹ —Dai xibi abhiadïrï bhaitiakoga ka maiti gayïdamu aanï bino ïpamu asta xïïxkadï ka bhïiyi aanï gin sïïrhikamiga ix makïdï bhïimu aanï xako gatïanïi gin Oga. Aidï gia gayïdamu aanï utudui bino gïn ïmadï— itïtïdai Suxi go mamaatïrdamigadï.

³⁰ Dai bhodïrï ganïyi ïgai ïmo nïidagai bïïxkatai ïmapi dai iji maigobai go gidamu xako Olibo tïgidu.

Piduru podukai aagai sai mai dagito agai go Suxi

³¹ Dai ami gidana maa Suxi aatagi mamaatïrdamigadï. Daidi potïtïdai ïgai, —Aapimï bïïxkatai gin dagito agai xibi tukarï. Kïï maatï aanï, ka podukai ojixikami bii ïkiaxdïrï kaxkïdï. Ami go ojiana ikaiti saidi, Gï muatuda agai go paxturu saidi go kañiñiru aipako bopi agai, ikaiti go ojai— itïtïdai.

³² —Dïï gia gokiïrï iimimu aapimï Galileamu dai aanï kaxi gïn bhaitïki imimu ka duakatukai aanï ïpamu— itïtïdai Suxi.

³³ Daidi Piduru potïtïdai aidï, —Tomaxi go gaa gï dagitoagi aanï gia xadïrï gï dagitona— itïtïdai.

³⁴ Daidi Suxi potïtïdai, —Cho, daiñi Piduru— itïtïdai. —Aanï aagai sai xibi tukarï mai kia kujukai takuku, aapi kaxi baikako po tïi agai sai maiti gin maatï— itïtïdai.

³⁵ Daidi go Piduru kabamioma aagidi daidi potïtïdai, —Cho xadïrï— itïtïdai. —Tomaxi gï ïmadï muu xadïrï ïxtona aanï saidi gï maatï— itïtïdai. Dai go gaa mamaatïrdamigadï pokaititadai ïpï.

Suxi atagai Diuxi ïmadï Getsemaniana

³⁶ Bhodïrï jii Suxi abhiadïrï dai ayi xako Getsemaniana tïgidu. Dai Suxi potïtïdai mamaatïrdamigadï, —Tami abïr gin nïnïraka nai aanï mïï aatagada iñagai Diuxi ïmadï— itïtïdai.

³⁷ Dai ïko baidaja ïgai Piduru ïmadï goka maamaradï go Sebedeo dai ami kabami soi gï ïldatu go Suxi.

³⁸ Dai potïtïdai ïgai go baika kïkïïrhi ix makïdï ïkobai ijitadai ïgai ïmadï, —Karhioga mukiadan taadaga aanï soi ïrhiarakïdï— itïtïdai. —Tami abïr gin nïnïraka kia dai maiti abïr kokosïda— itïtïdai.

³⁹ Bhodïrï ïpï lachi bhaitïki jii ïgai dai ami kupurhi boi ïgai dïbïrapi. Kaxi miadaimitadai go kaduku xi taata agai ïgai ïmo gïïdukami soi ïrhiaragai tudu dai kaxkïdï gadaanïi ïgai Diuxi saidi maigobai dasana. Daidi potïtïdai ïgai Diuxi, —Gin Oga, gin oigïdakai gin maaka oigaragai ix mai soimaaxi taatagi aanï idi soi ïrhiaragai ix oidakagi ïma dukai ix dukatai kïïgakïrï bubiadagi óídakami— itïtïdai. —Dïï aanï aagai sai gin duiñtuldana ixdukatai aapi bhai ïrhidi dai mai xu xi ixdukatai aanï bhai ïrhidi toma xïï soimaaxi taadakagi aanï— itïtïdai.

⁴⁰ Dai bhodïrï jii ïgai xako daraja go gaa ix makïdï ïkobai oiditadai ïgai ïmadï baidi ka kokosotadai ïgai. Daidi potïtïdai Suxi go Ximuñi Piduru, —Ximuñi, ¿Koso pïxi? ¿Maiti pïx ixtui xi nïadagi tomaxi parï ïmo hora?

⁴¹ Maiti abïr kokoxi tudu. Daiñi, go diabora gïn abïnakida ïrhidi mïsai soimaaxi ibuadagi gïpiïrï gïn daituda ïrhiditai ïgai. Daanïdabïrai Diuxi tudu sai mai gïpiïrï surhigiagi aapimï. Tomaxi ipïrhiadagi aapimï ix gupurtudagi gïn iibhïdaga go soimaaxi buidïrï bïïxkïrï mai gupuka aapimï. Dai maiti ixtutuidimu aapimï xi bui gukibagi go soimaaxkami ïïgi. Kaxkïdï abïr daanïda Diuxi— itïtïdai.

⁴² Dai maigo jii Suxi ïpamu dai aataga agai Diuxi ïmadï. Daidi potïtïdai ïgai, —Gin Oga, ix gï agadagi xi soimaaxi taatagi aanï, bhai aagai aanï sai pogïduna ix dukatai aapi bhai ïrhidi— itïtïdai.

⁴³ Daidi ïpamu dibia ïgai xako darajatadai go baika mamaatïrdamigadï dai ka kokosokatadai ïgai ïpamu. Ka mos susurhigïi bupuidï kokoximukatai.

⁴⁴ Dai bhodïrï ïpamu jii Suxi dai aataga Diuxi ïmadï dai ïpamu aagidi sai bhai aagai ïgai saidi gï duna ixdukatai Diuxi bhai ïrhidi xi iduñagi.

⁴⁵ Dai ka dibiakai ïpamu sai potïtïdai ïgai go mamaatïrdamigadï, —¿Kia mïx bïïtï dai kokoso? Nïnïababïrai tudu, aanï ïr Diuxi otosadï ix makïdï ïmo kïïrhi busai dai ka ayi kaduku xi gin tïgitotulda iñagai aanï go soimaaxi ibuadami.

⁴⁶ Bapaigibïrai, timïda. Kaxi bhodïrï imïi ix makïdï gin tïïgida agai tudu— itïtïdai Suxi.

Tami aagai ix dukatai gï bhïitu go Suxi

⁴⁷ Kia ñokaitadai go Suxi taidi ami dibia go Udaxi. Ïgai ïr ïmoko go bhaibuxtama dan goka mamaatïrdamigadï Suxi. Dai jaa mui odami oiditadai go Udaxi ïpï dai bukati mamaaxtai dai uxi. Ojotosadï ïgai go tïtïanïdamigadï go dadaxdadami ïmadï jaa bhaitï gukakamigadï go judidiu.

⁴⁸ Daidi go Udaxi ka ïkiaxdïrï bhai duitadai ñoki ïgai ïmadï ix makïdï oiditadai daidi potïtïdaitadai, —Ix makïdï usudagi aanï kamadïana, ïgai aba ïgai. Bïrai bhïiyi ïgai tudu— itïtïdai.

⁴⁹ Dai mïï aïkai ïgai tai otoma biaturhi ïgai go Suxi, —Bhaiga aapi maatïtuldiadami— itïtïdai. Dai mïï usupi kamadïana.

⁵⁰ Daidi Suxi potïtïdai, —Iduñi tudu ix makïdï iduña agai aapi dai dibia, aapi gin aduñi— itïtïdai. Mïtai oton bhïiyi go Suxi.

⁵¹ Dai ïmadutai ix makïdï ami kïakatadai go Suxi ïmadï busaitu maxtaigadï dai guikuta naakadï ïmoko go ix makïdï bhïitadai go Suxi. Ix makïdï gabhïiyi ïr pioñigadï go bïïxi adaama gatïanïdami dadaxdadami.

⁵² Daidi Suxi ñokidi ïgai ix makïdï busaitutadai maxtaigadï daidi potïtïdai, —Cho. Gï kubiertagana kïïsa gï maxtaiga. Daiñi, xorai maxtaikïdï gamuagi sai aadïrï gï muatuda agai ïgai maxtaikïdï ïpï— itïtïdai.

⁵³ —¿Maita pïx maatï tudu sai kïï bhaiga aanï xi tañiagi soiñi gin Oga baidi ïgai kïïga ixtutuidi xi gin otosdagi mui mirhi tïtïañikarudï saidi buidïrï surhigïna ïgai gin buidïrï bïïtïkamiga?

⁵⁴ Dïï gia xi gataañiagi aanï soiñi gin Oga podukai aidï gia ka maiti po gï duñimudai ix makïdï ojixi Diuxi ñokidïrï. Ami ojixi ixtumaxi gï agai sai taatagi aanï tudu. Dai gï agai sai bïïxi pogïduñagi gobai— itïtïdai.

⁵⁵ Dai bhodïrï ñokidi Suxi go mui odami ix makïdï ami dadatadai bhïiya agaitai. Daidi potïtïdai ïgai, —¿Ix tuixi bhïï ajiopai aapimï mamaaxtai dai uxi?— itïtïdai. —¿Ïmo ïxibugami xi aanï tudu xi kaxkïdï podukai gin bhïiyi aapimï? Daiñi, bïïx tasai gïn ïmadï dakana aanï amïka go gïï kiupaigadïrï judidiu dai ami gamaamakaiña aanï ñoki. Kïï bhaigakatadai aapimï xi ami gin bhïiyagi.

⁵⁶ Dïï gia gï aagai sai gin duiñtuldagi bïïxi ix dukatai oja go ñiñokituldiadamigadï Diuxi ïïki, kaxkïdï gï agaitadai xi ïmo ïïxibogami dukai gin nïijada aapimï— itïtïdai Suxi. Mos potïi Suxi taidi bïïxi dïgabuna boopoi mamaatïrdamigadï dai ïïgi bia ïgai go Suxi.

Gï baan kïsatu go Suxi dunukami buidïrï

⁵⁷ Dai ix makïdï bhïiyi go Suxi baidaja kiidïrï Kaifas. Ïgai bïïxi adaama ïr tïanïdamigadïkatadai go dadaxdadami aidï. Ami kaxi gïn ïmpagitadai go tïtïïgiadami sïïrhikami ïmadï jaa bhaitï gukakamigadï go judidiu.

⁵⁸ Gamo baidaja ïgai go Suxi tudu dai go Piduru mïkaxdïrï oiditadai asta tuixikigadïana go Kaifas kiidïrï ukami. Ami ukami ayi ïgai dai ami daiba ïgai go sandadaru ïmadï go tuixikana dai nïida agai ix iduña agai Suxi.

⁵⁹ Go tïtïanïdamigadï go dadaxdadami ïmadï bïïxi go gaa dudunukami gïn ïmpagi dai tïañia ïrhiditadai muaragai Suxi dai gaagaitadai xorai yaatagikïdï gïpiïrï daitudagi Suxi

⁶⁰ dïï mai tïtïgaiña. Muidutai gïpiïrï bupaitadai yaatagikïdï dïï modukai mai tïï go dudunukami ixtukïdï tïañiagi muaragai go Suxi. Dïï gia gokiïrï ami gukiba goka kïkïïrhi dai yaatagïi ïpï.

⁶¹ Daidi ikaiti ïgai, —Aatïmï kaï baidi kaiti go Suxi sai daituda agai go gïï kiupai Jerusalenïrï dai sai baika tasaikïdï ïpamu kïïsa agai— ikaiti go yaatabogami.

⁶² Dai go tïanïdamigadï go dadaxdadami kaï ix kaiti go yaatabogami saidi kïïka ïgai dai potïtïdai ïgai Suxi, —¿Maiti pïx aa noraida agai gobai ix makïdï gïpiïrï gï bupaimi?— itïtïdai.

⁶³ Dai go Suxi mos dodorhi bii dai mai taadatu. Daidi go tïanïdamigadï go dadaxdadami potïtïdai aidï, —Aapi Suxi, Diuxi ïgai dai bïïxi adaama ïr xadutudikïdï. Bïïxkïrï oidaga ïgai ïïki abhiadïrï tudu dai tomarhi ïmo imidagai mai muki agai. Ïgai ïr nïijadami ix tumaxi gin aagidagi aapi xibi tudu. Dai gï tïanïi aanï xibi pïsaidi aagana aapi tami gïr nïiditai Diuxi ix bhai aapi ïr go ix makïdï Kristo aagaiña odami, sa bhai aapi ïr Diuxi otosadï bhaitï kïakami ix makïdï kïïgakïrï busaida agai go Oidakami. Gïr aagidañi ix bhai aapi ïr Diuxi Maradï tudu— itïtïdai.

⁶⁴ Dai Suxi potïtïdai, —Ïjï, kïï aagai aapi. Aanï ïr Diuxi otosadï ix makïdï ïmo kïïrhi busai— itïtïdai. —Dai ayimu ixtuigako saidi gin nïijadamu aapimï sai sïïrhixapadïrï daibamu aanï Diuxi. Ïgai bïïxi adama ïr Tïanïdami tudu, dai ïgai gin maakimu sïïrhikami xi ami daibamu aanï. Dai gin nïijadamu aapimï ïpï xïïxkadï tïbagiañdïrï dibiagi aanï iikomai saagida— itïtïdai.

⁶⁵ Daidi go tïanïdamigadï go dadaxdadami ïïgi sasarai yukuxidï bhamukatai kaïkai ïgai ix kaiti Suxi. Daidi ikaiti ïgai, —¿Duna aatïmï bamioma ñoki buidïrï go Suxi? Ka aagai gobai saidi ïr ïpïan namïakami gobai ïmadï Diuxi. Ïmo gïï parunaragai gobai buidïrï Diuxi tudu. Dai bïïxkatai aapimï kaï.

⁶⁶ ¿Dukatai nïidi aapimï? ¿Ix tuma gïgïbidaragai ajïga gobai?— itïtïdai ïgai go gaa dudunukami. Daidi go gaa bïïxkatai potïtïdai, —Ka gïpiïrï gïi gobai di. Dai ajïga gobai sai gatïañiagi aapi muaragai— itïtïdai.

⁶⁷ Daidi gaxixibidimi ïgai buibasodïrï go Suxi dai kapixaimi. Dai jaa gïbaimi

⁶⁸ daidi potïtïdai, —Gïr aagidañi gï soikïitai Diuxi sa xorai gïïgï xi buaboikïdï ïr Diuxi otosadï gabhaitïkïakami aapi— itïtïdai.

Go Piduru podukai aagai sai mai maatï Suxi

⁶⁹ Daidi Piduru maigo tuixikiana dajatadai dai ami dibia ïmo kuxnirugadï go tïanïdamigadï go dadaxdadami. Dai tïï ïgai go Piduru daidi potïtïdai, —Aapi ïpï ïmadï aimïraiña ïrhi aanï go Suxi ix makïdï ïr Galileañdïrï oidakami— itïtïdai.

⁷⁰ —Cho— itïtïdai Piduru. —Aanï mai maatï go kïïrhi dai mai maatï aanï tuixi pokaiti aapi— itïtïdai.

⁷¹ Dai maigobioma kidigamadïrï kïkiba ïgai kuuparagai abhana. Daidi ïmai kuxñirui tïï go Piduru daidi potïtïdai ïgai go ix makïdï ami gukatadai, —Gobai ïmadï aimïraiña ïrhi aanï go Nasaretañdïrï oidakami. Ïmadï aimïraiña gobai go Suxi tudu— itïtïdai.

⁷² Daidi go Piduru potïtïdai, —Kïïga maatï Diuxi sai mai maatï aanï go kïïrhi ix makïdï aagai aapi— itïtïdai.

⁷³ Dai bhodïrï laachkïdï ïmai ix makïdï ami dakatadai miadïrï kïkiba ïpï xako dakatadai go Piduru. Daidi potïtïdai ïgai, —Aapi ïr ïmoko go mamaatïrdamigadï Suxi ïrhi aanï— itïtïdai. —Kïïga maatiga maaxi gobai. Galileañdïrï oidakami maaxi ñokai aapi— itïtïdai.

⁷⁴ Daidi go Piduru galnaaxi ñoki aagidi daidi potïtïdai, —Maita an maatï aanï go kïïrhi ix makïdï aagai aapimï— itïtïdai. —Ix yaatagïi aanï aidï gia sai Diuxi gin abhana daitudana ïmo gïïdukami gïgïbituldaragai— itïtïdai. Mos potïi ïgai baidi kujui go takuku.

⁷⁵ Dai amaxi gï tïgito go Piduru saidi Suxi ïkiaxdïrï potïtïdaitadai, —Aapi Piduru, mai kia kujukai takuku aapi baikojo potïimu sai maiti gin maatï aapi— itïtïdaitadai Suxi ïkiaxdïrï. Dai Piduru gï tïgitokatadai gobai dai jii abhiadïrï dai kabami suakaitadai soigamukai.