Mataibo 24 - Northern Tepehuan Bible

Suxi aagidi mamaatïrdamigadï ix tuma daibuña agai xïïxkadï karhioga dibiagai ïgai ïpamu

¹ Dai bhodïrï busai Suxi go gïï kiupiañdïrï Jerusalenïrï xako gamamaakaitadai ïgai aatagi dai ka imi agaitadai. Baidi go mamaatïrdamigadï agaitadai xïï xigiamaaxi go gïï kiupai ïmadï go gaa kiiki ix makïdï sonoana guka.

² Daidi Suxi potïtïdai, —Gïn tïgito abïr nïida go gïï kiupai ïmadï go kiiki ix makïdï ami guka, gï agai sai maatïka aapimï sai ayimu ixtuigako bïïxi gï naato daituda agai gobai. Amaxi mai bii agai tomarhi ïmo odai dama ïmai ami tudu— itïtïdai.

³ Dai gokiïrï go gidi Olibo tïgidukïdïana dakatadai Suxi daidi mamaatïrdamigadï ïkobai aatagai ïgai ïmadï daidi potïtïdai, —Gïr aagidañi xïxkadï po gï duña agai gobai go gïï kiupaikïdï ix makïdï gïr aagidi aapi— itïtïdai. —¿Dukatai maatïkamu aatïmï xïïxkadï karhioga ïpamu dibiagai aapi tudu dai xïïxkadï karhioga ugiti agadagi oidigi?— itïtïdai.

^4-5 Dai Suxi potïtïdai, —Gïn aagidamu aanï ixdukatai maatïkamu aapimï— itïtïdai. —Daiñi, aidï mui dadimu odami aanï in aagaitai. Pokaitadamu sai ïgai ïr go otosadï Diuxi ix makïdï nïnïraka go judidiu tudu ipïrhiditai sai buaboitudaiña go odami dai podukai bupuirumada agai ïgai mui óídakami. Dïï gia gï agai sai gïn nukadakagi aapimï tadu gïn bupuirumadagi ïgai aapimï ïpï.

⁶ Naana maaxi pogïduña agai kia mai kia ugitïkai oidigi— itïtïdai. —Kaxkïdï maiti abïr duduadikuda kajiomakatai sai ka iimïi kokodi no xibhïkai xiïpï xi gïn kokodadan kaitadagi óídakami. Gï agadamu xi podukai daibuñagi bïïxi gobai dïï maiti abïr duduadikuda. Mai kia ugitimu oidigi podukai daibunukai.

⁷ Naana maaxi nïijadamu aapimï kia tudu. Ïma maa ñokadami bui surhigi agai jaa ix makïdï ïmamaaxi ñokai dai podukai ïpï mui gïgïr tïtïanïdamigadï go aipakoga óídakami gïn bupui surhigi agai ïpï. Muiyapïrï gigiburhi agai oidigi dai kabami oidakami bhiugigai aipakoga.

⁸ Dai gokïdï utudama ajida agai go soi ïrhiaragai dai kia oidaka agai gïdukamioma soi ïrhiaragai ïpïan dukai xïïxkadï kokokagi oki karhioga buapa agaitai ïmo arhi xïïñi— itïtïdai.

⁹ —Daiñi, bïïxi go naana maaxi ñokadami ix makïdï oidaga oidigi daama gïn kïïdada agai gin aaduñikatai aapimï. Dudunukamiïrï baan gïn tutusadamu ïgai xi go dudunukami soi gïn buidadamu dai gïn kodamu.

¹⁰ Amaxi mui óídakami ka maiti ipïldamu xi gin buaboitudagi. Kïïdada agai ïgai asta ïïgi aaduñdï ix makïdï gin buaboitudadagi dai tïïgi agai dudunukamiïrï.

¹¹ Dai oidaka agai mui yaatabogami aidï ix makïdï ñokituldiadamigadï Diuxi gïn aagadamu dai podukai bupuirumada agai ïgai mui óídakami— itïtïdai.

¹² —Bïïx tasai bamioma gïïradamu go buirudagai soimaaxi ibuadatai óídakami aidï oidigi daama. Xi kaxkïdï mui óídakami ka mai oigïdada go jaa.

¹³ Dïï gia ix makïdï mïï kugatïrï ukami mo ïxi gin buaboitudagi, ïgai gia kïïgakïrï bubuaki agai—.

¹⁴ Dai aanï aagai sai mai kia ugitïkai oidigi sai bïïxi oidigi daama gï aitulda agai go bhai ïrhiaragai aatagi. Bïïxi oidigi daama gï aituldamu go aatagi aagaitai ixdukatai biakana oigaragai go óídakami sai tïanïna Diuxi tudu. Po gï duñimu gobai dai aidï gia kaxi ugiti agai oidigi— itïtïdai.

Suxi pokaiti sai mai kia ugitïkai oidigi sai dibiagai ïmoko ix makïdï xia duada agai xadutudaragai go gïï kiupiana Jerusalenïrï

¹⁵ —Xibi gïn aagidamu aanï ïmo ñoki dai gï agai sai kïïga gïn tïgito kaïkagi— itïtïdai Suxi. —Daiñi, go ñokituldiadamigadï Diuxi Daniel tïgidukami ix makïdï oidakatadai ïïki podukai oja sai dibiamu ïmo kïïrhi ix makïdï go Gïï Soimaaxi Ibuadami Omarhigami tïgidu. Dai kïkiba agai ïgai xako maiti gï agai xi kïakagi ïgai go gïï kiupiana dai go xadutudikïdï tukabiïrï. Kïïga abïr gïn tïgito xako gobai tudu. Dai xudu nïijada aapimï gobai,

¹⁶ Aidï gia go odami ix makïdï tami Judeïrï darakagi gï agadamu ix dïgabuna bopiagi abhiadïrï dai tutubidakiana iimiagi sai mai bhïna go Gïï Omarhigami ïgai.

¹⁷ Dai aidïpïrï xi baaki daama darakagi odami, gï agadamu xi otoma bopia ïgai mai bubaidakai buxtuidadï tukabiañdïrï.

¹⁸ Dai xi nobai dïjoana aimïradagi ïmoko maiti gï agadamu xi imiagi ïgai kiidïrï dai bhïiyagi yukuxi.

¹⁹ Xïïxi soimaaxi taadakamu oki ix makïdï nonoakagi amaxi xiïpï ix makïdï biakagi xiixïdami, tomax dukai biakamu ïgai xi bopiagi tudu— itïtïdai.

²⁰ —Daanïdabïrai Diuxi tudu sai mai toomoko aiyagi go gïï soi ïrhiaragai gobai sai mai biakagi aapimï xi dagitoagi gïn kiiki xïïxkadï kabami ïpidikagi oidigi. Dai daanïdabïrai ïpï sai mai aiyagi gobai ïmo ibhïxtaragai tasïrï ïpï. Daidarxi xi mïkaxi ajiopadagi aapimï ibhïxtaragai tasïrï kaxkïdï.

²¹ Daiñi, mai pokaxi soi taadakana odami aidï abhiadïrï ix kïi Diuxi go oidigi. Dai tomarhi ïmo imidagai mai po ïxi soi taatakamu óídakami ïpamu gokiïrï.

²² Xi dagitomudai Diuxi ix apia imïdagi go soi ïrhiaragai gobai, aidï gia bïïxi koimudai oidigi daama óídakami. Dïï gia Diuxi kïï oigïdai aaduñdï ix makïdï ïkobai bubaitu ïgai. Kaxkïdï ka podukai dáí ïgai sai otoma kugaidamu go soi ïrhiaragai gobai— itïtïdai Suxi.

²³ Dai bhodïrï oi Suxi go aatagi dai aagai ïgai go yaatabogami ix makïdï dadi agai mai kia ugitïkai oidigi. Daidi potïtïdai ïgai go odami, —Aidïxi karhioga ugiti agadagi oidigi mui odami gïn yaatagïdamu. Po gïn tïdamu ïgai sai no xibhïkai gïn tïïgida agai ïmoko ix makïdï ïr go otosadï Diuxi ix makïdï nïnïraka go judidiu. Dïï maiti abïr buaboituda ïgai— itïtïdai.

²⁴ —Dai dadimu jaa ïpï daidi potïimu saidi ïgai ïr go otosadï Diuxi ix makïdï nïnïraka go judidiu dai jaa potïimu ïpï saidi ïr ñokituldiadamigadï Diuxi. Naana maaxi buirumadaragai iduñimu ïgai ix makïdï odami ïïgi maiti ixtutuidiña xi ibuadagi dai podukai maaxituda agai xïï gupuka ïgai. Podukai bupuirumada agai ïgai mui odami. Dai asta ix makïdï Diuxi ka ïko bubaitu katoma buaboituda agai ïpï— itïtïdai.

²⁵ —Kïïga abïr gïn nukadaka tudu— itïtïdai. —Daiñi, kaxi an ïkiaxdïrï gïn aagidi ix dukatai pogïduña agai xudu kaxi ugiti agadagi oidigi.

²⁶ Imimu aanï tabhiadïrï oidigi daamaiñdïrï tudu. Dai kaxkïdï ix po gin tïdagi jaa saidi gin tïï maiti abïr buaboitudada. Ix pokaitadagi jaa sai mïïka gïn tïïgida agai no xibhïkai oidigana xako daja aanï, maiti abïr oijada. Dai ix po gïn tïdagi ïgai sai ïxto daja aanï no xibhïkai tukabi, abïr mai buaboitudada ïpï.

²⁷ Maiti ïr buaboi tudu sai ïxtotai dukai dibiamu aanï tudu. Amaxi kïïga gin nïijada agai bïïxi odami. Ix maaxi xïïxkadï bïpïdokïdagi oidigi dai bïïxi aipakoga maaxkana pomaaxkamu xïxkadï dibiagi aanï ïpï aanï ix makïdï ïr Diuxi otosadï dai ïmo kïïrhi busai tudu. Bïïxi óídakami nïidamu tudu dibiakai aanï— itïtïdai.

²⁸ —Xibi gïn aagidamu aanï ïmo maaxidaragai sai maatïkana aapimï xïï kïïga maaxkamu xïïxkadï dibiagi aanï. Gobai ïr ïpïan dukamika agai xïïxkadï mui nïnïdagi nunui no xibhïkai oidigana. Kïïga maatiga maaxkana bïïxi óídakami bïïtarï sai ami kaatï ixtumaxi mukiadï ¿aba? Dai podukai ïpï xïïxkadï dibiagi aanï kïïga maatiga maaxkamu bïïxi óídakami bïïtarï ïpï. Mai ïxtotai dukai dibiamu aanï tudu— itïtïdai.

²⁹ Dai oi Suxi aatagidï daidi potïtïdai ïgai go mamaatïrdamigadï, —Ayimu ixtuigako kabami soimaaxi taatamada agai óídakami karhioga ugiti agaitai oidigi. Dai ka daibunukai go kabami soimaaxi taataragai saidi aidï otoma gï tukamutu agai go tasai ïmadï go masadai dai surhigimu go xixabugai tïbagiañdïrï. Aidïpïrï gigiburhi agai bïïxi ixtumaxi oidaga tïbagiïrï tudu— itïtïdai.

³⁰ —Dai aidï gia tïbagiana gï maaxitudamu go maaxidaragai ixtukïdï maatïkamu bïïxi óídakami saika dibia iñagai aanï. Aanï ix makïdï ïr Diuxi otosadï dai ïmo kïïrhi busai tudu. Dai aidïpïrï kabami soi gïn ïjïldamu bïïxi go naana maaxi ñokadami oidigi daama maatïkatai sai ajïga ïgai ix taatagi gïgïbidaragai. Duduadikuda agai ïgai tudu nïiditai sai ka aijimi aanï. Ikomai ïmadï dibiamu aanï tudu dai maaxitudamu xïï gubuka aanï dai xïï kabami totoarïi aanï ïpï. Kaxkïdï duduadikuda agai ïgai.

³¹ Dai amaxi gï kaidatumu ïmo trompeta ix makïdï kabami ibada agai dai aidï otosamu aanï gin tïtïañikaruga bai ïgai ïmpaida agai bïïxi go odami ix makïdï ïkobai bubaitu Diuxi. Ïmpaida agai ix makïdï ïkobai bubaitu ïgai bïïxi oidigi daamaiñdïrï tudu— itïtïdai Suxi.

Tami aagai go igoxi dïïdï aatagi

³² Bhodïrï Suxi potïtïdai go mamaatïrdamigadï, —Xibi gïn aagidamu aanï ïmo maaxidaragai ñoki aagaitai ïmo igoxi dïïdï. Daidi potïtïdai, Daiñi, xïïxkadï ka ipoñikagi aagadï go igoxi dïïdï kaxi gï maatï sai miadaimi tïdako.

³³ Podukai ïpï xïïxkadï nïijadagi aapimï ix ka po gï buimi bïïxi ix makïdï gïn aagidi aanï aidï gia ka maatïkamu aapimï ix karhioga dibia iñagai aanï tïbagiañdïrï dai go oidigi ka ugiti agai.

³⁴ Dai aanï aagai sai odami xibi óídakami mai kia ugiti agai xïïxkadï ka bïïxi po gï duña agai ixtumaxi gïn aagidi aanï. Gobai kïïga ïr buaboi— itïtïdai.

³⁵ —Bïïxi ugitimu go tïbagi ïmadï oidigi dïï gia aanï gin ñoki gia bïïxkïrï ïr buaboikagi agai. Gobai gia mai ugiti agai— itïtïdai.

³⁶ —Daiñi— itïtïdai. —Mai tipu xorai maatïkagi xuduku dibia iñagai aanï, tomarhi ix tuma tasïrï. Diuxi tïtïañikarudï tïbagiïrï óídakami mai maatï tomarhi aanï ix makïdï ïr Diuxi Maradï mai maatï ïpï. Mosïkaxi gin Oga ïgai dai kïïga maatï.

³⁷ Dïï gia aanï aagai sai xïïxkadï ka ïpamu dibia in agadagi aanï tami oidigi daama sai óídakami ïpïan ibuadamu aidïxi oidakatadai go Noékaru. Po tudu ikaiti aanï ix makïdï ïr otosadï Diuxi dai ïmo kïïrhi busai.

^38-39 Daiñi, aidïxi oidakatadai go Noékaru aidï mai buamï ïrhidiña go óídakami ix dibiagai gïgïbidaragai dai mos sai gakuadana ix dukai ibuadana ïgai bïïx tasai dai gaïmadï bipiïdana dai gamamaakaiña maamaradï oki sai gaïmadï bipiïdana ïgai ïpï. Mai buamï ïrhidiña ïgai tudu asta xïxkadï baa go Noé barko ïrana dai sudaïrï dupi go oidi dai ka bïïxi koi go óídakami. Podukai ïpï mai buamï ïrhiditai óídakamu go óídakami xïïxkadï dibiagi aanï ïpamu, aanï ix makïdï ïr otosadï Diuxi dai ïmo kïïrhi busai tudu— itïtïdai.

⁴⁰ —Dai xïxkadï dibiagi aanï ïpamu gïn baidakatu agai ïïmo maaxi odami dai ïïmoko bimu. Aidïpïrï dïjoana gaatabuadamu goka kïkïïrhi dai ïmoko gï baidakatu agai dai go gïmai amaxi bimu.

⁴¹ Dai goka oki gatuadamu no xibhïkai ïpï dai gï baidakatu agai ïmoko dai go gïmai amaxi bimu ïpï. Pomaaxkamu xïïxkadï dibiagi aanï— itïtïdai Suxi.

⁴² Daidi Suxi potïtïdai ïpï, —Gï agai xi kïïga nïnïasïrhigan dukai nïnïrakagi aapimï xïïxkadï aiyagi aanï.

⁴³ Daiñi, ïmo oidakami xadïrï kosokana ix maatïkagi ïgai sai ami kiidïrï ayi agai ïmo ïxibugami. Nïnïasïrhigan dukai dakana ïgai bhaiyoma dai mai daadagitoiña ïgai go ïxibugami xi bakiagi sai mai popoidana ïgai buxtuidadï.

⁴⁴ Podukai tudu gï agai xi gin nïnïrakagi aapimï ïpï aanï ix makïdï ïr otosadï Diuxi dai ïmo kïïrhi busai. Podukai abïr gin nïnïraka mai maatïkatai xuduku ayimu aanï— itïtïdai.

⁴⁵ —Daiñi— itïtïdai. —Ïmo ga amu ix makïdï muidukagi pipioñigadï xïxkadï xibhï imi agadagi gaagaiña ïmo pioñigadï ix makïdï kïïga ïïgidaragakagi dai ix makïdï kïïga tïtïitorïi. Dai tïïgakai ïgai ïmoko pomaaxkami nukaturhiña ïgai go gaa pipioñi sai nukadakana ïgai dai bhibhidiña xïïxkadï gï agadagi— itïtïdai.

⁴⁶ —Dai xi go pioñi kïïga nukadakagi go gaa pipioñi amudï bïïtarï aidï gia bhïimu ïgai ïmo bhai ïrhiaragai dibiakai go amudï.

⁴⁷ Aidï gia amudï maakimu sïïrhikami sai tïanïdagi ïgai bïïxi xïïxi bia ïgai— itïtïdai.

^48-49 —Dïï gia go pioñi ix makïdï nukadakami bii ami kiiyïrï kïï bhaiga xi galtuigakagi ïpï. Xi pomaaxkagi ïgai aidï gia gïgïbi antaada ïgai go gaa pipioñi ïmadï kuxñiñirui po gï ïrhiditai ïgai sai mai otoma dibiagai amudï. Ix mai buamï gï ïrhiadagi ïgai ix dibiagi amudï dai mos gakuadagi dai gayïdagi ïmadï jaa nabaakoidadï,

⁵⁰ aidï gia dibiamu amudï xïxkadï go soimaaxi pioñi mai tïgito nïijadagi mai nïnïrakatai ïgai.

⁵¹ Dibiamu ïgai dai kabami gïikarsamu ïgai dai maigobai otosamu xako darakana ix makïdï ïïgiadami dukai gïn dadasai dai mai ïïgidaraga. Ami susuanïda agai bïïxkatai kabami soimaaxi taatamaitai maigobai ïkobai darakatai. Asta kïrïndamu ïgai taatamudï tudu mos ïï kabami soimaaxi taatamaitai ami tudu— itïtïdai Suxi go odami.