Mataibo 23 - Northern Tepehuan Bible

Suxi aagai ïmo ñoki aagaitai ix tutuiga go bhaitï gukakamigadï go judidiu

¹ Dai bhodïrï maa Suxi ñoki mamaatïrdamigadï ïmadï jaa mui odami ix makïdï ami darakatadai ïpï.

² Daidi potïtïdai ïgai, —Go tïtïïgiadami sïïrhikami ïmadï go fariseos bia sïïrhikami xi gïn soikïdagi sai maatï kaïkagi aapimï go sïïrhikamigadï Moises.

³ Dïï gia tomarhi ïïgi ïgai mai ïïgidi go ñoki ix makïdï gatïtïïgidi ïgai. Kaxkïdï abïr ïïgiada ixtumaxi gïn aagidagi ïgai xïïxkadï gïn tïtïïgiadagi ïgai go sïïrhikami dïï gia maiti abïr ibuada ixtumaxi ïgai ibuayi.

⁴ Go tïtïïgiadami sïïrhikami ïmadï go fariseos pokaitiña sai bia óídakami xi ïïgiadagi naana maaxi sïïrhikami tudu dai bïïtï gobai. Ïpïan dukami gobai ïmo kusubi kabami bïïtïkami. Dai gatïanïiña saidi kusukana óídakami go kusubi dïï gia mos gatïanïi ïgai dai mai soiña kusukai ïgai toma lachi. Mai soikïi ïgai óídakami sai ïïgiada ïgai go naana maaxi sïïrhikami ix makïdï gatïtïïgidi ïgai. Ïïgi ïgai mai ïïgidi ixtumaxi tïanïiña ïgai jaa tudu— itïtïdai Suxi.

⁵ —Gïn aagidamu aanï ix tutuiga go tïtïïgiadami sïïrhikami ïmadï go fariseos tudu— itïtïdai. —Daiñi, ïgai ojai Diuxi ñokidï aarhi papeperhiïrï dai bhodïrï aarhi kaja ïrana darasai dai kobadïrï dai ïïkadïrï bupurai go aarhi kaja. Podukai gïn biturhi ïgai kaxkïdï. Dïï gia ojoidi ïgai xi bamioma gïrhidagi go aarhi kaja ix makïdï gïn bupurai ïgai saidi odami gïn tïgito nïidiña dai sai pokaitiña odami sai ïgai gia kïïga xadutudai Diuxi. Ojoidi ïgai ïpï sai gïn aadadagi yukuxi ix makïdï ugidïrï kïïga tïïtïbïdu naanakadï ix dukai gïn aadai odami ïmo xadutudaragai dukai Diuxi bïïtarï tudu. Dïï gia go tïtïïgiadami sïïrhikami ïmadï go fariseos pobuayi ipïrhiditai sai gïn tïgito nïidiña odami dai kïï ñokaiña ïgai bïïtarï bhaiyoma.

⁶ Ipïrhidi ïgai sai óídakami kïïga xadutuadagi ïgai tudu. Dai kaxkïdï xïïxkadï pogïbuadagi ïmo kuadagai óídakami bïïtarï go fariseos bïïxkïrï ipïrhidiña xi kïkïïgadukïdioma daraikaruana daraibagi. Dai pobuayi ïgai ïpï xïïxkadï go judidiu kiupaigadïana darakagi ïgai.

⁷ Ipïrhidi ïgai sai óídakami kïïga xadutudaitai biatuldagi xïïxkadï tïïgiagi kayana dai ipïrhidi ïpï sai ïmo gïï namïakami maatïtuldiadami aagaiña odami— itïtïdai Suxi.

⁸ —Dïï aapimï gia maiti gï agai xi dagitoagi xi ïmo gïï namïakami mamaatïtuldiadami gïn aagadagi óídakami— itïtïdai. —Ïmo xixïgïmï aapimï tudu dai mosïkaxi aanï ïr gïn maatïtuldiadamiga, aanï ix makïdï ïr go Kristo tudu.

⁹ Dai maiti abïr gïï gïn oga xadutudikami dukai nïijada aapimï tomarhi ïmo maatïtuldiadami tami oidigi daama ïpï. Mosïkaxi Diuxi ix makïdï tïbagiana daja ïr go adaama xadutudikami gïn Oga kaxkïdï.

¹⁰ Dai mosïkaxi aanï Kristo ïr go gabhaitïkïakami adaama xadutudikami ïpï. Kaxkïdï maiti gï agai sai ipïrhiada aapimï xi bhaitï kïakami xadutudikami gïn aagadagi óídakami aapimï ïpï.

¹¹ Dai bhaiyoma aapimï gïn saagida ïgai ix makïdï soikïdagi jaa ïmo pioñi dukai ïr ïgaikamu ix makïdï Diuxi bamioma namïakami dukai nïijadamu.

¹² Diuxi dumaltuda agai xorai ïmo gïdukami gï ïrhiadagi ïïgi tudu dïï gia xorai mai gïdukïdï gï ïrhiadagi ïgai gia ïmo gïdukami aagadamu Diuxi— itïtïdai Suxi go odami.

¹³ Dai bhodïrï maa ñoki Suxi go fariseos ïmadï go tïtïïgiadami sïïrhikami. Daidi potïtïdai ïgai, —Agia soimaaxi taatama agai aapimï fariseos dai tïtïïgiadami sïïrhikami. Kïï tutiakami dukai gïn dadasai aapimï dai mai kïï tutuiga— itïtïdai. —Ga tïtïïgidi aapimï aatagi ix makïdï maiti ïr buaboi tudu dai podukai sobhikïdan buayi aapimï óídakami ix biakagi oigaragai xi tïanïdagi Diuxi. Ïpïan dukami gobai xi kuupandagi aapimï kuuparagai sai mai bapakïdagi óídakami xako gatïanïi Diuxi. Mai bapakïi aapimï dai mai daadagitoi aapimï jaa xi bapakïdagi ïpï tudu.

¹⁴ Asta bupuirumadai aapimï bipiudu dai ïïxidiña aapimï buxtuidadï dai kiikidї. Pobuayi aapimï dai bhodïrï tïbïpi gamamaadai aapimï odami buitapi saidi gïn kaïkana óídakami. Kïïga xadutuadami Diuxi dukai gïn dadasai aapimï tudu dïï mai buaboikïdï xadutudai aapimï— itïtïdai.

¹⁵ —Agia soimaaxi taata agai aapimï tïtïïgiadami sïïrhikami ïmadï fariseos— itïtïdai. —Aipakoga ajiopai aapimï gatïtïïgiditai ñoki go óídakami ipïrhiditai aapimï saidi gïn ïpïan dukai buaboitudana ïgai. Ajiopai aapimï asta baasadïrï go gïï sudagi xako mïkaxioma kaatï oidigi dai ami gatïtïïgidi aapimï gïn aatagi ix makïdï maiti ïr buaboi. Pobuadana aapimï tomaxi mosïkaxi ïmo oidakami ami bhïiyagi gïn ñoki tudu. Dai go odami ix makïdï gïn buaboitudagi ajïga xi taatagi gïgïbidaragai go gïï taiyïrï. Kabami soimaaxi ibuadami bipiïyi ïgai tudu ïïgiditai gïn ñoki dai kaxkïdï ajïga ïgai gïgïbidaragai kabami ïpï dai gobai ïr aapimï gïn duñi— itïtïdai.

¹⁶ —Aapimï tïtïïgiadami sïïrhikami ïmadï fariseos kabami soimaaxi taata agai tudu— itïtïdai. —Daiñi, pupuiruga aapimï mai maatïkatai ixtumaxi ïr buaboi. Mai nïadami dukai aapimï dai bïïxkïrï gatïïgida ïrhidi aapimï boiyi jaa. Buirudagai gobai tudu. Pokaitiña aapimï sai xïxkadï ïmo odami aagadagi saidi iduña agai ixtumaxi dai gokiïrï maiti ibuadagi, pokaitiña aapimï sai maiti ïr soimaaxi gobai. Pokaitiña aapimï sai mai xudu gobai tomaxi gï bapasadagi ïgai aagaitai sai go gïï kiupai Jerusalenïrï ïr nïijadami saidi iduña agai. Dïï gia pokaiti aapimï saidi xi gï bapasadagi ïgai potïkai sai go oro ix makïdï ami kiupiïrï daja ïr nïijadami sai aidï gia bia ïgai xi iduñagi ixtumaxi agaitadai ïgai.

¹⁷ Agia pupuiruga aapimï. Mai nïadami dukai aapimï tudu mai maatïkatai toma lachi ixtumaxi ïr buaboi. Daiñi, ¿tumaxi ïgai dai bamioma namïga, go oro kiupiana xi go kiupai ix xako ïko bipiïyi go oro Diuxi bïïtarï?— itïtïdai.

¹⁸ —Pokaitiña aapimï tïtïïgiadami sïïrhikami ïmadï fariseos sai ix gï bapasadagi ïmoko saidi iduña agai ixtumaxi dai aagadagi sai go daxdakarui ami kiupiana ïr nïijadami saidi iduña agai aapimï, pokaiti aapimï sai maiti ïr soimaaxi gobai tomaxi maiti ibuadagi ïgai ixtumaxi agaitadai ïgai dai gï báí. Dïï gia ix aagadagi ïmoko go daxdaragai ix makïdï ami go daxdakarui dama daja sai aidï gia bia ïgai xi iduñagi ixtumaxi agaitadai ïgai dai gï báí. Po tudu ikaitiña aapimï— itïtïdai.

¹⁹ —Aapimï tïtïïgiadami sïïrhikami dai fariseos mai maatï ixtumaxi ïr buaboi tudu. Daiñi, ¿Mai ix ïr go daxdakarui dai namïaturhi go daxdaragai? Ami go daxdakarui dama ka ïko bipiïyi go daxdaragai Diuxi bïïtarï tudu. Kaxkïdï kïïga gï maatï tudu sai bamioma namïga go daxdakarui xi bhai go daxdaragai ix makïdï daama dakagi.

²⁰ Dai kaxkïdï ïpï xi ïmo odami gï bapasadagi aagaitai sai go daxdakarui ïr nïijadami ka aagadankaiti ïgai bïïxi ixtumaxi ami go daxdakarui dama daja ïpï dai bia xi iduñagi ixtumaxi agaitadai ïgai.

²¹ Dai xi aagadagi ïgai go gïï kiupai gokïdï ka aagadankaiti ïgai Diuxi ïpï. Diuxi kiidï go gïï kiupai tudu dai kaxkïdï xorai gï bapasadagi aagaitai gobai bia xi iduñagi ixtumaxi aagadagi ïgai.

²² Dai xi aagadagi ïgai sai go tïbagi ïr nïijadami saidi iduña agai ixtumaxi ka aagadankaiti ïgai go daikarui xako dakana Diuxi gatïanïitai ïgai dai ka aagadankaiti ïgai Diuxi ïpï. Ami tïbagiana daja Diuxi kaxkïdï. Xorai podukai ñokadagi bia xi iduñagi bïïxi ixtumaxi aagadagi ïgai gï bapasaitai tudu— itïtïdai Suxi.

²³ —Agia soimaaxi taata agai aapimï tïtïïgiadami sïïrhikami dai fariseos gïn aïkai gïgïbidaragai— itïtïdai. —Tomaxi kïï buayi aapimï ïïmo ixtumaxiïrï dïï gia bïïxkïrï mai buaboikïdï kïïga ibuayi aapimï. Daiñi, kïïga ïr buaboi sai bïïxi ixtumaxi buiyiña aapimï óídiña aapimï lïïlïchi Diuxi dai kïïgadu gobai. Asta óídiña aapimï lïïchi gïn yooba ibagi tomaxi lïïchi yoobagi aapimï. Kïïga gï agai xi pobuadagi aapimï tudu dai maiti abïr dagito gobai. Dïï gia gajiadïrï bipiayi aapimï ixtumaxi bamioma gï agaitadai xi ibuadagi aapimï. Mai soi gïlda nïidiña aapimï jaa tudu dai mai sïïrhi ibuayi aapimï jaa bïïtarï dai mai sïïrhi aatabuayi aapimï. Gobai ïr ix makïdï bamioma gï agaitadai xi ibuadagi aapimï.

²⁴ Kabami buamï gïn ïrhidi aapimï bïïtarï ixtumaxi mai xii gï agai tudu. Dai ixtumaxikïdï gia gï agaitadai xi buamï ïrhiadagi aapimï gokïdï gia mai buamï gïn ïrhidi aapimï. Agia ïr mai nïadami dukai aapimï dai bïïxkïrï gatïïgida ïrhidi aapimï boi jaa bïïtarï. Ga tïtïïgidiña aapimï ñoki jaa mai maatïkatai aapimï ixtumaxi ïr buaboi tudu— itïtïdai Suxi.

²⁵ —Agia soimaaxi taata agai aapimï tïtïïgiadami sïïrhikami ïmadï fariseos tudu. Kïï tutiakami dukai gïn dadasai aapimï dai mai kïï tutuiga— itïtïdai Suxi. —Ïpïamaaxi aapimï ïmo asokorhi xiïpï ïmo tasa ix makïdï kïïga buañixika maaxi daamanagadï dïï gia tukuraga ïrabiadïrï. Po ïrhiada maaxi sai kïïga ïr oijadami aapimï Diuxi dïï gia koimudadï tutuiga aapimï dai bia aapimï naana maaxi soimaaxi tïgibudagai gïn ibhïdagana. Ix buaboikïdï oijada ïrhiada aapimï Diuxi aidï gia gï agai sai buanadagi aapimï gïn ibhïdaga. Aidï gia kïïga ïr oijadamikamu aapimï dai kïïga buañikamu aapimï ïrabiadïrï. Aidï gia jaa gïn nïijadamu sai buaboikïdï ïr oijadami aapimï Diuxi. Daiñi, mai ix ïr buaboi sai ix kïïga buanada agadagi ïmoko ïmo tasa xiïpï ïmo asokorhi gï agai sai kïïga buanadagi ïrabiadïrï dai mai xu mosïkaxi daamanagadï. Ïma dukai mai buaboikïdï buañixikami bipiïyi gobai ¿aba? Dai pomaaxi aapimï ïpï gï agai sai kïïga buañixikagi aapimï gïn ibhïdagïrï xako mai maaxi odami bïïtarï dai mai xu xi mosïkaxi buañixika maaxkagi aapimï odami bïïtarï— itïtïdai.

²⁶ Agia pupuiruga aapimï fariseos. Buanabïrai gïn iibhïdaga tudu. Gïn Buanabïrai ix dukai bakuanai odami ajasokorhi. Gï agai xi kïïga buanadagi gobai ïrabiadïrï tudu. ¿Ïma dukai dukatai kïïga buañixikana gobai?— itïtïdai.

²⁷ —Aa gia soimaaxi taata agai aapimï tïtïïgiadami sïïrhikami ïmadï fariseos. Kïï tutiakami dukai gïn dadasai aapimï dai mai kïï tutuiga— itïtïdai Suxi. —Tukuraga aapimï gïn ïrabiadïrï tudu. Ïpïan dukami aapimï xakoga yaasapi koidadï. Kïïga tojamadai odami daamanagadï gobai dïï gia bïïxkïrï galnaaxi uta. Pomaaxi aapimï tudu gïn ibhïdagïrï. Soimaaxi gïn ibhïdaga— itïtïdai.

²⁸ Óídakami bïïtarï gia kïï tutiaka maaxi aapimï dïï gia gïn tïgibudagïrï soimaaxi aapimï. Gïn tïgibudagïrï mai ïïgidi aapimï Diuxi sïïrhikamigadï tudu— itïtïdai.

²⁹ —Agia kabami soimaaxi taata agai aapimï tïtïïgiadami sïïrhikami ïmadï fariseos— itïtïdai. —Kïïga bhai buadana aapimï ami xako yaasapi go ñiñokituldiadamigadï Diuxi ïmadï go pipioñigadï Diuxi ix makïdï gïn koditu ïïki. Dai aapimï gïn aaduñi ïïkidadï ïr ix makïdï gakoitadai.

³⁰ Dai ikaitiña aapimï sai ix óídakamudai aapimï ïïki aidï gia mai gasoiña kodamudai aapimï go ñiñokituldiadamigadï Diuxi ix makïdï gïn aaduñi koi ïïki.

³¹ Pokaiti aapimï sai aapimï gïn aaduñi ïgai ix makïdï koi go ñiñokituldiadamigadï Diuxi ïïki dai potïkai ka kïïga maaxi aagai aapimï sai ïpïan tutuiga aapimï ïgai ix makïdï gakoi. Xadïrï mai ïpïan tutiakana aapimï tudu aaduñdïkatai aapimï.

³² Dai kaxkïdï ïpïan duñimu aapimï ïgai asta xako ka bïïxi naato kodai aapimï go ojotosadï Diuxi. Ïpïan tutuiga aapimï gïn aaduñi ïïkidadï kaxkïdï— itïtïdai.

³³ —Kookoyi tutuiga aapimï tudu. Xadïrï kïïgakïrï bubuakïna aapimï sai maiti gïn aïna gïgïbidaragai— itïtïdai.

³⁴ —Daiñi, gïn otosdamu aanï ñiñokituldiadamigadï Diuxi dai gïn otosdamu aanï odami ix makïdï kïïga bia tïgibudagai dai jaa ix makïdï gïn tïtïïgiadamu Diuxi ñokidï ïpï. Dai kodamu aapimï ïïmoko kukuruxiana xixakai. Sïïrhikïdï oomarhiga aapimï kaxkïdï. Dai jaa baan tutusamu aapimï judidiu kikiupaigadïana dai gïgïbimu aapimï ikixanaikïdï. Aadaimu aapimï ïgai aipakoga go gïgïr kiikiamu dai soimaaxi taatamitulda agai aapimï. Podukai buidadamu aapimï ix makïdï gïn otosdamu aanï mos ïï oomarhigakatai aapimï— itïtïdai.

³⁵ —Kaxkïdï ïr gïpiïrï bïïtïkami aapimï. Gïn maakimu Diuxi gïgïbidaragai bïïtarï go buañixikami iibhïdakami ix makïdï gïn koditu ïïki abhiadïrï asta xibi ukami tudu. Daiñi, go Abelkaru kïï buañixikatadai ibhïadï dai ïgai ïr go ïpïgadï ix makïdï gï muatu ïïki. Dai xibiapioma mua aapimï go Sakarias ix makïdï ïr maradïkatadai go Berekias. Ïgai kïïga buañixikatadai ibhïadï ïpï dai mua aapimï amïï buidïrï go gïï kiupai Jerusalenïrï tudu. Ïmo padïrï kïïka go daxdakarui ami dai ïma padïrï kïïka go gïï kiupai. Dai ami ïrana go kiupai ïmadï go daxdakarui ami gï mua aapimï. Mui gïn koditu aidï abhiadïrï xi gï muatu go Abelkaru asta aidïxi gï muatu go Sakarias tudu. Ka maaxitu aapimï sai gakodadami tutuiga aapimï tudu ïpïan dukai gïn aaduñi ïïkidadï. Dai kaxkïdï gïn maakimu Diuxi gïgïbidaragai bïïxkatai go buañixi iibhïdakami bïïtarï ix makïdï gïn koditu ïïki abhiadïrï.

³⁶ Aanï aagai sai kïïga ïr buaboi sai taata agai aapimï gïgïbidaragai bïïxkatai go buañixi iibhïdakami bïïtarï ix makïdï gïn koditu ïïki abhiadïrï tudu— itïtïdai.

³⁷ —Sogigi aapimï Jerusalenïrï óídakami. Gïn otoxdiña aanï mui gin ñiñokituldiadamiga dai mos kodaiña aapimï. Ïïmoko maixaiña aapimï dai kodaiña dai jaa ïma dukai kodaiña aapimï. Gï agai sai maatïkana aapimï sai muiyoko gïn bapaida ïrhidiña aanï saidi gin ïmadï darakagi aapimï gin abhana. Gïn nukada in ïrhidiña aanï ïpïan dukai ïmo takuku ix makïdï nukadakana maamaradï aanadï uta. Dïï gia aapimï maiti ipïrhi.

³⁸ Kaxkïdï aanï aagai saidi ka dagitomu aanï go gïï kiupai Jerusalenïrï.

³⁹ Gïn dagitomu aanï tudu dai ka maiti gin nïijadamu aapimï ïpamu asta xïïxkadï ïpamu dibiagi aanï dai kïïga gin miadïgidagi aapimï. Aidï gia aagamu aapimï ïmo ñoki gin aagaitai aanï dai pokaitadamu aapimï sai, Ipïrhidi aatïmï sai Diuxi maakana bhai ïrhiaragai go otosadï ix makïdï bia ïmo sïïrhikami Diuxiañdïrï, ikaitidamu aapimï. Dai xïxkadï pokaitadagi aapimï aidï gia gin nïijadamu aapimï ïpamu— itïtïdai Suxi go odami ami go gïï kiupiana.