Mataibo 2 - Northern Tepehuan Bible

Kïkïïrhi ix makïdï ïr mamaatïkami mïï dibiji go Suxi

¹ Podukai busai Suxi ïmo arhi kiiki Belen tïgidukamiïrï ix makïdï Judea munisipiïrï bipiïyi. Aidïpïrï go Herodes ïr Reykatadai Jerusalenïrï dai aidïpïrï ïpï ami Jerusalenïrï ayi mamaatïkami xarhi utapadïrï óídakami.

² Daidi potïtïdaiña ïgai go óídakami, —¿Xako daja ïgai ix makïdï xibiapï busai dai ïr Reygadïka agai go Judidiu?— itïtïdaiña. —Tïï aatïmï ïmo xabugai amïï xarhi amakoga ix makïdï ïr ïmo maaxidaragai sai ka busai go Rey ix makïdï go Judidiu nïnïraka ix busiagi dai kaxkïdï dada aatïmï dai gaagai. Tïïgia rïrhidi dai iduña rïrhidi ïmo xadutudaragai ïgai bïïtarï tudu— ikaitiña go mamaatïkami.

Go Rey Herodes maiti ipïrhiditadai sai ïmai popoidagi sïïrhikamigadï dai kaxkïdï mai bhai ïrhidi ïgai kajiomakai sai busaitadai Reygadï go judidiu

³ Daidi go Rey Herodes kajioma ix kaititadai go mamaatïkami sai busaitadai go Rey ix makïdï go judidiu nïnïraka. Dai mai bhai ïrhidi ïgai kaïkatai gobai. Dai bïïxi go óídakami Jerusalenïrï mai bhai ïrhiditadai ïpï.

⁴ Dai go Herodes ïmpagi go bhaitï gukakamigadï go Judidiu. Ïmpagi ïgai go dadaxdadami bhaitï gukakamigadï ïmadï go tïtïgiadami sïïrhikami tudu. Daidi gatïkakai sai xako gï agaitadai xi busiagi go Rey ix makïdï go Judidiu nïnïraka.

^5-6 Daidi go bhaitï gukakamigadï go judidiu potïtïdai go Rey Herodes aidï sai, —Aapi Rey, ïmo ñokituldiadamigadï Diuxi ojixikami bia xako busi agai go Rey ix makïdï go judidiu nïnïraka— itïtïdai. —Go ojai ikaiti saidi, Juda munisipiïrï daja go arhi kiiki ix makïdï Belen tïgidu. Dai go Belen ïpïan namïaka agai go gaa gïïgïr kiiki ix makïdï bamiom gatïanïi tami Israelïrï. Ïpïan namïaka agai go Belen tomaxi arhidu gobai mai xii muidukatai óídakami ami. Abhiadïrï bhelenañdïrï tudu busai agai go gïï Tïanïdami ix makïdï ïr Nukadamika agai go óídakami Israelïrï. Podukai oja go ñokituldiadamigadï Diuxi ïïki tudu dai kaxkïdï gï maatï sai Belenïrï gï agai sai busiagi go Rey ix makïdï nïnïraka aatïmï Judidiu— itïtïdai go bhaitï gukakamigadï judidiu go Rey Herodes.

⁷ Daidi go Rey Herodes ïxtotai dukai báí go mamaatïkami dai tïkakai xïkidï tïïtadai ïgai go xabugai ix makïdï agaitadai ïgai. Dai go mamaatïkami aagidi.

⁸ Daidi go Herodes potïtïdai aidï, —Iimibïrai Belenamu tudu dai kïïga gaagana go arhi odami as xako daja. Dai mïx xïxkadï tïïgiagi abïr bhaigobai iimïda dai gin aagida. Nai aanï ïpï imiagi dai mïïka ïpï iduñagi ïmo xadutudaragai— itïtïdai.

⁹ Daidi ka nato aatagakai go mamaatïkami ïmadï go Rey sai bhodïrï iji ïgai ami Jerusalenañdïrï. Dai go xabugai ix makïdï baasïkioñdïrï tïïtadai ïgai kia bhaitï imïitadai dai gatïtïïgidi boi. Daidi go xabugai kïïkiban dui sïïrhi daama go baaki xako dakatadai go arhi odami

¹⁰ baidi go mamaatïkami kïïga bhai gïn ïjïrhi nïiditai xi ami kïkiba go xabugai.

¹¹ Daidi ka bapakïkai ïgai ami kiiyïrï tïï ïgai go arhi odami ïmadï dïïdï ix makïdï Maria tïgidu. Dai go mamaatïkami kuiki ami go arhi odami buidïrï dai kïïga xadutugi. Dai kupioka ïgai kajojoño ix makïdï bukatikatadai ïgai dai bubaitu ïgai oidaragai go arhi odami bïïtarï. Oi ïgai oro dai kubhimadarhi dai mira. Gobai oi ïgai go arhi odami tudu xadutudaitai.

¹² Dai bhodïrï bui ïgai boi ïpamu dai aa surhi. Dïï ka aagiditadai Diuxi sai mai iimïna ïpamu gamo xako daja go Rey Herodes xi kaxkïdï ïmai boi bui ïgai xibi dai mai iji Jerusalenamu xako nïiditadai ïgai go Herodes.

Ejipituana gï baidakatu go Suxi

¹³ Dai iji go mamaatïkami abhiadïrï. Dai bhodïrï tïïtïkimi go Jose ïpamu dai ïpamu tïï ïgai go tïañikarudï Diuxi ix makïdï ïr otosadï Diuxi Gïr Nukadakami. Dai go tïañikarudï Diuxi potïtïdai, —Bañigiñi otoma— itïtïdai. —Aapi ïmadï dïïdï go arhi odami abïr bhïkai go arhi odami dai dïgabuna boopoi Ejiptuamu. Dai ami Ejipituana abïr bii asta xïïxkadï ukami gïn aagidagi aanï. Go Rey Herodes gaaga agai go arhi odami tudu mua ïrhiditai— itïtïdai.

¹⁴ Dai go Jose ïïgidi go tïañikarudï Diuxi dai otoma bañi dai apia dukai mai kia maaxikai oidagi bhïiyi boi dai Ejiptuamu dai baidaja go arhi odami ïmadï modukai dïïdï.

¹⁵ Ami Ejipituana bii agai ïgai asta xïïxkadï ukami ka muu go Herodes. Pobai gï dui gobai saidi gokiïrï xïïxkadï ka bubuakiagi ïgai Ejiptuañdïrï saidi aidï gï iduna ix dukai oja ïïki ïmo ñokituldiadamigadï Diuxi tudu. Ïgai oja ïïki sai Diuxi ikaiti sai, Agidamu aanï gin mara sai busaiña Ejiptuañdïrï, ikaiti Diuxi. Ami Ejipituana dakatadai Suxi tudu ïmadï dïïdïdï.

¹⁶ Daidi go Herodes máí sai go mamaatïkami buirumagi mai aagidakai ïgai xako daja go Suxi xi kaxkïdï bhamu go Herodes. Dai gatïjai ïgai kodaragai bïïxi go aarhi gïgïrhi goka umigi biakami koidamakoga ami Belenïrï dai ix makïdï maigobai miadïrï óídaga ïpï. Go mamaatïkami aagiditadai sai ka parï goka umigi ïpïduitadai aidïxi abhiadïrï busaitadai go Suxi tudu.

^17-18 Podukai daibusai ix dukatai agaitadai go ñokituldiadamigadï Diuxi Jeremias tïgidukami ïïki. Ïgai ikaiti sai, Gïïgïr susuanïda agai oki ramana óídakami dai gïïgïr kaidatumu suanïdadï ami. Ïgai ïr piipixaradï go rakekaru dai susuanïda agai kokai maamaradï. Dai mai tipukamu ixdukatai bhai ïrhitudagi soigakoñikatai ïgai, ikaiti go Jeremias ïïki.

¹⁹ Dai gokiïrï aidïxi ka muu go Herodes sai go Jose tïïtïkimi ïpamu ami Ejipituana dakatai. Dai ami tïïtïkiïrï gï maaxitu tïañikarudï Diuxi ix makïdï ïr otosadï Diuxi Gïr Nukadakami. Dai potïtïdai ïgai go Jose,

²⁰ —Bañigiñi dai baidakañi go arhi odami ïmadï dïïdï dai nonoigibïrai ïpamu Israelamu— itïtïdai. —Ka koi bïïxkatai ïgai ix makïdï mua ïrhiditadai go arhi odami tudu— itïtïdai.

²¹ Daidi bañi go Jose dai baidakai go arhi odami ïmadï dïïdï dai nonora ïpamu Israelamu.

²² Dïï gia xibi ïmo maradï go Herodes Arkileo tïgidukami gatïanïitadai Judea munisipiïrï ami Israelïrï. Bhïitadai ïgai go sïïrhikamigadï go Herodes maradïkatai ïgai tudu. Dai kajioma go Jose ix gatïanïi ïgai dai duadimu ix imiagi gamoko. Dai tïïtïkidïrï kaï ïgai ïmo ñoki Diuxiañdïrï ïpï ix makïdï aagidi sai mai imïna Judeamu. Dai dïgabusai ïgai dai iji Galilea munisipiamu bhaiyoma.

²³ Ami ayi ïgai dai ïmo kiikiïrï óídatu xako Nasaret tïgidu. Podukai daibusai ix makïdï aagaiña go ñiñokituldiadamigadï Diuxi ïïki abhiadïrï. Ikaitiña ïgai sai, —Dibiamu go Otosadï Diuxi bai Nasaretañdïrï oidakami gï aagadamu ïgai— po tudu ikaiti ñiñokituldiadamigadï Diuxi aagaitai go Suxi.