Mataibo 19 - Northern Tepehuan Bible

Suxi pokaiti sai mai kïïgadu xïïxkadï ïmo odami dagitoagi aduñdï ix makïdï ïmadï daja

¹ Daidi ka kugaidakai Suxi go aatagi ami xako dakatadai ïgai Galilea munisipioana sai bhodïrï jii ïgai baasadïrï go Jordan aki dai ayi ïmo ïmapïkïrï Judea munisipiïrï.

² Dai kïïga mui óídakami oiditadai Suxi aipakoga ami dai duduadi ïgai ix makïdï kokokoñikatadai.

³ Dai ami dada chïki fariseo dai ñokidi ïgai go Suxi. Gaagaitadai ïgai ixtukïdï gïpiïrï daitudagi daidi potïtïdai ïgai, —¿Go sïïrhikamigadï Moises ix bhai maakai xi oigaragai kïkïïrhi sai dagitona aduñdï mos ipïldakai?— itïtïdai.

⁴ Daidi Suxi potïtïdai, —¿Maiti mïx kia nïidi Diuxi ojadïrï xako ikaiti Diuxi sai, tukamïrï idui ïgai mos arhi ïmo oki ïmadï ïmo kïïrhi?— itïtïdai.

⁵ —Dai ami ikaiti Diuxi ïpï sai kaxkïdï kïkïïrhi daadagitoi dïïdïdï dai ïmadï bipiïyi oki saidi ïr oñigadïkana daidi ka ïmo odami dukai bipiïyi ïgai.

⁶ Dai gobai itïiya ïrhidi sai Diuxi ïgai dai ïmapidi ix makïdï ka gaïmadï bii dai kaxkïdï maiti gï agai sai tomarhi ïmo odami ïjïkobaldagi ïgai— itïtïdai Suxi.

⁷ Daidi go fariseos potïtïdai aidï, —Aidï gia ¿Ix tuixi go Moiseskaru gïr aagidi sai bhaiga aatïmï xi dagitoagi gïr aduñi mos maakakai aatïmï ïmo ojai xako aagai sai ka dagito ïragai aatïmï?— itïtïdai.

⁸ Dai Suxi potïtïdai, —Arhiï kapaka gïn iibhïdaga tudu. Kaxkïdï gïn dagito go Moises ix dagitoagi aapimï gïn ooñiga. Dïï gia Diuxi tukamïrï abhiadïrï maiti ipïrhidiña sai pobuadagi aapimï— itïtïdai.

⁹ —Dai aanï aagai sai xorai dagitoagi oñigadï dai ïmadï biyagi ïmai ka soimaaxi ibuayi aduñdï buidïrï. Ïbogiami xi oñigadï ka ïmadï daibuñagi ïmai mosïkaxi podukai bhaiga ïgai xi dagitoagi— itïtïdai.

¹⁰ Daidi go mamaatïrdamigadï Suxi potïtïdai, —Xi ïr buaboikagi ix dukatai aagai aapi sai kïkïïrhi mai bia oigaragai ix dagitoagi oñigadï, aidï gia xioma ïr kïïga ïgai bïïtarï xi maiti gaontadagi ïgai— itïtïdai.

¹¹ Dai Suxi potïtïdai, —Mai bïïxi kïkïïrhi bhaiga xi ïïgi biiyagi ix dukai aagai aapimï. Mosïkaxi ix makïdï maa Diuxi gubukarhigai sai ïïgi biïna tudu.

¹² Daiñi, ïïmo kïkïïrhi ïïgi pomaaxi bubuakai tukugadï dai mai bhaiga xi ïmadï bipiïdagi oki. Dai jaa gïn kapuñtu odami dai kaxkïdï mai bhaiga ïpï. Dai ïïgi bipiïyi jaa sai podukai kïïga bhaigakana xi aipakoga ajiopadagi dai aagidagi jaa ix dukatai biakagi oigaragai ix tïanïna Diuxi— itïtïdai.

Suxi aagai ïmo bhai ïrhiaragai ñoki aarhi bïïtarï

¹³ Dai go odami buapaiña aarhi Suxi buidïrï sai taatana ïgai dai sai daanturhiada ïgai. Dai go mamaatïrdamigadï Suxi bhagakarai go odami dai daidi xi buapidiña ïgai aarhi Suxi ïmadï.

¹⁴ Dïï gia Suxi potïtïdai mamaatïrdamigadï, —Dagitobïrai sai gin urabana go aarhi. Maiti abïr daidada tudu. Odami ix makïdï aarhi dukai tutiakagi ïr ix makïdï bia oigaragai sai Diuxi tïanïdagi— itïtïdai.

¹⁵ Dai taata Suxi momodï go aarhi dai aagai ïmo bhai ïrhiaragai ñoki ïgai bïïtarï dai bhodïrï jii ïgai abhiadïrï.

Ïmo gï bidakami tïkakai go Suxi ix dukatai iduna daidi bïïxkïrï bïïtarï oidakagi

¹⁶ Dai ïmo imidagai ïmo uu imïdami kïïrhi dibiji go Suxi daidi potïtïdai, —Aapi mamaatïtuldiadami, kïï tuiga aapi— itïtïdai. —Gin aagidañi, ¿Ix tumaxi iduna aanï kïïgadukami sai podukai bhaigakagi aanï xi oidakagi bïïxkïrï bïïtarï?— itïtïdai.

¹⁷ Dai Suxi potïtïdai, —¿Ix tuixi kïï tuigakami gin aagai aapi? ¿Maiti pïx maatï sai Diuxi gin aagai aapi potïkai sai kïï tuiga aanï? Mosïkaxi Diuxi buaboikïdï ïr kïï tuigakïdï tudu— itïtïdai. —Dïï gia ix kïïgakïrï oidaka ïrhiadagi aapi bïïxkïrï bïïtarï aidï gia gï agadamu xi ïïgiadagi aapi go Moises sïïrhikamigadï— itïtïdai.

¹⁸ Dai go kïïrhi potïtïdai, —¿Ix makïdï go mui sïïrhikamigadï Moises gï agai xi ïïgiada aanï tudu?— itïtïdai. Daidi Suxi potïtïdai, —Gobai ix makïdï pokaiti sai, maiti gï agai xi ïmadï bopodagi aapi ix makïdï maiti ïr gï oñiga dai sai maiti gakodada dai sai maiti gaïxiada dai sai mai gïpiïrï bupaiña ïmai yaatagikïdï

¹⁹ dai sai xadutuada aapi gï dïïdïdï dai sai oigïdada aapi gï aaduñi ïpïan ïxi ix xïïxi gï oigïdai aapi ïïgi. Bïïxi gobai gï agai xi ïïgiada aapi— itïtïdai.

²⁰ Dai go utu imïdami potïtïdai aidï, —Kaxi an bïïxi ïïgidiña aanï bïïxi gobai— itïtïdai. —¿Tumaxi gin biïga kia xi ibuadagi aanï tudu?— itïtïdai.

²¹ Daidi Suxi potïtïdai, —Aidï gia mosïka ïmo ixtumaxi biïga— itïtïdai. —Ix buaboikïdï ipïrhidi aapi xi kïï tuigakagi ix dukai ipïrhidi Diuxi aidï gia gagarañi bïïxi gï buxtuidaga dai oidañi go tuminxi go soititigami— itïtïdai. —Aidï gia biakamu aapi naana maaxi ixtumaxi namïakami tïbagiana. Podukai duñi tudu dai gokiïrï gin uraba daidi gin oijada— itïtïdai.

²² Dai soi gïrhi go kïïrhi kaïkai ix kaiti go Suxi maigobai jii abhiadïrï. Kïïga gï bidakatadai ïgai tudu dai maiti ipïrhidi xi gamaakadagi buxtuidadï go soititigami bïïtarï.

²³ Daidi Suxi potïtïdai mamaatïrdamigadï, —Gia xijaiga ïmo gï bidakami bïïtarï xi kïïgakïrï busiagi sai biakana ïgai oigaragai xi Diuxi tïanïdagi.

²⁴ Bamioma mai xijaiga xi ïmo kameyo ïmo oyi dïgadïana sïïrhi daibuñagi ix bhai xi ïmo gï bidakami bakiagi xako gatïanïi Diuxi— itïtïdai.

²⁵ Dai go mamaatïrdamigadï ix makïdï kaïkatadai ix kaiti Suxi potïtïdai, —Ka pokaiti aapi Suxi sai xijaiga ïmo gï bidakami xi kïïgakïrï busiagi sai Diuxi tïanïna. Dai aatïmï po rïrhiditadai sai bamioma kïïgakïrï nïidi Diuxi go gïn bipidakami xi bhai jaa óídakami dai kaxkïdï mamaakai ïgai naana maaxi buxtuidadï. ¿Dïï gia ix mai kïïgakïrï bubuakïi agai ïgai, gobai ix tïiya ïrhidi sai mai tipu xorai kïïgakïrï busi agai?— itïtïdai.

²⁶ Dai Suxi sïïrhi buijako nïidi mamaatïrdamigadï daidi potïtïdai, —Buaboi aba sai óídakami mai bhaiga xi kïïgakïrï gïn bubiadagi ïïgi. Dïï gia Diuxi kïïga ixtutuidikïi xi kïïgakïrï bubiadagi. Kïïga ixtutuidikïi ïgai xi ibuadagi ixtumaxi odami mai bhaiga xi ibuadagi tudu— itïtïdai.

Suxi aagai ixtumaxi ïr maitïkidïka agai go mamaatïrdamigadï

²⁷ Daidi Piduru potïtïdai go Suxi, —Gïr mamaatïtuldiadamiga, aatïmï ka bïïxi dagito gïr buxtuidaga dai gï oi— itïtïdai. —¿Ix tuma maitïki gïr maakimu Diuxi gï oiditai aatïmï tudu?— itïtïdai.

²⁸ Daidi Suxi potïtïdai, —Kïïga ïr buaboi ixtumaxi gïn aagidamu aanï xibi. Kaïkabïrai tudu. Daiñi, aanï ïr Diuxi otosadï ix makïdï ïmo kïïrhi busai. Dai xïïxkadï utudutuldagi aanï go tïbagi ïmadï oidigi aidï daibamu aanï ïmo daikaruana kïï tiodikami dai kïï namïakami dai ami dakatai gatïanïdamu aanï— itïtïdai. —Dai amaxi aapimï daraibamu gïgïr daraikaruana ïpï dai ami darakatai gatïanïdamu aapimï ïpï. Amaxi gatïanïdamu aapimï bïïxi go piipixaradï go bhaibuxtama dan goka maamaradï go Israelkaru tudu— itïtïdai.

²⁹ —Daiñi, xorai dagitoagi ixtumaxi bia gin oiditai, aanï maakimu muiyoma naana maaxi xi bhai ix makïdï biakatadai ïgai. Dukami xi dagito ïgai kiikidї xiïpï susukurhidï xiïpï xixïgidï xiïpï dïïdïdï xiïpï maamaradï xiïpï dïdïbïragadï, aanï aagai sai mui bamioma biakamu ïgai xi bhai ix makïdï dagito ïgai. Dai ïkobïrakoga bïïxkïrï bïïtarï oidaka agai ïgai. Pobai gï duñimu ïgai ix makïdï dagitoagi ixtumaxi gin oiditai tudu.

³⁰ Dai aanï aagai sai xïïxkadï gatïanïdagi aanï, amaxi go óídakami ix makïdï xibi gatïanïitadai ka maiti gatïanïda agai. Dai ix makïdï maiti gatïanïi xibi ïgai gatïanïda agai amaxi— itïtïdai.