Mataibo 17 - Northern Tepehuan Bible

Ïmo tubidakana gï maaxitu Suxi xïï gubuka ïgai dai xïï kïï tiodi

¹ Dai bhodïrï abhiadïrï naadami tasaikïdï go Suxi baidaja go Piduru ïmadï Jakobo dai Juan ix makïdï ïr sukurhidï go Jakobo. Baidaja ïgai ïmo tubidaki daama ïïgi daka ïrhiditai go baika kïkïïrhi ïmadï.

² Dai ami tubidakïrï ïmapïdui go Suxi buitapi ix makïdï oidi. Daidi buibasodï Suxi kabami tonoraka maaxi tioditu dai yukuxidï kabami totoatu kudagi dukai.

³ Bhodïrï ami buitapi gïn maaxitu go Eliaskaru ïmadï go Moiseskaru dai atagai ïgai Suxi ïmadï.

⁴ Daidi Piduru potïtïdai go Suxi, —Gin Tïanïdamiga, gia kïïga gï idui xi tami daraka aatïmï gï ïmadï— itïtïdai. —Ix ipïrhiada aapi iduñimu aatïmï baika uukusai, ïmoko aapi Suxi gï bïïtarï dai ïmai Moises bïïtarï dai ïmai go Elias bïïtarï— itïtïdai.

⁵ Dai kia ñokaitadai go Piduru bai ïmo ikomai iña ami xako daraja ïgai. Kabami kudaka maaxi ami go ikomai ïrana dai Diuxi ño abhai ikomai ïrañdïrï daidi itïi ïgai, —Idi Suxi ïr gin Maara dai kïïgakïrï oigïdai aanï. Kïïga bhai gin ïrhidi nïiditai gobai— itïi. —Gïn tïgito abïr kaï ñokidï ïgai tudu— ikaiti Diuxi go ikomai saagidañdïrï.

⁶ Daidi go Piduru ïmadï Jakobo dai Juan kabami duduadimu dai dïbïrapi ukami kuiki kaïkai ïgai go ñoki ikomaiñdïrï.

⁷ Dai Suxi mïï taata daidi potïtïdai, —Bapagibïrai. Maiti abïr duduadikuda— itïtïdai.

⁸ Daidi aipako nïnïaba bïï baikatai ix makïdï oidi Suxi dai tïï ix mosïkaxi Suxi ami kïakatadai. Go Elias dai Moises ka mai tipukatadai.

⁹ Bhodïrï aidïxi ka tïapañimitadai ïgai tubidakiañdïrï saidi Suxi potïtïdai ix makïdï oiditadai, —Xibi abïr mai kia aagada ix tuma tïï aapimï tubidakïrï— itïtïdai. —Dïï gia mukukai aanï ix makïdï ïr Diuxi otosadï dai gokiïrï gin duakatudakai aanï ïpamu aidï gia abïr aagada ix tuma tïï aapimï xibi— itïtïdai.

Suxi aagidi mamaatïrdamigadï sai go Juan ïr ïgai ix makïdï gï agaitadai ix dibiagi ïpïgioma xi Suxi dai ïr ïgai ix makïdï Elias aagaiña go óídakami ïïki

¹⁰ Daidi go baika mamaatïrdamigadï ix makïdï oiditadai potïtïdai go Suxi, —Kïïga maatï aatïmï sai aapi Suxi ïr go otosadï Diuxi ix makïdï nïnïrakatadai aatïmï judidiu ïïki abhiadïrï. Dïï gia pokaitiña go tïtïïgiadami sïïrhikami sai gï agaitadai xi dibiagi go Elias ïpïgioma xi aapi. ¿Ix tuixi pokaiti ïgai?— itïtïdai.

^11-12 Daidi Suxi potïtïdai, —Buaboi aba sai gï agaitadai sai ïpïgioma dibiagi go Elias dai bhai duñagi bïïxi ix tumaxi dai bhodïrï ïpamu dibiamu aanï ix makïdï ïr go Kristo gatïanïda iñagaitai. Aanï ïr go otosadï Diuxi ix makïdï ïmo kïïrhi busai tudu. Dai aanï aagai saidi ka dibia go kïïrhi Elias ix makïdï gï agaitadai xi gin bhaitïki dibiagi. Dïï gia go óídakami mai máí dai soi buididi mai biakatai ix tuixi podukai buidadagi. Dai aanï bia xi naana maaxi soimaaxi taatagi ïpï soi gin buididitai óídakami ïpï— itïtïdai.

¹³ Dai kaïkai gobai go mamaatïrdami máí sai go Juan ix makïdï bapakonaiña odami ïr ix makïdï Elias aagaiña Suxi.

Duadi Suxi ïmo diabora tïañikarudï biakami

¹⁴ Dai gokiïrï ka tubidakiañdïrï iimïitai ïgai saidi ayi ïgai ïpamu xako darakatadai go mui odami dai ami ayi ïmo kïïrhi dai totonakïdï kïkiba buidïrï Suxi dai potïtïdai ïgai,

¹⁵ —Aapi Suxi Gïr Nukadakami, soi gï ïlda dai soiña gin maara gïïrhi. Kabami gigibukïiña tukugadï dai susuikiturïiña gobai dai muiyoko asta gïgïsïiña taiyïrï dai sudagiïrï ïpï. Kabami soimaaxi taatamai gobai tudu— itïtïdai.

¹⁶ —Ïkiapo buapi aanï gï mamaatïrdamiga dïï maiti ixtui ïgai xi duadiagi— itïtïdai.

¹⁷ Daidi itïi Suxi aidï, —Aapimï óídakami xibi sïïrhikïdï mai kïïga buaboitudai dai sïïrhikïdï ïr soimaaxi ibuadami. Ka mui naana maaxi maaxidaragai ibuadana aanï dai modukai maiti gin buaboitudai aapimï tudu. ¿Bïï tïbïpi ukami gï agadamu xi gïn ïmadï dakagi aanï kia dai ibuadagi maaxidaragai ipïrhiditai sai gin buaboitudada aapimï?— itïtïdai. Dai bhodïrï potïtïdai, —Bhaigobai abïr buapa go kokoadï tudu— itïtïdai.

¹⁸ Dai bhagaidi Suxi go tïañikarudï go diabora ix makïdï ïrana dakatadai go gïïrhi dai otoma busai ïgai dai ka duadixikami bii go kokoadï.

¹⁹ Dai gokiïrï go mamaatïrdami ïkobai aataga ïmadï Suxi daidi potïtïdai, —¿Ix tuixi aatïmï maiti ixtui ix busaidagi go tïañikarudï go diabora go gïïrhiañdïrï?— itïtïdai.

²⁰ Dai Suxi potïtïdai, —Mai kïïga buaboitudai aapimï kaxkïdï. Daiñi, tomaxi mosïkaxi palïpi buaboitudamudai aapimï bhaigakamudai aapimï xi potïdagi ïmo tubidaki sai maigobai kïkibana dai otoma gïn ïïgiadamudai go tubidaki dai maigobai imimudai. Mai tipukamudai ixtumaxi gïn sobhidagi tomaxi mosïkaxi palïpi buaboitudadamudai aapimï tudu.

²¹ Dïï gia pomaaxkami tïañikarudï go diabora ix makïdï biakatadai go gïïrhi, gobai xijaiga busaidaragai. Gï agai ïpïgioma xi mai kuadatai daanïdagi Diuxi xïïxkadï busaida agadagi gobai. Ïbogiami podukai busakïi gobai— itïtïdai.

Suxi ïpamu aagidi mamaatïrdamigadï saidi gï agaitadai sai mukiagi ïgai

²² Ïmo imidagai gïn ïmpagi Suxi ïmadï mamaatïrdamigadï Galileana darakatadai ïgai daidi Suxi potïtïdai aidï sai, —Aanï ïr Diuxi otosadï ix makïdï ïmo kïïrhi busai dai gin tïïgida agai ïmoko saidi gin bhïna gin buidïrï bïïtïkamiga

²³ baidi gin mua agai ïgai. Dïï gia abhiadïrï baika tasaikïdï ïpamu gin duakatudamu aanï— itïtïdai. Dai go mamaatïrdamigadï sïïrhikïdï soi gïn ïjïrhi potïdakai Suxi sai gï muatuda agai.

Suxi gatïïgi go kuota ix makïdï ïr go gïï kiupai bïïtarï Jerusalenïrï

²⁴ Daidi gokiïrï Kapernaumïrï ayi Suxi ïmadï mamaatïrdamigadï. Daidi chïki kïkïïrhi ix makïdï ïr taanïdami kuota go gïï kiupai Jerusalenïrï bïïtarï mïï aatagidi go Piduru daidi potïtïdai, —¿Aapi Piduru, aapi gï Tïanïdamiga ix bhai anamïidiña go kuota go gïï kiupiana ix makïdï bïïxi umiïrï biakana kïkïïrhi xi gamamaakadagi?— itïtïdai.

²⁵ —Ïjï— itïtïdai Piduru. Dai bhodïrï tukabiako jii go Piduru ami kiiyïrï xako dakatadai go Suxi. Dai aagida agaitadai ïgai go Suxi ix kaititadai go tanïdami kuota. Dïï mai kia aagidi ïgai bai Suxi potïtïdai, —¿Dukatai ïrhidi aapi Piduru? ¿Dukatai aatabuayi go gïgïr tïtïanïdami? ¿Borai taanïiña ïgai kuota sai biakana ïgai tuminxi ix tukïdï ibuadagi aaduindadï? ¿Tanïiña xi ïgai kuota ïïgi maamaradï, tanïiña xi ïgai jaa ix makïdï maiti ïr maamaradï xio?— itïtïdai.

²⁶ Daidi go Piduru potïtïdai, —Go ix makïdï maiti ïr maamaradï bia xi aa namïidagi go kuota— itïtïdai. —Ïjï kïïga aagai aapi— itïtïdai Suxi. —Podukai aba. Go maamaradï go gïgïr tïtïanïdami mai bia xi tïïgidagi kuota— itïtïdai.

²⁷ —Dai aatïmï ïr maamaradï go tuidakami go gïï kiupai dai kaxkïdï aatïmï mai bia xi maakadagi go kuota go kiupai bïïtarï. Dïï gia maiti ipïrhidi aanï xi bhakoikagi go tanïdami kuota dai kaxkïdï aa namïidamu aatïmï go kuota tomax dukai. Imiñi tudu go gïï sudagi ugidïamu dai sudaïrï daituda ïmo bhabhaidakarui dai busaida go batopa ix makïdï ïpïgioma bhïiyagi. Ami go batopa tïñidïrï tïigimu aapi ïmo tuminxi. Gobai ayimu ixtukïdï aa namïidagi go kuota bïï gokatai aatïmï gïr bïïtarï— itïtïdai. —Bhïkañi aapi dai mïï aa namïida gïr kuotaga tudu— itïtïdai Suxi go Piduru.