Mataibo 16 - Northern Tepehuan Bible

Go bhaitï gukakamigadï go Israelitas aagidi go Suxi saidi iduna ïmo maaxidaragai sai podukai maatiagi ïgai ix bhai bia Suxi ïmo sïïrhikami Diuxi amadïrï

¹ Daidi ïmo imidagai iji chïki fariseos ïmadï saduseos dai mïï nïidi ïgai go Suxi. Dai gïpiïrï daituda ïrhiditadai ïgai go Suxi dai aagidi saidi iduna ïmo maaxidaragai Diuxi gubukarhigadïkïdï sa bhai iduna. Po ïrhiditadai ïgai sai maiti ixtuidimu Suxi xi ibuadagi tudu.

² Dïï gia Suxi potïtïdai, —Xïxkadï urunoko bïgikagi iikomai aapimï ikaitiña sai xadiko kïïgaduka agai tasai.

³ Dai xïxkadï kiamoko bïgika maaxkagi gobai dai kabami ikomakagi aidï gia ikaitiña aapimï sai mai kïïgaduka agai tasai— itïtïdai. —Kïïga maatï nïnïidi aapimï iikomai dai maatïkana ix bhai duduki agai ix cho ïpï— itïtïdai. —Dai gï agaitadai xi podukai maatïkagi aapimï ix tuma daibuña agai gokiïrï nïiditai ixtumaxi po gï buimi gïn buitapi xibi ïpï dïï mai maatï nïnïidi aapimï— itïtïdai.

⁴ —Aapimï xibi óídakami kabami ïr soimaaxi ibuadami. Adaimïi aapimï ïma maaxi buaboidaragai ka dagitokai aapimï Diuxi. Kaxkïdï ipïrhidi aapimï saidi ibuada aanï ïmo maaxidaragai sa bhai ïr otosadï aanï Diuxi— itïtïdai. —Daiñi, ix dukai gï idui go Jonaskïdï ïïki dai ïmo gïï batopa ïrana bii biaka tasai dai bhodïrï ïpamu busai, podukai ïpï ayimu ixtuigako dïbïrai uta bimu aanï baika tasai dai gokiïrï ïpamu busaimu aanï ïpï. Gokïdï gï maatïkamu sai buaboikïdï ïr otosadï aanï Diuxi tudu. Mosïkaxi gobai ïr maaxidaragaika agai aapimï gïn bïïtarï saidi maatïkana aapimï xorai aanï. Mai tipukamu ïmai maaxidaragai tudu— itïtïdai Suxi. Dai bhodïrï dagito ïgai go óídakami ami dai baasadïrï daibusai ïgai go gïï sudagi mamaatïrdamigadï ïmadï.

⁵ Dai ka aïkai ïgai baasadïrï go gïï sudagi sai go mamaatïrdamigadï gïn tïgito tïï sai mai bukati ïgai pan ixtuma ugiagi.

⁶ Dai aidïpïrï go Suxi potïtïdai, —Gïn tïgito abïr nïida tadu bhïiyi aapimï go kopodatudakarui ix makïdï bia go fariseos ïmadï saduceos— itïtïdai.

⁷ Daidi go mamaatïrdamigadï ïïgi aipako gïn aagiditadai aidï daidi ikaititadai, —Suxi maatï sai mai bua aatïmï pan kaxkïdï gïr aagidi go ñoki aagaitai go kopodatudakarui— ikaititadai ïgai.

⁸ Dïï gia Suxi maatïkatadai ixtuma aatagai ïgai daidi potïtïdai, —Sïïrhikïdï mai kïïga buaboitudai aapimï— itïtïdai. —¿Ix tuixi ïïgi gïn ñokidimi aapimï aipakoga mai buapakai aapimï pan?— itïtïdai.

⁹ —Daiñi, tomaxi nïidi aapimï aidïxi bhibhidi aanï taama mirhi odami mos arhi taama panakïdï, modukai mai maatï nïidi aapimï ixtuma dui aanï dai otoma mai tïgito. ¿Bïïki asarai sudakami ïmapagi aapimï saasakigadï go pan ix makïdï bhaibitu aidï?— itïtïdai.

¹⁰ —Dai nïidi aapimï ïpï aidïxi kubarakami panakïdï bhibhidi aanï maakoba mirhi odami ïpï. ¿Dai aidï bïïki gïgïr asarai sudakami ïmpagi aapimï?— itïtïdai.

¹¹ —Kaxkïdï gï agaitadai sai kïïga maatï kaïkagi aapimï ixtumaxi gïn aagidi aanï xibi. Mai agaitadai go pan tudu aidïxi gïn aagidi aanï saidi kïïga gïn tïgito nïijada aapimï. Gïn aagidi aanï bhaiyoma sai kïïga gïn tïgito nïijadagi sai mai bhïiyagi aapimï go kopodatudakarui ix makïdï bia go fariseos ïmadï saduceos tudu— itïtïdai.

¹² Dai aidï gia go mamaatïrdamigadï maatï kaï ix tïda ïrhiditadai Suxi. Mai agaitadai ïgai go kopodatudakarui tuiyi tudu. Dai bhaiyoma agaitadai ïgai go buaboidaragai ix makïdï gatïtïïgidi go fariseos ïmadï saduceos. Gobai ïr ix makïdï maiti gï agaitadai ix bhïiyagi ïgai tudu.

Piduru aagai sai go Suxi ïr go Kristo

¹³ Daidi gokiïrï ayi Suxi miadïrï xako Cesarea Filipo tïgidu ïmo kiiki. Ami gaatagataidai ïgai mamaatïrdamigadï ïmadï daidi potïtïdai ïgai, —¿Borai gin aagai odami aanï ix makïdï ïr otosadï Diuxi dai ïmo kïïrhi busai?— itïtïdai.

¹⁴ Dai mamaatïrdamigadï potïtïdai, —Ïïmoko pokaitiña pïsaidi ïr go Juankaru ix makïdï bapakonaiña odami dai jaa pokaiti pïsaidi ïr go Eliaskaru, dai jaa pokaiti pïsaidi ïr go Jeremiaskaru xiïpï ïmai ñokituldiadamigadï Diuxi— itïtïdai.

¹⁵ Dai Suxi potïtïdai aidï, —¿Dai aapimï borai gin aagai?— itïtïdai.

¹⁶ Daidi go Ximuñi Piduru potïtïdai, —Aapi ïr go Kristo. Aapi ïr go otosadï Diuxi ix makïdï aatïmï judidiu nïnïrakatadai ïïki abhiadïrï tudu. Dai aapi ïr Maradï Diuxi ix makïdï bïïxkïrï bïïtarï oidaga— itïtïdai.

¹⁷ Daidi Suxi potïtïdai, —Agia bia aapi ïmo gïdukami bhai ïrhiaragai aapi Ximuñi aapi ix makïdï ïr maradï Jonas. Diuxi gin Oga ix makïdï tïbagiana daja ïgai dai gï tïtïgidi xorai aanï, kaxkïdï. Mai xu xi odami gï tïtïgidi gobai tudu.

¹⁸ Daiñi Ximuñi, aapi Piduru tïgidu ïpï, ix makïdï itïiya ïrhidi odai. Dai aanï aagai sai aapikïdï gin aaga iduñimu aanï ïmo gïdukami aaduindagai. Aapi ïpïan dukamika agai ïmo odai ix makïdï dasagi ïmo kïsadami baaki gï aga dasakai simientogadï ïmo baaka. Aapikïdï gin aaga iduñimu aanï ïmo aaduindagai soikïitai mui óídakami saidi gin buaboitudana. Dai ïgai ix makïdï gin buaboitudada agai ïr gin kiupaiga dukaika agai. Ïrana dakamu aanï ïgai kaxkïdï. Dai maitïmu ïgai buidïrï bïïtïkamigadï. Maitïmu ïgai asta go mukigami bui tudu— itïtïdai.

¹⁹ —Daiñi— itïtïdai. —Gïn maakimu aanï sïïrhikami saidi aagada aapimï ix tumaxi daidarxika aagai go odami bïïtarï ix makïdï Diuxi tïanïi. Dai bhaigakamu aapi xi maakadagi oigaragai ïgai bïïtarï ïpï. Dai aanï aagai sai ixtumaxi daidagi aapimï tami oidigi daama sai Diuxi daidamu gobai ïpï. Dai ixtumaxikïdï gamaakadagi aapimï oigaragai sai gokïdï maakimu oigaragai Diuxi ïpï—.

²⁰ Potïtïdai Suxi mamaatïrdamigadï tudu. Dai daidi ïgai sai aagana maigobai sai ïgai ïr otosadï Diuxi.

Suxi ïkiaxdïrï aagai saidi muki agai

²¹ Dai aidï abhiadïrï dudatai aagidiña Suxi go mamaatïrdamigadï sai gï agaitadai sai naana dukai soimaaxi taatatulda agaitadai ïgai. Aagidiña ïgai sai go bhaitï gukakïdï go judidiu soi buidada agai tudu ïmadï go dadaxdadami bhaitï gukakamigadï dai go tïtïgiadami sïïrhikami. Potïtïdaiña Suxi sai gï agaitadai sai gï muatudagi ïgai ïpï dai sai baika tasaikïdï gï duakatuda agai ïpamu.

²² Daidi go Piduru ïkobai busaitu go Suxi dai potïtïdai, —Cho, xadïrï po gï duñagi aapi gin Tïanïdamiga. Xadïrï dagitona Diuxi sai pogïduna ix dukatai aagai aapi— itïtïdai.

²³ Daidi go Suxi ajako kïkiba dai bhagakarai ïgai go Piduru daidi ikaiti, —Maigobai kïkiba aapi Diabora— ikaiti. —Totoropiadan dukai ibuayi aapi Piduru adaimïitai aapi tami oidigi daama óídakami tïgibudadï dai mai oiditai aapi Diuxi tïgibudadï— itïtïdai.

Suxi aagai ixdukatai gï agai xi óídakagi mamaatïrdamigadï

²⁴ Daidi bhodïrï Suxi potïtïdai mamaatïrdamigadï, —Gïn aagidamu aanï ix dukatai gï agai xi ibuadagi odami ix makïdï ipïrhiadagi saidi ïr gin mamaatïrdamigakagi. Gï agai xi dagitoagi ïgai ïïgi tïgibudadï. Ka maiti gï agai xi ibuadagi ïgai ïïgi ixtumaxi ipïrhiadagi ïgai tudu. Xorai gin oijada ïrhiada gï agai bhaiyoma xi bïïx tasai kusukan dukai imïdagi go kuruxi ixtukïdï gï muatuda aagai ïgai. Gobai itïiya ïrhidi sai gï agai xi bïïx tasai bhai gï dukagi ïgai ix soimaaxi taatagi dai asta sai gï muatudagi gin oiditai. Aidï gia bhaigakamu ïgai xi gin oijadagi daidi ïr gin mamaatïrdamigakagi. Ïma dukai gia cho— itïtïdai.

²⁵ —Dai aanï aagai sai xorai maiti ipïrhiadagi ix gin oijadagi po ïrhiditai sai jaa mua antaada, ïgai mai kïïgakïrï oidaka agai. Dïï gia xorai mai buamï ïrhiadagi ïïgi dai gin oijadagi tomaxi mua ïrhiadagi jaa ïgai gia kïïgakïrï oidaka agai.

²⁶ Daiñi, xi ïmo odami tuidadïkagi bïïxi go oidigi dïï gia ix mukiagi ïgai dai ix taatagi go gïgïbidaragai bïïxkïrï bïïtarï aidï gia, ¿Tumaxi ïr soiñika agai ïgai bïïtarï bïïxi gobai ix makïdï biakatadai ïgai? Xadïrï ixtutuidiña ïgai xi aa namïidagi Diuxi sai mai maakana gïgïbidaragai tudu tomaxi maakadagi xïïxi biakagi ïgai— itïtïdai.

²⁷ —Gï agai sai maatïkagi aapimï tudu sai imimu aanï tami oidigi daamaiñdïrï dïï gia ayimu ixtuigako dibiamu aanï ïpamu. Aanï ix makïdï ïr otosadï Diuxi dai ïmo kïïrhi busai tudu. Dibiamu aanï gubukarhigadïkïdï gin Oga dai gin oijadamu tïtïañikarudï Diuxi. Dai dibiakai maakimu aanï bïïxi óídakami ixtumaxi ajïakagi ïgai nïiditai aanï ixtumaxi idui ïgai tami oidigi daama. Ïïmoko maakimu aanï bhai ïrhiaragai dai jaa maakimu aanï gïgïbidaragai.

²⁸ Dai aanï aagai sai ïïmadutai aapimï ix makïdï tami daraka xibi mai kia koimu xi gin nïijadamu aapimï xudu dibiagi aanï. Gin nïijadamu ix dibiamu aanï gatïanïda iñagaitai aanï ix makïdï ïr otosadï Diuxi dai ïmo kïïrhi busai tudu— itïtïdai.