Mataibo 14 - Northern Tepehuan Bible

Gï muatu go Juan ix makïdï bapakonadami aagaiña odami

¹ Aidïpïrï go Herodes ïr reykatadai Galilea munisipioana. Dai kajioma ïgai saidi Suxi ibuadana naana maaxi maaxidaragai.

² Daidi go Herodes potïtïdai go pipioñigadï, —Gobai ix makïdï Suxi aagaiña odami gobai ïr go Juan ïrhi aanï. Gï duakatu ïpamu ïrhi aanï go Juan dai kaxkïdï bia ïgai gubukarhigai daidi ibuayi naana maaxi maaxidaragai— itïtïdai Herodes go pipioñigadï.

³ Go Herodes ka ïïkioñdïrï aidïxi kia oidakatadai go Juan gatïjaitadai mïsai bhïna ïgai dai sai burana kadenakïdï dai sai maixana. Ïmo oki Erodiaxi tïgidukami ïr duñidï gobai. Go oki ïgai ïr oñigadïkatadai Pirhi ix makïdï ïr sukurhidï go rey Herodes. Dai go rey gaïïxiditadai dai ïmadï bitadai go oñigadï go sukurhidï. Ïmadï bitadai ïgai go Erodiaxi tudu.

⁴ Dai aidïxi gaïïxi ïgai aidï go Juan kia oidakatadai daidi potïtïdai ïgai go rey aidï, —Maiti ïr sïïrhi xi oñigadï gï sukurhi ïmadï dakagi aapi— itïtïdai.

⁵ Dai kaxkïdï go rey mua ïrhiditadai go Juan dïï duadikoitadai ïgai ixtumaxi iduñagi go odami. Go odami kïïga xadutudaiña go Juan kaxkïdï. Maatïkatadai go odami saidi go Juan ïr ïmo ñokituldiadamigadï Diuxi tudu. Dai kaxkïdï duadikoitadai go rey ix muagi.

⁶ Dïï gia gokiïrï ayi tasagadï go rey Herodes dai idui ïgai ïmo bagimi. Dai ïmo arhi oki gatudai ami bagimiana. Maradï ïgai go oki Erodiaxi ix makïdï ïmadï dakatadai go rey. Daidi go rey ïmadï go gaa ix makïdï ami bagimiana darakatadai ojoida tïï go arhi oki.

⁷ Xi kaxkïdï go Rey potïtïdai go arhi oki, —Gin tañiñi pïx tumaxi aapi ipïrhiadagi nai aanï gï maakimu. Gin bapasai aanï tudu saidi gï maakiagi aanï ixtumaxi gin taañiagi aapi tomaxi gin táí asta tajukami go dïbïrai ix makïdï tïanïi aanï— itïtïdai ojoida nïiditai ïgai go arhi oki.

⁸ Daidi dïïdï go arhi oki aagidi sai taanïna ïgai Juan modï. Baidi go arhi oki potïtïdai go rey, —Ipïrhidi aanï sai xibi otoma gin maakiagi aapi go Juan modï ïmo asokorhiana— itïtïdai.

⁹ Daidi go rey sïïrhikïdï soi gï ïrhi. Dïï kaxi gï baitadai ïgai buidïrï go bapaidadї dai kaxkïdï biakatadai ix maakiagi.

^10-11 Daidi otoi ïgai ïmo sandaru sai imïna mïï maixakaruana dai sai mïï guikutana modï. Dai aagidi ïgai ïpï sai buapana ïgai modï ïmo asokorhiïrï dai sai tïïgidana go arhi oki. Po dui go sandaru tudu ix dukai aagidi go rey. Maa ïgai go arhi oki Juan modï bai ïgai tïïgi dïïdï.

¹² Dai go mamaatïrdamigadï Juan máí ix kaxi gï muatu ïgai dai mïï bhïiyi tukugadï dai yaasa. Dai bhodïrï iji ïgai dai mïï aagidi Suxi.

Bhibhidi Suxi taama mirhi odami oidigana xako mai tipukatadai ixtuma ugiagi

¹³ Dai iji go mamaatïrdamigadï go Juankaru xako daja Suxi dai aagidi sai gï muatu go Juan. Daidi bhodïrï tïsai go Suxi ïmo barkoana dai jii xako ïgiga oidigi ïïgi daka ïrhiditai. Dïï gia go odami máí xako imi agai ïgai dai taatarakïdï iji aipadïrï go gïgïr kiikiañdïrï dai mïï ayi xako imi agai go Suxi.

¹⁴ Dai aidïxi tïbai go Suxi barkoañdïrï kïïga mui odami ka darakatadai ami dai Suxi duduadi ix makïdï kokokoñikatadai soi gï ïldakai tïïgakai ïgai.

¹⁵ Dai bhodïrï ka uruñimitadai oidigi bai Suxi mamaatïrdamigadï mïï aagidi go Suxi daidi potïtïdai, —Arhi ïgiga oidigi tami dai ka urui. Otosamudai aapi go odami sai mïïka sabïdana ixtuma ugiagi nobai go aarhi kiikiana ix makïdï bamioma miaga. Tami oidigana mai tipu ixtuma ugiagi tudu— itïtïdai.

¹⁶ Daidi Suxi potïtïdai, —Maiti gï agai xi maigobai iimiagi ïgai. Bhibhidabïrai aapimï bhaiyoma— itïtïdai.

¹⁷ Dai go mamaatïrdamigadï potïtïdai, —Mosïkaxi bia aatïmï taama pan dai goka batopa— itïtïdai.

¹⁸ Daidi Suxi potïtïdai, —Bhai bhïiyi gobai tudu— itïtïdai.

¹⁹ Dai bhodïrï aagidi ïgai go odami sai daraibana basoi saagida. Dai bhïiyi ïgai go taama pan dai goka batopa dai taiyakoga nïnïaba tïbagiamakoga daidi itïtïdai ïgai Diuxi sai bhai gï ïrhidi ïgai go kuadagaikïdï. Dai bhodïrï saasarai ïgai go pan daidi maa ïgai go mamaatïrdami bai takogi ïgai go odami.

²⁰ Dai kïïga uu go odami dai bïïxkatai kïïga tataxkobai. Dai ka kïïga ugakai go odami ïmpagi ïgai bhaibuxtama dan goka asarai susudakami saasakigadï go pan dai batopa ix makïdï bitadai.

²¹ Daidi taama mirhikatadai ix makïdï ami darakatadai go ïï kïkïïrhi dai ïkobïrakoga darakatadai mui oki dai aarhi ïpï.

Suxi kïixapaitai jii sudagi daama

²² Dai bhodïrï ka ugakai go odami sai Suxi otoma aagidi mamaatïrdamigadï sai tïtïidïna ïgai barkoana dai aagidi sai bhaitï iimïna dai aïna baasadïrï go gïï sudagi. Dai iji ïgai baidi Suxi amaxi bii kia daidi diosaida agai go odami.

²³ Dai bhodïrï tïsai go Suxi ïmo tubidakana xako ïgiga dai ami gaataga agai Ogadï ïmadï. Kia tubidakïrï dakatadai Suxi bai ka didiaymitadai oidigi.

²⁴ Dai go mamaatïrdamigadï ka ïrana ïxi imïi go gïï sudagi barkoïrï. Daidi kabami ïbïraitadai ami dai aipako nïituskïitadai gobai go barko sudagi ïrana imïitai gobai.

²⁵ Daidi xarhimodï kia kabami ïbïraitadai bai Suxi jii sudagi daama tarakïdï imïitai dai ayi xako ukami imïitadai go barko.

²⁶ Daidi go mamaatïrdamigadï tïïgakai sai sudagi daama iimïi ïgai kabami duduadimu daidi ikaiti, —Ïmo sïiñarhi ïrhi aanï gobai— ikaiti.

²⁷ Dïï gia Suxi potïtïdai, —Gïn kabakadabïrai go duadimudagai buidïrï gin aaduñi. Aanï an ïr Suxi. Maiti abïr duduadikuda tudu— itïtïdai.

²⁸ Daidi go Piduru potïtïdai aidï, —Ix buaboikïdï ïr go Tïanïdami aapi aidï gia gin aagidañi ix imia aanï sudagi daama dai amïka gï ajiagi— itïtïdai.

²⁹ —Gimi tudu— itïtïdai Suxi. Daidi busai go Piduru go barkoañdïrï dai aimïraitadai sudagi daama dai mïï buidïrï aji agai Suxi.

³⁰ Kïïga imïitadai ïgai tudu, dïï gia ka imïitai nïidi ïgai xïï kabami ïbïrai dai xïï kabami oiñïi go sudagi dai duadimu ïgai dai ka dupimitadai. Dai gïgïr ño ïgai aidï daidi potïtïdai ïgai go Suxi, —Gin Tïanïdamiga, kïïgakïrï gin busaida— itïtïdai duadimukatai.

³¹ Dai Suxi otoma bhïiyi daidi potïtïdai, —Sïïrhikïdï mai gubuakami dukai gin buaboitudai aapi— itïtïdai. —¿Tuipïxi mai kïïga gin buaboitudai tudu?— itïtïdai.

³² Dai bhodïrï tïtïsai ïgai barkoana dai mos tïtïsai ïgai baidi gï ïpitu go ïbïrhi.

³³ Daidi bïïxkatai ix makïdï barkoïrï iimïitadai aagidi xadutudaragai ñoki Suxi nïiditai ix dukatai pogïduitadai. Daidi ikaiti ïgai, —Aa gia ïr buaboi saidi ïr Diuxi Maradï aapi— itïtïdai ïgai bïïxkatai.

³⁴ Daidi gokiïrï ka dïgabunukai ïgai baasadïrï go gïï sudagi sai ayi ïgai xako Genesaret tïgidu oidigi.

³⁵ Dai mos aïkai go Suxi ami saidi go óídakami otoma máí xorai ïgai dai otoma aipakoga otoi ñoki ami munisipioana sai maatïkana go odami sai ami daja Suxi. Dai aipadïrï bua ïgai ix makïdï kokokoñikatadai.

³⁶ Daidi gataanïiña ïgai oigaragai sai dagitona Suxi ix mos baasaradï ugidïrï taatana ïgai. Dai bïïxkatai ix makïdï taata yukuxidï duduadixikami bii.